“Vakasaqara Vakagumatua O na Qai Kunea,” Liaona, Janu. 2024.
Vakasaqara Vakagumatua O na Qai Kunea
Na Turaga sa vakatakila oti na sala eda rawa ni vakasaqara kina na dina kei na veidusimaki ki na noda bula.
Ena gauna keirau lesu tale kina ki vale e Brazil kei na watiqu, o Regina, ni oti na veiqaravi ena tabana ni kaulotu na Angola Luanda Mission mai na 2016 ki na 2019, e a tiko e dua na vakatulewa bibi me keirau cakava. Keirau a volitaka na neirau vale ni bera ni keirau lako i veiqaravi. Ni oti e dua na yabaki na neirau lesu ki vale, e a tiko na digidigi me keirau volia se rede-taka e dua na vale. Keirau na digitaka vakacava na ka e dodonu vei keirau?
Na mataqali vakatulewa vakaoqori e dua vei ira na vuqa na itavi, itaviqaravi, kei na lomaleqa ni bula e veisiga ka dau yacovi keda kece. So na gauna, era na rawa ni vakagolei keda tani mai na veivakalougatataki lagilagi kei na madigi ka solia duadua ga vei keda na kosipeli vakalesui mai i Jisu Karisito. Ena dela ni vuqa na veidinadinati kei na itavi eso, e rawa ni veibolei me kilai na veika dina se na vanua cava me da gole kina. Oqo e rawa ni vakavuna me da vakila vakasauri na noda bikai ena icolacola vakaitamera.
Eda vakavinavinaka, ni Tamada Vakalomalagi dauloloma e sega ni biuti keda taudua tu me da kila vakaikeda na cava e dina se na cava e dodonu me da cakava.
Na iVurevure ni Dina Kecega
Ni bera ni biuta na vuravura oqo na iVakabula, o Jisu Karisito, e a yalataka vei iratou na Nona tisaipeli ni na tala mai na Tamada na Dauveivakacegui, se na Yalo Tabu, me vakalougatataki iratou. Na Dauveivakacegui, a kaya o Jisu, “ena vakavulici kemudou ena ka kecega kau a vosataka vei kemudou” (Joni 14:26).
E dua na itavi bibi ni Yalo Tabu sa ikoya me dau vakatakila na ka dina (raica na Joni 16:13). Na Tamada Vakalomalagi sa ivurevure ni dina kece sa vakatakilai mai, se mai vei ira na parofita, daurairai, kei na dauvakatakila se vei keda yadua mai vua na Yalo Tabu. Ni da sasaga me tiko kei keda na Yalo Tabu, na Tamada Vakalomalagi ena dusimaki keda ena veigauna dredre duadua sara mada ga.
Kerekere, Vakasaqara, ka Tukituki
Baleta ni vinakata na Tamada Vakalomalagi me veivakauqeti, veivakavulici, veidusimaki, ka tarai keda cake, eda sa sureti me da “kerekere, ka na soli vei kemudou; vakasaqara, ka dou na kunea; dou tukituki, ka na dolavi vei kemudou” (Maciu 7:7; raica talega na Luke 11:9; 3 Nifai 14:7).
Ni rogoca o Nifai na vosa nei tamana, o Liai, me baleta na nona raivotu me baleta na vunikau ni bula, a kaya o Nifai ni “sa gadreva talega me’u raica, ka rogoca, ka kila na veika oqo, ena kaukauwa ni Yalo Tabu, na isolisoli ni Kalou vei ira kecega era sa vakasaqarai koya matua” (1 Nifai 10:17).
Na vakasaqarai ni dina e gadrevi kina na gugumatua. Ni da gugumatua, eda na sasaga tikoga e veigauna, ena yalodina, ena kena kaukauwa me da kila na dina kei na loma ni Turaga me baleta na noda bula. Na gugumatua ena vakasaqarai ni dina mai vua na Turaga e vakavolekataki keda vei Koya ena veituvaki kece sara ni noda bula.
A vulica taumada ena nona bula na Parofita o Josefa Simici ni dua vei ira na sala mana duadua me kunei kina na dina oya me vakasaqarai ena yalodina na isau ni taro (raica na Josefa Simici—Ai Tukutuku 1:10, 18). Eda na taroga beka na vei taro oqo ni da vakasaqara tiko na dina. Na isaunitaro e solia e dua na ivakarau ka rawa ni da vakamuria me yaco me da kila kina na dina.
O Cei Me Da Goleva Me Da Kunea Kina na Dina?
Ena itinitini ni iVola i Momani, a sureti ira na tamata kecega o Moronai na parofita me ra kerea vua na Kalou ena yalodina, ena lomadra taucoko, kei na vakabauta na Karisito, “kevaka era sega ni dina na veika oqo.” E vakadinadinataka o Moronai ni Kalou “ena vakatakila vei kemudou na dina [ni iVola i Momani], ena kaukauwa ni Yalo Tabu. Ia ena kaukauwa ni Yalo Tabu dou na kila kina na dina ni veika kecega” (Moronai 10:4–5).
Na Kalou, na Tamada Tawamudu, sa vakarautaka tu e dua na sala rawarawa me ra rawa ni ra kerei Koya kina na luvena (raica na Jemesa 1:5) ka toro voleka Vua e veisiga, ena vei auwa—ena veigauna kece sara. Na sala rawarawa ka mana oqo sa ikoya na masu.
Na ivakavuvuli nei Alama vei luvena o Ilamani sa baleti keda taucoko: “Mo tagi vua na Kalou me vukei iko ena ka kecega.” Ena “nomu cakacaka kecega … na nomu sala kecega … ia mo vagolea vua na Turaga na nomu vakanananu kecega, io, mo daulomana tiko ga na Turaga ka sega ni mudu” (Alama 37:36). A vakavulica talega o Alama, “ Mo vakarorogotaka vua na Turaga na ka kecega ko kitaka, ia ena dusimaki iko ena veika vinaka ko koya” (Alama 37:37). Eda sega ni gadreva e dua na gauna vakatabakidua se vanua me da masu kina. E dina ni da na sega beka ni rawa ni masu i cake e veigauna, ia ena rawa ni da dau masu e yaloda (raica na Alama 34:27).
Na isau ni noda masu ena sega beka ni vaka na ka eda namaka. Ena so na gauna, ena veisaqasaqa beka kei na noda lewa. Na noda masu e rawa talega ni taura e dua na gauna balavu me saumi mai ka veicalati kei na noda gagadre. Ena so na gauna ena vakilai ni vaka e sega ni ciqomi tiko e dua na isau ni masu. Ia na Tamada Vakalomalagi e kila vinaka tu na veika eda gadreva. Na Nona isaunitaro ena dau yaco me vinaka vei keda. Eda gadreva ga me da toso ki liu ena vakabauti Jisu Karisito. (Raica na Luke 11:9–13.)1
Sa vakaraitaka na noda iVakabula ka Dauveivueti ni da na sega ni torova rawa na Tamada Vakalomalagi vakavo ga ena Vukuna. “Oi au na sala, kei na vu ni dina, kei na vu ni bula,” a kaya o Jisu. “Sa sega ni torovi Tamaqu walega e dua na tamata, e na vukuqu ga” (Joni 14:6;). Oqo e kauta tani e dua na ka veisosomitaki, se veivakataotaki sara mada ga, ena noda veitaratara kei na Kalou. Oqo na vuna sa dau vakayacori kina na masu kece, vosa, ivakadinadina, kalasi, kei na vuqa tale na ka eda cakava—ena lotu, e vale kei na noda matavuvale, se vakai keda—ena yaca i Jisu Karisito.
Na Cava e Dodonu me Noda iValavala?
Me kunei na dina, e dodonu me da yalodina ka tiko vei keda na inaki dina. Ni da masuta na Tamada Vakalomalagi ena yalomalumalumu, eda sa soli keda me da cakacakataka na isaunitaro eda ciqoma ka vakarabailevutaka na noda rawa ni cakava vakina.
Na yalodina kei na inaki dina e tosoi keda me da cakava na veika e vinakata vei keda na Tamada Vakalomalagi, ka sega ni veika eda vinakata me da cakava. Eda vakaraitaka vakamatata vua na Tamada Vakalomalagi na noda nuitaki Koya ni da “talairawarawa, yalomalua, yalomalumalumu, dauvosota, sinai ena loloma, ka ciqoma na veika kece sa raica na Turaga ni dodonu [me da] sotava” (Mosaia 3:19). Ena ivakarau eso oqo, eda mai kila kina ka nuitaka ni na dau cakava tikoga na Tamada Vakalomalagi na veika e vinaka duadua vei keda.
iTaba mai vei Lee Michael Ragsdale
Ena Yaco Mai Vakacava na iSaunitaro?
Ena vakatulewa me voli se rede-taki e dua na vale, keirau a masu kei watiqu, vakasamataka vakatitobu, ka veitalanoataka sara vakalevu. Oti, sa qai yaco mai ena neirau vakasama kei na lomai keirau ni dodonu me sa kakua ni keirau voli vale. Keirau a muria ena vakabauta me vaka na isau ni masu keirau a ciqoma, ka keirau sega ni kila se cava ena vakarau yaco ena neirau bula.
Ni oti toka e 18 na vula, ena Epereli ni 2022, au a kacivi me‘u Vakaitutu Raraba ni Vitusagavulu. Ni oti na koniferedi raraba ni Epereli 2022, e a vo walega e tolu na macawa me keirau sa biubiu mai Brazil ena imatai ni neirau ilesilesi. Na tiko ena dua na vale rede-taki ena gauna oya a vakarawarawataka vakalevu sara na toso. Nikua, keirau sa raica vakamatata sara kei Regina ni a dusimaki keirau na Turaga ena neirau vakatulewa.
A ciqoma talega o Nifai me vaka na nona gagadre. Ena nona vakasaqara vakagumatua na dina ka vakabauta ka nuitaka ni na vakatakila vua na Tamada Vakalomalagi na dina, a vakalougatataki o Nifai me raica na veika a raica o tamana. A raica na vunikau ni bula, ka matataka na loloma ni Kalou—na loloma “ka sa gadrevi vakalevu duadua mai vei ira na ka kecega” ka “sa ka rekitaki duadua ki na yalo” (1 Nifai 11: 22, 23).
Na Tamada Vakalomalagi sa vakatakila na dina ka sa vakarautaki tu vei ira taucoko na Luvena, mai vua na Yalo Tabu. A vakatakila na Turaga mai vua na Parofita o Josefa Simici ni Yalo Tabu ena rawa ni vosa ki na noda vakasama kei na yaloda (raica na Vunau kei na Veiyalayalati 8:2), “ka tara … na [lomada]” (Vunau kei na Veiyalayalati 128:1), ka vakavuna me “katakata na [lomada]” (Vunau kei na Veiyalayalati 9:8), vakasinaiti na yaloda ena reki, vakararamataka na noda vakasama, se vakaceguya na lomada e rarawa tu (raica na Vunau kei na Veiyalayalati 11:13; 6:14–15, 22–23).
Au vakadinadinataka ni dina ni Kalou e kauta tani na vakatitiqa kei na rere ka vakaqaqacotaka na noda ivakadinadina. Au kaya vata kei Nifai, “Ia ko koya sa vakasaqara matua ena kunea” (1 Nifai 10:19). Ena vakatakila na Kalou na dina kevaka eda vakasaqara vakagumatua, ni o Koya “sa saumi ira talega era sa dauvakasaqarai koya” (Iperiu 11:6). Ka na vakayacora vakamatata sara o Koya me na sega ni vakatitiqataki kina ni Ligana e dau dusimaka na noda bula.