“Na Volanikalou i Sami,” iTokani, Janu. 2024, 10–11.
Na Volanikalou i Sami
A vinakata talega o Sami me wiliwili.
Na italanoa oqo a yaco mai Bolivia.
A vakasausau o Papi ni cava na lotu vakamatavuvale. “E tiko e dua na vakasama me baleta e dua na takete ni matavuvale,” e kaya o koya. “Tou wiliwili mai na iVola ni Momani e veisiga.”
Erau a deduvata na tuakai Sami, o Andrés kei Juan, ena dua na matadredredre levu ena vakasama oya.
“Sa donu!” tukuna o Andrés.
Sa marau talega o Sami. Ia a qai nanuma e dua na ka. A laveta cake na ligana. “Au sega ni kila na wilivola. E rawa vakacava meu veivuke?”
A yavalata o Juan na tabana. “E rawa ga ni o vakarorogo.”
E ratou sa kila oti tu na tuakai Sami na wilivola. Ia o Sami e se qai yabaki lima. E se bera ni vulica me wilivola.
“Ia au via veivuke talega!” A kaya o Sami ena dua na mata cudrucudru.
A mokoti Sami o Mamá. “O na qai rawata,” e kaya o koya. “Sa dau tiko ga e dua na sala me da cakava kina na veika sa vakarota vei keda na Kalou.”
Ena bogi ka tarava, eratou a soqoni vata na matavuvale nei Sami me ratou wilika na iVola i Momani. Era sa dui kauta ga mai na nodra dui ivolanikalou, vakavo ga ko Sami. A solia vua o Mamá e dua na iyaloyalo ni italanoa ni iVola i Momani.
“O sega ni rawa ni wilika na vosa. Ia e rawa nio wilika na iyaloyalo,” a kaya ena matadredredre.
A taura toka vakavoleka o Sami na ivola. Sa rawa talega vua me wilika vata kei na nona matavuvale!
Eratou a veivukevuke ena wiliwili. A raica na iyaloyalo o Sami ka vakaraitaka na italanoa. Ni sa nona gauna, a tukuna na veika a raica ena iyaloyalo. E tukuna o koya na levu ga ni veika matailalai e rawata.
Ni sa toso na gauna, sa vinakata o Sami me wiliwili vakalevu cake. A vakavulica vua o Mamá na rorogo ni matanivola yadua. A qai vakaraitaka vua na sala me vakarogoya kina na vosa. Ni oti e vica na vula, a sega ni gadreva sara vakalevu o Sami na ivola ni iyaloyalo. Ia, a wilika na iotioti ni vosa ni veitikina yadua e wilika na nona matavuvale. A wilika taumada o Mamá na vosa, ka kaya lesu mai o Sami.
Taumada, era a wiliwili vakamalua. A taura e dua na gauna balavu na kena rawati na itinitini ni wase yadua. Sa vuturi ko Andrés kei Juan ni sa nona gauna o Sami. Ia era se wiliwili tikoga vakamatavuvale.
Vakalalai tiko, a wilika o Sami eso tale na ka. A wilika e dua na vosa mai na dua na tikina, qai rua na vosa, qai tolu. Sa qai tekivu wilika taucoko o koya e dua na tikina!
Ni sa voleka ni cava na nodrau takete, sa rawa vei Sami me wilika ga vakai koya e vica na tikina. Sa vinaka cake sara na nona wiliwili. Sa tubu talega na nona taleitaka na iVola i Momani.
Ni sa oti, a vakacavara na matavuvale nei Sami na iVola i Momani. A taura e rua na yabaki! Oqo sa yabaki vitu ko Sami, ka sa vulica me wilika vakavinaka sara.
“Vakanuinui Vinaka!” Tukuna o Papi. “Tou sa rawata”
E marau vata kei na nona matavuvale o Sami. Sa vukei ratou o koya me ratou vakacavara na iVola i Momani!
A mokoti Sami o Juan. “Na cava na nomu lalawa ena rua na yabaki ka tarava?”
E dredre o Sami. A tucake balavu ka kaya, “Au na wilika tale na iVola i Momani!”
Droini mai vei Melissa Manwill Kashiwagi