“Na Soqo Uasivi nei Papa,” iTokani, Janu. 2024, 18–19.
Na Soqo Uasivi nei Papa
Vakacava ke sega ni mudu na uca?
A yaco na italanoa oqo e Samoa.
Butobuto, era lili tu e lomalagi na o loaloa. A raici ira o Alex.
BOOM!
Rogo levu mai na cava. Taubi na uca e veivanua kece.
Sa kurea na uluna o Alex. E sega ni vinaka. Sega ni vinaka saraga. Ena so na gauna, mai Samoa, e rawa ni tau na uca me vica na siga ka sega ni cegu. Ia a vinakata me vinaka na siga ni nona siganisucu o tukana!
A gole kina nona rumu o Alex ka tekiduru ena yasa ni nona idavodavo.
“Tamaqu Vakalomalagi lomani,” a kaya o koya. “Yalovinaka cakava me lako tani na uca ena siganisucu nei Papa ni mataka. E sa vakau oti na veisureti. Ena yacai Jisu Karisito, emeni.”
Ni tucake o Alex, a raici Na kei Ta ni rau tucake tu ena nona katuba. Rau matadredre tu.
“Vosota, keirau rogoca na nomu masu,” a kaya o Na.
A matadredredre o Alex. Sa okoya. Au vinakata ga me siga vinaka na nona siga o Papa. Ena sega ni tautauvata kevaka eda na tiko e lomanivale. E sega na vanua me keirau danisi kina!”
A boboka na tabai Alex o tamana. “Se cava ga na ituvaki ni draki, ena kila o Papa na levu ni nomu lomani koya.”
Ena mataka ka tarava, erau a kerei Alex o Na kei Ta me rau cabora na masu vakamatavuvale. Se tau toka ga na uca. Ka se sega tikoga ni vaka ena mudu.
“Yalovinaka tarova na uca me lako tani ena gauna ni soqo,” e kaya o koya. “Kau kerea me keimami na marautaka vata kece na soqo oqo. Vakabibi o Papa!”
A raica toka o Alex na lomalagi ena mataka taucoko. E dua na gauna balavu, e sega ni dua na ka e veisau. Ia qai yaco e dua na ka veivakurabuitaki.
“Raica!” A kaila o Alex. “E dua na vanua e karakarawa toka oya!” Eratou cici yani ki tautuba na nona matavuvale. Sa tekivu me seyavu yani na o.
Ena vica na auwa, era sa yali kece na o! O ira sara mada ga na soso ena qele era sa mamaca mai. A vakusakusa yani o Alex me ukutaka na matanivale. Era na tiko ena dua na gauna totolo o Papa kei ira na vo ni vulagi.
Ni yaco yani ki kea o Papa, a kurabui sara o koya. A raica na cina, na veidrigidrigi duiroka, kei ira kece na vulagi. “Sa totoka na veika kecel,” e kaya o koya. “Vinaka vakalevu sara.”
E yaco me marautaki na soqo me vaka e navuca o Alex. Era danisi ki na sere taleitaki nei Papa. E kana vinaka na kakana—vakauasivi na madrai niu kamica. Lagasere talega o Alex vata kei Papa.
Na tikina uasivi duadua, e dina ga ni sa kena gauna na Siva Taualuga. Na danisi oqo e dau vakayacora ga na tamata bibi duadua ena siga oya. Ka, oya o Papa!
A danisi o Papa, ia a qai raici Alex. “Mai tomani au, Alex!” A kaci o Papa. A rika cake o Alex ka danisi tikivi Papa. Sega ni dede era sa danisi kece talega na kena vo.
E kala sobu o Papa me mokoti Alex. “Au marautaka ni o vakademeni au nikua,” e kaya o Papa. “Sa totoka dina na soqoni ni siganisucu qo.”
Ni sa cava na soqo, a rai cake o Alex ki lomalagi. A lesu tale mai na o loaloa vavaku. Sa tekivu tavatuki sobu tale na uca. Ia ena gauna oqo, a sega ni kauwai kina o Alex. E kila o koya ni a vukea na Tamada Vakalomalagi na draki me vinaka tiko ga ki na nona soqo o Papa.
“Vinaka vakalevu na draki vinaka,” a masu o Alex. “Au vakavinavinaka ni dua na noqu Papa vinaka.”
iVakaraitaki mai vei Augusto Zambonato