Ko e Tokotaha Mahuʻinga Taha ʻi he Tohi ʻa Molomoná

ʻI he ngaahi taʻu lahi kuohilí, naʻe fakaafeʻi au ʻe he ongo tangata naʻe ngāue fakaetauhi mai kiate aú ke u ako fakamātoato ʻa e Tohi ʻa Molomoná. ʻI heʻena fakahoko mai ʻa e fakaafe ko ʻení, ne u fakatokangaʻi neongo ne u lau ha kiʻi meʻa siʻi mei he Tohi ʻa Molomoná ʻi he ʻaho takitaha, ka naʻe ʻikai ke u fuʻu ako fakamātoato ia.

Naʻá na vahevahe mai ha palōmesi kiate au naʻe fakatefito ia ʻi he ngaahi lea meia Palesiteni ʻEselā Tafu Penisoni: “ʻOku ʻi ai ha mālohi ʻi he [Tohi ʻa Molomoná] ʻe kamata ke tafe atu ki hoʻomou moʻuí ʻi he momeniti te ke kamata ai ke ako fakamātoato ʻa e tohí. Te ke maʻu ha mālohi lahi ange ke tekeʻi ʻa e ʻahiʻahí … ke afe mei he kākaá … ke nofo ʻi he hala lausiʻi mo fāsiʻí” (Ngaahi Akonaki ʻa e Kau Palesiteni ʻo e Siasí: Ezra Taft Benson [2014], 141).

Naʻá ku tali ʻena fakaafé, pea naʻá ku mamata ʻi he ngaahi māhina hono hokó naʻe hoko ʻena palōmesí. Kuó ne liliu ʻeku moʻuí.

Ko ha ʻuhinga mahuʻinga ʻoku ʻomi ai ʻe he Tohi ʻa Molomoná ha mālohi fakalaumālie kiate kitautolú ko ʻene fakamālohia hotau vā fetuʻutaki mo Sīsū Kalaisí. ʻI he fakamatala ʻa Palesiteni Henelī B. ʻAealingi ʻi he peesi 4, naʻá ne tohi ai ʻo pehē, “Ko kinautolu ʻoku nau lau fakamātoato ʻa e Tohi ʻa Molomoná, moʻui fakatatau mo hono ngaahi akonakí, pea lotua hono moʻoní, te nau ongoʻi ʻa e Laumālie Māʻoniʻoní mo fakatupulaki ʻenau tuí, mo e fakamoʻoni ki he Fakamoʻuí.”

Ko Sīsū Kalaisi ʻa e tokotaha mahuʻinga taha ʻi he Tohi ʻa Molomoná. ʻI heʻeku vahevahe mo hoku kaungā-faʻu tohi ko Metisoni Sinikeleá, ʻi heʻema tohi, “Ko Sīsū Kalaisi ʻi he Tohi ʻa Molomoná” (peesi 10), ʻoku ʻi ai ha ngaahi fakamoʻoni fakafolofola ʻe 7,000 tupu ki he Fakamoʻuí ʻi he Tohi ʻa Molomoná.

ʻOku ou ʻiloʻi ʻi heʻetau ako ʻa e Tohi ʻa Molomoná fakataha mo e Haʻu, ʻo Muimui ʻIate Aú ʻi he taʻu ní, te tau ʻunu ke ofi ange kia Sīsū Kalaisi.

ʻOfa atu,

Sione Hilitoni III

Palōfesa ʻo e Ako Fakalotú, ʻUnivēsiti Pilikihami ʻIongí