Fakaʻilekitulōnika Pē
Ko ha Palani Faingofua ki Heʻetau Fononga ki he Moʻui Fakafalala Pē Kiate Kitá
“Ko e moʻui fakafalala pē kiate kitá ko ha tokāteline ia ʻo e ongoongolelei ʻo Sīsū Kalaisí, ka ʻoku ʻikai ko ha polokalama.”1
Ko e fē ʻa e taimi fakamuimuitaha naʻá ke fekumi ai ʻi he faʻa lotu ki ha founga ke langaki hoʻo moʻui fakafalala pē kiate koé?
Ko e moʻui fakafalala pē kiate kitá “ko e malava, tukupā, mo e ngāue ke maʻu ʻa e ngaahi fiemaʻu fakalaumālie mo fakatuʻasino ʻo e moʻuí maʻata pea mo e fāmilí.”2 ʻOku mahuʻinga ia ʻi he palani ʻa e Tamai Hēvaní maʻatautolú koeʻuhí he ʻoku ʻaonga lahi ia ki heʻetau moʻuí. Pea hangē ko e lea ʻa Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí, “Ko e hā pē ha meʻa ʻokú ne ʻai ke tau fakafalala ki ha taha kehe ʻi he ngaahi fili pe ngaahi maʻuʻanga tokoni te tau lava ʻo tokonaki maʻatautolú, ʻokú ne fakavaivaiʻi fakalaumālie kitautolu mo fakatuaiʻi ʻetau tupulaki ki he meʻa ʻoku fakataumuʻa ʻa e palani ʻo e ongoongoleleí ke tau aʻusiá.”3 ʻOku ʻikai ʻuhinga ia he ʻikai ke tau teitei fiemaʻu ha tokoni, koeʻuhí ʻoku faʻa kau ʻi he moʻui fakafalala pē kiate kitá ʻa e tafoki ki he niʻihi kehé ʻi heʻetau tupulakí. Ka ʻoku kau ai ʻa e hokohoko atu ʻetau fakalakalaka ke tokonaki maʻatautolu ʻa e ngaahi meʻa ko ia te tau lavá.
ʻOku hoko ʻa e moʻui fakafalala pē kiate kitá ʻi he ʻotu lea ki he ʻotu lea (vakai, 2 Nīfai 28:30). Ko ha ngaahi fakakaukau faingofua ʻeni ʻe niʻihi ke tokoni ki hono fakamālohia ʻetau moʻui fakafalala pē kiate kitautolú.
Kamata ʻa e Fonongá
Kuo pau ke tau kamata kotoa (pe vivili atu ki muʻa!) mei ha feituʻu, pea ko e taimi lelei tahá ʻa e taimí ni. Naʻe akonaki ʻa Palesiteni Tieta F. ʻUkitofa, ʻi heʻene kei hoko ko e Tokoni Ua ʻi he Kau Palesitenisī ʻUluakí, ʻo pehē:
“ʻOku pehē ʻe ha palōveape motuʻa, ‘Ko e taimi lelei taha ke tō ai ha fuʻu ʻakaú ko e taʻu ʻe 20 kuo hilí. Ko e taimi lelei taha hono uá ko e taimí ni.’
“ʻOku ʻi ai ha faʻahinga meʻa fakaʻofoʻofa mo fakatupu ʻamanaki lelei fekauʻaki mo e foʻi lea ko e taimí ni. ʻOku ʻi ai ha faʻahinga meʻa fakatupu ivi lahi fekauʻaki mo e foʻi moʻoni ko iá kapau te tau fili ke fakapapauʻi ʻi he taimí ni, te tau lava ʻo ngaʻunu ki muʻa ʻi he momeniti pē ko ʻení.
“Ko e taimí ni ko e taimi lelei taha ia ke te kamata hoko ai ko e tokotaha ʻokú te fakaʻamu ki aí—ʻo ʻikai ʻi he taʻu ʻe 20 mei heni ka ʻi ʻitāniti kotoa foki.”4
ʻOku totonu ke tau fakakau mai ʻa e ʻOtuá mo e niʻihi kehe te nau lava ʻo tataki kitautolu ʻi heʻetau fonongá. Te tau lava ʻo fekumi ʻi he faʻa lotu ke ʻiloʻi ʻa e meʻa ʻoku fiemaʻu ke tau ngāue ki ai ke langaki hake ʻetau moʻui fakafalala pē kiate kitautolú. Hangē ko ʻení, te tau lava ʻo fai ha ngaahi meʻa hangē ko e:
-
“Tokangaʻi [ʻetau] fakamoʻoni kia Sīsū Kalaisí mo ʻEne ongoongoleleí,”5 ʻo hangē ko ia naʻe akoʻi mai ʻe Palesiteni Lāsolo M. Nalesoní.
-
Ako ke tui ha foʻi fakamaʻu ʻi ha sote.
-
Fokotuʻu ha patiseti pea muimui ki ai.
-
Akoʻi ha taukei fakangāue ki ha ngāue.
-
Ngaohi ha meʻatokoni lelei.
-
Ako ke fetongi ha foʻi vaʻe ʻo ha pasikala pe kā.
Te tau lava ʻo tuku ha taimi ke fekumi mo mahino kiate kitautolu ʻa e meʻa ʻoku tau loto ke faí pea fekumi ki he meʻa ʻoku finangalo ʻa e Tamai Hēvaní ke tau faí ʻi Heʻene poto ʻo ʻafioʻi ʻa e meʻa ʻoku lelei taha maʻatautolu takitahá. ʻE tokoniʻi kitautolu ʻi hano fokotuʻu ha ngaahi taumuʻa fakapotopoto ʻi he ngāue ko ʻení.
Hoko Atu ʻi he Faʻa Kātaki, pea Kātekina
ʻOku ʻikai ke aʻu leva ki he ngataʻangá ʻi he hili pē ʻa e laine kamatá. ʻOku fiemaʻu ha taimi lahi ki he fonongá. ʻOua naʻá ke loto-foʻi kapau ʻoku kiʻi lōloa pe fakaongosia ʻa e hala ki he moʻui fakafalala pē kiate kitá.
Naʻe pehē ʻe ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ko e moʻoni mahinongofua mo fakamātoato ko ia kimuʻa ʻi ha ngaahi momeniti maʻongoʻongá, pea kimuʻa ʻi ha ngaahi momeniti fakalaumālié, ʻe lava ke hoko mai ʻa e faingataʻá, fakafepakí mo e fakapoʻulí. ʻOku ʻi ai ha ngaahi taimi pehē ʻo e moʻuí maʻatautolu, pea ʻoku nau faʻa hoko mai ʻi he ʻamanaki ko ia ke tau fai ha fili mahuʻinga pe fakahoko ha sitepu mahuʻinga ʻi heʻetau moʻuí.”6
Kapau ʻoku tau fefaʻuhi mo e loto-foʻí, te tau lava ʻo kiʻi holomui. Fēfē nai kapau ʻe tukutaha pē ʻetau tokangá ʻi ha meʻa pē ʻe taha, kae ʻoua ʻe feinga ke fai leva ha fuʻu meʻa lahí? Mahalo ko ha founga ke fakatupulaki ai ʻetau taumuʻa taupotu tahá ko hono langaki ʻo e ivi matuʻuaki fakaelotó; ko hono ako ʻo e founga ke mapuleʻi ai ʻa e loto-mafasiá pe fakatupulaki ha vā fetuʻutaki lelei mo kitautolú te ne paotoloaki ʻetau fononga ki he moʻui fakafalala pē kiate kitá. Pe mahalo ko ʻetau taumuʻá ko e ako ke fetuʻutaki lelei ange mo e niʻihi kehe te nau lava ʻo tokoniʻi kitautolú.
Naʻe pehē ʻe Palesiteni Lāsolo M. Nalesoni: “ʻOku ʻikai fiemaʻu ke tau loto-foʻi ʻo kapau ʻoku ngali fakahela mo ʻikai toe ʻosi ʻetau feinga mālohi ki he haohaoá. ʻOku kei fakatatali ʻa e haohaoá. ʻE lava ke toki hoko kakato mai ia ʻi he hili pē ʻa e Toetuʻú pea fakafou pē ʻi he ʻEikí.”7 Ko ia ai, hokohoko atu pē. ʻOku malava ke ʻi ai ha tupulaki!
Fakafiefiaʻi ʻa e Lavameʻá
ʻOku tatau ai pē pe te tau fakakakato ha taumuʻa taimi lōloa pe ko ha kiʻi ikuna siʻisiʻi pē, ka ko ha ʻuhinga ia ke tau fiefia ai. Te tau lava ʻo laukau ʻaki ʻetau fakalakalaká mo ʻetau ngaahi lavameʻá. Kuo taimi ke fai hano fakafiefiaʻi!
ʻOku totonu ke tau manatuʻi ke fakamālō ki he Tamai Hēvaní (vakai, 1 Tesalonika 5:18; Mōsaia 26:39) mo e niʻihi kehe naʻa nau tokoniʻi kitautolu ke tau moʻui fakafalala lahi ange kiate kitautolú.
Fakalakalaka Maʻu Pē
Hili hono maʻu ʻo e lavameʻá, ko e hā ʻa e meʻa hokó?
Naʻe pehē ʻe ʻEletā Hiuko E. Mātini ʻo e Kau Fitungofulú:
“Ko e moʻui fakafalala pē kiate kitá ko ha tokāteline ia ʻo e ongoongolelei ʻo Sīsū Kalaisí, kae ʻikai ko ha polokalama. Ko ha founga ngāue ia ʻoku tuʻuloa, ʻikai ke fakahoko tuʻo taha pē.
“ʻOku tau moʻui fakafalala pē kiate kitautolu ʻi hono kotoa ʻo ʻetau moʻuí ʻaki ʻetau tupulaki ʻi he mālohi fakalaumālié, fakatuʻasinó mo e moʻui lelei fakaelotó, hokohoko atu ʻetau akó mo e ngāue maʻuʻanga moʻuí, pea mo mateuteu fakatuʻasino [vakai, Tohi Tuʻutuʻuni Fakakātoá, 22.1]. ʻE toe ngata koā ʻa e ngāué ni lolotonga ʻetau moʻuí? ʻIkai, ko ha founga ngāue ia ʻo e ako, tupulaki, mo e ngāue ʻi he kotoa ʻo e moʻuí. ʻOku ʻikai ke toe ʻosi ia; ko ha ngāue ʻoku hokohoko atu pē, pea ʻoku fakahoko fakaʻaho.”8
ʻI he hokohoko atu ʻetau tupulakí, ʻe tāpuekina kitautolu mo e kau mēmipa hotau fāmilí ʻaki ha tui, mālohi, mo e fakaʻapaʻapaʻi lahi ange kita. Pea ʻi heʻene fuʻu lahi ko ia ʻetau moʻui fakafalala pē kiate kitautolú, te tau lava leva ʻo tokoniʻi ʻa e niʻihi kehé ke nau fai mo e meʻa tatau.