“Ko ha ʻTokotaha ʻIkai Tukupā Kakatoʼ Nai Au pe ko ha ʻTokotaha Tukupā Kakatoʼ?,” Liahona, Sānuali 2024.
Haʻu, ʻo Muimui ʻIate Au
Ko ha “Tokotaha ʻIkai Tukupā Kakato” Nai Au pe ko ha “Tokotaha Tukupā Kakato”?
ʻI he misi ʻa Līhai ki he ʻakau ʻo e moʻuí (vakai, 1 Nīfai 8), ʻokú ke pehē ko e hā hono ʻuhinga naʻe mavahe ai ha kakai ʻe niʻihi mei he fuʻu ʻakaú kae nofo ha niʻihi ʻi he fuʻu ʻakaú ke kai ʻi he fuá? Naʻe hē atu ha niʻihi ʻo e kakai naʻa nau kai ʻi he fuaʻi ʻakaú, ʻo nau mā ʻi he fuʻu kakai naʻa nau lumaʻi kinautolu mei he fuʻu fale lahi mo ʻataʻataá. Ko e faikehekehe mahuʻinga ʻe taha ʻi he ngaahi kulupu ko iá ʻoku fekauʻaki ia mo e meʻa ne nau fai kimuʻa pea nau aʻu ki aí: founga ne nau piki ʻaki ki he vaʻa ukameá—ʻa e folofola ʻa e ʻOtuá.
Pīkitai pe Piki Maʻu Maʻu Ai Pē
Naʻe mamata ʻa Līhai kiate kinautolu naʻe “vivili mai … [ʻo] pīkitai pē ki he vaʻa ukameá” mo kinautolu ne “vivili atu ʻi honau halá ʻo piki maʻu maʻu ai pē ki he vaʻa ukameá” (1 Nīfai 8:24, 30; tānaki atu hono fakamamafaʻí).
Naʻe fakamatalaʻi ʻe Eletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá naʻe kamata ha kulupu ʻe tolu ʻi he halá, ka ko e kulupu pē ʻe ua naʻa nau piki ki he vaʻa ukameá:
“[Naʻe] toe maʻu foki [ʻe he kulupu hono uá] mo ha tāpuaki makehe ʻo e vaʻa ukameá, pea naʻa nau pīkitai ki ai! … ʻOku talamai kiate au ʻe he piki pē ki he vaʻa ukameá ʻa e tātāitaha pē ʻa e ʻmāfanaʼ ke akó pe fai fakamuʻomuʻa nima pē kae ʻikai ke hokohoko fakaʻutumauku he folofola ʻa e ʻOtuá. …
“Naʻe vilitaki atu foki mo e kulupu hono tolú ʻi he tui mo e loto fakapapau; neongo iá, ʻoku ʻikai ha fakamatala te ne fakahaaʻi mai naʻa nau hē mei he halá. … Mahalo pē ko e falukunga kakai hono tolu ko ʻení naʻe toutoulau moako mofekumi ki he folofolá. … Ko e kulupu ʻeni ʻoku totonu ke tau feinga ke kau ki aí.”1
ʻOku tau hoko nai ko ha “kakai ʻikai tukupā kakato” pe “kakai tukupā kakato” ʻi heʻetau aʻusia ʻa e folofola ʻa e ʻOtuá? Neongo ʻoku fakahoko ʻe he niʻihi ʻoku ʻikai tukupā kakató mo e tukupā kakató ha ngāue, ka ʻoku lahi mo pau ange ʻa e ngaahi aʻusia ʻoku toutou hoko ki he kakai tukupā kakató ʻa ia te ne lava ʻo ʻomi ʻa e fiefia maʻu peé.