“Ko Hono Maʻu ʻa e Maama ʻo e Fakamoʻuí ʻi he Tohi ʻa Molomoná,” Liahona, Sānuali 2024.
Maʻá e Ngaahi Mātuʻá
Ko Hono Maʻu ʻa e Maama ʻo e Fakamoʻuí ʻi he Tohi ʻa Molomoná
Siʻi Ngaahi Mātuʻa,
ʻOku ʻomi ʻe he makasini ʻo e māhina ní ha ngaahi fakakaukau fekauʻaki mo e Tohi ʻa Molomoná ko e naunau fakalēsoni ʻo e Haʻu, ʻo Muimui ʻIate Aú ki he 2024. ʻOku aleaʻi ʻe he ngaahi fakamatala ʻi laló ʻa e ngaahi kī ki hono maʻu ʻo e māmá mo e moʻoní ʻi ha māmani ʻoku faʻa fonu ʻi he fakapoʻulí mo e puputuʻú.
Ngaahi Fealēleaʻaki ʻi he Ongoongoleleí
Fekumi ki he Maama ʻo e Fakamoʻuí
Fakakaukau ke vahevahe mo ho fāmilí ha ngaahi fakakaukau mei he fakamatala ʻa Palesiteni ʻAealingi ʻi he peesi 4, pea aleaʻi ʻa e fatongia ʻo e maama ko iá ʻi heʻetau moʻuí. Toe vakaiʻi ʻa e talanoa ʻa Kamilini fekauʻaki mo hono maʻu ʻo e Fakamoʻuí ʻi he fakapoʻulí. ʻE maʻu fēfē ʻe hoʻomou fāmilí ʻa e maama ʻo e Fakamoʻuí ʻi hoʻomou ako ʻa e Tohi ʻa Molomoná ʻi he taʻu ní?
Feituʻu ke Fekumi ai ki he Moʻoní
Ko e ʻOtuá ʻa e tupuʻanga ʻo e moʻoni kotoa pē, pea te tau lava ʻo ako ʻEne moʻoní ʻi he fekumi faivelenga ki aí. Naʻe fiemaʻu ke fili ʻe ʻEletā mo Sisitā Siliva ʻa e feituʻu ke na nofo ai hili ʻena foki mai mei he ngāue fakafaifekaú, ko ia naʻá na fekumi ki ha fakahinohino mei he ʻEikí (vakai, peesi 20). Ko e fē ha taimi kuo ʻoatu ai ʻe he ʻEikí ʻa e fakahinohino naʻá ke fiemaʻú?
Vakai lahi ange ʻi Hoʻo Ako ʻa e Ongoongoleleí
ʻI he taimi ʻoku faʻa ʻaʻahi ai ʻa e kakaí ki ha musiume ʻātí, ʻoku nau faʻa fakavavevave ke sio ki he meʻa kotoa pē te nau lavá, ʻo tupu ai ha mole meiate kinautolu ʻa e fakaʻofoʻofa ʻo e ʻātí. Ko e meʻa tatau pē, ʻe ala mole mei he kau laukonga ʻo e Tohi ʻa Molomoná ha ngaahi moʻoni mahuʻinga kapau te nau fakavavevave ʻi he laukongá. Ko e hā ha ngaahi founga ʻe lava ʻo tokoni ke tau vakai fakalelei ai ki he tohi folofola ko ʻení? Vakai ki he peesi 12 ki ha ngaahi fakakaukau.
Fiefia Fakafāmili ʻi he Haʻu, ʻo Muimui ʻIate Aú
Ko e Hala Fāsi‘i mo Lausiʻí
Ko hono kai ʻa e fua ʻo e ʻakau ʻo e moʻuí ko ha fakataipe ia ʻo e fili ki he moʻui taʻengatá ʻo fakafou ʻia Sīsū Kalaisi (vakai, 1 Nīfai 15:36; Tokāteline mo e Ngaahi Fuakava 14:7). ʻAhiʻahiʻi ʻa e ʻekitivitī ko ʻení ke ako ʻa e founga ʻoku tataki ai kitautolu ʻe he vaʻa ukameá (ʻa e folofola ʻa e ʻOtuá) ki he meʻaʻofa maʻongoʻonga taha ko ʻeni ʻa e ʻOtuá.
-
Fakapipiki ha fakatātā ʻo e ʻakau ʻo e moʻuí ʻi ha holisi.
-
Fakapipiki ha afo (ʻo fakafofongaʻi ʻa e vaʻa ukameá) ʻi lalo ʻi he fakatātaá, pea ʻai ha taha ke tuʻu ʻi he tafaʻaki ʻe taha ʻo e lokí fakataha mo e tafaʻaki ʻe taha ʻo e afó.
-
Taimiʻi pe ko e hā hono fuoloa ʻa e lue ha kiʻi tamasiʻi kuo haʻi hono matá mei he ngataʻanga ʻe taha ʻo e lokí ki he ʻakau ʻo e moʻuí ʻo ʻikai piki ki he afó.
-
Taimiʻi leva pe ko e hā hono fuoloa ʻo e aʻu ki he fuʻu ʻakau ʻo e moʻuí lolotonga ʻoku piki ki he afó.
Fealēleaʻakí: Ko e hā te tau lava ʻo fai ke piki maʻu ai ki he vaʻa ukameá pea ʻoua naʻa teitei tukuange?