“Tuʻunga Fakaākongá: Ko e Ngāué mo e Foungá,” Ki Hono Fakamālohia ʻo e Toʻu Tupú, Sānuali 2024.
Tuʻunga Fakaākongá: Ko e Ngāué mo e Foungá
Ke ʻilo ko hai moʻoni koe mo e tuʻunga te ke lava ʻo aʻusiá, tali fakatouʻosi ʻa e ngāué mo e founga ʻo e hoko ko ha ākonga ʻo Sīsū Kalaisi.
“Ko hai Au?”
Ko ha fehuʻi ia ʻoku fekumi ki ai ha kau toʻu tupu tokolahi ki hano tali. ʻI hoʻo tupulaki mo ako pea fakalakalaka ʻi ho founga makehé, ʻokú ke fifili ai pe ko e hā ʻokú ne fakamatalaʻi koé, ko e hā ho tuʻunga totonú. Naʻe fakahoko ʻe Palesiteni Lāsolo M. Nalesoni ha ngaahi fakahinohino mahuʻinga ki he fehuʻi ko ʻení:
“Ko hai koe? Ko e ʻuluaki mo e mahuʻinga tahá, ko e fānau koe ʻa e ʻOtuá, ko ha fānau ʻo e fuakavá, pea mo ha ākonga ʻo Sīsū Kalaisi. ʻI hoʻo tali e ngaahi moʻoni ko ʻení, ʻe tokoniʻi koe ʻe heʻetau Tamai Hēvaní ke ke aʻusia hoʻo taumuʻa taupotu taha ke moʻui taʻengata ʻi Hono ʻao māʻoniʻoní” (“Ngaahi Fili ki he Taʻengatá” [fakataha lotu fakamāmani lahi maʻá e kakai lalahi kei talavoú, 15 Mē 2022], broadcasts.ChurchofjesusChrist.org).
Naʻe akoʻi ʻe Palesiteni Nalesoni ʻoku ʻikai totonu ke toe mahuʻinga ange kiate koe ha toe fakahingoa ʻi he ngaahi hingoa ʻe tolu ko ʻení: (1) fānau ʻa e ʻOtuá, (2) fānau ʻo e fuakavá, mo e (3) ākonga ʻa Sīsū Kalaisí.
Ko e Tuʻunga ʻo ha Ākongá
Tau kiʻi talanoa lahi ange ki he fika tolú, ākonga ʻa Sīsū Kalaisí. ʻOku fēfē nai hoʻo tali moʻoni ʻa e tuʻunga ko ʻení pea hoko ko ha ākongá?
Ke muimui ki he Fakamoʻuí mo hoko ko ʻEne ākongá, ʻoku fiemaʻu ke ke tokanga taha ki he meʻa ʻokú ke faí mo e founga hoʻo fai iá.
Hangē ko ʻení, ʻoku fie maʻu ʻe he Fakamoʻuí ke tau foaki ki he niʻihi kehé mo tokoniʻi kinautolu, ka ʻokú Ne fakaafeʻi kitautolu ke fai ia ʻi he loto fiemālie mo e fiefia kae ʻoua ʻe ʻiteʻita. ʻI he taimi ʻoku tau loto ai ke foaki mo tokoní, ʻoku tau maʻu ʻa e ngaahi pale maʻongoʻonga taha ʻo e hoko ko ha ākonga moʻoní. (Vakai, 2 Kolinitō 9:7; Molonai 7:8.)
Ko ia, tau vakai ki he meʻa ʻoku fai ʻe he kau ākongá pea mo e founga ʻoku nau fakahoko ʻakí.
Meʻa ʻOku Fai ʻe ha Ākongá
Ko ha niʻihi ʻeni ʻo e ngaahi meʻa lahi ʻe lava ke fai ʻe ha ākonga ʻa Kalaisi ke muimui ai ki he Fakamoʻuí.
-
Ngāue ʻaki e tuí ʻi he founga ʻoku ngāue ʻaki ai ʻe he kau ākongá ʻa e tuí.
-
Tokoni ʻi he founga tokoni ʻa e kau ākongá.
-
Lotu ʻi he founga lotu ʻa e kau ākongá.
-
Ako ʻi he founga ako ʻa e kau ākongá.
-
Fakatomala ʻi he founga fakatomala ʻa e kau ākongá.
-
Fakakaukau ʻi he founga fakakaukau ʻa e kau ākongá.
-
ʻOfa ki he ʻOtuá ʻi he founga ʻoku ʻofa ai ʻa e kau ākongá ki he ʻOtuá.
-
ʻOfa ki he niʻihi kehé ʻi he founga ʻoku ʻofa ai ʻa e kau ākongá ki he niʻihi kehé.
-
Akoʻi ʻi he founga akoʻi ʻa e kau ākongá.
-
Kātaki ʻi he founga ʻo e kātaki ʻa e kau ākongá.
Founga hono Fakahoko Ia ʻe ha Ākongá
Ko ha ngaahi fakamatala ʻeni ʻe niʻihi ki he founga hono fakahoko ʻe ha ākonga e ngaahi meʻá ni. ʻE lava ke fakaʻaongaʻi ha konga lahi ʻo e ngaahi fakamatala ko ʻení ki ha niʻihi ʻo e ngaahi meʻá ni. ʻE ʻi ai e niʻihi ʻe kaunga ki he taha kotoa.
-
ʻI he loto mo e fakakaukau ʻoku nofotaha ʻia Sīsū Kalaisi
-
Loto-fiemālie
-
ʻI he loto fakatōkilalo
-
‘I he Loto-ʻofa
-
Faivelenga
-
Maʻu pē
-
Lotó kotoa
-
ʻI he loto-fakamātoato
-
ʻI he loto moʻoni
-
ʻIkai ha loto-fakamaau pe tāufehiʻa
-
Faʻa Kātaki
-
Mālohi
-
Loto-toʻa
-
Tokanga taha ki he ngaahi fiemaʻu ʻa e niʻihi kehé
-
Nofotaha ʻi he ngaahi folofolá
-
Taʻe toe ueʻia
-
Angamaʻa
-
Fonu ʻi he ʻamanaki leleí
-
ʻI he loto-holi ke hangē ko e Tamai Hēvaní mo Sīsū Kalaisi
-
ʻIkai ha fakahohaʻa
Mahalo ʻe ʻaonga kiate koe hoʻo fakakaukau fakatouʻosi ki he meʻa ʻokú ke fai ke muimui ai ki he Fakamoʻuí mo e founga hoʻo fakahoko iá. Kapau ʻokú ke ongoʻi ʻoku totonu ke ke fai ha ngaahi liliu pau ʻi ha faʻahinga tafaʻaki pē, ʻoku fakaʻofoʻofa ia. ʻOku ngalingali ko e ueʻi ia koe ʻe he Laumālié ke ke hoko ko ha ākonga lelei ange.
Ko ha Tuʻunga ke Tali mo Mataʻikoloa ʻAki
Hangē ko e lea ʻa Palesiteni Nalesoní, ko e hoko ko ia ko ha ākonga ʻa Sīsū Kalaisí, ko ha konga mahuʻinga ia ʻo ho tuʻungá. ʻI hoʻo tali mo mataʻikoloa ʻaki ʻa e tuʻunga ko ʻení, ʻe tokoniʻi koe ʻe hoʻo Tamai Hēvaní ke ke hoko ko e tokotaha ʻokú Ne ʻafioʻi te ke lava ʻo aʻusiá—ʻa e tokotaha ʻokú ke loto moʻoni ke aʻusiá.