Foua ha Meʻa Foʻou

Fai ʻe Brynn Wengler

Ngaahi Makasini ʻa e Siasí

Ko ha lēsoni fakataumuʻa fakafiefia ʻeni te ke lava ʻo akoʻi ki ho fāmilí pe kalasí lolotonga hono ako ʻo e Haʻu, ʻo Muimui ʻIate Aú he māhiná ni.

ʻI hoʻo ʻahiʻahiʻi ha meʻa foʻoú, mahalo te ke ongoʻi ʻo hangē ko e fekumi ʻa Nīfai ki he ʻū lauʻi peleti palasá, “ʻo ʻikai te [ke] tomuʻa ʻilo ʻa e meʻa te [ke] faí” (1 Nīfai 4:6). Kae manatuʻi, ʻoku ʻikai ke ke teitei tuenoa, tautautefito ki he taimi ʻokú ke fai ai ha meʻa kuo fekauʻi ʻe he ʻOtuá.

1. ʻIkai Tomuʻa ʻIloʻi

ʻOange ki he tokotaha takitaha ha laʻipepa. Kae ʻoua naʻá ke talaange pe ko e ʻai ke hā. Ka mou talanoa ki he founga ʻoku tau faʻa maʻu fakakongokonga ai ʻa e fakahā mei he ʻOtuá, hangē ko hono ʻomi ʻe Nīfai ʻa e ʻū lauʻi peleti palasá (vakai, 1 Nīfai 3–4) pe foʻu ha vaká (vakai, 1 Nīfai 17–18).

2. ʻOtu Lea ki he ʻOtu Lea

Ko e konga fakafiefiá ʻeni! Lau leʻolahi tahataha ʻa e ngaahi fakahinohino ko ʻení ke tokoni ki hoʻo kulupú ke peluki ʻenau meʻa liló. (ʻOku faingataʻa ia he ʻikai ha ʻū taá! Kapau ʻoku nau fiemaʻu ha tokoni lahi ange, tuku ke nau kiʻi vakai ki ha foʻi sitepu ʻe taha he taimi.)

3. Fakahaá: Tataki ʻe he Laumālié

ʻOku totonu ke maʻu ʻe hoʻo fāmilí pe kalasí he taimí ni ha ʻū vaka pepa foʻou! Talanoa ʻi ha ngaahi miniti siʻi ki ha ngaahi taimi ne mou fiemaʻu kotoa ai e fakahinohino ʻa e ʻOtuá ʻi he “ʻotu lea ki he ʻotu lea.” Te ke lava foki ʻo tohi pe tā ha meʻa ʻi hoʻo vaká ke manatuʻi e ngaahi taimi ko iá.

Sai ʻi hoʻo foua leva ha ngaahi meʻa foʻou ʻi he moʻuí, ʻoua naʻa ngalo ke ke fekumi ki ha fakahā mei he ʻOtuá. Manatuʻi, te Ne teuteu maʻu pē ha founga maʻau ke fakahoko ʻa e meʻa kuó Ne fekaú (vakai, 1 Nīfai 3:7).

Ngaahi Fakahinohinó

Puke ʻa e laʻipepa ʻi he tapa nounou ʻi ʻolungá. Pelu ua, mei ʻolunga ki lalo.
Toe pelu ua mei toʻohema ki toʻomataʻu, pea folahi hake leva ʻa e pelu naʻá ke toki fakahokó.
ʻI he tafaʻaki ki ʻolunga ʻo e pelú, puke ʻa e ongo tuliki ki ʻolungá ʻo peluki hifo ki he pelu ʻi lotomālié. ʻOku totonu ke hangē ha tapatolu pea tapafā ʻa e konga ki laló.
Peluki ki ʻolunga ʻa e kiʻi konga siʻisiʻi ʻi lalo ʻi hoʻo tapatolú. Fulihi ki he tafaʻaki ʻe tahá pea fai e meʻa tatau ki he laʻi pepa he tafaʻaki ʻe tahá.
Fakaava ʻa e konga ki laló ke hangē ha tataá.
Fusi pē kae ʻoua kuo fetaulaki ʻa e ongo muiʻi meʻá pea hangē ha foʻi taiamoní.
ʻI he konga ʻoku ava ki laló, pelu ʻa e laʻipepa taupotu ki ʻolungá ki he konga ki ʻolunga ʻo e foʻi taiamoní. Fulihi ʻo fai e meʻa tatau he tafaʻaki ʻe tahá. ʻOku totonu ke hangē ha tapatolú.
Fakaava ʻa e konga ki laló pea pelu tatau ia mo e sitepu 5 mo e 6 ki ha foʻi taiamoni.
ʻOku totonu ke ʻi ai ha tapatolu ʻe ua ʻi he tafaʻaki toʻohemá mo e toʻomataʻú ʻi ʻolunga ʻi hoʻo foʻi taiamoní. Fakaava ʻa e ngaahi tuliki ko iá pea fokotuʻu ke ʻi ai haʻo tapafā fakahihifi. Pea tekeʻi leva ʻa e ngaahi tafaʻakí ke tokoni ke tuʻu ʻiate ia pē.