Ngaahi Fehuʻí mo e Talí

“ʻOku ou fiemaʻu faleʻi ʻi hono palani e ngaahi ʻekitivitī ʻa e toʻu tupú. Ko e hā ha ngaahi fakakaukau lelei?”

“Tokanga taha ki he ngaahi fiemaʻu hoʻo kalasí [pe kōlomú] pea palani ha ngaahi ngāue tokoni mo ha ngaahi ʻekitivitī kehekehe ke faaitaha mo fakamālohia ai e kau mēmipa ʻo e kalasí, langaki e fakamoʻoní, tāpuekina e niʻihi kehé, mo fiefia.”

“What Should I Focus On?,” My Calling as a Young Women Class Presidency Member, Gospel Library.

Taufetongi mo Palani Fakataha

finemui

“ʻOku mau taufetongi ʻi hono palani ʻo e ngaahi ʻekitivitī ʻi he uike takitaha. ʻOku toʻo heni ʻa e loto-mafasia ha foʻi toko taha pē, pea ʻoku mau maʻu ha ngaahi fakakaukau kehekehe. ʻOku tokoni foki ke ʻi ai ha ʻekitivitī ʻoku mou palani fakataha ai. ʻOku mau saiʻia ke vaʻinga, kakata fakataha, mo ngāue tokoni.”

Adelynne S., 17, Utah, USA

ʻOmi e Niʻihi Kehé ki he Fakamoʻuí

finemui

“Fehuʻi ki he kau mēmipa ʻo hoʻo kalasí pe kōlomú pe ko e hā e meʻa ʻoku nau saiʻia hono fakahokó. Fili ha ngaahi ʻekitivitī te ne ʻomi e toʻu tupú ke nau vāofi ange mo e Fakamoʻuí, pea fiefia fakataha! Kuo hoko maʻu pē ʻa e ngaahi ʻekitivitī ngāue tokoní ko ha niʻihi ʻo e ngaahi meʻa ʻoku ou saiʻia taha aí. ʻOku ou maʻu maʻu pē ha ngaahi kaungāmeʻa foʻou!”

Katie G., 18, Washington, USA

Feinga ke Fakakau ʻa e Tokotaha Kotoa Pē

finemui

“ʻE lava ke ongoʻi ʻe he niʻihi kehé ʻoku talitali lelei ange kinautolu ʻi he ngaahi ʻekitivitī ʻe lava ke kau ki ai ʻa e tokotaha kotoa pē. ʻOku tokoni hono ʻeke ki ho kulupú ʻa e ngaahi ngāue manako pe meʻa kehe ʻoku nau saiʻia ke fakahokó.

Lily D., 13, Arizona, USA

Ngaahi Fehuʻi ʻe Tolu

finemui

“ʻOku faʻa palani ʻe heʻeku kalasí ha ngaahi ʻekitivitī ʻo makatuʻunga ʻi ha ngaahi fehuʻi ʻe tolu: Ko e hā ʻoku fiemaʻu ke tau fakaleleiʻí? Ko hai ʻoku fiemaʻu ke tau poupouʻí? Kuo taimi nai ki ha ʻekitivitī ʻoku siʻisiʻi ange ai ʻa e taimi mo e ivi ʻoku molé, ʻi he ngaahi ʻekitivitī kehé? ʻI hoʻomou fakakaukau ki he ngaahi meʻá ni, lotu, fakalaulauloto, mo fealēleaʻaki fakataha. Te ke lavaʻi ia!”

Isabella R., 14, Oregon, USA

ʻEsia Tā Fakalaumālié

finemui

“Te ke fiemaʻu ha ngaahi makasini lahi ʻa e Siasí koeʻuhí ke ke lava ʻo kosi ʻa e ngaahi ʻīmisi pe pōpoaki fakalaumālie ʻokú ne ueʻi fakalaumālie koé. Hili ia pea fokotuʻutuʻu ʻa e meʻa naʻá ke kosí ʻi ha ʻesiaʻi tā ʻoku fokotuʻutuʻu makehe. Te ke lava ʻo tuku ia ʻi ha feituʻu te ke lava ʻo sio ki ai.”

Florence M., 14, British Columbia, Canada

ʻOku fakataumuʻa ʻa e ngaahi talí ko ha tokoni mo ha fakakaukau, ka ʻoku ʻikai ko hano fakahaaʻi fakaʻofisiale ʻo ha tokāteline ʻa e Siasí.

Ko e Hā Hoʻo Fakakaukaú?

“Te u ʻiloʻi fēfē ʻoku moʻoni ʻa e meʻa ʻoku ou lau ʻi he Tohi ʻa Molomoná?”

ʻOmi hoʻo talí mo e laʻitaá kimuʻa he ʻaho 15 ʻo Fēpueli 2024.

ʻĪmeili mai kiate kimautolu ʻi he [e-mail]. Pe ʻalu ki he ftsoy.ChurchofJesusChrist.org pea lomiʻi ʻi he “Submit Your Work (Fakahū Hoʻo Ngāué).” Hū ʻaki hoʻo ʻAkauni ʻi he Siasí pea fili leva ʻa e “For the Strength of Youth (Ki Hono Fakamālohia ʻo e Toʻu Tupú)” ʻi lalo ʻi he “Choose Magazine (Fili ʻa e Makasiní).” Lomiʻi ʻi he “Add File (Tānaki Atu ʻa e Failé)” ke fili hoʻo failé mo e ʻū taá, pea lomiʻi ʻi he “Submit (Fakahū)” ke upload mo ʻomi kiate kimautolu hoʻo failé.

ʻE lava ke liliu ʻa e ngaahi talí koeʻuhí ke lōloa feʻunga pe mahino.