“Taʻofi e Fakafehoanakí! ʻOkú Ke Feʻunga,” Ki Hono Fakamālohia ʻo e Toʻu Tupú, Sānuali 2024.
Haʻu, ʻo Muimui ʻIate Au
Taʻofi e Fakafehoanakí! ʻOkú Ke Feʻunga
Ko ha ngaahi meʻa ʻeni ʻe fā ʻoku tau ako mei he taha ʻo e ngaahi taʻokete ʻo Nīfaí.
Ngaahi tā fakatātā ʻa Corey Egbert
ʻOku ʻi ai ha tokotaha ako ʻi he kalasí ʻokú ne ʻiloʻi maʻu pē ʻa e tali totonú. Ko e kiʻi tamasiʻi ʻi he timi pasiketipoló ʻoku lelei ange maʻu pē ʻene fakahuú ʻiate koe. Ko e tokotaha ʻoku fie fakakaumeʻa ki ai e tokotaha kotoa. ʻI he māmani ʻo e fakafehoanakí, ʻoku hangē ʻoku ʻi ai maʻu pē ha taha ia ʻoku lelei ange.
ʻE lava ke mātuʻaki faingataʻa ʻa e fakafehoanakí ʻi heʻetau vakai ki he moʻui ʻaki ʻa e ongoongoleleí. Mahalo te ke pehē ʻoku anga māʻoniʻoni ange ʻa e niʻihi kehé, mālohi ange ʻenau fakamoʻoní, pe ongoʻi lelei ange ʻa e Laumālié ʻiate koe. Ka ʻoku ʻikai tokoni hono fakafehoanaki pehē koé.
Mahalo ʻokú ke ʻiloʻi mei he Tohi ʻa Molomoná ko ha taki mo ha palōfita maʻongoʻonga ʻa Nīfai. Ka ko e hā hono lahi hoʻo ʻilo ki he taʻokete faivelenga ʻo Nīfai ko Samú? Naʻe ʻikai ko ha taki pe palōfita ia hangē ko Nīfaí, ka naʻe ʻikai fiemaʻu ia ke ne hangē pē ko Nīfaí kae toki feʻunga.
1. Naʻe Tui ʻa Samu
Naʻe lotu ʻa Nīfai pea maʻu ha tali maʻana naʻe fekau ʻe he ʻEikí honau fāmilí ke nau mavahe ki he feituʻu maomaonganoá. Pea naʻe “tui [ʻa Samu] ki he ngaahi lea ʻa Nīfaí” (vakai, 1 Nīfai 2:16–17). Mahalo naʻe ʻikai ke ʻi ai ha fakamoʻoni haohaoa ʻa Samu. Mahalo naʻe ʻi ai haʻane ngaahi fehuʻi. Ka naʻá ne fili ke tui ki he ngaahi lea ʻa hono tokouá, peá ne ngāue leva ʻo fakatatau ki heʻene tuí. ʻOua te ke fakafehoanaki hoʻo tuí pe fakamoʻoní ki he niʻihi kehé. ʻI hoʻo ngāue ʻi he tui hangē ko Samú, ʻe tupulaki māmālie pē hoʻo fakamoʻoni ki he Fakamoʻuí. (Vakai foki Tokāteline mo e Ngaahi Fuakava 46:13–14; ʻAlamā 32.)
2. Naʻe Loto-fakatōkilalo ʻa Samu
Naʻe ʻikai fiefia ʻa Leimana mo Lēmiuela ʻi he hoko hona tehina ko Nīfaí, ko ha taki kiate kinauá. Ka naʻe pau pē naʻe loto-fakatōkilalo ʻa Samu, ʻa ia ko e taʻokete foki mo ia ʻo Nīfaí. Naʻá ne fakafanongo kia Nīfai peá ne muimui ki heʻene faleʻí (vakai, 2 Nīfai 5:3–6). Kapau ʻoku kole ki he niʻihi kehe ʻoku mou feohí ke nau taki kae ʻikai ko koe, loto-fakatōkilalo, pea ʻoua naʻá ke fakafehoanaki. Poupouʻi kinautolu, ako meiate kinautolu, pea fai ho lelei tahá ke fili ki he totonú.
3. Naʻe Faʻa Kātaki ʻa Samu
Mahalo ʻe hangē ʻoku haohaoa e moʻui ʻa e tokotaha kotoa pē ʻoku mou feohí, ka ʻoku foua ʻe he tokotaha kotoa pē ha ngaahi taimi faingataʻa. Naʻe ʻikai toe kehe ʻa Samu. Naʻe ʻita ʻa Leimana mo Lēmiuela kia Samu, ʻo hangē pē ko ʻena fakafepaki kia Nīfaí. Naʻá na taaʻi foki ʻa Samu ʻaki ha vaʻakau, ʻo hangē ko ʻena taaʻi ʻa Nīfaí! (Vakai, 1 Nīfai 3:28; 1 Nīfai 7:6.) Ka naʻe kātekina ʻe Samu ʻi he faʻa kātaki hono ngaahi faingataʻaʻiá. ʻOku ʻikai ʻuhinga e foua e ngaahi taimi faingataʻá ʻokú ke fai ha meʻa ʻoku hala. ʻOua te ke fakafehoanaki ho ngaahi faingataʻaʻiá mo e niʻihi kehé. Faʻa kātaki pea falala ki he ʻEikí. Te Ne tokoniʻi koe.
4. Naʻe Tāpuekina ʻa Samu
Naʻe talaange ʻe Līhai ko e tamai ʻa Samú kiate ia, “ʻE tāpuakiʻi koe ʻi ho ngaahi ʻahó kotoa” (2 Nīfai 4:11). Mahalo naʻe ʻikai ko ha taki pe palōfita ʻa Samu, ka naʻá ne kei muimui faivelenga pē kia Sīsū Kalaisi, pea naʻe tāpuekina ai ia. ʻI he tokoni ʻa e Fakamoʻuí, naʻá ne feʻunga ai. Pea te ke lava foki mo koe.