“Folofola ʻa Samí,” Kaumeʻa, Sānuali 2024, 10–11.
Folofola ʻa Samí
Naʻe fie laukonga foki mo Sami.
Naʻe hoko ʻa e talanoá ni ʻi Polivia.
Naʻe pasipasi ʻa Papi ʻi he fakaʻosinga ʻo e efiafi fakafāmili ʻi ʻapí. Naʻá ne pehē, “ʻOku ʻi ai haʻaku fakakaukau ki ha taumuʻa fakafāmili. Tau lau fakataha ʻa e Tohi ʻa Molomoná ʻi he ʻaho kotoa pē.”
Naʻe kamokamo pē ʻa e ongo taʻokete ʻo Samí, ʻa ʻOnitelea mo Huani, ʻi heʻena malimali fiefia ʻi he foʻi fakakaukaú.
Naʻe talaange ʻe ʻOnitelea, “ʻOku sai ia.”
Naʻe fiefia foki mo Sami. Ka naʻá ne manatuʻi ha meʻa. Naʻá ne hiki hake hono nimá. “ʻOku ʻikai ke u poto ʻi he laukongá. Te u tokoni fēfē?”
Naʻe hiki hake mo tuku hifo ʻe Huani hono ongo nimá. “Te ke lava pē ʻo fanongo.”
Naʻe ʻosi ʻilo pē ʻe he ongo tokoua ʻo Samí ʻa e founga laukongá. Ka naʻe taʻu nima pē ʻa Sami. Kuo teʻeki ai ke ne ako ke laukonga.
“Ka ʻoku ou fie tokoni foki mo au!” Naʻe lea fakafulofula atu ʻa Sami.
Naʻe fāʻofua ange ʻa Mama kia Sami. Naʻá ne pehē ange, “Pea te ke tokoni pē. ʻOku ʻi ai maʻu pē ha founga ke fai ai ʻa e meʻa kuo fekauʻi mai ʻe he ʻOtuá kiate kitautolú.”
ʻI he pō hono hokó, naʻe fakataha mai ʻa e fāmili ʻo Samí ke lau ʻa e Tohi ʻa Molomoná. Naʻa nau haʻu kotoa mo ʻenau folofolá, tukukehe pē ʻa Sami. Naʻe ʻoange ʻe Mama ha tohi fakatātā ʻo e ngaahi talanoa ʻi he Tohi ʻa Molomoná.
“ʻOku teʻeki ke ke lava ʻo lau ha ngaahi foʻi lea. Ka te ke lava ʻo lau ha ngaahi fakatātā,” ko ʻene leá ange ia mo e malimalí.
Naʻe puke maʻu ʻe Sami ʻa e tohí. Te ne lava foki eni ʻo laukonga mo hono fāmilí!
Naʻá nau taufetongi ʻi he laú. Naʻe sio ʻa Sami ki he ngaahi fakatātā naʻa nau fakahaaʻi ʻa e talanoá. ʻI he aʻu ki hono taimi ke laú, naʻá ne talaange ki hono fāmilí ʻa e meʻa naʻá ne sio ki ai ʻi he ngaahi fakatātaá. Naʻá ne fakamatala fakaikiiki ki he lahi taha naʻá ne lavá.
Hili ha ngaahi ʻaho lahi, naʻe fie laukonga lahi ange ʻa Sami. Naʻe akoʻi ange ʻe Mama ʻa e ongo ʻo e foʻi mataʻitohi kotoa pē. Naʻá ne akoʻi ange leva ʻa e founga hono puʻaki ʻo e ngaahi foʻi leá. Hili ha ngaahi māhina mei ai, naʻe ʻikai toe fuʻu fiemaʻu ʻe Sami ia ʻa e tohi fakatātaá. Ka naʻá ne lau ʻa e foʻi lea fakaʻosi ʻo e veesi kotoa pē naʻe lau ʻe hono fāmilí. Naʻe ʻuluaki lau ʻe Mama ʻa e foʻi leá, pea toe puʻaki mai ia ʻe Sami.
ʻI he kamataʻangá, naʻa nau laukonga māmālie. Naʻe fuoloa pea nau toki aʻu ki he fakaʻosinga ʻo e vahe takitaha. Naʻe lāunga ʻa ʻOnitelea mo Huani ʻi he hoko ki he taimi ʻo Samí. Ka naʻa nau kei lau fakafāmili pē.
Naʻe māmālie pē ʻa e lava ke laukonga lahi ange ʻa Samí. Naʻá ne lau ha foʻi lea ʻe taha ʻo ha veesi, pea mo ha foʻi lea ʻe ua, pea tolu. Naʻá ne kamata lau leva ha veesi kakato!
ʻI he ofi ke ʻosi ʻenau taumuʻá, naʻe lava ke lau ʻe Sami ha ngaahi veesi ʻiate ia pē. Naʻe fakaʻau ke lelei ange ʻene laukongá. Kuo tupulaki foki mo ʻene ʻofa ki he Tohi ʻa Molomoná.
Naʻe faifai pea fakaʻosi ʻe he fāmili ʻo Samí ʻa e Tohi ʻa Molomoná. Kuo feʻunga mo ha taʻu ʻe ua! Naʻe taʻu fitu ʻeni ʻa Sami, pea kuó ne ako ke poto ʻaupito ʻi he laukongá.
“Fakafiefia!” Ko Papa ange ia. “Kuo tau lavaʻi ia!”
Naʻe fiefia fakataha ʻa Sami mo hono fāmilí. Kuó ne tokoniʻi kinautolu ke fakaʻosi ʻa e Tohi ʻa Molomoná!
Naʻe fāʻofua ange ʻa Huani kia Sami. “Ko e hā hoʻo taumuʻa ki he taʻu ʻe ua ka hokó?”
Naʻe mamali ʻa Sami. Naʻá ne tuʻu hangatonu mo pehē, “Te u toe lau ʻa e Tohi ʻa Molomoná!”
Ngaahi tā fakatātā ʻa Melissa Manwill Kashiwagi