Ko ha Fepōtalanoaʻaki mo ʻEilisi fekauʻaki mo e Laumālie Māʻoniʻoní

Ko ʻEilisí ko ha kiʻi taʻahine taʻu 12 mei he Vahefonua Fakahahake ʻo Singapoá. Naʻa mau fehuʻi ange pe ʻoku tokoniʻi fēfē ia ʻe he Laumālie Māʻoniʻoní.

Fakamatala mai kau kiate koe.

ʻOku ou saiʻia ʻaupito ʻi he lautohí mo e volipoló, pea ko e lēsoni ʻoku ou saiʻia taha ai ʻi he akó ko e fiká. Ko e meʻakai ʻoku ou saiʻia taha aí ko e lasāniā (lasagna), pea ko e lanu ʻoku ou saiʻia taha aí ko e lanu kulokulá. ʻI heʻeku tupu haké, ʻoku ou fakaʻamu ke u hoko ko ha loea pea ngāue ʻi he fakamaauʻangá.

ʻOku ongo fēfē ʻa e Laumālie Māʻoniʻoní kiate koe?

Kiate au, ʻoku ou ongoʻi ʻoku hangē ʻa e Laumālie Māʻoniʻoní ko haʻaku kaungāmeʻa ofí. ʻOku ou ongoʻi ko ha taha Ia te u lava ʻo falala ki ai ʻi he taimi ʻoku ou tauhi ai ʻa e ngaahi fekaú mo ʻeku ngaahi fuakava mo e Tamai Hēvaní. ʻOku ou fakakaukau kiate Ia ko hoku fai fakahinohino mo hoku takaua. Te Ne lava ʻo tokoniʻi au ke u fai ha ngaahi fili ʻoku lelei.

Ko e hā ha faleʻi te ke fai ki ha taha ʻoku ʻikai ke ne fakapapauʻi pe kuo nau ongoʻi ʻa e Laumālie Māʻoniʻoní?

ʻOku ou faʻa ongoʻi taʻepauʻia foki ʻi he taimi ʻe niʻihi pe ʻoku ou ongoʻi nai ʻa e Laumālie Māʻoniʻoní. Ka ʻo kapau te ke fakakaukau moʻoni ki ai, lau ʻa e folofolá, mo lotu, peá ke ongoʻi fiemālie ki ai, ko e Laumālie Māʻoniʻoní ia. Taimi ʻe niʻihi ʻoku ʻikai ko ha ongo pē ʻa e fanongo ki he Laumālie Māʻoniʻoní. ʻE lava foki ke hoko ia ko ha fakakaukau. Kapau ʻokú ke kei ongoʻi puputuʻu pē, te ke lava maʻu pē ʻo lotu mo toe kole tokoni ki he ʻEikí.

Ko e fē ha taimi kuó ke ongoʻi ai ʻa e Laumālie Māʻoniʻoní?

Naʻá ku vaʻinga ʻi ha feʻauhi volipolo ʻi he taʻu kuo ʻosí. Naʻá ku manavasiʻi ʻo hangē ko e tokolahi hoku ngaahi kaungāvaʻingá. ʻI he kamata ke u vaʻingá, ne ʻosi foʻi ʻemau timí ʻi he ongo ʻuluaki vaʻingá. Ne mau loto-foʻi. Naʻe lea ʻaki ʻe he kau mamata vaʻingá ha ngaahi lea taʻeʻofa, pea naʻa mau ongoʻi toe loto-foʻi ange. Ne mau ʻulungia.

ʻI hono ʻeke mai ʻe heʻeku faʻeé pe naʻe fēfē ʻa e taú, naʻe kamata ke u tangi. Naʻá ku fuʻu loto-mamahi ʻaupito. Naʻá ku ʻalu ki hoku lokí, ʻa ia naʻe malu mo lōngonoá, peá u fai ai ha lotu. Hili ʻeku lotú, naʻá ku ongoʻi nonga mo fiemālie ange ʻi hoku lotó. Naʻá ku ʻiloʻi naʻe fakafiemālieʻi au ʻe he Laumālie Māʻoniʻoní pea te Ne tokoniʻi maʻu pē au. ʻI ha feʻauhi ʻe taha ʻi he taʻú ni, ʻoku ou ʻiloʻi te Ne ʻiate au ʻi heʻeku vaʻingá.

Ko e hā mo ha toe founga kehe kuo tokoniʻi ai koe ‘e he Laumālie Māʻoni‘oní?

Naʻe tokoniʻi foki au ʻe he Laumālie Māʻoniʻoní ʻi he taimi naʻá ku hiki ai mei he Palaimelí ki he Kau Finemuí. Naʻá ku fiefia ke hiki ki he Kau Finemuí. Ka naʻá ku ongoʻi manavasiʻi ʻi he taimi tatau. Naʻá ku kiʻi loto-mamahi foki ʻi heʻeku mavahe mei he Palaimelí.

Kimuʻa ʻi heʻeku ʻuluaki kalasí, naʻá ku fai ha lotu peá u kole ki he Tamai Hēvaní ke tokoni mai ke u fiefia ʻi he Kau Finemuí. Naʻá ku ongoʻi ha nonga ʻi hoku lotó ʻi heʻeku hū atu ki hoku lokiako foʻoú. Ne u mateuteu ke u ako. Naʻe tokoni ke manatuʻi ʻe ʻi ai maʻu pē ʻa e Laumālie Māʻoniʻoní maʻaku!

Ngaahi tā fakatātā ʻa Annabel Tempest