Ko e Ueʻi ki he Pateta Fakapakú

Fai ʻe Haley Yancey

(Makatuʻunga ʻi ha talanoa moʻoni)

Naʻe maʻu ʻe Mia ha ongo mālohi ke vakaiʻi ʻa e ngaahi meʻa ʻoku ngaohi ʻaki ʻa e pateta fakapakú.

Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.

Naʻe hifi ʻe Mia ʻa e situloapeulí pea tānaki atu ia ki he poulu sālati fuaʻiʻakaú. Ko e fuaʻiʻakaú ʻa e meʻakai naʻá ne saiʻia taha aí. Naʻá ne saiʻia ʻi he ngaahi lanu fakaʻofoʻofa kotoa pē. Pea naʻe ʻikai teitei hohaʻa ia ki hono kai ia!

Naʻe lahi ʻa e meʻakai naʻe kovi kia Miá. Naʻe pau ke ne tokanga koeʻuhí he ʻe lava ke ne puke lahi ʻi hono kai ʻo e meʻakai halá. ʻI heʻene kei siʻí, naʻá ne inu ʻikai ʻiloʻi ha huʻakau pulu pea faingataʻa ai ke ne mānava. Naʻe pau leva ke ne ʻalu ki falemahaki. Naʻe ʻikai ke ne loto ke toe hoko ia.

Naʻe faingataʻa ʻi he taimi ʻe niʻihi ke kai ha ngaahi meʻakai kehe mei hono ngaahi kaungāmeʻá mo e fāmilí. Ka naʻá ne ʻiloʻi naʻe mahuʻinga ke ne malu.

Naʻe toʻo ʻe Mia ʻa e sālati fuaʻiʻakaú ki he kānitá. “ʻOku maau ʻa e sālatí.”

Naʻe hanga hake ʻa Teti mei he kulo naʻá ne heú. “Sai! ʻE vavé ni pē ha aʻu mai ʻetau kau fakaafé.”

Naʻe fanongo ʻa Mia ki ha tukituki ʻi he matapaá peá ne lele ke fakaava. Naʻe malimali ange ʻa e fāmili Sionisoní mo e ongo faifekaú kiate ia mei he fakafaletoló. Ko ha ngaahi kaungāmeʻa ʻo e fāmilí ʻa e fāmili Sionisoní. Naʻe fiefia ʻa Mia ke toe sio kiate kinautolu. Naʻá ne fakaava lahi ʻa e matapaá ke hū mai ki loto ʻa e tokotaha kotoa pē.

Lolotonga ʻenau tatali ki he maʻu meʻatokoni efiafí, naʻe fakaʻaliʻali ange ʻe ha taha ʻo e ongo faifekaú kia Mia ha faiva faimana. Naʻe ʻikai ke ne lava ʻo ʻilo pe naʻe toʻo fēfē ʻe he faifekaú ʻa e sēnití mei hono telingá!

ʻIkai fuoloa kuo taimi ke nau kai. Naʻe fai ʻe Brother Sionisoni ha lotu. Naʻa nau tuʻu laine kotoa atu leva ke fakafonu ʻenau peletí.

ʻI he hoko atu ki he taimi ʻo Miá, naʻá ne tata mai ha sēpuni salati fuaʻiʻakau lahi. Naʻá ne fakalaka atu ʻi he ngaahi meʻakai naʻá ne ʻiloʻi naʻe ʻi ai ʻa e huʻakaú.

Naʻá ne toʻo hake leva ha kofukofu pateta fakapaku lahi ʻo huaʻi ki heʻene peletí. Naʻa nau hangē ko e kalasi tatau naʻá ne kai kimuʻá. Naʻá ne toʻo hake e taha ʻo kai.

Ka ʻi he kamata ke ne lamú, naʻá ne maʻu ha ongo mālohi. Naʻe pehē ʻe ha leʻo ʻi hono ʻatamaí, vakaiʻi ʻa e ngaahi meʻa naʻe ngaohi ʻakí.

Naʻe taʻofi ʻe Mia ʻene kaí. Naʻá ne sio ki he lisi ʻo e ngaahi meʻa naʻe ngaohi ʻakí ʻi he kofukofú. Naʻe kau ai e huʻakaú!

Naʻe maʻu mai ʻe Mia ha pepa holoholo ʻo puʻaki hifo ki ai ʻi he vave taha naʻá ne lavá. Naʻe loʻimataʻia hono matá. Naʻe teʻeki ai ke ne folo ia. Ka ʻe kei hoko nai ha meʻa kovi?

“Mami! Teti!” Naʻe fakatovave atu ʻa Mia ki heʻene ongomātuʻá. “Naʻá ku faʻapuku ha pateta fakapaku naʻe kau ai ʻa e huʻakaú ki hoku ngutú!”

Naʻe talaange ʻe Mami, “ʻOku sai pē. Ta ʻalu ʻo ʻomai ha faitoʻo.” Naʻe folo ʻe Mia ʻa e foʻiʻakau naʻe ʻoange ʻe Mamí peá ne mihiʻi ʻene mānavá. Naʻe puke ʻe Teti ʻa Mia lolotonga ʻenau tatali ke ngāue ʻa e faitoʻó.

Hili ha ngaahi miniti siʻi, naʻe pehē ange ʻe Mami, “ʻOku fēfē hoʻo ongoʻí?”

Naʻe kei ongoʻi manavahē pē ʻa Mia. Ka naʻe ʻikai ke ne ongoʻi ha meʻa ʻoku fehalaaki ʻi hono sinó. “ʻOku ou tui ʻoku ou sai pē. Ka ʻe lava nai ke u maʻu ha tāpuaki?”

Naʻe pehē ange ʻe Teti, “ʻIo. Ta kole ha tokoni mei he ongo faifekaú.”

Naʻe tangutu ʻa Mia ʻi ha sea, pea hilifaki ʻe he Tetí mo e ongo faifekaú honau nimá ki hono ʻulú. Naʻa nau tāpuakiʻi ia ke ne malu. Naʻe ongoʻi nonga ʻa Mia. Naʻe mole kotoa ʻene ngaahi ongoʻi manavaheé.

“Naʻá ke ʻilo fēfē ke vakaiʻi ʻa e ngaahi meʻa naʻe ngaohi ʻakí ʻi he kofukofú?” Ko e fehuʻi ange ia ʻa Mamí.

“Naʻá ku ongoʻi ha fakatokanga mei he Laumālie Māʻoniʻoní!”

Naʻe fāʻofua ange ʻene Teti kiate ia. “ʻOku ou fiefia ʻaupito ʻi hoʻo fakafanongó.”

Naʻe kamo pē ʻa Mia. Naʻá ne ʻiloʻi naʻe ʻofa mo tokanga mai ʻa e Tamai Hēvaní kiate ia.

Ngaahi tā fakatātā ‘a Chrisanne Serafin