“Faʻa Fakamolemole ʻo Hangē ko Nīfaí,” Kaumeʻa, Sānuali 2024, 4–5.
Faʻa Fakamolemole ʻo Hangē ko Nīfaí
Naʻe ʻikai fie ʻita ʻa ʻAisea ia kia Siō ʻo taʻengata.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe lele ʻa ʻAisea ʻo ʻakahi ʻa e foʻi pulú ki hono kaungā vaʻinga ko Tīmoté. Naʻá ne sio ki hono ʻakahi ʻe Tīmote ʻa e foʻi pulú ki he koló.
“Hū!” Ko e kaila ia ʻa Tīmoté ʻi he tau ʻa e foʻi pulú ʻi he netí.
Naʻe fiefia ʻa ʻAisea. Kuo nau ikuna ʻa e vaʻingá!
ʻI heʻene lue ki tuʻa mei he malaʻe vaʻingá, naʻá ne ongoʻi fiefia! Ka naʻe ui ia ʻe ha taha ʻo e fānau ʻi he timi ʻe tahá, ko Siua, ʻaki ha hingoa taʻeʻofa.
Naʻe ongoʻi ʻohovale mo loto-mamahi ʻa ʻAisea. Naʻe ʻikai ke ne ʻilo ʻa e meʻa ke ne lea ʻakí. Naʻá ne sio hifo ki he kelekelé pea lue māmālie atu ki hono kaungā vaʻingá.
“Kuo tau ikuna!” Ko Tīmote ange ia. “Paasi lelei ia, ʻAisea.”
Ka naʻe ʻikai ongoʻi fiefia ʻa ʻAisea. Hili ʻa e lea naʻe fai ange ʻe Siua kiate iá! Naʻá ne ongoʻi loto-mamahi mo ʻita.
ʻI he toenga ʻo e ʻahó, naʻe ongoʻi ʻe ʻAisea hangē ʻoku fusi hifo ia ʻe ha kavenga mamafá. Naʻe ʻikai ke ne toe saiʻia ʻia Sioó.
ʻI he pō ko iá, naʻe tangutu fakataha ʻa ʻAisea mo hono fāmilí lolotonga ʻa e taimi lau folofolá. Naʻá ne feinga ke fanongo ki he laukonga hono tuofefiné. Ka naʻe ʻikai lava ke taʻofi ʻene fakakaukau ki he meʻa naʻe lea ʻaki ʻe Sioó.
Naʻe sio hifo ʻa ʻAisea ki he ngaahi peesi ʻo ʻene Tohi ʻa Molomoná. Naʻá ne tuʻu ʻi ha potufolofola ʻi he 1 Nīfaí. Ko ha taimi ia naʻe taʻeʻofa ai ʻa e ongo taʻokete ʻo Nīfaí kiate ia.
Naʻe pehē ʻe he folofolá, “Pea naʻe hoko ʻo pehē naʻá ku fakamolemoleʻi moʻoni ʻa kinaua.”*
Naʻe fakamolemoleʻi ʻe Nīfai hono ongo tokouá? Ko e fakakaukau ia ʻa ʻAiseá. Naʻa mo e hili ʻena anga taʻeʻofá?
Naʻe fakakaukau ʻa ʻAisea kia Siō. Naʻe ʻikai ke ne toe fie tukulotoʻi ʻene ongoʻi ʻita kia Sioó ʻo taʻengata. Naʻá ne taʻu 10 pē!
Naʻe fiemaʻu ʻe ʻAisea ke ne hangē ko Nīfaí. ʻE lava ke ne fakamolemoleʻi ʻa Siō, ʻo hangē pē ko hono fakamolemoleʻi ʻe Nīfai hono ongo tokouá. Pea kapau ʻe toe lea ʻaki ʻe Siō ha meʻa taʻeʻofa, te ne kole ange pē ke ʻoua te ne fai ia.
Naʻe ongoʻi loto-māfana mo loto-nonga. Naʻe hangē naʻe pehē ange ʻa e Laumālie Māʻoniʻoní, “ʻOkú ke fai ʻa e meʻa ʻoku totonú.”
“ʻAisea, ko e hā naʻá ke ako mei he ngaahi potufolofola ko ʻení?” Ko e fehuʻi ange ia ʻa Mamí.
Naʻe hanga hake ʻa ʻAisea. Naʻá ne pehē ange, “Kātaki, naʻá ku lau ha potufolofola kehe.” Naʻá ne talaange ki hono fāmilí ʻa e meʻa naʻe hoko ʻi he soká.
Naʻe fāʻofua ʻa Mami mo Teti kia ʻAisea. Naʻe pehē ange ʻe Teti, “Kātaki pē ʻi he anga taʻeʻofa atu ʻa Siō kiate koé. Naʻe ʻikai moʻoni ʻa e meʻa naʻá ne lea ʻakí. Ka ʻoku sai pē ke ongoʻi loto-mamahi ai.”
Naʻe malimali ʻa ʻAisea. “Mālō. Naʻá ku fuʻu ʻita ʻaupito ʻi ha kiʻi taimi. Ka ko ʻeni kuó u lau ʻa e folofolá, ʻoku ʻikai ke u fie ʻita kiate ia. ʻOku ou fie fakamolemoleʻi ia. Pea ʻoku ou ʻosi ongoʻi lelei ange!”
“ʻOku fakaʻofoʻofa ia!” Naʻe malimali foki mo Mami. “ʻOku ʻikai faingofua maʻu pē ʻa e faʻa fakamolemolé. Ka ʻokú ke moʻoni. ʻOku ʻaonga ia.”
Naʻe sio hifo ʻa ʻAisea ki heʻene folofolá. Kuo nau tokoniʻi ia! Naʻe mole atu ʻa e kavenga mamafa mei muʻá. Ka naʻá ne ongoʻi loto-māfana mo fonu ʻi he melinó.
Ngaahi tā fakatātā ʻa Alyssa Tallent