Te Ke Lava ʻo Fai ha Liliu

Fai ʻe Palesiteni Susan H. Porter

Palesiteni Lahi ʻo e Palaimelí

Mei ha ʻinitaviu mo ʻOlivia Kitameni mo Lesieli Pitasoni.

ʻOku ʻofa lahi ʻaupito ʻa e Tamai Hēvaní mo Sīsū Kalaisi ʻiate koe. Koeʻuhí ʻokú Na ʻofa ʻiate koe, kuó Na fakaafeʻi koe ke ke fai ha ngaahi fuakava, pe palōmesi mo Kinaua. ʻOku kamata ke ke fai ʻa e ngaahi palōmesi ko iá ʻi he taimi ʻoku papitaiso ai koé.

ʻOkú ke maʻu ʻa e meʻa-foaki ʻo e Laumālie Māʻoniʻoní hili hoʻo papitaisó. ʻOkú ke hoko ko ha mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻOku ʻuhinga ia ʻoku falala atu ʻa e Tamai Hēvaní ke ke tauhi hoʻo ngaahi fuakavá.

Ko e hā te ke lava ʻo fai ʻi hoʻo hoko ko e mēmipa kakato ʻo e Siasí ke tauhi hoʻo ngaahi fuakavá? Te ke lava ʻo talitali lelei ʻa e niʻihi kehé ki he Palaimelí. Te ke lava ʻo tangutu mo ha taha ʻoku foʻou pea tokoni ke nau ako ʻa e ngaahi hivá. Te ke lava ʻo tokoni ʻi he ngaahi ʻekitivitī ʻa e Palaimelí. Te ke lava foki ʻo hoko ko ha taki ʻi hoʻo fāmilí. Te ke lava ʻo kole ke fai ha lotu fakafāmili pe vahevahe ʻa e meʻa naʻá ke ako ʻi he Palaimelí.

Hili hoʻo maʻu ʻa e Laumālie Māʻoniʻoní, te ke lava ʻo vakai ki he ngaahi fiemaʻu ʻa e niʻihi kehé ʻi ha founga foʻou. Te ke lava ʻo lotu ki he Tamai Hēvaní mo pehē, “Tokoni mai ke u ʻiloʻi ʻa e tokotaha te u lava ʻo tokoniʻi ʻi he ʻaho ní.” ʻE lava leva ke tokoni atu ʻa e Laumālie Māʻoniʻoní ke ke fakatokangaʻi ha taha ʻoku tangutu toko taha pe tala atu ke ke fakalea ki haʻo kaungāmeʻa. ʻOkú ke fakahoko ha liliu lahi ʻi he taimi ʻokú ke fili ai ke tokoniʻi ʻa e niʻihi kehé. ʻOkú ke hoko ko ha mēmipa ʻo e Siasi ʻo e Tamai Hēvaní!

ʻOku ʻofa hoʻo Tamai Hēvaní ʻiate koe. ʻOkú Ne finangalo ke ke taki ʻaki hoʻo sīpingá ʻi ha feituʻu pē te ke ʻalu ki ai kae lava ke ke ʻomi ʻa e niʻihi kehé ke nau ofi ange kiate Ia. Ka, ʻoku ʻikai fiemaʻu ia ke ke fai toko taha pē ia. He ʻikai teitei tuku hono tokoniʻi koe ʻe he Tamai Hēvaní mo Sīsū Kalaisí. Te ke lava ʻo ongoʻi loto-falala koeʻuhí ʻokú ke ʻiloʻi ʻokú Na ʻiate koe. Te ke lava ʻo fakakaukauloto ki he tuʻu maʻu pē ʻa Sīsū ʻi hoʻo tafaʻakí.