“Ko e Taumuʻa Laukongá,” Kaumeʻa, Sānuali 2024, 36–37.
Ko e Taumuʻa Laukongá
Naʻe ʻikai saiʻia ʻa ʻEnitasi ke laukonga leʻolahi.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe fanongo ʻa ʻEnitasi ki he laukonga hono tuofefiné lolotonga ʻa e ako folofola fakafāmilí. Naʻá ne feinga ke muimui ki ai ʻi heʻene tepiletí (tablet). Ka naʻe faingataʻa ke tokanga taha ki he ngaahi leá.
Naʻe faingataʻaʻia maʻu pē kia ʻEnitasi ke ne laukonga. Naʻá ne toki ʻilo ʻi he taʻu kuo ʻosí naʻá ne tisilekisia. Ko e tisilekisiá ko ha faingataʻaʻia fakaako naʻe faingataʻa ai ke laukonga. Naʻe tuifio ʻe hono ʻatamaí ʻa e ngaahi foʻi leá mo e ngaahi mataʻitohí, pea naʻe ʻikai muimui hono matá ʻi he hokohoko totonu ʻo e ngaahi lea ʻi he pēsí ʻi heʻene feinga ke laukongá.
Naʻe ʻosi hono lau ʻe hono tuofefiné ʻene vēsí, pea lau ʻe hono tokouá ʻa e veesi hono hokó. Ka naʻe ʻikai ke lau ʻa ʻEnitasi. Naʻe ʻikai ke ne saiʻia ʻi he laukonga leʻolahí. Naʻe kiʻi tokoni hono ʻai ke matalalahi ʻa e ngaahi foʻi lea ʻi heʻene tepiletí. Ka naʻá ne fehiʻa ʻi he tuai mo e faikehe ʻene laukongá. Naʻá ne fai ha ngaahi fehalaaki lahi! Naʻe pau ke ne ngāue mālohi ki ha meʻa naʻe ngali faingofua ki he tokotaha kotoa pē.
ʻI he ʻosi ʻenau laukongá, naʻe mamata ʻa e fāmili ʻo ʻEnitasí ʻi ha foʻi vitiō. Naʻe fekauʻaki ia mo e polokalama ʻa e Fānaú mo e Toʻu Tupú.
Naʻe pehē ʻe ʻEletā Kongo ʻi he vitioó, “Fokotuʻu ha ngaahi taumuʻa fakataautaha ʻoku nau poleʻi mo fakatupulaki koe. ʻIloʻi ha ngaahi talēniti, ngaahi manako, mo ha ngaahi taukei foʻou.”*
Naʻe fakakaukau ʻa ʻEnitasi ki he ngaahi taumuʻa te ne lava ʻo fokotuʻú. Mahalo pē te ne lava ʻo ako ʻa e founga ki hono taʻo ʻa e kūkisí. Pe vaʻinga soka lelei ange!
Naʻá ne sio ki he Tohi ʻa Molomoná ʻi he funga tēpilé. Naʻe ʻikai ke fuʻu ongo fakafiefia ʻa e taumuʻa ke ne lelei ange ʻi he laukongá. Ka naʻá ne fiemaʻu ke ne lava ʻo lau folofola mo hono fāmilí.
Naʻá ne talaange ki heʻene Tetí, “ʻOku ou ʻiloʻi ʻa e meʻa ʻoku ou fiemaʻu ke hoko ko ʻeku taumuʻá.”
“Ko e hā?” Ko e fehuʻi ange ia ʻa Tetí.
Naʻe toʻo hake ʻe ʻEnitasi ʻa e Tohi ʻa Molomoná. “ʻOku ou fie lau leʻolahi ha veesi ʻo e Tohi ʻa Molomoná ʻi he ʻaho kotoa pē.”
Naʻe pehē ange ʻe Teti, “Ko ha taumuʻa lelei ʻaupito ia. ʻOkú ke fie kamata fakakū?”
“Taimí ni pē!”
Naʻe ʻalu ʻa ʻEnitasi ki hono lokimohé ʻo tāpuniʻi ʻa e matapáa. Naʻe ʻikai ke ne loto ke fanongo ki ai ha taha. Naʻá ne fakaava leva ʻene Tohi ʻa Molomoná. Naʻá ne tuifio ha niʻihi ʻo e ngaahi leá, ka naʻe miniti pē ʻe taha kuó ne fakaʻosi ʻa e veesi ʻuluakí. Naʻá ne fakakaukau, naʻe ʻikai ke fuʻu kovi ia.
Naʻe lau ʻe ʻEnitasi ha potufolofola ʻi he ʻaho kotoa pē. Naʻe faingata‘a! Naʻe ʻikai foki ke ne ongoʻi naʻe fakaʻau ke ne sai ange. Ka naʻá ne kei feinga pē.
Pea ʻi ha ʻaho ʻe taha ʻi he akó, naʻe pehē ange ʻene faiakó, “Tōatu! ʻOku ʻikai ke u tui ki he vave hoʻo akó.”
Na‘e sio hake ʻa ʻEnitasi mei heʻene ngāue fakaako mei ʻapí. “Moʻoni?”
Naʻe kamokamo ange ʻene faiakó. “ʻOkú ke fakalakalaka lahi ʻaupito.”
Naʻe sio hifo ʻa ʻEnitasi ki he ngaahi lea ʻi heʻene laʻipepá. Naʻe faingofua ange hono lau iá ʻi he tuʻunga ne nau ʻi ai kimuʻá. Naʻe tokoni ange foki ʻene taumuʻa ke akoako lau ʻa e folofolá ki heʻene ako ʻi ʻapiakó.
ʻI heʻene foki ki ʻapí, naʻá ne lele ki ʻolunga ke lau ʻene folofolá. ʻI heʻene sio ki he pēsí, naʻe kei vilo holo pē ʻa e ngaahi foʻi leá. Ka naʻe faingofua ange ke ʻiloʻi ʻa hono puʻakí.
Naʻe fiefia ʻa ʻEnitasi ke ako fakafāmili ʻa e folofolá ʻi he pō ko iá.
Naʻe pehē ange ʻe ʻEnitasi, “ʻE, Teti. ʻE lava ke u tokoni ki he lau folofolá ʻi he ʻahó ni?”
Naʻe malimali ange ʻa Teti. “Te u saiʻia ʻaupito ai!”
Naʻe muimui tokanga ʻa ʻEnitasi ki hono tokouá mo e ongo tuofāfiné ʻi heʻenau takitaha lau ha vēsí. ʻI he hoko hono taimí, naʻá ne lau māmālie ʻa e vēsí ke fakapapauʻi naʻá ne puʻaki totonu ʻa e foʻi lea kotoa pē. Hili ʻene laukongá, naʻá ne hanga hake. Naʻe malimali ange ʻa e tokotaha kotoa pē kiate ia.
Neongo naʻe ʻikai ko ha tokotaha laukonga lelei ʻa ʻEnitasi, ka naʻá ne ongoʻi laukau ʻaki ia. Naʻá ne ʻiloʻi ko e taimi te ne ngāue mālohi aí, ʻe ʻi ai maʻu pē ʻa e Tamai Hēvaní ke tokoniʻi ia.
Ngaahi tā fakatātā ʻa Kelly Smith