“Taimi Folofola Fiemoheá,” Kaumeʻa, Sānuali 2024, 30–31.
Taimi Folofola Fiemoheá
Neongo naʻe pongipongia, ka naʻe ʻiloʻi ʻe ʻElevia naʻe ʻaonga hono lau ʻo e folofolá.
Naʻe hoko ʻa e talanoá ni ʻi Noaue.
Naʻe ʻā hake ʻa ʻElevia ki he leʻo ʻo e Tetí. Naʻe pehē ange ʻe Teti, “Taimi ki he lau folofolá.”
Naʻá ne tangutu hake ʻi hono mohengá ʻo mili hono mata fiemoheá. Ne kei fakapoʻuli pē ʻa tuʻa. Pea naʻe momoko! Naʻe ʻikai fie mavahe ʻa ʻElevia mei hono mohenga māfaná.
Naʻe pehē ʻe Mami ko e lau folofolá ʻa e founga te nau lava ai ʻo ʻiloʻi lelei ange ʻa Sīsuú. Ka naʻe faingataʻa hono lau ʻa e folofolá ʻi he pongipongi kotoa pē!
Naʻe lue māmālie hake ʻa ʻElevia ʻi he sitepú ʻo tangutu ʻi he tafaʻaki ʻo hono taʻokete ko Sikilití, ʻi he seá. Naʻá ne fāʻofua ʻi ha pilo mo fusi hake hono kafu māfaná. Naʻe ʻi he loki ʻe tahá hono ongo tuongaʻané ʻo kamata ʻena kalasi semineli ʻi he ʻinitanetí.
Naʻe tatangi ʻa e telefoni ʻa Tetí. Naʻá ne tali ia, pea ʻasi mai ʻa e kau mēmipa ʻo e fāmilí ʻi he komipiutá. Naʻe teuteu mo maau ʻa ʻAnitī Livi ki he ngāué. Naʻe kei vala mohe pē honau kāinga ko Tolofií, ʻo hangē pē ko ʻEleviá.
Naʻe taʻataʻalo atu ʻa ʻElevia kiate kinaua ʻi he telefoni vitioó mo mamao. Naʻa nau fakahoko maʻu pē ʻa e taimi lau folofolá mo ʻAnitī Livi mo Tolofī. Naʻá na nofo ʻi ha feituʻu ʻe taha ʻi Noaue ʻo mamaʻo ʻaki ha houa ʻe fā. Naʻe faingofua ange ke nau lau kotoa ʻa e folofolá ʻi he taimi ne ʻi ai ai haʻanau taumuʻa ke fetuʻutaki ʻi he telefoní ʻi he ʻaho kotoa pē. Pea naʻe saiʻia ʻa ʻElevia ke sio ki hono tokoua ʻakí!
Hili ha ngaahi miniti siʻi mei ai, naʻe kau mai foki mo Mami ʻi he telefoní. Naʻá ne pehē atu “Hei, kau fefine.” Naʻá ne fononga ki he ngāué ʻi he uiké ni, ka naʻá ne kei telefoni mai pē ki he taimi folofola fakafāmilí.
Naʻa nau fai ha lotu. Naʻe fakaava leva ʻe ʻElevia ʻene folofolá. Naʻa nau lau fakataha ʻa e Tohi ʻa Molomoná. Naʻe taufetongi ʻa e tokotaha kotoa ʻi hono lau ʻo e ngaahi vēsí.
Naʻe fakafanongo ʻa ʻElevia ki he laukonga ʻa e niʻihi kehé, ka naʻe faingataʻa ke ne ʻāʻā. Kuo ʻosi tō hifo ʻa Sikiliti ia ʻo toe mohe ʻi he seá. Naʻe hokaʻi ia ʻe ʻElevia. Ka naʻe tohoakiʻi ʻene tokangá ʻe ha meʻa he vēsí.
Naʻe lau ʻe Tolofī ʻo pehē, “Pea naʻá ku vakai ki ha vaʻa ukamea, pea naʻe ʻalu atu ia ʻi he veʻe vaitafé, ʻo aʻu mai ki he fuʻu ʻakau ʻa ia naʻá ku tuʻu ʻo ofi ki aí.”*
“ʻOku ou ʻilo ʻa e talanoa ko ʻení!” Ko e lea ange ia ʻa ʻEleviá. “Ko e misi ia ʻa Līhaí.” Kuó ne sio ʻi ha vitiō fakafolofola fekauʻaki mo ia. Naʻe ʻi ai ha fuʻu ʻakau fakaʻofoʻofa mo ha fua hinehina, pea naʻe pukepuke ʻe he kakaí ʻa e vaʻa ukameá ke tokoni ke nau aʻu ki ai.
Naʻe fehuʻi ange ʻe Mami, “ʻOkú ke manatuʻi pe ʻoku tatau ʻa e vaʻa ukameá mo e hā?”
“Ko e folofolá?”
“ʻOku moʻoni ia!” Ko Teti ange ia. “ʻOku akoʻi ʻe Nīfai kimui ange ʻoku hangē ʻa e vaʻa ukameá ko e folofola ʻa e ʻOtuá. ʻOkú ke pehē te tau lava fēfē ʻo piki ki he vaʻa ukameá ʻo hangē ko e kakai ʻi he misi ʻa Līhaí?”
“ʻOku tau puke ʻa e vaʻa ukameá ʻi he taimí ni!” Naʻe toʻo hake ʻe ʻElevia ʻene Tohi ʻa Molomoná. “ʻI hono fakahoko ʻa e taimi lau folofolá.”
Naʻe kamokamo pē ʻa Mami. “ʻI he taimi ʻoku tau lau ai ʻa e folofolá, ʻoku tau toe ofi ange ai kia Sīsū Kalaisi. Hangē pē ko e ofi ange ʻa e kakaí ki he ʻakau ʻo e moʻuí ʻi heʻenau piki ki he vaʻa ukameá.”
ʻI he hoko atu ʻenau laú, naʻe fakakaukau ʻa ʻElevia ʻokú ne piki ki he vaʻa ukameá ʻo lue ki he fuʻu ʻakau fakaʻofoʻofá. Naʻe ʻikai ke ne toe ongoʻi fiemohea.
ʻIkai fuoloa kuo taimi ke nau mavahevahe. Naʻe fiemaʻu ke ʻalu ʻa Livi mo Mami ki he ngāué. Pea naʻe fiemaʻu ʻe ʻElevia, Sikiliti, mo Tolofī ke nau teuteu ki he akó.
“Nofo ā ē!” Naʻe taʻataʻalo ʻa ʻElevia ki hono fāmilí ʻi he komipiutá. “ʻOfa atu!”
ʻI he lele hifo ʻa ʻElevia ki lalo ke teuteu ki he akó, naʻá ne ongoʻi māfana ʻi hono lotó. Pea naʻe ʻikai koeʻuhí ko hono sipi kafu māfaná. Naʻá ne ʻiloʻi ko e ongoʻi māfaná ko hono talaange ia ʻe he Laumālie Māʻoniʻoní ʻoku moʻoni ʻa e Tohi ʻa Molomoná. Ne hoko ia ko ha founga lelei ʻaupito ke kamata ʻaki ʻa e ʻahó!
Tā fakatātaaʻi ʻe Hector Borlasca