Mālō e Lelei mei Taileni!

Ako fekauʻaki mo e fānau ʻa e Tamai Hēvaní ʻi he funga ʻo e māmaní.

Ko Tailení ko ha fonua ia ʻi ʻĒsia Tonga-hahake. ʻOku meimei ko e kakai ʻe toko 72 miliona ʻoku nau nofo ʻi aí.

Lea Fakafonuá

Ko e lea faka-Tailení ko e lea fakaʻofisiale ia ʻa e fonuá. ʻOku mataʻitohi ʻe 72 ʻa e ʻalafapeti Faka-Tailení.

ʻI he lea faka-Tailení, te ke lava ʻo talitali lelei haʻo kaungāmeʻa ʻaki haʻo pehē ange, “kin khao reu yang.”

ʻOku ʻuhinga ia, “Kuó ke ʻosi kai?”

Kātoanga Songkran

ʻOku fakafiefiaʻi ʻe he kakai ʻi Tailení honau taʻu foʻou ʻaki ʻa e tau ʻaki e vai lahi taha ʻi he māmaní. ʻOku nau feafuhiʻaki ʻa e vaí ke nau manatuʻi ke fufulu ʻa e ngaahi meʻa ʻoku koví. ʻOku feʻunga ia mo ha ʻaho ʻe tolu!

ʻAna ʻo e Taiká

Ko e Temipale ʻAna ʻo e Taiká ko ha temipale Puta ia ʻoku moihū mo lotu ai ha kakai tokolahi. Ke aʻu ki aí, kuo pau ke ke kaka ʻi ha sitepu ʻe 1,260 ʻo ha moʻunga. ʻOku ʻi ai ha ngaahi fakaʻilonga ʻo e pesipesi ʻo e taiká ʻi he ʻaná!

Ngaahi Māketi Tētē

ʻI Tailení, ʻe lava ʻa e kakaí ʻo fakatau ʻi ha ngaahi vaka ʻi he vaitafé, hangē ha fanga kiʻi falekoloa tētē īkí. Ko e vaitafé ko ha founga ia ʻe taha ke fononga takai ai ʻi he kolomuʻá. ʻOku lahi ha ngaahi fale ʻoku tuʻu ʻi he ngaahi pou ke nau ʻi ʻolunga ʻi he fukahi vaí.

ʻEkitivitī

Uʻu ʻe he Ngatá ʻa e Hikú

Fili ha taha ke ngata 1 mo ha taha kehe ke ngata 2. ʻOku tuʻu kotoa ʻa e toengá ʻi mui ʻi he ngata 1 pea piki ki he tokotaha ʻi muʻa ʻiate kinautolú. ʻOku feinga ʻa e ngata 2 ke fakalaka atu ʻi he ngata 1 pea ʻai ʻa e tokotaha fakamuimui taha ʻi he lainé ke tukuange. Ko ha taha pē ʻoku tukuangé ʻoku mate ia!

Founga Feimeʻatokoní

Somu Tami (Som Tam)

Ko e salati lesi lanu matá ko ha founga feimeʻatokoni angamaheni ia ʻi Taileni. Ko ha founga ʻeni te ke lava ʻo ʻahiʻahiʻi!

1. ʻI ha fuʻu poulu lahi, tuifio ai ha sepuni lalahi suka paame ʻe 1 1/2 (pe suka melomelo), sepuni lalahi ʻe 1 1/2 ʻo e soosi iká (pe soia sōsí), mo e sepuni lalahi ʻe 2 ʻo e huhuʻa laimí . Heu kae ʻoua kuo vaia ʻa e suká.

2. Hifi momo iiki ha foʻi kāliki ʻe 2 mo e polo fifisi lanu kulokula ʻe 1 pe lahi ange. Hifi ha piini lanu mata ʻe 3. Hifi ha foʻi temata ʻe 1 ki ha kongokonga iiki.

3. Tele ha foʻi lesi lanu mata ʻe 1 (pe foʻi ʻāpele lanu mata ʻe 3). Tama pe hifi ki ha ngaahi konga manifi.

4. Tānaki atu ʻa e meʻa kotoa ki he poulú pea tuifio.

Fakamālō ki he fāmili ʻo Paniaá ʻi hono vahevahe mai ʻa e founga feimeʻatokoni ko ʻení!

Ngaahi tā fakatātā ʻa Mackinzie Rekers