“Ko e Hā ʻa e Meʻa ʻOkú Ke Fakakaukau Ki Aí?” Kaumeʻa, Sānuali 2024, 42.

Ko e Hā ʻa e Meʻa ʻOkú Ke Fakakaukau Ki Aí?

ʻI he taimi ʻoku ou fokotuʻu ai ha ngaahi taumuʻá, ʻoku faʻa iku ʻo ngalo kinautolu ʻiate au. Te u aʻusia fēfē ʻeku ngaahi taumuʻá?

—Feinga ʻi Leikaviki

Siʻi Feinga,

ʻOua te ke hohaʻa ki ai: ʻOku ʻikai ko koe toko taha pē ʻoku fokotuʻu pea ngalo ʻa e ngaahi taumuʻá. Ko ha meʻa ʻeni ʻoku faingataʻaʻia ai ha kakai tokolahi. ʻOku tau lava lelei kotoa pē ʻo fokotuʻu ha ngaahi taumuʻa. Ko e feinga moʻoni ke aʻusia ʻa e ngaahi taumuʻa ko iá—ko e konga faingataʻá ia. Ko ha ngaahi fakakaukau ʻeni ʻe ala tokoni atu!

ʻOfa atu,

Ko e Kaumeʻá

Fakaʻānaua ke lahi kae kamata siʻisiʻi. ʻOku lelei ʻaupito ke fakatukupaaʻi koe. Kae manatuʻi ʻoku mālohi foki mo e fanga kiʻi taumuʻa īkí. “ʻOku fakahoko ʻe he fanga kiʻi meʻa iiki mo faingofuá ʻa e ngaahi fuʻu meʻa lalahi” (ʻAlamā 37:6).
ʻAi ke mahino. “Te u tokoni ʻi ʻapi.” Ko ha taumuʻa sai pē ʻeni, ka ʻoku kiʻi taʻe mahino. “Te u tokoni ʻi ʻapi ʻaki ʻeku fakamaau ʻeku ngaahi meʻá ʻi he ʻaho kotoa pē.” Ko ha taumuʻa lelei ʻaupito ʻeni. ʻOku mahino. Ko ha palani ia.
Vahevahe hoʻo taumuʻá. Talanoa ki hoʻo taumuʻa mo hoʻo mātuʻá, faiakó, pe kaungāmeʻá. Kole ange ke nau poupouʻi koe. Ko e taimi ʻe niʻihi ko e tokoni pē ʻokú ke fiemaʻú ke ʻi ai ha taha ke ne vakaiʻi mo fakalotolahiʻi koe.
ʻAi ha ngaahi fakamanatu. Kapau ʻokú ke fie manatuʻi hoʻo ngaahi taumuʻá, hiki kinautolu. Tuku ha tatau ʻo hoʻo ngaahi taumuʻá ʻi ha feituʻu ʻa ia te ke sio ai kiate kinautolu ʻi he ʻaho kotoa pē. ʻAi ke lanu kehekehe mo mohu founga!
Maʻu ʻa e tuí. Naʻe pehē ʻe Palesiteni M. Lāsolo Pālati, “Kuo pau ke tau tui ki he ʻOtuá. Kuo pau ke tau tui ki he ʻEiki ko Sīsū Kalaisí. Pea ʻoku fuʻu fiemaʻu moʻoni ke tau tui kiate kitautolu pē.”^* Te ke lava ʻo fai ia! ʻE tokoniʻi koe ʻe he ʻOtuá.