Pōpoaki mei he Kau Taki Fakaʻēliá
“ʻO Liunga Taha Pē”
ʻI he meimei taʻu ʻe 40 ʻo e hoko ‘a Palesiteni Lāsolo M. Nalesoni ko ha fakamoʻoni makehe ʻo e ʻEikí, kuó ne vahevahe maʻu pē ʻene fakamoʻoni pau mo taʻeueʻia ki he Fakalelei ʻa Sīsū Kalaisí. ʻOku tau vakaiʻi heni ha niʻihi ʻo ʻene ngaahi pōpoaki mālohi fekauʻaki mo e feilaulau taupotu taha ʻa hotau Fakamoʻuí.
Ko e Mahino ʻa e Palani ʻo e Fakamoʻuí
“Kimuʻa pea mahino kiate kitautolu ʻa e Fakalelei ʻa Kalaisí . . . kuo pau ke tomuʻa mahino kiate kitautolu ʻa e Hinga ʻa ʻĀtamá. Pea kimuʻa pea mahino kiate kitautolu ʻa e Hinga ʻa ʻĀtamá, kuo pau ke tomuʻa mahino kiate kitautolu ʻa e Fakatupú. ʻOku fekāingaʻaki ʻa e ngaahi kongokonga mahuʻinga ʻe tolu ko ʻeni ʻo e palani ʻo e fakamoʻuí.”
Naʻe fakamatalaʻi ʻe ʻEletā Nalesoni ʻi heʻene lea1 ʻi he Konifelenisi Lahi ʻo ʻEpeleli 1996, ʻo pehē:
“Naʻe fakaʻosi ʻaki ʻa e Fakatupú ʻa hono tuku ʻo ʻĀtama mo ʻIvi ki he Ngoue ko ʻĪtení. . . . Ko ha fakatupu fakapalataisi ia, ko ha fakatupu naʻe fiemaʻu ki ai ha liliu mahuʻinga kimuʻa pea toki lava ke na fakakakato ʻa e fekau ke maʻu ha fānau pea ʻomi ai ha ngaahi sino fakamatelie maʻá e ngaahi foha mo e ʻofefine fakalaumālie ʻa e ʻOtuá ʻi he maama fakalaumālié.
“Naʻe fokotuʻu ʻe he Hinga ʻa ʻĀtama (mo ʻIví) ʻa e fakatupu fakamatelié pea fakahoko ai ʻa e ngaahi liliu ne fiemaʻu ki hona sinó, kau ai ʻa e fetafeaki ʻo e totó mo ha ngaahi liliu kehe foki. Naʻe lava heni ke na maʻu ai ha fānau. Naʻá na moʻulaloa foki mo hona hakó ki he laveá, mahamahakí, mo e maté.
“Naʻe hoko ʻa e ʻahiʻahí, fakatupu ha moʻuí, mo e hoko ʻo matuʻotuʻá ko e ngaahi konga kotoa ia ʻo e—pea naʻe mahuʻinga ʻa e mate fakatuʻasinó ki he—‘palani lahi [ʻa e ʻOtuá] ki he fiefiá.’2
“Ka ko e moʻui fakamatelié, neongo ʻene fakaʻofoʻofá, naʻe ʻikai ʻaupito ko e taumuʻa taupotu ia ʻa e palani ʻa e ʻOtuá. Ko e moʻui mo e mate ʻi he foʻi palanite ko Māmaní ko ha founga pē ia ke aʻusia ai ʻa e palaní.”
Naʻe hoko atu e fakamatala ʻa ʻEletā Nalesoní ʻaki haʻane lea ʻaki ʻa e tohi ʻa Paulá:
“‘He ʻoku hangē ʻoku mate kotoa pē ʻia ʻĀtamá, ʻe pehē foki e moʻui kotoa pē ʻia Kalaisi.’3
“Naʻe hoko ʻa e Fakalelei ʻa Sīsū Kalaisí ko e fakatupu taʻe-faʻa-maté. Naʻá Ne finangalo lelei ke fakaleleiʻi ha fono ne maumauʻi kimuʻa.4 Pea ʻi Hono taʻataʻá, ʻe lava ai hono sinó5 mo hotau sino fakamatelié ʻo haohaoa . . . Naʻe akoʻi ʻe Paula “ʻe ʻikai faʻa maʻu ʻe he kakanó mo e totó ʻa e puleʻanga ʻo e ʻOtuá; . . . ke ʻai ʻe he maté ni ʻa e taʻe-maté.”6
Ko e Misiona Fisifisimuʻa ʻo Sīsū Kalaisí
Naʻe lea ʻa ʻEletā Nalesoni ʻi ha fakataha lotu ʻi BYU7 hili ha ngaahi taʻu mei ai ʻo ne fakahaaʻi ʻene houngaʻia taʻengata koeʻuhí ko e meʻaʻofa ko hotau Fakamoʻui pē ko Sīsū Kalaisí te Ne lava ʻo foakí.
“Lolotonga ʻa e fononga taimi nounou ʻa e Fakamoʻuí ʻi he moʻui fakamatelié, naʻá Ne ikunaʻi ha ongo taumuʻa kāfakafa ʻe ua: Ko e taha ko ʻene ‘ngāué ʻeni mo [Hono] nāunaú—ke fakahoko ʻa e moʻui taʻe-faʻa-mate mo e moʻui taʻengata ʻa e tangatá.’
“. . . ʻoku tau ʻilo [ko e taumuʻa ko ʻení] ko e Fakaleleí.
“Naʻe ʻOʻona ʻa e misiona ko iá. ʻI hono ʻaloʻi Ia ʻe ha faʻē fakamatelie mo ha Tamai taʻe-faʻa-maté, ko Ia toko taha pē te Ne lava ʻo foaki ʻEne moʻuí pea toe maʻu iá.8 Naʻe taʻe-fakangatangata mo taʻengata ʻa e ngaahi nunuʻa nāunauʻia ʻo ʻEne Fakaleleí. Naʻá Ne toʻo ʻa e huhu ʻo e maté pea ngaohi ke fakataimi pē ʻa e mamahi ʻo e faʻitoká.9 Naʻe ʻiloʻi ʻa Hono fatongia ki he Fakaleleí kimuʻa ʻi he Fakatupú mo e Hingá. Naʻe ʻikai ngata pē ʻi heʻene ʻomi ha founga moʻó e toetuʻu mo e moʻui taʻe-faʻa-mate ʻa e faʻahinga kotoa ʻo e tangatá, ka ke malava foki ʻo fakamolemoleʻi ai mo ʻetau ngaahi angahalá—ʻi ha ngaahi makatuʻunga naʻá Ne fokotuʻu. Pea naʻe fakaava ʻe Heʻene Fakaleleí ʻa e hala ke tau lava ai ʻo toe fakataha mo Ia mo hotau ngaahi fāmilí ʻo taʻengata. ʻOku tau lau ʻa e fakakaukau ko ʻení ko e moʻui taʻengatá—ʻa e meʻaʻofa maʻongoʻonga taha ʻa e ʻOtuá ki he tangatá.10
“He ʻikai lava ʻe ha taha kehe ʻo fakahoko ʻa e Fakaleleí. He ʻikai lava ʻe ha toe taha, ʻo aʻu pē ki he koloaʻia tahá mo e mālohi tahá, ʻo fakahaofi ha laumālie ʻe taha—ʻo aʻu pē ki hono laumālie ʻoʻoná.11 Pea he ʻikai ha toe taha ʻe fiemaʻu pe fakangofua ke ne mate koeʻuhí ko e fakamoʻui taʻengata ʻa ha taha kehe. Naʻe fakahoko ia ʻe Sīsū “ʻo liunga taha pē.”12
Ko e Ongoongo Fakafiefia ʻo e Palani ʻa e ʻOtuá
ʻI he hoko ʻa Palesiteni Nalesoni ʻi he taimí ni ko ha palōfita, tangata kikite mo ha tangata maʻu fakahā maʻa hotau kuongá, ʻoku ʻikai toe fehuʻia ʻa ʻene fakamoʻoni mālohi kia Sīsū Kalaisí. Naʻá ne lea ʻi he Konifelenisi Lahi13 ʻo ʻOkatopa 2023 lolotonga ia ʻene fakaakeake mei ha lavea ʻi hono tuʻá.
“ʻI heʻeku fekuki mo e mamahi fau naʻe tupu ʻi hoku fokoutuá, kuó u ongoʻi houngaʻia lahi ange ʻia Sīsū Kalaisi mo e meʻaʻofa taʻe-mafakakaukaua ʻo ʻEne Fakaleleí. Fakakaukau ki ai! Naʻe fuesia ʻe he Fakamoʻuí ʻa e “ngaahi mamahi mo e ngaahi faingataʻa pea mo e ngaahi ʻahiʻahi kehekehe kotoa pē”14 koeʻuhí ke Ne lava ʻo fakafiemālieʻi kitautolu, fakamoʻui kitautolu, mo fakahaofi kitautolu, ʻi he taimi ʻo e faingataʻá.15 Naʻe fakamatalaʻi ʻe Sīsū Kalaisi ʻEne aʻusia ʻi Ketisemani mo Kalevalé: “Ko [ha] mamahi naʻe langaki ai ʻa ʻeku tetetete ʻaʻaku, ʻa ia ko e ʻOtua, ko e tokotaha ʻoku mālohi tahá, koeʻuhí ko e mamahi, pea mo e tafe ʻa e totó ʻi he ava kotoa ʻo hoku kilí.”16 Kuo fakatupu ʻe hoku fokoutuá ʻeku toutou toe fakakaukau ki he “māfimafi ʻo e Tokotaha Māʻoniʻoni ʻo ʻIsilelí.”17 Lolotonga ʻeku fakaakeaké, kuo fakaeʻa ʻe he ʻEikí Hono mālohi fakalangí ʻi ha ngaahi founga nonga mo ʻikai toe fakaʻuliʻulilātai.
“ʻOku hoko ʻa e palani ʻa ʻetau Tamai Hēvaní ko ha palani haohaoa koeʻuhí ko e Fakalelei taʻe-fakangatangata ʻa Sīsū Kalaisí! ʻOku toʻo ʻe he mahino ʻo e palani fakaofo ʻa e ʻOtuá ʻa e meʻa fakamisitelí mei he moʻuí mo e taʻepaú mei hotau kahaʻú. ʻOkú ne fakaʻatā kitautolu takitaha ke tau fili ʻa e founga te tau moʻui ai ʻi heni ʻi he māmaní mo e feituʻu te tau nofo ai ʻo taʻengatá.”
Naʻe palōmesi mai ʻe Palesiteni Nalesoni te tau lava ʻo maʻu ʻa e mālohi mo e nonga ʻi hotau māmani faingataʻá kapau te tau ako ke ‘fakakaukau fakasilesitiale’, ke tau fakakaukau fakalaumālie pea moʻui ʻi ha founga ʻoku tau taau ai mo e ngaahi tāpuaki ʻo e taʻengatá.
Naʻá ne kole mai, “Ko ia, siʻoku ngaahi tokoua mo e tuofāfine ʻofeina, ko e hā ʻa e founga mo e feituʻu pea mo hai ʻokú ke fie nofo taʻengata mo iá? Te ke fili pē.
“ʻI he taimi ʻe fai ai hoʻo filí, ʻoku ou fakaafeʻi koe ke ke sio lōloa—ʻaki ha vakai ʻoku taʻengatá. Fakamuʻomuʻa ʻa Sīsū Kalaisi, he ʻoku fakafalala ʻa e moʻui taʻengatá ki hoʻo tui kiate Ia mo ʻEne Fakaleleí.18 ʻOku toe fakafalala foki ia ki hoʻo talangofua ki Heʻene ngaahi fonó. ʻOku teuteu ʻe he talangofuá ʻa e hala ki he moʻui fiefiá maʻau ʻi he ʻahó ni, mo e pale taʻengata ʻi he kahaʻú.”