Moihū ʻi he ʻOfa ʻi Papua Niu Kini

Loki Ongoongo

ʻI ha pongipongi Sāpate fakaʻofoʻofa ʻi he konga kimui ʻo e taʻu 2023, ʻi ha miniti ʻe hongofulu tupu kimuʻa pea kamata ʻo e lotú, naʻe ʻosi fakanofonofo ʻa e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi honau falelotu ʻoku ʻikai ha holisí, ʻo nau hiva ha ngaahi himi lolotonga ʻenau talitali ke kamata ʻa e lotú.

ʻI he fale ko ʻeni ʻoku fakavaʻe ʻaki ha fanga foʻi poú, naʻe ongona honau leʻo leleí ʻi he angi ʻa e matangí ki he vaotā ʻi he tafatafaʻakí, ʻo fakaafeʻi mai ai ha laumālie ʻo e ʻaʻapa mo e fakahā kiate kinautolu kotoa pē naʻe omi ke moihū ki he ʻEikí. Naʻe aʻu ki he longaʻifānau ʻe toko 40, ne nau tangutu loto-ʻapasia ʻi he falikí, naʻe ʻi ai honau faingamālie ke hiva fakataha, pea naʻe ongo fakalaumālie ia ki he haʻofangá ʻi he lea faka-Pilitāniá, faka-Toka Pisiná, pea mo ʻenau lea tuʻufonuá.

ʻOku mahino ʻa e anga-fakamatuʻotuʻa ʻa e kakai kei talavou ʻo e Siasí ʻi hení, naʻe fakafatongiaʻaki ha fefine taʻu 19 ʻa hono tataki mo tokangaʻi ʻo e kau finemui taʻu 11–18. Lolotonga iá, naʻe tāpuakiʻi mo tufaki ʻe he kau talavou ʻo e toʻu tatau ʻa e sākalamēnití, ʻo fakakakato ai honau ngaahi fatongia toputapú.

Naʻe aʻu mai ʻa e kau ʻaʻahi ne nau fai ʻa e leá pea naʻe talitali kinautolu ʻaki ha ʻū kahoa naʻe tui mei he lau ʻo e ʻakaú. Naʻa nau takitaha ongoʻi ʻa e māfana, ʻofa, mo e houngaʻia ʻo e kau muimui loto-fakatōkilalo mo mateaki ko ʻeni ʻo Sīsū Kalaisí.

ʻOku faʻa fakahoko maʻu pē ʻa e faʻahinga fakatahaʻanga melino pehení ʻi he ngaahi tapa kehekehe ʻo Papua Niu Kini ʻi he Sāpate kotoa. ʻOku tupulaki vave ʻa e Siasí ʻi he fonua ko ʻeni ʻo e kakai ʻe toko 10 miliona tupú.

Hili ʻa e fakataha ʻi he pongipongi fakaʻofoʻofa ko ʻení, naʻe fononga atu ʻa ʻEletā Peuli Pēneti, ko e ʻEtivaisa Fakafaitoʻo ʻo e Misioná mei he ʻĒliá, mo hono uaifi ko Kilisitiná, fakataha mo e palesiteni misioná mo hono uaifí, ʻi ha miniti ʻe 90 nai ʻi ha ngaahi hala kelekele tokakovi ki he tukui kolo takatakai ʻo e kolo ko Laé. ʻOku ʻuha ʻa e feituʻú ni ʻi ʻi he ʻaho kotoa pē ʻo e taʻú, pea ʻoku fakaholomamata ʻa e fakaʻofoʻofa mo lanu mata ʻa e feituʻú. ʻOku meimei ke langa ʻa e fanga kiʻi falé ʻo fakavaʻe ʻaki ha fanga fuʻu pou koeʻuhí ko e taimi ʻe hoko mai ai ʻa e tāfeá, he ʻikai ke nau tafia ai.

ʻI he tupulaki ʻa e tokolahi ʻo e fonuá, ʻoku ʻi ai ha toketā pē ʻe toko taha ki he kakai ʻe toko 20,000. ʻOku kau ʻi he ngaahi faingataʻa fakafaitoʻo fakalotofonuá ʻa e mahaki fatafata vaivaí, mofi tengí, mo e malēliá. Ko e taumuʻa ʻo e ʻaʻahi ʻa ʻEletā Pēneti ki he fonua ko ʻení ke vakaiʻi ʻa e ngaahi meʻa fakafaitoʻo ʻoku maʻu ʻi Laé. Naʻá ne ʻohovale lahi ʻi he tokolahi ʻo e niʻihi naʻe ʻi he ngaahi falemahaki ʻe tolu naʻá ne ʻaʻahi ki aí.

Lolotonga ʻa e ʻaʻahi ʻa e ongomātuʻa Pēnetí naʻá na toe feʻiloaki foki mo e kau faifekaú peá na talanoa kiate kinautolu fekauʻaki mo e ngaahi palopalema fakafaitoʻó mo e founga ke tauhi ai ʻa e moʻui leleí.

ʻOku ʻi Papua Niu Kini ha misiona ʻe ua (Misiona Lae mo e Pooti Molasipei) pea ʻokú na maʻu ha kau faifekau ʻe toko 100 tupu ʻoku nau ngāue tokoni ki he kakai ʻo e fonua fakaʻofoʻofa ko ʻení. ʻI hono tauhi ke mālohi mo moʻui lelei ʻa e kau faifekau ko ʻení ʻoku lava ai ke nau ngāue tokoni lelei ange ki he kakai ʻi he tukui koló mo e ngaahi komuinitií.