Ngaahi peesi fakalotofonuá
Fakamanatu ʻa e Toetuʻú ʻi he Loto-ʻApasia mo e Houngaʻia
ʻI he fakakaukau ki he faʻahitaʻu Toetuʻú, naʻe pehē ai ʻe Palesiteni Lāsolo M. Nalesoni ʻi he Konifelenisi Lahi ʻo ʻEpeleli 2018:
“He ʻikai ha toe meʻa ʻe lelei ange ka ko hono fakamanatua e meʻa mahuʻinga taha kuo hoko ʻi he māmani ko ʻení ʻaki ʻetau moihū ki he tokotaha mahuʻinga taha kuo moʻui ʻi he māmani ko ʻení. ʻI he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau hū kiate Ia naʻe kamata ʻEne Fakalelei taʻefakangatangatá ʻi he Ngoue ko Ketisemaní. . . .
“Ka ne taʻeʻoua ʻa e Fakalelei taʻefakangatangata hotau Huhuʻí, he ʻikai ha ʻamanaki lelei ʻa ha taha ʻiate kitautolu ke toe foki ki heʻetau Tamai Hēvaní. Ka ne taʻeʻoua ʻEne Toetuʻú, ko e ngataʻangá pē ʻa e maté. Naʻe hoko ʻa e Fakalelei ʻa hotau Fakamoʻuí ke malava ai ʻa e moʻui taʻengatá pea hoko ʻo moʻoni ʻa e moʻui taʻe-faʻa-maté ki he taha kotoa.”
ʻOku vahevahe heni ʻe Palesiteni Paula Tukulua Laumape, Tokoni ʻUluaki ʻi he Kau Palesitenisī ʻo e Siteiki ʻAokalani Papatoetoé, ʻene fakakaukau ki he Fakalelei ʻo hotau Fakamoʻui ko Sīsū Kalaisí, pea mo e founga ʻokú ne fakamanatua ai mo hono fāmilí ʻa e Toetuʻú ʻi he loto-ʻapasia mo e houngaʻiá:
“ʻI heʻeku hoko ko ha papi ului ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, kuó u ako ke fakatefito ʻeku fakamanatua ʻa e Toetuʻú ʻi hotau ʻEiki ko Sīsū Kalaisí he ko Ia ʻa e ʻuhinga ʻo e Toetuʻú. ʻOku ʻikai ʻuhinga ia ke u mālōlō mei he ngāué pea ō ʻo taumātaʻu mo e ngaahi kaungāmeʻá, ka ko ha taimi makehe ia ke fakamanatua—mo hotau fāmilí—ʻa e moʻui mo e ngaahi feilaulau ne fai ʻe hotau ʻEiki ko Sīsū Kalaisí maʻatautolú. Ko Ia ʻa e meʻaʻofa maʻongoʻonga taha kuo foaki mai ʻe heʻetau Tamai Hēvaní.
“ʻOku fakamanatua ʻe homau fāmilí ʻa e faʻahitaʻu Toetuʻú, ʻaki ʻemau fakatahataha mai ʻo maʻu meʻatokoni fakataha, mamata ʻi he ngaahi faiva ʻa e siasí, pea talanoa fekauʻaki mo e feilaulau fakalelei ʻa hotau ʻEiki ko Sīsū Kalaisí mo ʻEne ikunaʻi ʻa e maté. Naʻe fakamanatu mai ʻe he ʻEikí ko Ia ʻa e toetuʻú pea mo e moʻuí. Ko ia ʻoku tui kiate Iá, neongo ka ne mate, ʻe moʻui pē ia. ʻOku fakamanatu maʻu pē ʻa e feilaulau ʻa hotau ʻEikí maʻatautolú ʻi he Sāpate kotoa ʻi hono maʻu ʻo e sākalamēnití. ʻOku tau feinga ke muimui ki Heʻene ngaahi akonakí mo ʻEne ngaahi sīpingá, ke ʻaʻahi ki he mahakí pea tokoniʻi ʻa kinautolu ʻoku fiemaʻu ʻetau tokoní. ʻOku ou houngaʻia taʻengata koeʻuhí ko e ʻofa ʻa ʻetau Tamai Hēvaní mo Hono ʻAlo ko Sīsū Kalaisí. Ke fakahaaʻi ʻeku ʻofa kiate Kinauá, ʻoku ou feinga ke tauhi ʻena ngaahi fekaú pea mo ʻeku ngaahi fuakava mo Kinauá.
“Ko ʻeku fakamoʻoní ʻeni ʻi he loto-fakatōkilalo, ʻi he huafa ʻo Sīsū Kalaisí, ʻēmeni.”