1. Die Ontwikkeling van Herstellingsvermoë onder Spanning

Hierdie afdeling bevat algemene voorstelle vir die voorkoming van oormatige spanning en die hantering van spanningsvolle tye wanneer dit voorkom. Hierdie voorstelle kan nuttig wees vir alle sendelinge.

A. Reageer Positief op Spanning

• Bid vuriglik en dikwels. Vertel die Here van jou gevoelens, ervarings, planne en bekommernisse. Vra die Gees om in alles met jou te wees. Skryf indrukke neer wat jy ontvang terwyl jy bid en die skrifture bestudeer. Let op geestelike leiding wat jy dalk deur die dag mag ontvang. Slaan ag op die stem van die Gees. Wanneer jy dit doen, sal jy aanhou om leiding, vertroosting en hulp te ontvang. “Want kyk, ek sê weer vir julle dat as julle die weg sal binnegaan, en die Heilige Gees ontvang, sal dit aan julle alle dinge toon wat julle moet doen” (2 Nefi 32:5). Vra die Here om jou te help om geestelike prikkelings te herken en te volg.

• Wees stil. Stilte beteken nie net om fisies stil te wees nie, hoewel dit beslis ingesluit kan word. Om stil te wees is ʼn innerlike houding. Dit is ʼn toestand van innerlike kalmte wat God se teenwoordigheid uitnooi. Wees stil “en weet dat Ek God is” (Psalm 46:11). Leer om stil te wees. Jy sal dan meer sensitief wees vir die prikkelings van die Gees. Jy sal meer in staat wees om aan die eise van jou sending te voldoen. Wanneer jy te veel spanning ervaar, kan jy stilte beoefen. In plaas daarvan om te fokus op jou gedagtes, let op sensasies in jou liggaam. Let op of jou spiere gespanne of ontspanne is, en let op die geluide en reuke rondom jou. Dit is veral nuttig om aandag te skenk aan jou asemhaling (sien Asemhalingsoefening). Jy probeer nie om enige gedagtes te onderdruk of jou gedagtes af te skakel nie. Jy verskuif net jou aandag weg van bekommernisse en vrese. Dit laat meer ruimte vir die Gees in jou gedagtes. Dit kan jou ook help om meer vrede te voel.

“Vrede laat Ek vir julle na, my vrede gee Ek aan julle; nie soos die wêreld gee, gee Ek aan julle nie. Laat julle hart nie ontsteld word en bang wees nie.”

Johannes 14:27

• Herken die hand van die Here in alles. Jy het die voorreg om deel te neem aan God se wonderbaarlike werk om sy kinders te seën. Oefen om elke dag te fokus op seëninge waarvoor jy dankbaar is. Let op die invloed van die Gees in jou lewe en skryf daaroor in jou joernaal (sien Moroni 10:3).

• Dien vanuit jou sterk punte en talente. Maak ʼn lys van jou sterk punte, talente en geestelike gawes. Jou sterk punte is deel van die Here se voorraadskuur. Hy gebruik dit om sy kinders te seën en sy koninkryk te bou. ʼn Belangrike deel van jou sending is om jou gawes te ontwikkel. Gebruik jou sterk punte op ʼn Christelike manier om ander te help. Dink aan wat die Gees vir een sendeling gefluister het: “Ek het jou nie geroep vir jou swakhede nie. Ek het jou geroep vir jou sterk punte.” Fokus meer op wat jy goed doen as wat jy verkeerd doen. Beplan elke week maniere om jou gawes te ontwikkel en te gebruik om ander te dien en te seën. (Sien Leer en Verbonde 82:18–19.)

• Identifiseer en memoriseer vertroostende verse. Terwyl jy die skrifture bestudeer, skryf verse neer wat jou versterk en vertroos. Jy kan dit lees, daarna luister of memoriseer.

• Fokus op die behoeftes van diegene wat jy dien. Dink aan wat jy kan doen om diegene wat jy dien, te seën. Soek inspirasie om te weet hoe jy hulle beter kan help. Probeer om hulle geloof te versterk.

• Koppel jou werk aan mense wat jy ken. Dink oor hoe jou diens mense wat jy ken wat werklike probleme het, help. Skryf voorbeelde in jou joernaal neer van hoe jou diens ʼn verskil vir ander maak.

  

• Kyk na jou verwagtinge. Jou diens-sending is dalk nie altyd wat jy verwag het nie. Soms sal dinge nie uitwerk soos jy gehoop het nie. Jou toewysing is dalk nie altyd uitdagend of lonend nie. En miskien doen jy nie alles perfek nie. Maar onthou die Here se raad aan Joseph Smith in die Liberty-gevangenis: “Al hierdie dinge [sal] vir jou ervaring gee, en [sal] vir jou beswil wees. … Daarom, bly op die weg” (Leer en Verbonde 122:7, 9).

• Vra toestemming om ʼn blaaskans te neem van wat jy ookal doen. Miskien kan jy nie dadelik een neem nie. Indien wel, sê vir jouself: “Ek kan wag tot dit tyd is vir ʼn ruskansie.”

• Oefen. Gereelde oefening is een effektiewe manier om spanning te hanteer. Probeer om deel te neem aan ʼn verskeidenheid aktiwiteite wat beide aangenaam en fisies uitdagend is. Terwyl jy op hierdie aktiwiteite fokus, kan jy meer energiek voel. Jy sal die bekommernisse van die dag kan vergeet. Enige oefening kan help om jou stamina en vermoë om die Here te dien, te verhoog. Vind ʼn manier om jouself te beloon as jy maniere vind om jou oefening te vermeerder.

• Moenie probeer om dinge te beheer wat jy nie kan beheer nie. Die resultate van jou regverdige pogings kan afhang van die handelingsmag van ander. Jy kan nie mense beheer of hulle dwing om dinge te doen nie. “Geen mag of invloed kan of behoort gehandhaaf te word deur middel van die priesterskap nie, behalwe deur oorreding, deur lankmoedigheid, deur saggeaardheid en sagmoedigheid, en deur ongeveinsde liefde” (Leer en Verbonde 121:41). “Daarom, geliefde broers, laat ons blymoedig alle dinge doen wat in ons mag is; en dan mag ons stilstaan, met die uiterste versekering, om die heil van God te sien, en vir sy arm om geopenbaar te word” (Leer en Verbonde 123:17).

• Beoefen bewustheid. Bewustheid is ʼn tegniek om spanning te hanteer. Dit behels om aandag te skenk aan ervarings in die huidige oomblik. Gebruik dit wanneer jy baie gespanne of angstig voel. Probeer om jou bewustheid te fokus op wat rondom jou aangaan. Fokus op nou en hier, nie op die toekoms nie. Let op hoe jou gedagtes op hierdie bewustheid reageer.

  • Haal diep asem, maak jou oë toe indien nodig, en probeer ontspan.

  • Neem ʼn kort wandeling as dit nuttig is.

  • Let op, byna soos ʼn buitestaander, waaroor jy bekommerd was. Hoe voel jy daaroor?

  • Laat dit wat jou pla verbygaan. Fokus op wat jy kan of moet doen in die volgende paar minute.

  • As die situasie nie verbeter nie, laat jou diens-sendingleier weet.

Asemhalingsoefening

• Sit in ʼn gemaklike posisie of staan stil.

• Haal ʼn paar keer diep en stadig asem deur jou neus, en wag na elkeen.

• Ontspan jou skouers en probeer asemhaal sodat jou maag beweeg, nie jou skouers nie.

• Probeer om op jou asemhaling te fokus. As jou gedagtes afdwaal, moet jy dit sagkens laat teruggaan na jou asemhaling.

• Hou aan om stadig en kalm asem te haal vir vyf minute of totdat die kommerwekkende gevoelens verlig.

• Raak bevriend met jou kollegas en ander sendelinge. Deel idees, dien mekaar, help mekaar en vergewe mekaar.

  

• Gebruik musiek. Dink aan die woorde van ʼn paar gunsteling liedjies of skrifture. Wanneer jy gespanne of mismoedig voel, dink aan die woorde. Vra of jy “earbuds” by jou diensopdrag kan gebruik. Luister na kalmerende musiek as dit nie met jou toewysing inmeng nie. Oorweeg dit om “Calm” of ʼn soortgelyke app op jou slimfoon te gebruik.

• Onthou wat jy geleer het. Jy het jou hele lewe lank met verandering en probleme te doen gehad. Maak ʼn lys van wat jy geleer het uit vorige tydperke van hoë spanning (verhuising, ʼn verlies of ʼn nuwe skool of werk). Hoe kan jy hierdie vaardighede nou gebruik?

B. Reageer op ʼn “Spanningsnoodtoestand”

ʼn Spanningsnoodtoestand vind plaas wanneer jy skielik in die oranje of rooi spanningsones beweeg. As jy in fisiese of emosionele gevaar verkeer, skakel jou ouers of diens-sendingleier onmiddellik. Vir ander situasies, probeer die volgende voorstelle:

• Neem ʼn kort blaaskansie. As jy baie ontsteld of oorspanne voel, neem ʼn blaaskans. Neem verskeie stadige, diep asemteue; strek; en ontspan fisies. Wanneer jou liggaam en verstand weer kalm is, sal jy helderder dink. Gaan stap, of kry ʼn bietjie kos of ʼn koeldrank. Of sit net en wees vir ʼn paar minute stil. Om net te noem wat jy voel (byvoorbeeld, ek voel gefrustreerd of verwerp) kan jou brein help om aan die probleem te begin werk.

• Wees goedhartig teenoor jouself. Praat met jouself met dieselfde vriendelike, vertroostende woorde wat jy met iemand anders sou gebruik. Almal raak gefrustreerd of maak soms foute. Weet dat die Here verstaan. Stel jou voor dat Hy naby jou sit en luister en ondersteuning bied. Onthou, gedagtes van hulpeloosheid, hopeloosheid of skerp veroordeling kom nie van die Here af nie.

• Herfokus op dankbaarheid. Let op wat rondom jou aangaan. Fokus op wat reg, goed en positief is oor jouself en die wêreld. Doen ʼn gebed van dankbaarheid vir ten minste vyf spesifieke dinge. Sê vir jouself: “Ek is ʼn dissipel van Jesus Christus, die Seun van God. Ek is geroep deur Hom om sy woord te verkondig onder sy volk” (3 Nefi 5:13).

• Neem een stap op ʼn slag. Identifiseer die onmiddellike probleem en neem een stap op ʼn slag om dit op te los. Herinner jouself: “Al wat ek nou moet doen, is .”

• Help iemand anders. Herfokus jou aandag deur iemand anders te dien. Glimlag met mense, help hulle en bied jou diens aan. Begin ʼn gesprek met iemand om jou gedagtes terug te bring na die hede.

• Sê nee vir negatiewe gedagtes. Skryf nou dadelik, of voor jy vanaand gaan slaap, ʼn lys van vandag se negatiewe gedagtes neer op papier. Herskryf dit dan om meer hoopvol, eerlik en bemoedigend te wees (sien die volgende voorbeeld).

Sê Nee vir Negatiewe Gedagtes

MY GEDAGTES	MY HERSKRYF
MY GEDAGTES Ek kan nie hierdie opdrag doen nie.	MY HERSKRYF Hierdie opdrag is op die oomblik moeilik. Maar ek kan dit leer.
MY GEDAGTES Hierdie werk verveel my.	MY HERSKRYF Ek sal ʼn manier soek om hierdie werk vir my interessanter te maak.
MY GEDAGTES Ek gee nie om wat my toesighouer dink nie; ek doen dit op my manier.	MY HERSKRYF Ek gee om; ek is net gefrustreerd. Ek sal probeer om beter te luister en meer vrae te vra. Dan sal ek verstaan waarom my toesighouer dit anders sien.
MY GEDAGTES Ek word altyd geoordeel.	MY HERSKRYF Ek weet ek doen goeie werk; Die Here weet dit ook. Al wat ek nou kan doen, is om op my poging te fokus.
MY GEDAGTES Ek is altyd so ongeorganiseerd.	MY HERSKRYF Soms is ek ongeorganiseerd, en soms is ek beter georganiseerd. Ek kan een ding kies en beter word om dit te organiseer.
MY GEDAGTES Ek sal dit nooit deur hierdie dag maak nie.	MY HERSKRYF Ek het dit tot dusver elke dag oorleef, en ek sal vandag oorleef. Al wat ek nou moet doen, is wat voor my is, een tree op ʼn slag. Ek sal vir vyf minute ontspan om te kalmeer.
MY GEDAGTES Ek behoort teen hierdie tyd my toewysing te ken.	MY HERSKRYF Wie sê ek moet? Ek werk hard. Die Here en ander sal my help om die opdrag gedoen te kry.
MY GEDAGTES My kollegas is irriterend.	MY HERSKRYF Ek weet dat die Here al sy kinders liefhet. Hy sal my help om hulle ook lief te hê.

C. Help Ander Wat Oorspanne Is

• Let op ander wat sukkel. Laat hulle weet dat jy verstaan. Bied aan om hulle te help. Neem tyd om te luister na wat hulle pla. Stel voor dat hulle ʼn kort blaaskansie neem.

• Dink aan jou doopverbond. Ons het belowe “om mekaar se laste te dra, sodat hulle lig mag wees; … om te treur met diegene wat treur; ja, en diegene te troos wat vertroosting nodig het, en om te staan as getuies van God te alle tye en in alle dinge” (Mosia 18:8–9). Pas hierdie verbond toe deur (1) ʼn ander se las te deel, (2) begrip en vertroosting te bied, en (3) van God se liefde te getuig.

• Vra ʼn paar vrae, maar moenie die persoon dwing om te praat nie. Probeer om te sê: “Jy lyk ontsteld. Wat het gebeur?” of “Wil jy my daarvan vertel?” Ander goeie opmerkings kan insluit:

  • “Ek weet nie wat om nou te sê nie, maar ek is só bly jy het my vertel.”

  • “Vertel my van wat jy nou voel.”

  • “Ek gee om vir jou.”

  • “Ek is hier vir jou.”

  • “Dit is in orde om so te voel. Jy is nie gebroke nie.”

• Herinner die ander persoon aan wat hy of sy goed doen. Jy kan byvoorbeeld sê: “Ek waardeer werklik jou integriteit en jou begeerte om God te dien.”

• Luister om te verstaan, en bied ondersteuning en aanmoediging aan. Totdat ʼn persoon voel dat hy verstaan word, is dit dikwels nie goed om advies aan te bied en oplossings voor te stel nie. Vra vrae en help die persoon om sy of haar eie antwoorde te vind. Moenie die rol van berader vir ander aanneem nie. Maar jy kan met empatie luister en hulle help en ondersteun.

• Deel jou getuienis. Deel jou oortuiging van God se liefde en bereidwilligheid om te help.

• Wees verstandig wanneer jy ander dien. Jy het ʼn heilige roeping. Wees betroubaar en behou vertroulikheid.

  

• Fokus op wat nou besluit moet word. Help oorspanne individue om groot kwessies te sy-stap en op die onmiddellike besluite wat geneem moet word te fokus. Bied aan om hulle te help. Moedig hulle aan om terug te keer na die groter probleem wanneer dinge gekalmeer het. Help hulle dan om oplossings te soek. Herinner hulle daaraan dat die Here mettertyd met oplossings kan help. Ons moet doen wat ons kan en ons probleme aan Hom oorgee.

President Spencer W. Kimball het geleer: “God sien ons wel raak, en Hy waak oor ons. Maar dit is gewoonlik deur ʼn ander persoon dat hy aan ons behoeftes voldoen. … Ons lees in die Leer en Verbonde oor hoe belangrik dit is om ‘… die swakkes by [te staan], die hande wat neerhang [op te lig], en die verswakte knieë [te versterk]’ [Leer en Verbonde 81:5]. So dikwels bestaan ons dade van diens uit eenvoudige aanmoediging of om alledaagse hulp te gee met alledaagse take, maar watter heerlike gevolge kan vloei uit alledaagse dade en uit klein maar doelbewuste dade!”

Teachings of Presidents of the Church: Spencer W. Kimball (2006), 82

D. Die Hantering van ʼn Persoonlike Uitdaging

Jy is ʼn unieke persoon met unieke sterk punte en swakhede. As jy ʼn persoonlike uitdaging het waaraan jy graag wil werk, skryf dit hier neer:

Maak ʼn lys van dinge wat jy reeds geleer het wat jou help om dit te hanteer:

Maak ook ʼn lys van nuwe dinge om te probeer. Jy kan leer by mense rondom jou, professionele persone of persoonlike navorsing. Dink aan fisiese, emosionele, sosiale, intellektuele of geestelike benaderings wat kan help. Onthou dat jy waarskynlik ʼn paar weke lank ʼn nuwe benadering sal moet toepas. Dan sal jy weet hoe goed dit werk.

Oefen om jou uitdaging aan ander te verduidelik en om hulp te vra om dit te beheer. Oefen met jou ouers of diens-sendingleiers.

Ouderling Jeffrey R. Holland het gemaan: “Wat ook al jou stryd, my broers en susters—verstandelik of emosioneel of fisies of andersins … vertrou op God. Hou vas aan sy liefde. … Hoewel ons dalk voel dat ons soos ʼn gebreekte voorwerp is, soos die Psalmis sê [Psalm 31:12], moet ons onthou, daardie voorwerp is in die hande van die goddelike pottebakker. Gebroke verstande kan genees word net soos gebreekte bene en gebroke harte genees word.”

“Like a Broken Vessel,” Ensign of Liahona, Nov. 2013, 42