Teuteu ʻa e Faifekau Tokoní,” Ko e Fakaangaanga ki he Moʻui ‘a e Faifekau Tokoní: Kiʻi Tohi Ma‘uʻanga Tokoni (2020)

“Teuteu ʻa e Faifekau Tokoní,” Ko e Fakaangaanga ki he Moʻui ʻa e Faifekau Tokoní

Teuteu ʻa e Faifekau Tokoní

Ko e Fakaangaanga ki he Moʻui ʻa e Faifekau Tokoní

ʻOku angamaheni pē ki he kau faifekau foʻoú ke nau foua ha tuʻunga ʻo e loto-mafasiá pe taʻefiemālie. ʻE fie maʻu ke ke ako ha ngaahi fatongia foʻou, feʻiloaki mo ha kakai foʻou, pea ngāue mo ha kakai kehe. Faʻa-kātaki, ʻi hoʻo ako ko ia ke fakahoko ʻa e ngaahi meʻa ko ʻení. Te ke feinga ke fakatokangaʻi ʻa e ngaahi tāpuaki ʻo e līʻoa hoʻo moʻuí maʻá e Fakamoʻuí. Manatu‘i, ʻe ʻiate koe ʻa e Laumālie Māʻoniʻoní. ʻE tokoni atu ke ke fakahoko ʻa e liliu ko ʻení. ʻE tokoni atu ʻi hono fakaangaanga ki ho ngaahi fatongia foʻou ko e faifekau tokoní.

Ko e Fakaangaanga ki he Ngaahi Aʻusia Foʻoú

ʻOku tatau ʻa e kau faifekau tokoní mo ha kakai tokolahi ʻoku nau kamata ʻi ha meʻa foʻou. Ko ha tokolahi ʻoku nau foua ha ngaahi tuʻunga kehekehe ʻo e liliu fakaelotó ʻi he taimi ʻoku kamata ai ʻenau ngāué.

Nofo ʻamanaki
- Te ke ala nofo ʻamanaki ki he faingataʻá (vakai, 1 Nephi 3:7).
- Te ke ala ongoʻi lahi ange hoʻo taumuʻa mo e mateakiʻi ʻo e ʻOtuá (vakai, 3 Nīfai 5:13).
- Mahalo te ke ongoʻi fiefia mo ʻamanaki ke feʻiloaki mo ha kakai foʻou pea mo foua ha ngaahi feituʻu foʻoú.
Ko hono ʻilo ʻo e taʻe-ʻamanekiná
- Mahalo te ke ala kamata fehuʻia hoʻo fili ke ngāué (vakai, ʻAlamā 26:27).
- Mahalo te ke fakatokangaʻi ha ngaahi fakaʻilonga fakatuʻasino ʻo e loto-mafasiá, feliliuaki ʻo e uʻá, pe ʻitangofua.
- Mahalo te ke fakatokangaʻi ʻokú ke fakaangaʻi e ngaahi tuʻutuʻuni ʻo e ngāue fakafaifekaú pe ngaahi fie maʻú. Mahalo he ʻikai te ke fie muimui kakato ʻiate kinautolu.
“Te u lava ʻo fai ʻeni”
- Te ke ako ke talangofua loto-fiemālie ki he ngaahi tuʻutuʻuni mo e ngaahi fiemaʻu ʻo e faifekau tokoní.
- Te ke ako ke faʻakātaki (vakai, ʻĪsaia 28:10; Mōsaia 4:27).
- ʻE kamata mōlia atu e ngaahi fakaʻilonga fakaesino hoʻo loto-mafasiá, kapau naʻe ʻi ai.
Moʻui fakafalala fakaeloto pē kiate kita
- Te ke ongoʻi nonga ʻi hoʻo fakahoko e ngaahi ngāue fakaʻahó.
- Te ke fakatokangaʻi ho ngaahi mālohinga fakatāutahá mo e fakalakalaká.
- ʻOku mahino kiate koe hono ʻuhinga ke ngāueʻi taha taha ʻa e moʻuí (vakai, Tokāteline mo e Ngaahi Fuakava 98:12).
- Te ke fakatupulaki ha loto-lahi ange pea mo tupulekina hoʻo fie ngāué.

Ngaahi Meʻa Te Ke Lava ʻo Fai he Taimi Ní

Kumi ha ngaahi founga ke tokoniʻi ai ha niʻihi kehe. Ko e ngāue fakafaifekaú ko ha ui ia ke ngāue. Tokanga pē ke sio mavahe mei hoʻo ngaahi ongoʻi taʻe-fiemālié. Tokoni kiate kinautolu ʻoku nau fie maʻu ha lea ʻofá, ha tōʻonga ʻofā, pe anga fakakaumeʻá.

Talanoa mo ha niʻihi fekauʻaki mo e liliu hoʻo ngāue fakafaifekaú. Tuku ha taimi ke aleaʻi ai ʻa e ngaahi tefito ko ʻení mo hoʻo mātuʻá, kau taki lakanga fakataulaʻeikí, pe ngaahi kaumeʻa ʻosi ngāue fakafaifekaú:

Kuo fie maʻu ʻe he ʻOtuá ha kakai tokolahi ke nau fai ha ngaahi meʻa ʻoku ope atu mei he meʻa ʻoku nau ongoʻi ʻoku nau malava ke faí. Ko e hā te ke lava ʻo ako mei he ngaahi sīpinga fakafolofolá? Te ke ala ako ʻa e ʻEkesōtosi 4:10–12; Selemaia 1:6–9; ʻAlamā 17:9–12; ʻAlamā 26:27; ʻEta 12:23–27; Mōsese 6:31–32.
Ko e hā ʻoku mahuʻinga ai ke mohe mo ʻā taimi totonú? Ko e hā ʻoku mahuʻinga ai ke fakaʻaongaʻi maʻu pē meʻakai leleíʔ Ko e hā ʻoku totonu ai ke ke fakamālohisino maʻu peé? Ko e hā ʻoku totonu ai ke ke fai haʻo ngaahi lotu fakafoʻituituí?
ʻE tokoniʻi fēfē koe ʻe he tohi ʻi ha tohinoa ʻi he lolotonga ʻo e lavameʻá mo e faingataʻá?
Ko e hā hoʻo meʻa ʻe fai ʻi he taimi he ʻikai mahuʻi atu ai e ngaahi fakakaukau pe ongo fakatupu palopalemá.
Tokanga pē ke fakamālohia hoʻo fetuʻutaki mo hoʻo Tamai Hēvaní. Kumia ʻa e Laumālié ʻi he lotu fakafoʻituitui mo e ako folofola. Fanongo ki ha ngaahi fasi langaki moʻui, mo lau ho tāpuaki fakapēteliaké.
Angaʻofa kiate koe pea ki he niʻihi kehé. Talanoa pē kiate koe ʻi he ngaahi lea fakafiemālie, mo angaʻofa ʻokú ke pehē ʻoku fakaʻaongaʻi ʻe he Fakamoʻuí. Manatuʻi, ʻoku ʻikai mei he ʻEikí ʻa e ngaahi fakakaukau tuēnoā, mole ʻo e ʻamanakí, pe tukuakiʻi fefeká.
ʻOua ʻe mūnoa. He ʻikai tatau hoʻo aʻusia ko e faifekau tokoní mo ha toe taha kehe. He ʻikai hoko tatau tofu pē ʻa e meʻa kotoa ʻo hangē ko hono palaní. Feinga ke ke loto tauʻatāina ki he liliú ka ke lava ʻo fakahoko ho ngaahi fatongia ko e faifekau tokoní.

Fakamatala Fakanounou

Manatu ko hoʻo moʻui ko e faifekau tokoní ʻe kehe ia mei hoʻo moʻui kimuʻá. Ka ‘e fakapaleʻi mo tāpuaki‘i koe ʻe he ʻEikí. Fakatupulaki ha loto ʻoku lelei. Tui ki he ʻEikí. Faʻa-kātakiʻi koe pea mo e niʻihi kehé. Manatuʻi ʻa e faleʻi naʻe fai ki he Palōfita ko Siosefa Sāmitá: “Ke ke ʻiloʻi, ʻe hoku foha, ʻe foaki ʻe he ngaahi meʻá ni kotoa pē ʻa e poto kiate koe, pea ʻe hoko ia ʻo ʻaonga kiate koe” (Tokāteline mo e Ngaahi Fuakava 122:7).