Моронай 10:26–34

“Христэд ирэгтүн.”

Мутраа дэлгэж буй Аврагч

Бид мөнх амьдралыг олж авахын тулд суралцаж, өсөж хөгжихөөр энэ дэлхий рүү илгээгдсэн. Тэнгэрлэг Эцэг бидэнд туслахын тулд Өөрийн Хүү Есүс Христийг илгээсэн. Мөн Тэрээр Есүс Христийн талаар зааж, гэрчлэхийн тулд бошиглогчдыг дуудсан. Мормоны Номын сүүлийн шүлгүүдэд Моронай бүх хүнийг Аврагчийг дагахад урьсан билээ. Энэ хичээл танд “Христэд ирж, мөн түүгээр төгөлдөржихөд” (Моронай 10:32) тусалж чадна.

Мормоны Номын зорилго

Яагаад Бурхан бидэнд Мормоны Номыг өгсөн тухай та бодож байсан уу?

Өнөөдөр та Мормоны Номын сүүлийн шүлгүүдийг судлах болно. Та энэ хичээлийг судалж байхдаа Мормоны Номын зорилго, адислалуудын талаар бод.

Мормоны Номын эхний хуудас дээр Моронай “Есүс бол Христ” гэдэгт бүх хүнийг итгүүлэхийн тулд Мормоны Ном бичигдсэн гэж тунхагласан. “Христ” гэдэг нь “грек хэлээр Мессиа гэсэнтэй адил юм. Энэ нь тослогдсон Бошиглогч, Санваартан, Хаан түүнчлэн Чөлөөлөгч гэсэн утгатай” (Судруудын удирдамж, “Мессиа,” scriptures.ChurchofJesusChrist.org).

• Мормоны Номыг судалснаар таны Есүс Христийн талаарх итгэл үнэмшил хэрхэн хүчирхэгжсэн бэ?

• Мормоны Номыг судлах нь Есүс Христийг дагахад танд хэрхэн тусалсан бэ?

• Та өөрийгөө Түүнийг дагахаар одоо хэр хичээж байгаа гэж бодож байна вэ?

Моронайн сүүлийн урилгууд

Сүнсний бэлгүүдийн талаар зааж, итгэлгүй байдлын үр дагаврыг анхааруулсны дараа Моронай Мормоны Номын талаар ярьсан.

Моронай 10:27–29-ийг уншаад, Моронайн бошиглосон ямар зүйл тохиолдохыг олж мэд.

• Моронайтай шүүлтийн тавцанд уулзах талаар та юу гэж бодож байна вэ?

Дараа нь Моронай сүүлчийн ухуулга буюу урилгуудыг хэлжээ.

Моронай 10:30–34-ийг уншаад, Моронай биднийг юу хийхийг хүссэнийг мөн түүний хуваалцсан амлагдсан адислалуудын талаар олж мэд.

Моронай 10:30–34-өөс дор хаяж хоёр урилга, хоёр амлалтыг судал. Дараах хүснэгт тусална. Моронай 10:30–34-ийн тодорхой үг хэллэгүүдийн хажууд нэмэлт судрууд мөн судлах тусламжийг жагсааж бичих нь тустай байж болно. Мөн та Моронай 10:30–34-өөс олсон, хүснэгтэд ороогүй бусад урилга эсвэл амлалтыг судалж болно.

Бидний хийх ёстой зүйлс (Моронайн урилга)

Тэнгэрлэг Эцэгийн амладаг зүйлс

Бидний хийх ёстой зүйлс (Моронайн урилга) Сайн бэлэг болгоноос барьж ав. (Моронай 7:19; Сургаал ба Гэрээ 6:7-г үзнэ үү.) Хилэнцэт бэлэг бас цэвэр бус зүйлээс зайлсхий. (2 Нифай 4:27–28; Мормон 9:28-ыг үзнэ үү.) Бүх бурханлаг бусаас өөрсдөө татгалзагтун. (Иосеф Смитийн Орчуулга, Матай 16:25–29 [Матай 16:24, зүүлт тайлбар a]; Мозая 3:19-ийг үзнэ үү.) Бурханыг өөрсдийн бүх хүч, оюун, чадлаар хайрла. (Матай 22:36–38; Омнай 1:26-г үзнэ үү.)

Тэнгэрлэг Эцэгийн амладаг зүйлс Түүний ач ивээл хангалттай бөгөөд биднийг төгс болгох боломжтой. (2 Нифай 10:24; 25:23; Ифер 12:27-г үзнэ үү; мөн Судруудын удирдамж дахь “Ач ивээл”-ийг scriptures.ChurchofJesusChrist.org-оос үзнэ үү.) Бид ариусгагдаж, нүглүүдийнхээ ангижралыг хүлээн авах болно. (3 Нифай 27:20; Сургаал ба Гэрээ 76:41-ийг үзнэ үү; Судруудын удирдамж дахь “Санваар хүртэх” гэдгийг scriptures.ChurchofJesusChrist.org-оос үзнэ үү.) Бид толбогүй, ариун болно. (Леви 19:2; Сургаал ба Гэрээ 87:8-ыг үзнэ үү; мөн Судруудын удирдамж дахь “Ариун” гэдгийг scriptures.ChurchofJesusChrist.org-оос үзнэ үү.)

шигтгээ зураг, тэмдэглэх

1. Дараах асуултуудад хариул.

   • Ямар урилга эсвэл амлалт танд хамгийн их ач холбогдолтой вэ, яагаад?

   • Эдгээр урилгын дагуу үйлдэх нь таныг Есүс Христэд ирэхэд хэрхэн тусалж чадах вэ?

   • Бид Моронай 10:30–34-өөс ямар зарчмуудыг сурч болох вэ?

Бидний сурч болох нэг зарчим бол Христэд ирснээр бид түүгээр төгөлдөржигддөг юм.

“Христэд ирэгтүн, мөн түүгээр төгөлдөржигтүн”

  Хэцүү үед тань Аврагчийн ач ивээл танд хэрхэн тусалсныг тунгаан бод.

2. Дараах асуултуудын дор хаяж нэгд нь хариул.

   • Биднийг Моронай 10:30–34 дээрх амлалтыг хүлээн авч, түүгээр төгөлдөржигдөхөд Есүс Христ юу хийсэн бэ?

   • Тэнгэрлэг Эцэг, Есүс Христ хоёрын ач ивээл (тэнгэрлэг тусламж эсвэл хүч) таны амьдралд байгааг та яаж харсан бэ?

Христэд ирж, Түүнд төгөлдөржихийн тулд таны хийж чадах ямар нэг зүйлийн талаар бод. Хэрэв та юу хийхээ мэдэхгүй байвал дараах асуултуудыг тунгаан бодох нь тус болно. Яг одоо танд хийж чадах зүйл байгаа бол түүнийгээ хий. Танай өсвөр үеийнхний өсөж хөгжих зорилтуудын нэг нь таныг Христэд ирэхэд аль хэдийн тусалсан байж болно. Та энэ зорилгынхоо төлөө үргэлжлүүлэн ажиллах боломжтой.

• Би өөрөө татгалзах болсон бурханлаг бус зүйл амьдралд маань байна уу (жишээлбэл, хэвлэл мэдээллийн нөлөөлөл эсвэл муу зуршлууд)?

• Би Бурханыг өөрийн бүх хүч, оюун, чадлаар хэрхэн илүү их хайрлах вэ?

• Ийн үйлдэх нь намайг Есүс Христтэй илүү адил болоход хэрхэн туслах вэ?

Нэмэлт: Илүү ихийг судлахыг хүсэж байна уу?

Би Бурханд ирэх урилгыг хүлээн авснаар хэрхэн адислагдаж болох вэ?

Арван хоёр төлөөлөгчийн чуулгын ахлагч Гэррит В.Гонг ийн хуваалцжээ.

Ахлагч Гэррит В.Гонг

Есүс Христ бол “зам, үнэн, амь” [Иохан 14:6] тул Бурханы урилгууд хайр, боломжуудаар дүүрэн байдаг. Ачаагаа дийлэхгүй байгаа мэт санагдаж байгаа хүмүүст хандан Тэрээр “Над уруу ир” хэмээн урьж, Өөр дээр нь ирсэн хүмүүст “Би та нарт амралтыг өгье” [Матай 11:28] хэмээн амладаг юм. “Христ рүү ирэгтүн, мөн Түүн дотор төгөлдөржигтүн, … Бурханыг өөрийн бүх хүч, оюун, мөн чадлаараа хайрла, тэгвэл Христийн дотор төгс болгох Түүний нигүүлсэл танд хангалттай байх болно” [Моронай 10:32].

“Бурханы ач ивээлээр та нар Христээр төгс аваас” гэсэн энэ батламж нь, бүр аливаа зүйлс алдаа дутагдал гаргалгүй, хамгийн сайнаараа хичээн хийсэн ч мөн найдаж, хүсэн хүлээсний дагуу зүй ёсоор болж бүтэхгүй байх үед ч Их Эзэнд итгэж найдан, урагш үргэлжлүүлэн явахад туслах тайтгарал, амар амгалан, амлалтыг бидэнд өгдөг юм. (Гэррит В.Гонг, “Итгэлийн маань түүдэг,” 2018 оны 10-р сарын Ерөнхий чуулган, 50)

Арван хоёр төлөөлөгчийн чуулгын ахлагч Жэффри Р.Холланд ийн заасан.

Ахлагч Жэффри Р.Холланд

Моронай “Тиймээ Христэд ирэгтүн, мөн түүгээр төгөлдөржигтүн … ” хэмээн гуйсан. “Бурханыг өөрийн бүх хүч, оюун, мөн чадлаар хайрлах аваас, тэгвэл … Түүний ач ивээлээр та нар Христээр төгс байж болно” (Моронай 10:32; тодотгол нэмсэн). Үнэн төгс байдалд хүрэх цорын ганц найдвар тэнгэрээс бэлэг хэмээн хүлээн авахад оршдог буюу бид үүнийг өөрсдөө “олж авч” чадахгүй. Тиймээс Христийн дутууг маань нөхөхөөр өгдөг ач ивээл нь биднийг харуусал, нүгэл, үхлээс авраад зогсохгүй байнга өөрийгөө шүүмжлэх явдлаас авардаг. (Жэффри Р.Холланд, “Тиймээс та нар эцэст нь төгс бай,” 2017 оны 10-р сарын Ерөнхий чуулган, 29)

Арван хоёр төлөөлөгчийн чуулгын ахлагч Д.Тодд Кристоффэрсон ийн заасан.

Ахлагч Д.Тодд Кристоффэрсон

Христийн цагаатгагч хүч, ач ивээл нь гэм нүгэл, алдаа дутагдлаас үүдэлтэй гэм буруугийн мэдрэмжээс салгахын зэрэгцээ биднийг цэвэршүүлж, Бурханы оршихуйд амьдрах чадавхтай цэвэр ариун болгодог гэдгийг санаарай. (Д.Тодд Кристоффэрсон, “Сонголт ба шийдвэр төгс байдал” [Залуучуудад зориулсан дэлхий даяарх онцгой цугларалт, 2020 оны 1-р сарын 12], broadcasts.ChurchofJesusChrist.org)

Моронай 10:34. Эцсийн шүүлт ямар байх вэ?

Тэргүүн зөвлөлийн ерөнхийлөгч асан Дийтр Ф.Угдорф ийн заажээ.

Ерөнхийлөгч Дийтр Ф.Угдорф

Шүүлтийн өдөр нь харууссан зүрх эдгээгдэн, харууслын нулимс талархлын нулимсаар солигдож, бүх зүйл зөв болох нигүүлсэл, хайрын өдөр байх болно.

Тийм ээ, нүглийн улмаас илүү их харуусах болно. Тийм ээ, бид бас өөрсдийг маань илүү агуу ирээдүйд хүргэх боломжуудыг алдахад хүргэсэн алдаа, мунхаглал, зөрүүд зангаасаа болсон харамсал, тэр ч бүү хэл цөхрөлийг мэдрэх болно.

Гэхдээ бид Бурханы шүүлтэд сэтгэл хангалуун байгаад зогсохгүй хүүхдүүд биднийгээ гэсэн Түүний хязгааргүй ач ивээл, нигүүлсэл, өгөөмөр сэтгэл, хайранд гайхширч, цочирдоно гэдэгт би итгэлтэй байдаг. Хэрэв бидний хүсэл, ажил үйлс сайн байж, амьд Бурханд итгэлтэй байвал бид Моронайн хэлсэнчлэн “Мөнхийн Шүүгч, агуу Иеховагийн таалалт тавцангийн” [Моронай 10:34] өмнө очих өдрийг хүсэн хүлээж чадна. (Дийтр Ф.Угдорф, “Ай Бурханы маань төлөвлөгөө хэчнээн агуу билээ!”  2016 оны 10-р сарын Ерөнхий чуулган, 5–6)