Tahirin-kevitra fanolorana

Ny drafitry ny famonjena

Ny drafitry ny Ray any An-danitra ho an’ny fahasambarantsika

Ilay Filankevitra Lehibe

Mandritra ny diantsika amin’ny fiainana etỳ an-tany, dia mitranga matetika ny fanontaniana momba ny tanjona sy dikan’ny fiainana: Avy aiza aho? Fa maninona aho no eto? Handeha ho aiza aho? Ny fahafantarana ny valin’ireo fanontaniana ireo dia afaka manampy anao hitety ireo fanamby amin’ny fiainana kanefa mijanona amin’ny làlan’ny fanekempihavanan’ny Tompo. Afaka manampy anao hahatakatra sy hahatsapa ny maha-zava-dehibe ny drafitry ny Ray any An-danitra ity lesona ity.

Ny Tanjon’ny Seminera sy Institiota Fianarana ny Filazantsara. Tsarovy fa “ny tanjontsika dia ny hanampy ny zatovo sy ny tanora manambady sy tsy manambady hahatakatra sy hiantehitra amin’ny fampianaran’i Jesoa Kristy sy ny Sorompanavotany, sy ho mendrika ny hahazo ireo fitahiana avy amin’ny tempoly, ary hiomana sy hanomana ny fianakaviany ary ny hafa ho amin’ny fiainana mandrakizay miaraka amin’ny Ray any An-danitra” (Fampianarana sy fianarana ny filazantsara: Boky torolalana ho an’ireo mpampianatra sy mpitarika ao amin’ny Seminera sy Institiota fianarana ny filazantsara [2012], x, ChurchofJesusChrist.org)

Sary famantarana, torolalana ho an’ny fampianarana

Fanomanana ny mpianatra: Asao ny mpianatra hieritreritra zavatra iray tsapan’izy ireo fa tsy vitan’izy ireo ny miaina tsy misy azy ary ho vonona hanazava ny anton’izany. Azon’izy ireo atao koa ny mitondra izany na ny sarin’izany ao am-pianarana raha mety.

Ireo asa azo atao ao anatin’ny fianarana

Drafitry ny Ray any An-danitra

Sary famantarana, torolalana ho an’ny fampianarana

Mba hanampiana ny olona ao amin’ny kilasy hifankahalala, dia hevero ny hanasa ny mpianatra hizara ny valin-tenin’izy ireo amin’ny fanontaniana eo ambany. Mety hanampy ny mpianatra ny hampiseho ny zavatra noeritreretin’izy ireo na hizara ny sarin’izany. Ataovy azo antoka fa manome vahana tontolo tsara sy feno fanajana ianao momba ireo zavatra manan-danja eo amin’ny fiainan’ny mpianatra.

• Inona no fahalalana heverinao fa tsy vitanao ny miaina tsy misy azy? Nahoana?

Amin’ny alalan’ny soratra masina sy ny fanambarana maoderina, dia ananantsika ny fahalalana momba ny fiainana talohan’ny nahaterahana, ny Sorompanavotan’ny Mpamonjy, ny fiainana aorian’ny fahafatesana sy ireo singa maro hafa momba ny fisiantsika mandrakizay. Ho sarotra ny hiaina tsy misy io fahalalana io. Makà fotoana hieritreretana ny zavatra fantatrao momba ny drafitry ny Ray any An-danitra. Saintsaino ny hoe mety hanao ahoana ny fiainanao tsy misy izany fahalalana izany.

Rehefa mandalina ianao anio, dia mikatsaha fiarahana amin’ny Fanahy Masina mba hanampy anao hahalala kokoa momba ny drafitra be fitiavan’ny Ray any An-danitra ho an’ny zanany.

Drafitry ny Ray any An-danitra ao amin’ny Bokin’ i Môrmôna

Sary famantarana, torolalana ho an’ny fampianarana

Mety hanampy ny fanoratana ireto fanontaniana sy fanovozan-kevitra manaraka ireto eny amin’ny solaitrabe. Safidy hafa azo atao ihany koa ny manoratra ny fanontaniana tsirairay amina taratasy kely misaraka ary mametraka izany taratasy izany manodidina ny efitrano. Asao ny mpianatra mba handeha manodidina ny efitrano sy hitady ny fanontaniana ary avy eo dia hijery ao amin’ny soratra masina ny valin’ny fanontaniana. Azon’ny mpianatra soratana eo amin’ilay taratasy mihitsy aza ny valiny hitan’izy ireo.

Ny Bokin’i Môrmôna dia mampianatra zavatra be dia be momba ny drafitry ny Ray any An-danitra. Ny Filoha Russell M. Nelson dia nanambara hoe: “Mijoro ho vavolombelona aho fa tena tenin’ Andriamanitra tokoa ny Bokin’i Môrmôna. Ahitana ny valin’ireo fanontaniana manan-danja indrindra amin’ny fiainana izy io” (Russell M. Nelson, “Ny Bokin’i Môrmôna: hanao ahoana re ny fiainanao raha tsy nisy azy?,” Liahona, nôv. 2017, 62). Indreto misy fanontaniana vitsivitsy valian’ny Bokin’i Môrmôna. Misafidiana roa farafahakeliny ary vakio ny andinin-tsoratra masina nanampy tamin’ny famaliana ilay fanontaniana.

• Inona no ampianarin’ny Bokin’i Môrmôna momba ny fiainana talohan’ny nahaterahana? (Almà 12:25, 30; ilay andian-teny hoe “fanorenana izao tontolo izao” dia manondro ny fiainana talohan’ny nahaterahana.)

• Inona no anjara asa tanan’i Jesoa Kristy amin’ny drafitry ny Ray any An-danitra? (Almà 22:12–14)

• Inona no tanjon’ny fiainana? (Almà 34:32–33)

• Inona no mitranga rehefa maty isika? (Almà 40:11–14, 21–23)

• Inona no mety hitranga raha tsy misy ny Sorompanavotan’i Jesoa Kristy? (2 Nefia 9:6–11)

Sary famantarana, torolalana ho an’ny fampianarana

Asao hifanakalo hevitra amin’ny valiny hitan’izy ireo tamin’ireo fanontaniana ny mpianatra. Azo asaina hametraka fanontaniana momba ny andininy novakian’izy ireo na ny drafitry ny Ray any An-danitra ny mpianatra. Azon’izy ireo ampiasaina ny teny iditra ao amin’ny Gospel Topics hoe “Plan of Salvation” mba hahatakarana ireo andinin-tsoratra masina sy hitadiavana valin’ny fanontanian’izy ireo.

• Inona avy ireo fahamarinana na fotopampianarana hitanao avy amin’ny andininy novakinao?

• Teny na andian-teny inona avy ao amin’ilay andininy no mampianatra ny fahamarinana na fotopampianarana hitanao?

  Sary famantarana, torolalana ho an’ny fampianarana

  Hevero ny hanoratra eny amin’ny solaitrabe ny fahamarinana na fotopampianarana hitan’ny mpianatra. Mety hahita karazana fahamarinana maro toy ny hoe amin’ny alalan’ny Sorompanavotan’i Jesoa Kristy dia afaka ny ho voavotra amin’ny Fahalavoana isika ny mpianatra.

• Inona amin’ireo fampianarana momba ny drafitry ny Ray any An-danitra no ankasitrahanao indrindra? Nahoana?

Sary famantarana, torolalana ho an’ny fampianarana

Mety hanampy raha mampihatra ny fanazavana ny drafitry ny Ray any An-danitra tsiroaroa na anatina vondrona ny mpianatra. Ankoatra ny fanazavana ny drafitra dia asao hizara ny fomba ahafahan’izany miantraika eo amin’ny fiainany ny mpianatra.

Ny drafitry ny Ray any An-danitra sy ny fiainako

Sary famantarana, torolalana ho an’ny fampianarana

Ampio hifanakalo hevitra amin’ny fomba ahafahan’ny fahalalana ny drafitry ny Ray any An-danitra miantraika amin’ny fiainany ny mpianatra. Azonao atao ny mihevitra ny hampiasa ity teny nambaran’ny Filoha M. Russell Ballard ity sy ny sasany amin’ireto fanontaniana manaraka ireto.

Ny Filoha M. Russell Ballard ao amin’ny Kôlejin’ny Apôstôly Roambinifolo dia nanazava ny fomba ahafahan’ny fahatakarana ny drafitry ny famonjen’ny Ray any An-danitra manampy antsika amin’ny fiainantsika. Afaka mijery ny horonan-tsary “Answers to Life’s Questions” manomboka eo amin’ny mari-potoana 10:37 hatramin’ny 12:09 ianao na mamaky ny lahatsoratra eo ambany:

Ny Filoha M. Russell Ballard

Isika mety maty dia manana fijery voafetra momba ny fiainana avy amin’ny fomba fijery mibanjina ny mandrakizay. Saingy raha mahalala sy mahatakatra ny drafitry ny Ray any An-danitra isika, dia tsapantsika fa ny fiatrehana zava-tsarotra no iray amin’ireo làlana fototra itsapana antsika. …

Amin’ny alalan’ny fifantohana sy fiainana ireo fitsipiky ny drafitry ny Ray any An-danitra ho an’ny fahasambarantsika mandrakizay, dia afaka manasaraka ny tenantsika amin’ny faharatsian’izao tontolo izao isika. Raha mifototra amin’ny fahatakarana marina momba ny hoe iza isika, nahoana no eto ambonin’ity tany ity isika, ary aiza no azontsika aleha aorian’ity fiainana an-tany ity, dia tsy afaka mandrahona ny fahasambarantsika amin’izay mety ho endrika fakam-panahy i Satana. Raha tapa-kevitra ka vonona hiaina amin’ny drafitry ny Ray any An-danitra isika, dia hampiasa ny fahafaha-misafidy nomen’ Andriamanitra isika mba hanapahan-kevitra miainga amina fahamarinana nahazoana fanambarana fa tsy ny hevitry ny hafa amin’ny fomba fisainan’izao tontolo izao ankehitriny. (M. Russell Ballard, “Answers to Life’s Questions,” Liahona, mey 1995, 23–24)

• Ahoana no iantraikàn’ny fahalalanao ny drafitry ny Ray any An-danitra amin’ny fiainanao?

• Inona avy ireo toe-javatra mety hiantraikàn’ny fahalalana ny drafitry ny Ray any An-danitra amin’ny fanapahan-kevitra ataonao?

• Ahoana no ahafahan’ny fahalalana ny drafitry ny Ray any An-danitra miantraika amin’ny fomba ijerenao ny toe-java-misy sy ireo zavatra iainanao amin’ny fiainanao?

Sary famantarana, torolalana ho an’ny fampianarana

Farano amin’ny alalan’ny fizarana ny fijoroanao ho vavolombelona momba ny drafitry ny Ray any An-danitra sy ny niantraikan’izany tamin’ny fiainanao ny lesona.

Fanamarihana sy fampahalalana voarakitra

Ahoana no maha-porofon’ny fitiavan’ Andriamanitra ny drafitry ny famonjena?

Nampianatra toy izao ny Filoha M. Russell Ballard ao amin’ny Kôlejin’ny Apôstôly Roambinifolo:

Ny Filoha M. Russell Ballard

Tia antsika fatratra ny Ray any An-danitra ka nanomana ny drafitry ny famonjeny Izy izay misy Mpamonjy mitana anjara fototra ao anatin’izany drafitra izany. Ary tia antsika fatratra i Jesoa ka rehefa nanontany ny Ray any An-danitra tany amin’ilay Filankevitra lehibe tany an-danitra hoe “Iza no hirahako?” Dia namaly i Jesoa, izay voalohan-teraka tamin’ireo fanahy zanaky ny Ray rehetra hoe: “Inty Aho, iraho Aho” [Abrahama 3:27]. Hoy Izy tamin’ny Ray hoe: “Ray ô, hatao anie ny sitraponao ary ho Anao ny voninahitra mandrakizay” [Mosesy 4:2]. Nirotsaka an-tsitrapo i Jesoa ho Mpamonjintsika sy Mpanavotra antsika mba ahafahantsika ho tonga tahaka Azy Ireo ary hiverina eo anatrehan’ Izy Ireo. (M. Russell Ballard, “Moa ny fitiavanao Ahy mihoatra noho ny fitiavan’ireto?,” Liahona, nôv 2021, 52)

Nahoana no misy fanamby eo amin’ny fiainantsika?

Hoy ny Filoha Dallin H. Oaks ao amin’ny Fiadidiana Voalohany hoe:

Ny Filoha Dallin H. Oaks

Samy miaina karazana fifanoherana samihafa izay mitsapa antsika isika rehetra. Ny sasany amin’ireo fitsapana ireo dia ny fakam-panahy hanota. Ny sasany dia ireo olana an-tany izay tsy avy amin’ny fahotana manokana. Ny sasany dia tena lehibe. Ny sasany tsy dia mafy. Ny sasany dia mitohy, ary ny sasany dia handalo fotsiny ihany. Tsy misy afa-miala isika tsirairay. Ny fifanoherana dia mamela antsika hitombo ho lasa ilay tian’ny Raintsika any An-danitra hahatongavantsika. (Dallin H. Oaks, “Fifanoherana amin’ny zava-drehetra,” Liahona, mey 2016, 115–16)

Ahoana no ahafahan’ny fahafantarana ny drafitry ny Ray any An-danitra manampy ahy?

Ny horonan-tsary “[Plan of Salvation—We’re Still a Family] Drafitry ny famonjena—Mbola fianakaviana iray isika” (4:46) dia mampiseho ny fomba nanampian’ny fananana fahalalana momba ny drafitry ny famonjena tovolahy iray hisedra ny fanamby amin’ny famoizana olona maro tao amin’ny fianakaviana.

Inona no tanjona sy dikan’ny fiainana?

Nanazava ny Filoha Dallin H. Oaks ao amin’ny Fiadidiana Voalohany hoe:

Ny Filoha Dallin H. Oaks

Io drafitra io, izay nambara ao amin’ny Famerenana amin’ny laoniny, ary antsoina ao amin’ny soratra masina hoe “ny drafitra lehiben’ny fahasambarana,” “ny drafitry ny fanavotana,” ary ny “drafitry ny famonjena” (Almà 42:8, 11, 5), dia nanomboka tamina filankevitra tany an-danitra. Fony isika fanahy dia naniry ny hahazo ilay fiainana mandrakizay izay efa azon’ireo ray aman-drenintsika any an-danitra. Tamin’izany fotoana izany dia nivoatra araka izay vitantsika isika tao anatin’ny tsy fananana traikefa momba ny fiainana an-tany miaraka amin’ny vatana nofo. Mba hanolorana izany traikefa izany dia nanao drafitra ny Ray any An-danitra hamoronana ity tany ity. Ao anatin’ilay fiainana an-tany izay nomanina, dia ho voaloton’ny fahotana isika rehefa hiatrika ny fanoherana izay ilaina ho an’ny fivoarantsika ara-panahy. Lasa iharan’ny fahafatesan’ny vatana ihany koa isika. Mba hamonjena antsika amin’ny fahafatesana sy ny fahotana dia hanolotra Mpamonjy ny Raintsika any An-danitra. Hanavotra ny rehetra amin’ny fahafatesana ny Fitsanganany amin’ny maty, ary ny sorompanavotany dia hanefa ny sarany ilaina mba hahavoadio antsika rehetra amin’ny fahotana rehefa manaraka ireo fepetra asaina arahina mba hampitombo ny fivoarantsika. Ivon’ny drafitry ny Ray io Sorompanavotan’i Jesoa Kristy io. (Dallin H. Oaks, “Ilay drafitra lehibe,” Liahona, mey 2020, 93)

Mba hahitana ankapobeny ny drafitry ny Ray any An-danitra, dia hevero ny hijery ny horonan-tsary “What Is the Purpose and Meaning of Life? [Inona no tanjona sy dikan’ny fiainana?]” (7:43) sy ny “Ny fiainana mandrakizaintsika” (3:46), azo jerena ao amin’ny Youtube sy ny ChurchofJesusChrist.org.

Ireo asa fanampiny atao ao anatin’ny fianarana

Fanombohana ny lesona hafa

Raha misy dia hevero ny hitondra solomaso misy fitaratra miloko. Manasà mpianatra iray hanao ilay solomaso sy hanazava ny fiantraikan’izany amin’ny fahitany. Avy eo dia azo asaina hieritreritra ny mety hiantraikàn’ny fijerena ny fiainana miaraka amin’ny drafitry ny Ray any An-danitra ao an-tsaina amin’ny fomba ieritreretan’izy ireo sy anaovany zavatra ny mpianatra. Rehefa azontsika kokoa ny drafitry ny Ray any An-danitra, dia mahazo fomba fahitana mazava kokoa ny fiainantsika eto an-tany isika. Ohatra iray ny hoe ireo izay mahalala fa misy fiainana aorian’ny fahafatesana dia mety hionona kokoa rehefa misy olona akaiky maty.

Mifantoha amin’ny anjara asa fototra raisin’ny Mpamonjy amin’ny drafitry ny famonjena

Hevero ny hampiasa ny lahateny nataon’ny Filoha Dallin H. Oaks “Inona no nataon’ny Mpamonjintsika ho antsika?” (Liahona, mey 2021, 75–77) mba hanampiana ny mpianatra hahatakatra ny fomba anampian’i Jesoa Kristy antsika handresy ireo fanamby mifandray amin’ny fiainana an-tany. Izany dia azo atao amin’ny alalan’ny famakiana ny tantara manokatra ny lahateny momba ilay vehivavy nanontany hoe: “Inona no nataon’i [Jesoa] ho ahy?” Zarazarao amin’ny iray kilasy ny ampahany amin’ny lahateny ary asao hitady valiny amin’izany fanontaniana izany izy ireo. Asao ny mpianatra mba hijoro ho vavolombelona momba ny fiantraikan’ny fahalalana ireo zavatra ireo amin’ny fahatsapany momba ny Ray any An-danitra sy i Jesoa Kristy. Azon’ny mpianatra atao ihany koa ny mandalina ireto andininy manaraka momba ny hoe mety hanao ahoana ny fiainana raha misy na tsy misy ny Mpamonjy.

• Miaraka amin’i Kristy: Mozià 16:8–11; Almà 11:42–45; Almà 12:33–34

• Tsy miaraka amin’i Kristy: 2 Nefia 9:6–9; Môzià 16:6–7; Almà 41:10–11; Almà 42:11–14

Asehoy an-tsary ny drafitry ny famonjena

Rehefa avy nandalina momba ny drafitry ny Ray any An-danitra ny mpianatra, dia azonao asaina hamorona fanehoana an-tsary hanazavana ny drafitra sy ny anjara asan’ny Mpamonjy amin’izany. Azon’ny mpianatra ampiasaina ny fanehoana an-tsarin’izy ireo mba hampiharana ny fanazavana amin’ny mpiara-mianatra ny zavatra fantatr’izy ireo momba ny drafitra. Ity manaraka ity dia ohatra amin’ny fanehoana an-tsary.

Drafitry ny famonjena

Ny drafitry ny famonjena mizara telo

Fomba iray ahatakarana ny drafitry ny famonjena ny fizarana izany ho telo: talohan’ny nahaterahana, eto an-tany ary aorian’ny fiainana eto an-tany. Hevero ny hizara ny horonan-tsary “Ny drafitry ny famonjena” (10:39) sy hanasa ny mpianatra hitady ny fomba ahafahana mampitaha io drafitra io amina tantara an-tsehatra mizara telo sy ny fomba ahafahan’ny fijerena azy io amin’izany fomba izany manampy azy ireo hahatakatra tsara kokoa izany. Ny toerana ijanonana ao amin’ny horonantsary ary ifanakalozan-kevitra dia ahitana ireto mari-potoana ireto:

• 1:42: Ahoana no ahafahan’ny fahatakarana ny drafitry ny Ray any An-danitra manampy amin’ireo zava-misy ireo?

• 2:59: Nahoana no eritreretinao fa hanakorontan-tsaina izany? Ahoana no anampian’ny fahafantarana ny zava-nitranga tany am-piandohana?

• 4:56: Inona no tari-dalana an-tsoratra ananantsika mba hanampy antsika? Ahoana no fomba nanampian’izany anao?

• 6:00: Jereo ny ampahany telo amin’ny drafitra ary hazavao ny fomba anampian’ny fahalalana azy ireo.