Loharanom-pitaovana fampahafantarana

Mahazo fahalalana ara-panahy, Tapany 1

Manao asa amim-pinoana

Iray amin’ireo tanjon’ny fifehezana fotopampianarana ny fanampiana anao hianatra sy hampihatra ireo fitsipiky ny mahazo fahalalana ara-panahy mba hanampy anao hanangana ny fototrao eo amin’i Jesoa Kristy. Ity lesona ity dia afaka manampy anao hanao asa amim-pinoana an’i Jesoa Kristy rehefa mitady valiny amin’ireo fanontaniana sy olana eo amin’ny fiainanao ianao.

Mampianatra ny mpianatra ireo fitsipiky ny mahazo fahalalana ara-panahy. Rehefa fantatry ny mpianatra ny fitsipiky ny mahazo fahalalana ara-panahy ary ampihariny, dia afaka mahavita tsara kokoa ireo tanjon’ny fifehezana fotopampianarana izy ireo. Ataovy azo antoka fa averina jerena matetika ao amin’ny kilasy ireo fitsipika ireo mba hanampiana ny mpianatra hahatakatra izany. Hanana fahafahana hampihatra ireo fitsipika ireo amin’ny leson’ny fifehezana fotopampianarana ny mpianatra.

Fiomananan’ny mpianatra: Asao ny mpianatra mba hanontany olona iray ao amin’ny fianakaviana na mpitarika ao amin’ny Fiangonana izay maneho finoana lehibe an’i Jesoa Kristy momba ny zavatra ataon’izy ireo mahatonga azy hahery hatrany rehefa miatrika fanontaniana na olana momba ny filazantsara.

Sahanasa fianarana azo atao

Fanamarihana: Mety ho tsara kokoa raha ampianarina any am-panombohan’ny taom-pianarana ity lesona ity na amin’ny fotoana ampahafantarana ny mpianatra ireo fitsipiky ny mahazo fahalalana ara-panahy.

Tsara sa ratsy ny fanontaniana?

Eritrereto hoe iza amin’ireto valiny manaraka ireto no mihatra amin’io fanontaniana io:

• Iza amin’ireto manaraka ireto no mety ho antony ananan’ny olona iray fanontaniana momba ny filazantsara na ny Fiangonan’i Jesoa Krsity?

  

  Hevero ny hamaky ireto safidy manaraka ireto amin’ny mpianatra: Miatò isaky ny vita ny safidy iray mba hanontaniana ny mpianatra sasany ny antony inoan’izy ireo fa marina tsara na tsy marina tsara izany safidy izany. Ampio ny mpianatra hahatakatra fa ny tsirairay amin’ireo safidy ireo dia afaka ny ho marina tsara na tsy marina tsara, miankina amin’ny fanirian’ny olona iray sy ny safidiny.

  1. Mbola tsy manana fijoroana ho vavolombelona momba ny filazantsara izy ireo.

  2. Tena ao an-tsain’izy ireo ny filazantsara ka tiany ny hahatakatra bebe kokoa.

  3. Misalasala amin’ilay finoana nananany taloha izy ireo.

  4. Mety manentana azy ireo hieritreritra mombana zavatra iray tiany hampianarina azy ireo Andriamanitra.

     Miankina amin’ny fomba fisainan’ny olona iray sy ny antony ametrahany fanontaniana ny valiny. Vakio ny andiam-pehezan-teny 3 ao amin’ny fizarana hoe “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana (2022), ka tadiavo ny fomba ahafahan’ny fomba handraisantsika ireo fanontaniana momba ny filazantsara mampatanjaka na mampalemy ny finoantsika an’i Jesoa Kristy.

• Inona no hitanao ho niavaka indrindra ao amin’io andiam-pehezan-teny io? Nahoana?

Hevero ny hanasa ny mpianatra hisaintsaina ny fomba niantraikàn’ireo fanontaniana sy ireo ahiahy tamin’ny fandrosoan’izy ireo ara-panahy. Afaka manampy amin’izany ity andiam-pehezan-teny manaraka ity.

Manana fanontaniana sy ahiahy daholo ny olon-drehetra. Tokony hitandrina isika mba tsy hitsara ny finoan’ny hafa rehefa manana fanontaniana izy ireo, ary tsy mila misalasala amin’ny finoantsika isika rehefa manana fanontaniana. Afaka ny hihamatanjaka na hihamalemy ny finoantsika an’i Jesoa Kristy sy ny fijoroantsika ho vavolombelona momba ny filazantsara naverina tamin’ny laoniny, miankina amin’ny fomba handraisantsika ireo fanontaniantsika sy ahiahintsika. Rehefa mandalina ianao anio, dia eritrereto ny anjara asa tanan’ireo fanontanianao amin’ny fandrosoanao ara-panahy. Inona avy no fanontaniana anananao momba ny filazantsara na ny Fiangonan’i Jesoa Kristy? Tsapanao ho misarika anao hanakaiky kokoa ny Mpamonjy sy ny Fiangonany ve ny fanontanianao?

Mahazo fahalalana ara-panahy

Mandritra ny fanaovanao seminera dia hanana fahafahana hampihatra ny fampiasana ireo fitsipika ao amin’ny mahazo fahalalana ara-panahy ianao. Ireto fitsipika telo manaraka ireto dia afaka manampy anao hanatona akaiky kokoa an’i Jesoa Kristy rehefa misy fanontaniana na ahiahy miseho eo amin’ny fiainanao:

1. Manao asa amim-pinoana.

2. Mamakafaka ireo hevi-dehibe sy ireo fanontaniana amin’ny fomba fijery mibanjina ny mandrakizay.

3. Mikatsaka fahatakarana bebe kokoa amin’ny alalan’ireo loharanom-pahalalana nofidin’ Andriamanitra.

Raha nanao seminera ny mpianatra sasany ao amin’ny kilasy taloha, dia hevero ny hanontany azy ireo ny zavatra efa hainy momba ireo fitsipika telo ireo. Afaka manome ny iray kilasy fahitana ankapobeny fohifohy momba ireo fitsipika izany ary afaka milaza ny haavon’ny fahatakaran’ny mpianatra amin’izao fotoana izao.

Hifantoka amin’ny fitsipiky ny fanaovana asa amim-pinoana an’i Jesoa Kristy ny ambin’ity lesona ity.

Vakio ny andiam-pehezan-teny 5–7 ao amin’ny fizarana “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana hitadiavana fomba maro ahafahanao mamarana ity fehezan-teny manaraka ity.

Hevero ny hanoratra eny amin’ny solaitrabe ity fehezan-teny tsy vita hatramin’ny farany ity:

Rehefa miseho ny fanontaniana sy fanahiana, dia afaka manao asa amim-pinoana an’i Jesoa Kristy isika amin’ny alalan’ny… .

Manasà mpianatra maromaro ho eny amin’ny solaitrabe ka hamarana ilay fanambarana. Hevero ny hametraka fanontaniana fanaraha-maso mba hanampiana ny mpianatra hanamboatra ho azy manokana ny zavatra hitany. Ohatra:

Raha toa ny mpianatra iray ka manoratra hoe “manohy mitandrina ny didy” (jereo ny andiam-pehezan-teny 5), amin’izay ny fanontaniana fanaraha-maso dia azo atao hoe “Ahoana araka ny hevitrao no ahafahan’ny fitandremana ny didy manampy anao hijanona ho akaiky an’i Jesoa Kristy rehefa miatrika olana sarotra ianao? Misy aminareo ve te hizara zavatra efa niainanareo tamin’izany?”

Raha toa ny mpianatra iray ka manoratra hoe “mihazonana ny zavatra efa fantatsika fa marina” (jereo ny andiam-pehezan-teny 6), amin’izay ny fanontaniana fanaraha-maso dia mety atao hoe “Makà fotoana kely hisaintsainana ny zavatra fantatrao fa marina ka azonao hazonina rehefa miseho ny fanontaniana. Ahoana no ahafantaranao fa marina izany zavatra izany?”

Raha toa ny mpianatra iray ka manoratra hoe “mahatoky an’ Andriamanitra mandra-pahatongan’ny valiny” (jereo ny andiam-pehezan-teny 7), amin’izay ny fanontaniana fanaraha-maso dia mety hoe “Inona no fantatrao momba an’ Andriamanitra ka manampy anao hatoky Azy eo am-piandrasanao valiny? Nahoana no misy fotoana mety hisafidy ny tsy hanome antsika valiny feno eo no ho eo Andriamanitra?

• Iza amin’ny fomba nosafidianao no heverinao fa mihatra indrindra amin’ny zatovo ankehitriny na amin’ny fiainanao mihitsy aza? Nahoana?

• Ahoana no ahafahan’ny fisafidianana hanao asa amim-pinoana amin’io fomba io miantraika amin’ny fifandraisan’ny olona iray amin’ny Mpamonjy?

• Iza no fantatrao fa nanao asa tamim-pinoana rehefa niatrika fanontaniana na ahiahy? Inona no nataony?

. . .

.

. .

Ohatra ao amin’ny soratra masina.

Hevero ny hanambatra ny sosokevitra ao amin’ny “Sahanasa fianarana fanampiny” amin’ity asa atao manaraka ity mba hanampiana ny mpianatra hahita ny fomba ahafahan’ny fomba fisainana sy safidy hampihena na hampitombo ny finoana an’i Jesoa Kristy.

Ireo soratra masina ireo dia ahitana fitantarana maro momba ireo izay niatrika fanontaniana sarotra sy fanahiana tamin’ny finoana an’i Jesoa Kristy. Iray amin’izy ireny ny mpaminany Nefia. Vakio ireto ohatra manaraka avy amin’ny fiainan’i Nefia ireto ary tadiavo ny fomba nanaovany asa tamim-pinoana an’i Jesoa Kristy rehefa niatrika fanontaniana sy olana hafa izy.

• 1 Nefia 2:16—Ny sasany tamin’ireo akaiky azy dia tezitra tamin’ny zavatra nasain’i Lehia mpaminany, rainy nataon’izy ireo.

• 1 Nefia 3:7—Nangatahina hanao zava-tsarotra izy.

• 1 Nefia 9:5–6—Nandidy azy hanao zavatra noho ny antony tsy fantany ny Tompo.

• 1 Nefia 10:17; 11:1–5—Naniry izy ny hanana ny fijoroany ho vavolombelona manokana momba ny zavatra nampianarin’ny rainy, ilay mpaminany.

• 1 Nefia 11:17—Tsy fantany tanteraka ny valin’ny fanontaniana iray nanontaniana azy momba ny filazantsara.

• Singa inona amin’ny fanaovana asa amim-pinoana no tena nasehon’i Nefia tamina ohatra?

Hevero ny hanasa ny mpianatra hizara ity manaraka ity amina vondrona kely mba hahafahana mpianatra misimisy kokoa manana fahafahana hizara.

Mamarita fanontaniana maoderina iray na olana izay mety hiantraika amin’ny finoan’ny olona iray an’i Jesoa Kristy sy ny Fiangonany. Ahoana no ahafahan’ny olona iray manao asa amim-pinoana rehefa miatrika izany fanontaniana na olana izany?

• Ahoana no ahafahan’ny fisafidianana hanao asa amim-pinoana na tsy hanao asa amim-pinoana miantraika amin’ny fifandraisany amin’ny Mpamonjy?

• Inona no tianao hampiharina indrindra amin’ny fiainanao avy amin’ny zavatra nohalalininao androany? Ahoana no ahafahan’izany manampy anao eo amin’ny fiainanao?

Fanazavana sy fampahalalana avy amin’ny zava-miseho

Tsy maninona ve izany hoe mametra-panontaniana momba ny filazantsara izany?

Nampianatra ny Filoha Dieter F. Uchtdorf, fony izy tao amin’ny Fiadidiana Voalohany hoe:

Voajanahary ny fananana fanontaniana—ny voa kelin’ny fangatahana amin-kitsimpo matetika dia nitsimoka ary nitombo ka lasa hazo lehiben’ny fahatakarana. Misy mpikambana vitsivitsy ato amin’ny Fiangonana izay tsy niady mafy nametraka fanontaniana lehibe na manohina, tao anatin’ny fotoana iray na ny fotoana hafa. Iray amin’ireo tanjon’ny Fiangonana ny mikolokolo sy mikarakara ny voan’ny finoana, eny fa na dia ao anatin’ny tany feno fasiky ny ahiahy sy ny fisalasalana aza indraindray. Ny finoana dia fanantenana ny zavatra izay tsy hita nefa marina.

Noho izany, ry rahalahiko sy anabaviko malala isany, ry namako malala isany, miangavy anareo aho hoe ny ahiahinareo aloha no ahiahio alohan’ny hiahiahianareo ny finoanareo. Tsy tokony hamela ny ahiahintsika mihitsy isika hanagadra sy hanakana antsika tsy hahazo ilay fitiavan’ Andriamanitra sy ny fiadanany ary ireo fanomezam-pahasoavana izay tonga amin’ny alalan’ny finoana ny Tompo Jesoa Kristy. (Dieter F. Uchtdorf, “Andao Hiaraka Aminay,” Liahona, nôv. 2013, 23)

Nanazava ny Filoha Russell M. Nelson hoe:

Ny saina manontany ihany no azon’ny Tompo ampianarina. (Russell M. Nelson, ao amin’ny M. Russell Ballard, “What Came from Kirtland” [Fampaherezam-panahy tao amin’ny Oniversiten’i Brigham Young, 6 nôv, 1994], 8, speeches.byu.edu)

Inona no tokony hataoko raha miady mafy amin’ny fisalasalana momba an’ Andriamanitra sy ny Fiangonana aho?

Nilaza ny Filoha Russell M. Nelson hoe:

Misafidiana ny hino an’i Jesoa Kristy. Raha manana fisalasalana momba an’ Andriamanitra Ray sy i Jesoa Kristy Zanaka Malalany ianao, na ny maha-azo antoka ny Famerenana amin’ny laoniny na ny fahamarinan’ny maha-avy amin’ Andriamanitra ny fiantsoana an’i Joseph Smith ho mpaminany, dia safidio ny hino ary mitoera ho mahatoky. Ento any amin’ny Tompo sy ireo loharano azo antoka ireo fanontanianao. Manaova fandalinana omban’ny faniriana ny hino toy izay amin’ny fanantenana mba hahazoanao mahita tsy fahalavorariana eo amin’ny ambaindain’ny fiainan’ny mpaminany na ireo boky mirakitra soratra masina. Atsaharo ny fampitomboana ireo fisalasalanao amin’ny alalan’ny firesahanao izany amin’ireo mpisalasala hafa. Avelao ny Tompo hitarika anao eo amin’ny dianao mankamin’ny fahatakarana ara-panahy. (Russell M. Nelson, “Nitsangana i Kristy; hamindra tendrombohitra ny finoana Azy,” Liahona, mey 2021, 103)

Nilaza toy izao ny Loholona Ronald A. Rasband ao amin’ny Kôlejin’ny Apôstôly Roambinifolo:

Mamporisika anareo aho amin’izao fotoana izao mba hahatsiaro, indrindra amin’ny fotoana isian’ny olana, ny fotoana nahatsapanareo ny Fanahy sy nananareo fijoroana ho vavolombelona matanjaka. Tsarovy ireo fototra ara-panahy naorinareo. Mampanantena aho fa raha manao izany ianareo, izany hoe misoroka ireo zavatra izay tsy manorina sy tsy mampatanjaka ny fijoroana ho vavolombelona anananareo na manao tsinontsinona ny finoanareo, dia hiverina ho tsaroanareo indray ireo fotoana sarobidy nampiroborobo ny fijoroana ho vavolombelona nanananareo amin’ny alalan’ny vavaka sy fifadian-kanina atao amim-panetrentena. Manome toky anareo aho fa hahatsapa indray ny fiarovana sy ireo zavatra mahafinaritra avy amin’ny filazantsaran’i Jesoa Kristy ianareo. (Ronald A. Rasband, “Fandrao hadinoinao,” Liahona, nôv. 2016, 114)

Sahanasa fianarana fanampiny

Ohatra ao amin’ny soratra masina.

Ity sosokevitra ity dia azo ampiasaina ho solon’ny sosokevitra fandalinana soratra masina tsy manadihady afa-tsy ny ohatr’i Nefia.

Hevero ny hampiseho ity sary manaraka maneho ny fianakavian’i Lehia mamakivaky ny tany efitra ity. Asao ny mpianatra mba hizara ny fanontaniana na olana mety ho nananany raha iray amin’ireo zanak’i Lehia izy ireo.

Rehefa avy eo dia asao ny mpianatra mba hampifanohitra ny zavatra nataon’i Lamana sy i Lemoela momba ireo fanontaniana sy fanahian’izy ireo ao amin’ny 1 Nefia 2:12–13 amin’ny zavatra nataon’i Nefia ao amin’ny andininy 16.

Azon’ny mpianatra ampifanoherina toy izany ny fihetsik’i Lamana sy i Lemoela manoloana ny fitadiavana valiny amina fanontaniana momba ny filazantsara 1 Nefia 15:2–3, 8–9 amin’ny fihetsik’i Nefia ao amin’ny 1 Nefia 10:17; 11:1.

Asao ny mpianatra mba hifanakalo hevitra amin’ny fomba iharan’ireo ohatra nasehon’ireo rahalahy ireo amintsika ankehitriny.