Loharanom-pitaovana fampahafantarana

Mandalina ny soratra masina

Hazòny mafy ny tenin’ Andriamanitra

Miavaka ny soratra masina eo amin’ny fahafahany mampitombo ny finoana sy fitiavana ny Ray any An-danitra sy i Jesoa Kristy. Ny fandalinana tsy miovaova sy manan-danja dia manasa ny finoana sy manamafy orina ny fiainantsika andavanandro. Ny tanjon’ity lesona ity dia ny hampitombo ny fanirianao sy ny fahafahanao handalina ny soratra masina isan’andro sy handray ireo fitahiana nampanantenaina izay miaraka amin’ny fandalinana soratra masina.

Mamporisika ny mpianatra hanana fahazarana mandalina soratra masina isan’andro. Zavatra vitsivitsy ihany no hanana fitaomana mahery vaika sy fitarihana ho amin’ny tsara maharitra kokoa eo amin’ny fiainan’ireo mpianatra mihoatra ny fanampiana azy ireo hianatra hitia ny soratra masina sy handalina izany isan’andro. Fomba iray hanaovana izany ny fifampiresahana amin’ny mpianatra momba ireo tombontsoa sy fitahiana entin’ny fandalinan’ny tena manokana ny soratra masina isan’andro.

Fiomanan’ny mpianatra: Omeo ny mpianatra ilay taratasy zaraina “Fitsapam-pahaizana momba ny fandalinana soratra masina” avy amin’ity lesona ity hoentiny mody sy hofenoiny. Hevero ny hanasa mpianatra hangataka olona ao amin’ny fianakaviana hamaly ireo fanontaniana ihany koa ary hiaraka hifanakalo hevitra amin’ny valin-tenin’izy ireo.

Sahanasa fianarana azo atao

Fandalinana ny soratra masina isan’andro

Mba hanampiana ny mpianatra hahita ny maha-zava-dehibe ny ezaka tsy miovaova amin’ny fandalinana ny soratra masina rehefa mandeha ny fotoana, dia hevero ny hanasa mpianatra iray izay mahavita tsara manao pompe mba hiroso eny alohan’ny iray kilasy hanao fampisehoana. Rehefa vitany izany dia hevero ny hanontany hoe: “Matanjaka kokoa ve ilay mpianatra izao izy avy nanao pompe vitsivitsy izao? Nahoana, na raha tsia dia nahoana?”

Raha te hatanjaka kokoa amin’ny alalan’ny fanaovana pompe ny olona iray, dia inona no zavatra tsy maintsy ataony? Hafiriana no mety hilaina mba hahitana fitomboan-tanjaka misongadina? Inona avy no fanamby mety ho tsy maintsy resen’ilay olona?

• Inona no ifandraisan’izany amin’ny fandalinana soratra masina?

Vakio ireto teny nambaran’ny Filoha Thomas S. Monson (1927–2018) sy i Julie B. Beck, Mpanolotsaina Voalohany tao amin’ny Fiadidian’ny Zatovovavy Maneran-tany tamin’izany ireto, ary jereo ny zavatra ampianarin’izy ireo momba ny fandalinana soratra masina:

Ny fampiasam-potoana isan’andro amin’ny fandalinana soratra masina dia tsy isalasalana fa hampahatanjaka ireo foto-pinoantsika sy ireo fijoroantsika ho vavolombelon’ny fahamarinana. (Thomas S. Monson, “How Firm a Foundation,” Liahona, nôv. 2006, 68)

Na dia tsy mihevitra ny tenako ho manampahaizana aza aho, … dia ankasitrahako ny nanombohako ny fahazarana mandritra ny androm-piainana mamaky [ny soratra masina]. Zavatra tsy mitombina ny hianarana ireo lesona hita ao amin’ny soratra masina amin’ny alalan’ny famakiana azy ireo indray mandeha fotsiny na fandalinana andininy voafantina ao am-pianarana. (Julie B. Beck, “Mon âme fait ses délices des Ecritures,” Liahona, mey 2004, 107)

• Inona no hitanao?

Hevero ny hampiseho ity fitsapana ny fahaizan’ny tena momba ny fandalinana soratra masina ity mba hahafahan’ny mpianatra mameno izany samirery.

Hevero ny fahatsapanao momba ny fandalinanao ny soratra masina.

Taratasy zaraina: “Fitsapam-pahaizana momba ny soratra masina”

Bokin’i Môrmôna: Boky torolalana ho an’ny mpampianatra seminera (2024)—“Mandalina ny soratra masina”

Omeo naoty amin’ireto fanambarana manaraka ireto ny tenanao, amina ambaratonga 1 hatramin’ny 5 (ny 1 dia ambany ary ny 5 dia ambony):

• Laharam-pahamehana amiko ny fandalinana ny soratra masina isan’andro.

• Fantatro sy ampiasaiko ny fahaizana mandalina soratra masina (vavaka, fisaintsainana, fanamarihana ambanim-pejy, fanamarihana sy ny sisa) izay manampy ahy hahazo kokoa ny soratra masina.

• Azoko ny zavatra vakiako ao amin’ny soratra masina.

• Manampy ahy hahatsapa ho akaiky kokoa an’i Jesoa Kristy ny fandalinana soratra masina.

Azo atao ny manasa ny mpianatra hizara ny fanamby mety hatrehiny amin’ny fandalinana manan-danja ny soratra masina isan’andro. Hevero ny hanasa ny mpianatra hizara izay mety ho vahaolana amin’izany fanamby izany. Ampio ny mpianatra hahatakatra fa na dia eo aza ny toerana misy azy ireo amin’ilay fitsapam-pahaizana, dia afaka ny hitombo amin’ny fahaizan’izy ireo mandray ny fitahian’ny fandalinana soratra masina izy ireo.

© 2023 an’ny Intellectual Reserve, Inc. All rights reserved.

Fitahiana amin’ny fandalinana ny soratra masina

Vakio ireto andininy manaraka ireto, ka jereo ireo fitahiana azo avy amin’ny fandalinana ny soratra masina.

Azo atao ny manasa ny mpianatra hanoratra eny amin’ny solaitrabe ireo fitahiana samihafa avy amin’ny fandalinana soratra masina. Rehefa manoratra izy ireo dia asao hanisy marika ihany koa eo akaikin’izay fitahiana noraisin’izy ireo.

• 1 Nefia 15:24

• 2 Nefia 32:3

• Môzià 1:3–5

• Almà 17:2–3

• Almà 37:8–9

• Inona avy ireo fahamarinana mifandray amin’ny fandalinana soratra masina hitanao avy amin’ireo andininy ireo?

Mety ho hitan’ny mpianatra ny fahamarinana toy ny hoe raha mihaino sy mihazona mafy ny tenin’ Andriamanitra isika, dia hitahy antsika hahatohitra ny fakam-panahy sy ny ratsy Izy (jereo ny 1 Nefia 15:24); Hanampy antsika hahalala ny tokony hatao amin’ny fiainantsika i Jesoa Kristy rehefa mivoky amin’ny teniny isika (jereo ny 2 Nefia 32:3); ary afaka manampy ahy hahalala sy hifaly ao amin’i Jesoa Kristy ny fandalinana ny soratra masina (jereo ny Almà 37:9).

• Iza amin’ireo fahamarinana na fitahiana ireo no efa niainanao?

Ho an’ny fitahiana hafa avy amin’ny fandalinana soratra masina, jereo ny “Fanazavana sy fampahalalana avy amin’ny Zava-miseho”.

Ahoana no ahafahako mahazo misimisy kokoa avy amin’ny fandalinako soratra masina?

Ity fanontaniana manaraka ity dia azon’ny mpianatra ifanakalozana hevitra anatina vondrona kely na tsiroaroa. Hevero ny hanasa ny mpianatra hizara ny hevitra takatr’izy ireo. Azonao atao ny manasa ny mpianatra hizara antsipiriany hafa momba ny valintenin’izy ireo, toy ny hoe amin’ny fomba ahoana, oviana, na nahoana no mampiasa izany fomba izany izy ireo.

• Inona no afaka manampy olona iray hahazo bebe kokoa amin’ny fandalinany soratra masina?

Vakio ity teny nambaran’ny Loholona D. Todd Christofferson ao amin’ny Kôlejin’ny Apôstôly Roambinifolo ity ary mitadiava fahaizana fanampiny afaka manampy ny fandalinana soratra masina hisy fiantraikany bebe kokoa.

Zavatra tsara indraindray ny mamaky bokin-tsoratra masina iray ao anatin’ny fotoana voafaritra mba hahafantarana ny dikan’ny hafatra entiny amin’ny ankapobeny, saingy ho an’ny fiovam-po dia tokony hiraharaha bebe kokoa mikasika ny habetsahan’ny fotoana lanianao amin’ny soratra masina ianao toy izay mikasika ny habetsahan’ny zavatra vakinao ao anatin’izany fotoana izany. Indraindray dia azoko sary an-tsaina ianareo mamaky andininy vitsivitsy, miato mba handinika izany, mamaky amim-pitandremana indray ireo andininy, ary rehefa iny mieritreritra momba ny hevitra tian’izy ireo ambara iny, mivavaka mba hahatakatra izany, mametra-panontaniana ao an-tsainareo, miandry fahatsapana ara-panahy, ary manoratra ireo zavatra tsapa sy hevi-baovao izay tonga mba hahafahanareo mitadidy sy mianatra bebe kokoa. Rehefa mandalina toy izany ianareo, dia mety tsy mamaky toko na andininy maro ao anatin’ny antsasan-kadiny, saingy hanisy toerana ho an’ny tenin’ Andriamanitra ao am-ponareo ianareo ary hiresaka aminareo Izy. (D. Todd Christofferson, “When Thou Art Converted,” Liahona, mey 2004, 11)

• Inona no hitanao amin’ireo hevitra ireo ka afaka mitahy ny fomba fandalinana soratra masina?

Afaka manampy hevitra fanampiny izay mbola tsy voasoratra eny amin’ny solaitrabe ny mpianatra.

Ankoatra ity fahaizana mandalina soratra masina manaraka ity, dia misy hevitra momba ny fahaiza-manao be dia be izay azo ampiasaina omena ao amin’ny fizarana “Sahanasa fianarana fanampiny” eo ambany.

Azonao atao ny manasa ny mpianatra hanao ity sahanasa manaraka ity samirery am-pahanginana. Avy eo dia zarao ho vondrona kely maromaro na mandeha tsiroaroa izy ireo mba hizara ny zavatra nianarany.

Raiso hanandramana mampiasa ny sosokevitra nomen’ny Loholona Christofferson ny 5 na 10 minitra manaraka. Makà fotoana hisaintsainana, hamerenana mamaky, hivavahana, hametrahana fanontaniana ary hanoratana ny fahatsapana. Indreto misy andinin-tsoratra masina azonao hampiasaina (aza misalasala mifantina andininy samihafa ao amin’ny Bokin’i Môrmôna).

Môzià 3; Almà 32; 3 Nefia 11

Rehefa avy nomena fotoana handalinana ny mpianatra dia asao izy ireo mba hizara ny zavatra niainany. Mety hanampy ireto fanontaniana manaraka ireto.

• Inona no zavatra niainanao rehefa nandalina ny soratra masina tamin’io fomba io?

• Ahoana no mety hiantraikàn’ny fandalinana amin’io fomba io amin’ny fandalinanao manokana ny soratra masina?

Manaova tanjona amin’ny fomba fandalinana soratra masina

Iray amin’ny tanjon’ny seminera ny hanampy anao hanatona kokoa an’i Jesoa Kristy amin’ny alalan’ny fandalinana ny soratra masina isan’andro. Mba hanampiana anao dia takina amin’ny isa tratrarina amin’ny seminera ny famakiana ny bokin’ny soratra masina ho an’ny taona hitsahina amin’ny 75 isan-jaton’ny tetiandron’ny fe-potoana ianarana farafahakeliny.

Mikatsaha aingam-panahy amin’ny alalan’ny Fanahy Masina mba hametrahana tanjona amin’ny fomba fandalinana anao manokana. Mba hanampiana anao dia atombohy amin’ny alalan’ny fanaovana vavaka mba hikatsahana aingam-panahy avy amin’ny Ray any An-danitra. Eritrereto ireto fanontaniana manaraka ireto rehefa mametraka tanjona ianao:

• Amina fotoana inona ary aiza no ahafahako manao ny fandalinako soratra masina isan’andro?

• Adiny firy isan’andro no handalinako?

• Inona no azoko atao mba hanasana kokoa ny Fanahy Masina ao anatin’ny fanaovako fandalinana soratra masina?

Fanazavana sy fampahalalana avy amin’ny zava-miseho

Inona avy ireo fitahiana fanampiny afaka ny ho tonga avy amin’ny fandalinana soratra masina?

Nampianatra ny Loholona D. Todd Christofferson ao amin’ny Kôlejin’ny Apôstôly Roambinifolo hoe:

Ny tena tanjon’ny soratra masina rehetra amin’ny farany dia ny hameno ny fanahintsika amin’ny finoana an’ Andriamanitra Ray sy i Jesoa Kristy Zanakalahiny. (D. Todd Christofferson, “Ny fitahian’ny soratra masina,” Liahona, mey 2010, 34)

Nampianatra ny Filoha Russell M. Nelson hoe:

Ny filomanosana isan’andro ao amin’ny tenin’ Andriamanitra dia zava-dehibe ho an’ny fiavotana ara-panahy, indrindra fa ao anatin’izao andro isian’ny fiovana sarotra tsy mitsaha-mitombo izao. Rehefa mivoky amin’ny tenin’i Kristy isan’andro isika, dia ny tenin’i Kristy no hanambara amintsika ny fomba hiatrehana ireo zava-tsarotra izay tsy noheverintsika mihitsy ho atrehana. (Russell M. Nelson, “Henoy Izy,” Liahona, mey 2020, 89)

…

Sahanasa fianarana fanampiny

Mampiditra vavaka amin’ny fandalinana soratra masina

Ampio ny mpianatra hahatakatra fomba samy hafa ahazoana mampiasa ny vavaka hanatsarana ny fandalinana soratra masina. Apetraho ity fanontaniana manaraka ity:

• Inona no azonao entina am-bavaka eo am-panombohana sy mandritra ny fandalinana soratra masina?

Hevero ny hizara ity teny nambaran’ny Filoha Howard W. Hunter (1907–95) ity: “Tsy misy zavatra manampy mihoatra ny vavaka mba hanokafana ny fahatakarantsika ny soratra masina. Amin’ny alalan’ny vavaka dia afaka manazatra ny saintsika hikatsaka ny valin’ny fikarohantsika isika” (“Reading the Scriptures,” Ensign, nôv. 1979, 64).

Fisaintsainana

Azonao atao ny manampy ny mpianatra hahatakatra fa ny fisaintsainana ny tenin’ Andriamanitra dia afaka mitarika ho amina fanambarana ho an’ny tena manokana. Ireto andininy manaraka ireto dia manampy amin’ny fanehoana izany fahamarinana izany: 1 Nefia 11:1; Helamàna 10:2–3; Fotopampianarana sy Fanekempihavanana 76:19; Fotopampianarana sy Fanekempihavanana 138:1, 11. Hevero ireto fanontaniana ifanakalozana hevitra ireto:

• Nahoana araka ny hevitrao no afaka mitarika mankany amin’ny fanambarana ho an’ny tena manokana ny fisaintsainana?

• Inona no mety hosaintsainin’ny olona iray rehefa mandalina soratra masina?

• Ahoana no ahafahanao mamela io fahaiza-manao io hitahy kokoa ny fandalinanao?

Fitadiavana fitsipika

Ny fanampiana ny mpianatra hamantatra fitsipika dia afaka manampy amin’ny fanatsarana ny fandalinan’izy ireo soratra masina. Azonao atao ny mizara ity fanambarana ity amin’ny mpianatra mba hanampiana azy ireo hahalala hoe inona izany fitsipika izany.

Ny Loholona Richard G. Scott (1928–2015) tao amin’ny Kôlejin’ny Apôstôly Roambinifolo dia nilaza toy izao: “Ireo fitsipika dia fahamarinana ambongadiny izay natambatra mba ho azo ampiharina amin’ny karazana toe-java-mitranga maro samihafa. Ny fitsipika marina iray dia mampazava ny fanapahan-kevitra na dia ao anatin’ny toe-javatra tena mampikorontan-tsaina sy feno faneriterena aza” (“Acquiring Spiritual Knowledge,” Ensign, nôv. 1993, 86).

Fampiasana fanamarihana ambanim-pejy

Fomba iray ahafahan’ny mpianatra manao fandalinana soratra masina mampivoatra ny fampiasana fanamarihana ambanim-pejy. Ahitana fanondroana andininy hafa na fitaovana fanampiny izy ireny mba hanampiana ny mpianatra hahatakatra kokoa ny zavatra vakiny.

Hevero ny hanome fahafahana ny mpianatra hanao fampiharana amin’ny alalan’ny fanehoana ohatra fa ny fanamarihana ambanim-pejy dia manampy amin’ny fampitomboana ny fahatakarana.