Mga Panimulang Materyal

Pag-aaral ng mga Banal na Kasulatan

Mahigpit na Kumapit sa Salita ng Diyos

Natatangi ang mga banal na kasulatan sa kakayahan nito na mapalalim ang pananampalataya at pagmamahal sa Ama sa Langit at kay Jesucristo. Ang palagian at makabuluhang pag-aaral ay nanghihikayat ng pananampalataya at nagpapalakas sa ating buhay araw-araw. Ang layunin ng lesson na ito ay dagdagan ang iyong hangarin at kakayahang pag-aralan ang mga banal na kasulatan araw-araw at tumanggap ng mga ipinangakong pagpapala na kasama sa pag-aaral ng banal na kasulatan.

Paghihikayat na ugaliin ang pag-aaral ng banal na kasulatan araw-araw. Iilang bagay lang ang may mas malakas at walang-hanggang impluwensya para sa ikabubuti ng buhay ng mga estudyante kaysa sa pagtulong sa kanilang matutuhang mahalin ang mga banal na kasulatan at pag-aralan ang mga ito araw-araw. Ang isang paraan upang magawa ito ay talakayin sa mga estudyante ang mga kapakinabangan at pagpapala ng araw-araw at personal na pag-aaral ng banal na kasulatan.

Paghahanda ng estudyante: Ibigay sa mga estudyante ang handout na “Ebalwasyon para sa Pag-aaral ng Banal na Kasulatan” mula sa lesson na ito upang iuwi at sagutan. Maaari mong sabihin sa mga estudyante na hilingin sa mga kapamilya na sagutin din ang mga tanong at sama-samang talakayin ang kanilang mga sagot.

Mga Posibleng Aktibidad sa Pag-aaral

Pag-aaral ng banal na kasulatan araw-araw

Upang matulungan ang mga estudyante na makita ang kahalagahan ng patuloy na pagsisikap sa pag-aaral ng mga banal na kasulatan, maaari mong sabihin sa isang estudyante na komportableng mag-push-up na pumunta sa harap ng klase at ipakita ito. Pagkatapos niyang magawa ito, maaari kang magtanong ng, “Mas malakas ba ang estudyante ngayon dahil nakapag-push-up siya nang ilang beses? Bakit oo o bakit hindi?”

Kung nais ng isang tao na mas lumakas sa pamamagitan ng pagpu-push-up, ano ang kailangan niyang gawin? Gaano katagal bago makita ang kapansin-pansing pag-iibayo ng lakas? Anong mga hamon ang maaaring kailangang madaig ng isang tao?

• Paano ito maiuugnay sa pag-aaral ng mga banal na kasulatan?

Basahin ang mga sumusunod na pahayag nina Pangulong Thomas S. Monson (1927–2018) at Julie B. Beck, na noon ay Unang Tagapayo sa Young Women General Presidency, at rebyuhin kung ano ang itinuturo nila tungkol sa pag-aaral ng banal na kasulatan:

Ang paggugol ng oras sa bawat araw sa pag-aaral ng mga banal na kasulatan ay hindi mapag-aalinlanganang nagpapatibay ng ating mga saligan ng pananampalataya at ng patotoo natin sa katotohanan. (Thomas S. Monson, “Saligang Kaytibay,” Liahona, Nob. 2006, 67–68)

Bagama’t hindi ko itinuturing ang sarili ko na dalubhasa sa banal na kasulatan, … nagpapasalamat ako’t nasimulan ko ang panghabambuhay na gawi na basahin [ang mga banal na kasulatan]. Imposibleng matutuhan ang mga [aral na nilalaman] ng mga banal na kasulatan sa minsanang pagbasa lang nito o pag-aaral ng mga piling talata sa klase. (Julie B. Beck, “Ang Aking Kaluluwa ay Nalulugod sa mga Banal na Kasulatan,” Liahona, Mayo 2004, 107)

• Ano ang nalaman mo?

Maaari mong ipakita ang sumusunod na ebalwasyon sa sarili para sa pag-aaral ng banal na kasulatan upang matapos ito nang mag-isa ng mga estudyante.

Isipin kung ano ang nadarama mo tungkol sa iyong pag-aaral ng mga banal na kasulatan.

Handout: “Ebalwasyon para sa Pag-aaral ng Banal na Kasulatan”

Manwal ng Aklat ni Mormon para sa Seminary Teacher (2024)—“Pag-aaral ng mga Banal na Kasulatan”

I-rate ang iyong sarili sa mga sumusunod na pahayag sa scale na mula 1 hanggang 5 (1 ang mababa at 5 ang mataas):

• Priyoridad ko ang pag-aaral ng mga banal na kasulatan araw-araw.

• Alam ko at ginagamit ko ang mga kasanayan sa pag-aaral ng banal na kasulatan (panalangin, pagninilay, mga talababa, mga tala, at iba pa) na nakatutulong sa akin na mas maunawaan ang mga banal na kasulatan.

• Nauunawaan ko ang nabasa ko sa mga banal na kasulatan.

• Ang pag-aaral ng mga banal na kasulatan ay nakatutulong sa akin na mas mapalapit kay Jesucristo.

Maaaring anyayahan ang mga estudyante na magbahagi ng mga hamon na maaari nilang maranasan tungkol sa makabuluhang pag-aaral ng banal na kasulatan araw-araw. Maaari mong sabihin sa mga estudyante na magbahagi ng mga posibleng solusyon sa mga hamon. Tulungan ang mga estudyante na maunawaan na anuman ang resulta ng ebalwasyon, maaari nilang mapaunlad ang kanilang kakayahang tumanggap ng mga pagpapala ng pag-aaral ng banal na kasulatan.

© 2023 by Intellectual Reserve, Inc. All rights reserved.

Mga pagpapala para sa pag-aaral ng mga banal na kasulatan

Basahin ang mga sumusunod na talata, at alamin ang mga pagpapalang nagmumula sa pag-aaral ng mga banal na kasulatan.

Maaaring sabihin sa mga estudyante na isulat sa pisara ang iba’t ibang pagpapala ng pag-aaral ng banal na kasulatan. Habang nagsusulat sila, sabihin din sa kanila na maglagay ng tsek sa tabi ng anumang pagpapalang natanggap nila.

• 1 Nephi 15:24

• 2 Nephi 32:3

• Mosias 1:3–5

• Alma 17:2–3

• Alma 37:8–9

• Anong mga katotohanan na nauugnay sa pag-aaral ng banal na kasulatan ang matutukoy mo mula sa mga talatang ito?

Maaaring tumukoy ang mga estudyante ng mga katotohanan na tulad ng kung tayo ay makikinig at mahigpit na kakapit sa salita ng Diyos, tutulungan Niya tayo na mapaglabanan ang tukso at kasamaan (tingnan sa 1 Nephi 15:24); tutulungan tayo ni Jesucristo na malaman kung ano ang gagawin sa ating buhay kapag nagpakabusog tayo sa Kanyang mga salita (tingnan sa 2 Nephi 32:3); at ang pag-aaral ng mga banal na kasulatan ay makatutulong sa akin na makilala si Jesucristo at magalak sa Kanya (tingnan sa Alma 37:9).

• Alin sa mga katotohanan o pagpapalang ito ang naranasan mo?

Para sa mga karagdagang pagpapala na nagmumula sa pag-aaral ng banal na kasulatan, tingnan ang “Komentaryo at Pinagmulang Impormasyon.”

Paano ako mas matututo pa mula sa pag-aaral ko ng banal na kasulatan?

Ang sumusunod na tanong ay maaaring talakayin ng mga estudyante sa maliliit na grupo o nang magkakapartner. Maaari mong sabihin sa mga estudyante na ibahagi ang kanilang mga ideya. Maaari mong sabihin sa mga estudyante na magbahagi ng mga karagdagang detalye tungkol sa kanilang mga sagot, tulad ng paano, kailan, o bakit nila ginagamit ang kasanayang iyon.

• Ano ang makatutulong sa isang tao para marami siyang matutuhan sa pag-aaral niya ng banal na kasulatan?

Basahin ang sumusunod na pahayag ni Elder D. Todd Christofferson ng Korum ng Labindalawang Apostol at maghanap ng mga karagdagang kasanayan na makatutulong para maging mas epektibo ang pag-aaral ng banal na kasulatan.

Kung minsa’y magandang basahin ang isang aklat sa banal na kasulatan sa takdang haba ng panahon para maunawaan ang buong mensahe nito, ngunit sa pagbabalik-loob, mas mahalaga dapat ang oras ninyo sa pagbabasa ng mga banal na kasulatan kaysa sa dami ng nabasa ninyo sa oras na iyon. Kung minsa’y nawawari kong nagbabasa kayo ng ilang talata, tumitigil sandali para pag-isipan ito, at muling binabasa ang talata, at habang pinag-iisipan ang kahulugan nito, ay nagdarasal kayong maunawaan ito, nag-iisip ng mga tanong, naghihintay ng espirituwal na mga paramdam, at isinusulat ang damdamin at kabatirang dumarating para mas matandaan ito at matuto pa kayo. Sa ganitong pag-aaral, maaaring ilang kabanata o talata lang ang mabasa ninyo sa kalahating oras, pero bibigyan ninyo ng puwang sa inyong puso ang salita ng Diyos, at kakausapin Niya kayo. (D. Todd Christofferson, “Kapag Ikaw ay Nagbalik-loob,” Liahona, Mayo 2004, 11)

• Ano ang nakikita mo sa mga ideyang ito na makatutulong sa iyong pag-aaral ng banal na kasulatan?

Ang mga estudyante ay maaaring magdagdag sa pisara ng mga karagdagang ideya na hindi pa nakasulat.

Bukod pa sa kasanayan sa pag-aaral ng banal na kasulatan na kasunod nito, maraming ideya tungkol sa kasanayan ang ibinibigay sa bahaging “Mga Karagdagang Aktibidad sa Pag-aaral” sa ibaba na maaaring gamitin.

Maaari mong sabihin sa mga estudyante na gawin nang tahimik at mag-isa ang sumusunod na aktibidad. Pagkatapos ay hatiin sila sa maliliit na grupo o nang magkakapartner upang ibahagi ang natutuhan nila.

Sa susunod na 5 o 10 minuto, subukang gamitin ang mga mungkahing ibinigay ni Elder Christofferson. Maglaan ng oras na magnilay, muling magbasa, magdasal, magtanong, at magsulat ng mga impresyon. Narito ang ilang posibleng scripture passage na maaari mong gamitin (huwag mag-atubiling pumili ng iba’t ibang scripture passage sa Aklat ni Mormon).

Mosias 3; Alma 32; 3 Nephi 11

Pagkatapos magkaroon ang mga estudyante ng oras na mag-aral, anyayahan sila na magbahagi ng tungkol sa kanilang mga karanasan. Maaaring makatulong ang mga sumusunod na tanong.

• Ano ang inyong naranasan sa pag-aaral ng mga banal na kasulatan sa ganitong paraan?

• Paano maiimpluwensyahan ng pag-aaral sa ganitong paraan ang inyong personal na pag-aaral ng banal na kasulatan?

Magtakda ng mithiin sa pag-aaral ng banal na kasulatan

Ang isa sa mga layunin ng seminary ay tulungan ka na mas mapalapit kay Jesucristo sa pamamagitan ng araw-araw na pag-aaral ng mga banal na kasulatan. Upang matulungan ka, may kinakailangan para sa seminary credit na basahin ang aklat ng banal na kasulatan sa kasalukuyang taon nang hindi bababa sa 75 porsiyento ng mga araw sa kalendaryo ng semester.

Humingi ng inspirasyon sa pamamagitan ng Espiritu Santo para makapagtakda ng personal na mithiin sa pag-aaral. Upang makatulong, magsimula sa pagdarasal upang humingi ng inspirasyon mula sa Ama sa Langit. Isipin ang mga sumusunod na tanong habang nagtatakda ka ng mithiin:

• Kailan at saan ko maaaring pag-aralan ang mga banal na kasulatan araw-araw?

• Ilang oras ako mag-aaral sa bawat araw?

• Ano ang magagawa ko upang mas lubos kong maanyayahan ang Espiritu Santo sa pag-aaral ko ng banal na kasulatan?

Komentaryo at Pinagmulang Impormasyon

Anong mga karagdagang pagpapala ang maaaring magmula sa pag-aaral ng banal na kasulatan?

Itinuro ni Elder D. Todd Christofferson ng Korum ng Labindalawang Apostol:

Sa huli, ang pangunahing layunin ng lahat ng banal na kasulatan ay puspusin ang ating mga kaluluwa ng pananampalataya sa Diyos Ama at sa Kanyang Anak na si Jesucristo. (D. Todd Christofferson, “Ang Biyaya ng Banal na Kasulatan,” Liahona, Mayo 2010, 34)

Itinuro ni Pangulong Russell M. Nelson:

Ang araw-araw na masigasig na pag-aaral ng salita ng Diyos ay mahalaga para sa espirituwal na kaligtasan lalo na sa tumitinding ligalig sa panahong ito. Kapag nagpapakabusog tayo sa mga salita ni Cristo araw-araw, ang mga salita ni Cristo ay magsasabi sa atin kung paano tumugon sa mga paghihirap na hindi natin inakalang dadanasin natin. (Russell M. Nelson, “Pakinggan Siya,” Liahona, Mayo 2020, 89)

Mga Karagdagang Aktibidad sa Pag-aaral

Samahan ng panalangin ang pag-aaral ng banal na kasulatan

Tulungan ang mga estudyante na maunawaan ang iba’t ibang paraan na magagamit ang panalangin upang mapahusay ang pag-aaral ng banal na kasulatan. Maaari mong itanong ang sumusunod:

• Ano ang maaari ninyong ipagdasal sa simula at habang nag-aaral ng banal na kasulatan?

Maaari mong ibahagi ang sumusunod na pahayag ni Pangulong Howard W. Hunter (1907–95): “Wala nang mas makatutulong pa kaysa panalangin upang mabuksan ang ating pag-unawa sa mga banal na kasulatan. Sa pamamagitan ng panalangin, maitutuon natin ang ating isipan na maghanap ng mga sagot sa ating mga pagsasaliksik” (“Reading the Scriptures,” Ensign, Nob. 1979, 64).

Pagninilay

Maaari mong tulungan ang mga estudyante na maunawaan na ang pagninilay sa salita ng Diyos ay maaaring humantong sa personal na paghahayag. Ang mga sumusunod na talata ay tumutulong na mailarawan ang katotohanang ito: 1 Nephi 11:1; Helaman 10:2–3; Doktrina at mga Tipan 76:19; Doktrina at mga Tipan 138:1, 11. Isipin ang mga tanong na ito sa talakayan:

• Sa inyong palagay, bakit maaaring humantong sa personal na paghahayag ang pagninilay?

• Ano ang maaaring pagnilayan ng isang tao habang pinag-aaralan ang mga banal na kasulatan?

• Paano ninyo magagamit ang kasanayang ito para mas lubos na mapagpala ang inyong pag-aaral?

Paghahanap ng mga alituntunin

Ang pagtulong sa mga estudyante na matukoy ang mga alituntunin ay makatutulong para mapagbuti nila ang pag-aaral ng banal na kasulatan. Maaari mong ibahagi ang pahayag na ito sa mga estudyante upang matulungan sila na malaman kung ano ang mga alituntunin.

Sinabi ni Elder Richard G. Scott (1928–2015) ng Korum ng Labindalawang Apostol: “Ang mga alituntunin ay dalisay na katotohanan, na inilahad para gamitin sa iba’t ibang sitwasyon. Nagagawa ng isang totoong alituntunin na linawin ang mga desisyon kahit sa pinakamagulo at pinakamahirap na mga sitwasyon” (“Acquiring Spiritual Knowledge,” Ensign, Nob. 1993, 86).

Paggamit ng mga talababa

Ang isang paraan upang magkaroon ang mga estudyante ng nakapagpapasiglang pag-aaral ng banal na kasulatan ay sa pamamagitan ng paggamit ng mga talababa. Naglalaman ang mga ito ng mga reperensya sa iba pang talata o karagdagang tool upang matulungan ang mga estudyante na mas maunawaan kung ano ang binabasa nila.

Maaari mong bigyan ang mga estudyante ng pagkakataong magsanay sa pamamagitan ng pagpapakita ng halimbawa kung saan nakatulong ang mga talababa para mapalalim ang pag-unawa.