Mga Panimulang Materyal

Ang Plano ng Kaligtasan

Ang Plano ng Ama sa Langit para sa Kanyang mga Anak

Ang Malaking Kapulungan

Sa ating mortal na paglalakbay, madalas na may mga tanong tungkol sa layunin at kahulugan ng buhay: Saan ako nanggaling? Bakit ako narito? Saan ako pupunta? Kapag alam mo ang mga sagot sa mga tanong na ito, makatutulong ito sa iyo na harapin ang mga hamon ng buhay at manatili sa landas ng tipan ng Panginoon. Ang lesson na ito ay makatutulong sa iyo na maunawaan at madama ang kahalagahan ng plano ng Ama sa Langit.

Ang Layunin ng Seminaries and Institutes of Religion. Tandaan na “ang ating layunin ay tulungan ang mga kabataan at young adult na maunawaan ang mga turo at Pagbabayad-sala ni Jesucristo at umasa rito, maging karapat-dapat sa mga pagpapala ng templo, at ihanda ang kanilang sarili, kanilang pamilya, at iba pa para sa buhay na walang hanggan sa piling ng kanilang Ama sa Langit” (Pagtuturo at Pag-aaral ng Ebanghelyo: Isang Hanbuk para sa mga Titser at Lider sa Seminaries and Institutes of Religion [2012], x, SimbahanniJesucristo.org)

icon, tagubilin sa pagtuturo

Paghahanda ng estudyante: Sabihin sa mga estudyante na mag-isip ng isang bagay na sa palagay nila ay hindi sila mabubuhay kung wala ito at maghandang ipaliwanag kung bakit. Maaari din nilang dalhin ito o ang isang larawan nito sa klase, kung naaangkop.

Mga Posibleng Aktibidad sa Pag-aaral

Ang plano ng Ama sa Langit

icon, tagubilin sa pagtuturo

Upang matulungan ang mga miyembro ng klase na matuto sa isa’t isa, maaari mong sabihin sa mga estudyante na ibahagi ang kanilang mga sagot sa tanong sa ibaba. Maaaring makatulong sa mga estudyante na sabihin kung ano ang naisip nila o magpakita ng larawan nito. Tiyaking manghikayat ng positibong saloobin at paggalang tungkol sa mahahalagang bagay sa buhay ng mga estudyante.

• Sa palagay mo, anong kaalaman ang hindi ka mabubuhay kung wala ito? Bakit?

Sa pamamagitan ng mga banal na kasulatan at makabagong paghahayag, nalaman natin ang tungkol sa buhay bago tayo isinilang, ang Pagbabayad-sala ng Tagapagligtas, kabilang-buhay, at marami pang ibang aspeto ng ating buhay na walang hanggan. Magiging mahirap mabuhay kung wala ang kaalamang ito. Pag-isipan sandali ang nalalaman mo tungkol sa plano ng Ama sa Langit. Pag-isipang mabuti kung ano kaya ang buhay mo kung wala ang kaalamang iyon.

Sa pag-aaral mo ngayon, hingin ang patnubay ng Espiritu Santo upang matulungan ka na matutuhan pa ang tungkol sa mapagmahal na plano ng Ama sa Langit para sa Kanyang mga anak.

Ang plano ng Ama sa Langit sa Aklat ni Mormon

icon, tagubilin sa pagtuturo

Maaaring makatulong na isulat sa pisara ang mga sumusunod na tanong at reperensya. Ang isa pang opsiyon ay isulat ang bawat tanong sa hiwalay na piraso ng papel at ilagay ang mga papel sa buong silid. Sabihin sa mga estudyante na lumibot sa buong silid, hanapin ang mga tanong, at pagkatapos ay hanapin sa mga banal na kasulatan ang mga sagot sa mga tanong. Maaari ding isulat ng mga estudyante ang mga sagot na mahahanap nila sa papel.

Maraming itinuturo ang Aklat ni Mormon tungkol sa plano ng Ama sa Langit. Ipinahayag ni Pangulong Russell M. Nelson na: “Pinatototohanan ko na ang Aklat ni Mormon ay tunay na salita ng Diyos. Nilalaman nito ang mga sagot sa pinakamahahalagang tanong sa buhay” (Russell M. Nelson, “Ang Aklat ni Mormon: Ano Kaya ang Buhay Ninyo Kung Wala Ito?,” Liahona, Nob. 2017, 62). Narito ang ilang tanong na sinasagot ng Aklat ni Mormon. Pumili ng kahit dalawang tanong at basahin ang scripture passage na tumutulong sa pagsagot sa tanong.

• Ano ang itinuturo ng Aklat ni Mormon tungkol sa buhay bago tayo isinilang? (Alma 12:25, 30; ang pariralang “pagkakatatag ng daigdig” ay tumutukoy sa buhay bago tayo isinilang.)

• Ano ang tungkuling ginagampanan ni Jesucristo sa plano ng Ama sa Langit? (Alma 22:12–14)

• Ano ang layunin ng buhay? (Alma 34:32–33)

• Ano ang mangyayari kapag namatay tayo? (Alma 40:11–14, 21–23)

• Ano ang mangyayari kung wala ang Pagbabayad-sala ni Jesucristo? (2 Nephi 9:6–11)

icon, tagubilin sa pagtuturo

Sabihin sa mga estudyante na talakayin ang mga sagot na nahanap nila para sa mga tanong. Maaari ding sabihin sa mga estudyante na magtanong tungkol sa mga talatang binasa nila o tungkol sa plano ng Ama sa Langit. Maaari nilang gamitin ang entry na “Plano ng Kaligtasan” sa Mga Paksa ng Ebanghelyo upang maunawaan ang mga scripture passage at maghanap ng mga sagot sa kanilang mga tanong.

• Anong mga katotohanan o doktrina ang natukoy mo mula sa mga talatang binasa mo?

• Anong mga salita o parirala sa mga talata ang nagtuturo ng katotohanan o doktrina na natukoy mo?

  icon, tagubilin sa pagtuturo

  Maaari mong isulat sa pisara ang mga katotohanan at doktrina na matutukoy ng mga estudyante. Maaaring matukoy ng mga estudyante ang iba’t ibang katotohanan, tulad ng sa pamamagitan ng Pagbabayad-sala ni Jesucristo, tayo ay matutubos mula sa Pagkahulog.

• Alin sa mga turo tungkol sa plano ng Ama sa Langit ang lubos mong ipinagpapasalamat? Bakit?

icon, tagubilin sa pagtuturo

Maaaring makatulong sa mga estudyante na magsanay na ipaliwanag ang plano ng Ama sa Langit nang magkakapartner o sa maliliit na grupo. Bukod pa sa pagpapaliwanag ng plano, sabihin sa mga estudyante na ibahagi kung paano nito maiimpluwensyahan ang kanilang buhay.

Ang plano ng Ama sa Langit at ang aking buhay

icon, tagubilin sa pagtuturo

Tulungan ang mga estudyante na talakayin kung paano makakaimpluwensya sa kanilang buhay ang kaalaman tungkol sa plano ng Ama sa Langit. Maaari mong gamitin ang pahayag na ito ni Pangulong M. Russell Ballard at ang ilan sa mga sumusunod na tanong.

Ipinaliwanag ni Pangulong M. Russell Ballard ng Korum ng Labindalawang Apostol kung paano makatutulong sa ating buhay ang pag-unawa sa plano ng kaligtasan ng Ama sa Langit.  Basahin ang teksto sa ibaba:

Pangulong M. Russell Ballard

Tayong mga mortal ay may limitadong pananaw sa buhay mula sa walang hanggang pananaw. Ngunit kung alam at nauunawaan natin ang plano ng Ama sa Langit, natatanto natin na ang pagdanas ng mga paghihirap ay isa sa mga pangunahing paraan para masubukan tayo. …

Sa pamamagitan ng pagtuon at pagsunod sa mga alituntunin ng plano ng Ama sa Langit para sa ating walang hanggang kaligayahan, maaari nating ihiwalay ang ating sarili sa kasamaan ng mundo. Kung wasto ang ating pagkaunawa sa kung sino tayo, bakit narito tayo sa mundo, at saan tayo patutungo pagkatapos ng buhay na ito, hindi matitinag ni Satanas ang ating kaligayahan kahit sa ano pa mang uri ng tukso. Kung determinado tayong mamuhay ayon sa plano ng Ama sa Langit, gagamitin natin ang kalayaang pumili na ibinigay sa atin ng Diyos sa paggawa ng mga desisyon batay sa inihayag na katotohanan, at hindi batay sa mga opinyon ng iba o sa kasalukuyang pag-iisip ng mundo. (M. Russell Ballard, “Answers to Life’s Questions,” Ensign o Liahona, Mayo 1995, 23–24)

• Paano naiimpluwensyahan ang buhay mo ng iyong kaalaman tungkol sa plano ng Ama sa Langit?

• Ano ang ilang sitwasyon kung saan maiimpluwensyahan ng nalalaman mo tungkol sa plano ng Ama sa Langit ang mga desisyong gagawin mo?

• Paano makakaimpluwensya ang nalalaman mo tungkol sa plano ng Ama sa Langit sa pananaw mo sa mga sitwasyon at karanasan mo sa iyong buhay?

icon, tagubilin sa pagtuturo

Tapusin ang lesson sa pamamagitan ng pagbabahagi ng iyong patotoo tungkol sa plano ng Ama sa Langit at kung paano nito naimpluwensyahan ang iyong buhay.

Komentaryo at Pinagmulang Impormasyon

Paano naging katibayan ng pagmamahal ng Diyos ang plano ng kaligtasan?

Itinuro ni Pangulong M. Russell Ballard ng Korum ng Labindalawang Apostol:

Pangulong M. Russell Ballard

Gayon na lamang ang pagmamahal ng Ama sa Langit kaya inihanda Niya ang Kanyang plano ng kaligtasan na ang Tagapagligtas ang nasa sentro. At gayon na lamang ang pagmamahal ni Jesus kung kaya’t nang itanong ng Ama sa Langit sa malaking Kapulungan sa Langit kung “Sino ang isusugo ko?” Si Jesus, na panganay sa lahat ng espiritung anak ng Ama, ay sumagot ng, “Narito ako, isugo ako” [Abraham 3:27]. Sinabi Niya sa Kanyang Ama, “Ama, masusunod ang inyong kalooban, at ang kaluwalhatian ay mapasainyo magpasawalang hanggan” [Moises 4:2]. Si Jesus ay nagkusa na maging ating Tagapagligtas at Manunubos upang tayo ay maging katulad Nila at makabalik sa Kanilang piling. (M. Russell Ballard, “Minamahal Mo ba Ako Nang Higit Kaysa mga Ito?,” Liahona, Nob. 2021, 52)

Bakit tayo may mga pagsubok sa buhay?

Sinabi ni Pangulong Dallin H. Oaks ng Unang Panguluhan:

Pangulong Dallin H. Oaks

Lahat tayo ay dumaranas ng iba’t ibang uri ng pagsalungat o oposisyon na susubok sa atin. Ilan sa mga pagsubok na ito ay ang mga tuksong magkasala. Ang ilan ay mga hamon sa buhay na walang kinalaman ang sariling kasalanan. May napakalalaki. May maliliit. Ang ilan ay tuluy-tuloy, at may ilang pansamantala lamang. Lahat tayo ay dumaranas nito. Ang pagsalungat ay nagtutulot sa atin na umunlad tungo sa nais ng ating Ama sa Langit na kahinatnan natin. (Dallin H. Oaks, “Pagsalungat sa Lahat ng Bagay,” Liahona, Mayo 2016, 115–16)

Paano makatutulong sa akin ang nalalaman ko sa plano ng Ama sa Langit?

Ano ang layunin at kahulugan ng buhay?

Ipinaliwanag ni Pangulong Dallin H. Oaks ng Unang Panguluhan:

Pangulong Dallin H. Oaks

Tinukoy sa mga banal na kasulatan bilang “dakilang plano ng kaligayahan,” “ang plano ng pagtubos,” at ang “plano ng kaligtasan” (Alma 42:8, 11, 5), ang planong iyan—na inihayag sa Pagpapanumbalik—ay nagsimula sa Kapulungan sa Langit. Noong mga espiritu pa lamang tayo, ninais nating matamo ang walang-hanggang buhay na tinatamasa ng ating mga magulang sa langit. Sa panahong iyon, umunlad tayo hanggang sa makakaya natin nang walang karanasang mabuhay nang mortal sa pisikal na katawan. Upang maibigay ang karanasang iyan, plinano ng Diyos Ama na likhain ang mundong ito. Sa plinanong buhay sa mundo, tayo ay mababahiran ng kasalanan habang dinaranas natin ang pagsalungat na kailangan para sa ating espirituwal na pag-unlad. Mararanasan din natin ang pisikal na kamatayan. Upang matubos tayo mula sa kamatayan at kasalanan, kasama sa plano ng ating Ama sa Langit ang maglaan ng Tagapagligtas. Ang Kanyang Pagkabuhay na Mag-uli ay magliligtas sa ating lahat mula sa kamatayan, at ang Kanyang nagbabayad-salang sakripisyo ay magbabayad ng halagang kinakailangan upang maging malinis ang lahat mula sa kasalanan ayon sa mga kundisyong itinakda para umunlad tayo. Ang Pagbabayad-salang ito ni Jesucristo ay sentro sa plano ng Ama. (Dallin H. Oaks, “Ang Dakilang Plano,” Liahona, Mayo 2020, 93)

Para sa buod ng plano ng Ama sa Langit, maaari mong panoorin ang video na “Ano ang Layunin at Kahulugan ng Buhay?” (7:43), na matatagpuan sa YouTube at SimbahanniJesucristo.org.

Mga Karagdagang Aktibidad sa Pag-aaral

Alternatibong simula ng lesson

Kung mayroon, maaari kang magdala ng isang salamin sa mata na may kulay ang mga lens. Anyayahan ang isang estudyante na subukang isuot ang salamin sa mata at ipaliwanag kung paano nito naaapektuhan ang kanyang paningin. Pagkatapos ay maaaring sabihin sa kanya na isipin kung paano maaaring makaimpluwensya sa kanyang pag-iisip at pagkilos ang pagtingin sa buhay nang isinasaisip ang plano ng Ama sa Langit. Kapag mas naunawaan natin ang plano ng Ama sa Langit, magkakaroon tayo ng mas malinaw na pananaw tungkol sa ating buhay sa lupa. Ang isang halimbawa ay maaaring mas mapanatag ang mga nakakaalam na may buhay pagkatapos ng kamatayan kapag pumanaw ang isang mahal sa buhay.

Pagtuunan ang pangunahing tungkuling ginagampanan ng Tagapagligtas sa plano ng kaligtasan

Maaari mong gamitin ang mensahe ni Pangulong Dallin H. Oaks na “Ano ang Nagawa ng Ating Tagapagligtas para sa Atin?” (Liahona, Mayo 2021, 75–77) upang matulungan ang mga estudyante na maunawaan kung paano tayo tinutulungan ni Jesucristo na madaig ang mga hamon na kasama sa mortalidad. Magagawa ito sa pamamagitan ng pagbabasa ng kuwento sa simula ng mensahe tungkol sa babaeng nagtanong ng “Ano ang nagawa [ni Jesus] para sa akin?” Hatiin ang mga bahagi ng mensahe sa klase at sabihin sa kanila na maghanap ng mga sagot sa tanong na iyon. Sabihin sa mga estudyante na magpatotoo kung paano naiimpluwensyahan ng kaalaman tungkol sa mga bagay na ito ang kanilang damdamin sa Ama sa Langit at kay Jesucristo. Maaari ding pag-aralan ng mga estudyante ang mga sumusunod na talata tungkol sa kung ano ang magiging buhay kung kasama o kung wala ang ating Tagapagligtas.

• Kung Kasama si Cristo: Mosias 16:8–11; Alma 11:42–45; Alma 12:33–34

• Kung Wala si Cristo: 2 Nephi 9:6–9; Mosias 16:6–7; Alma 41:10–11; Alma 42:11–14

Ilarawan ang plano ng kaligtasan

Matapos pag-aralan ng mga estudyante ang tungkol sa plano ng Ama sa Langit, maaari mong sabihin sa kanila na gumawa ng paglalarawan upang maipaliwanag ang plano at ang tungkuling ginagampanan ng Tagapagligtas dito. Maaaring gamitin ng mga estudyante ang kanilang mga paglalarawan upang magsanay na ipaliwanag sa isang kaklase ang nalalaman nila tungkol sa plano. Ang sumusunod ay isang halimbawa ng paglalarawan.

Plano ng kaligtasan

Ang plano ng kaligtasan sa tatlong bahagi

Ang isang paraan upang maunawaan ang plano ng kaligtasan ay hatiin ito sa tatlong bahagi: buhay bago isinilang o premortal, buhay sa mundo o mortal, at kabilang-buhay.