Մորմոնի Գրքի ներածական էջեր

Տիտղոսաթերթ

Մորմոնի Գրքի նպատակը

Ինչո՞ւ է մեզ անհրաժեշտ Մորմոնի Գիրքը, եթե արդեն ունենք Աստծո խոսքն Աստվածաշնչում: Մորմոնի Գրքի տիտղոսաթերթում Մորոնի մարգարեն օգնում է մեզ հասկանալ, թե ինչու է Մորմոնի Գիրքն այդքան կարևոր: Այս դասի նպատակն է օգնել ձեզ հասկանալ և բացատրել Մորմոնի Գրքի նպատակները:

Սեմինարիաների և Կրոնի ինստիտուտների նպատակի կիրառումը: Հիշեք, որ «մեր նպատակն է օգնել երիտասարդներին և երիտասարդ չափահասներին հասկանալ Հիսուս Քրիստոսի ուսմունքները և Քավությունը, ապավինել դրանց, արժանի լինել տաճարային օրհնություններին, պատրաստվել և իրենց ընտանիքներին ու մյուսներին պատրաստել իրենց Երկնային Հոր հետ հավերժական կյանքին» (Ավետարանի ուսուցում և ուսումնասիրություն. ձեռնարկ Սեմինարիաների և Կրոնի ինստիտուտների ուսուցիչների և առաջնորդների համար [2012], x):

Ուսանողի նախապատրաստում․ ուսանողներին առաջարկեք խորհել, թե ինչու է Մորմոնի Գիրքը այդքան հաճախ կարևորվում և օգտագործվում Հիսուս Քրիստոսի Վերջին Օրերի Սրբերի Եկեղեցում:

Հնարավոր ուսումնական վարժություններ

Նպատակն իմանալու կարևորությունը

Կարող եք ցուցադրել գործիքների նկարներ, որոնք ուսանողներին ծանոթ չեն լինի կամ նման գործիքները բերեք դասարան, որպեսզի ուսանողները տեսնեն և շոշափեն դրանք: Ստորև ներկայացված գործիքը էկկեր է, որը հնագույն ժամանակներում օգտագործվել է նավարկության համար:

Երբևէ տեսե՞լ եք ստորև ներկայացված նկարի գործիքի նման գործիք: Պատկերացրեք, որ ինչ-որ մեկին պետք է բացատրեք որևէ անծանոթ գործիքի նպատակն ու արժեքը:

• Ինչո՞ւ է օգտակար իմանալ և հասկանալ որևէ բանի նպատակն ու արժեքը՝ նախքան դրա օգտագործումը կամ ուրիշներին փոխանցելը:

  

  Նախքան հաջորդ հարցին անցնելը՝ կարող եք ցուցադրել Մորմոնի Գրքի որևէ օրինակ:

• Դա ինչպե՞ս կարող է կապված լինել Մորմոնի Գրքի նպատակի և արժեքի ըմբռնման հետ:

Մտածեք, թե ինչ վստահությամբ կբացատրեիք Մորմոնի Գրքի նպատակը և արժեքը մեկին, ով գաղափար չունի այդ մասին: Այս դասն ուսումնասիրելիս մտածեք, թե ինչն է օգնում ձեզ հասկանալ Մորմոնի Գրքի նպատակը և արժեքը, և ինչպես կարող եք ձեր հասկացողությամբ կիսվել ուրիշների հետ:

Մորմոնի Գրքի նպատակի և արժեքի ըմբռնումը

Գրատախտակին կարող եք գրել ստորև ներկայացված անավարտ նախադասությունը և ուսանողներին առաջարկել ավարտել նախադասությունն այն մտքերով, որ նրանք հասկացել են:

Մորմոնի Գիրքը գրվել է, որպեսզի…

Մորմոնի Գիրքը գրվել է, որպեսզի…

Տիտղոսաթերթը պարունակում է վերջին խոսքերը, որոնք Մորոնին գրել է ոսկե թիթեղների վերջին թերթի վրա: Կարդացեք Մորմոնի Գրքի տիտղոսաթերթը և նախաբանի առաջին երեք պարբերությունները: Փնտրեք վերոնշյալ նախադասությունն ավարտելու ձևեր: Հետևյալ հարցերը կարող են օգնել դա անելիս:

• Ո՞ւմ համար է գրվել Մորմոնի Գիրքը:

• Ո՞ւմ մասին է Մորմոնի Գիրքը:

• Ինչո՞ւ է գրվել Մորմոնի Գիրքը:

(Լրացուցիչ տեղեկությունների համար տես «Մորմոնի Գրքի մասին համառոտ բացատրությունը» ներածական էջերում:)

Տասներկու Առաքյալների Քվորումից երեց Ուլիսես Սոարեսը վկայել է Մորմոնի Գրքի նպատակների մասին:

Ես վկայում եմ, որ Մորմոնի Գիրքն Աստծո գործիքն է, որպեսզի մեր օրերում հավաքի Իսրայելը և օգնի մարդկանց ճանաչել Իր Որդուն՝ Հիսուս Քրիստոսին (Ուլիսես Սոարես, «Մորմոնի Գրքի ստեղծումը», Լիահոնա, մայիս 2020, 35):

• Ի՞նչ սովորեցիք ձեր ուսումնասիրությունից և երեց Սոարեսի՝ Մորմոնի Գրքի նպատակի մասին խոսքերից:

Գուցե դուք բացահայտել եք նմանատիպ մի ճշմարտություն. Մորմոնի Գիրքը գրվել է, որպեսզի հավաքի Իսրայելը և համոզի բոլոր մարդկանց, որ Հիսուսը Քրիստոսն է:

• Դրա համար ի՞նչ ապացույց եք տեսնում տիտղոսաթերթի երկրորդ պարբերությունում:

Ստորև ներկայացվող երկու վարժությունները կարող են օգնել ուսանողներին խորացնել վերոնշյալ թավագիր ճշմարտության իրենց ընկալումը: Այս վարժությունները կարելի է հանձնարարել տարբեր ձևերով: Կարող եք ուսանողներին ցույց տալ յուրաքանչյուր վարժությունը կամ նրանց տալ դրանցից յուրաքանչյուրի պատճենը: Ուսանողները կարող են ընտրությամբ կատարել դրանցից մեկը, այնուհետև միմյանց պատմել, թե ինչ սովորեցին: Երկու վարժությունները կատարելու համար էլ նրանք կարող են աշխատել նաև զույգերով կամ փոքր խմբերով:

Վարժություն Ա. Մորմոնի Գրքի նպատակն է օգնել հավաքել Իսրայելը

Մորմոնի Գիրքը հաճախ է անդրադառնում այն պատվիրանին, որը Տերը տվել է Իսրայելը հավաքելու համար: Կարդացեք Նախագահ Ռասսել Մ. Նելսոնի խոսքը և ստորև բերված սուրբ գրություններից երկուսը կամ երեքը:

Մորմոնի Գրքում դուք կսովորեք հավաքման վարդապետությունը, ճշմարտություններ Հիսուս Քրիստոսի, Նրա Քավության և Նրա ավետարանի լրիվության մասին, որոնք չկան Աստվածաշնչում: Մորմոնի Գիրքն առանցքային է Իսրայելի հավաքման համար: Իրականում, եթե չլիներ Մորմոնի Գիրքը, Իսրայելի խոստացված հավաքումը տեղի չէր ունենա (Ռասսել Մ․ Նելսոն և Վենդի Վ․ Նելսոն, «Իսրայելի հույսը» [երիտասարդների համաշխարհային հոգևոր հավաք, հունիսի 3, 2018թ.]», New Era և Ensign ամսագրերի լրացում, 13, ChurchofJesusChrist.org):

• 1 Նեփի 15.14–18

• 1 Նեփի 22.11–12

• 2 Նեփի 29.14

• Մորմոն 9.36–37

• Մորոնի 10.31

• Ի՞նչ եք կարծում, Մորմոնի Գիրքն ինչպե՞ս կարող է օգնել հավաքել Իսրայելը:

Խորհեք այն մասին, թե Մորմոնի Գիրքն ինչպես է օգնել ձեզ կամ ուրիշներին հավաքվել Հիսուս Քրիստոսի ճշմարիտ Եկեղեցու շուրջը: Փորձեք գրառել այս հավաքման արդյունքում եկած օրհնությունները:

• Ինչպիսի՞ն կլիներ ձեր կյանքն առանց Մորմոնի Գրքի:

• Ո՞ւմ հետ կարող եք կիսվել Մորմոնի Գրքով:

Վարժություն Բ․ Մորմոնի Գրքի նպատակն է համոզել բոլոր մարդկանց, որ Հիսուսը Քրիստոսն է

Մտածեք, թե ինչ գիտեք Հիսուս Քրիստոսի մասին, և ինչպես է Մորմոնի Գիրքն ազդել Նրա հետ ձեր հարաբերության վրա: Ապա թվարկեք Մորմոնի Գրքի երկու կամ երեք սուրբ գրություն, որոնք ձեզ ուսուցանում են Հիսուս Քրիստոսի մասին: Եթե անհրաժեշտ է օգնություն, տես «Հիսուս Քրիստոս» բաժինը սուրբ գրությունների եռահատորի կամ Մորմոնի Գրքի ցանկում:

• Այս հատվածներն ի՞նչ են օգնում ձեզ հասկանալ Հիսուս Քրիստոսի մասին:

Ստորև ներկայացվող վարժությունը կարելի է հարմարեցնել այնպես, որ ուսանողները զույգերով կամ փոքր խմբերով դերախաղ կատարեն:

Պատկերացրեք, որ խոսում եք մի ընկերոջ հետ, որը ծանոթ չէ Մորմոնի Գրքին կամ այն շատ օգտակար չի համարում: Ի՞նչ կպատմեիք նրան Մորմոնի Գրքի և նրա նպատակի մասին: Փորձեք ներառել անձնական փորձառությունը, արտահայտություններ տիտղոսաթերթից և նախաբանից կամ ցանկացած հղում Մորմոնի Գրքից, որոնք ձեր կարծիքով կարող են օգտակար լինել:

Փորձեք եզրափակել՝ բերելով ձեր վկայությունը Մորմոնի Գրքի նպատակի ու արժեքի մասին: Ուսանողները կարող են կիսվել նաև այս սրբազան հիշատակարանի անցյալ և ապագա ուսումնասիրության մասին իրենց վկայություններով կամ զգացողություններով:

Բացատրական և պատմական տեղեկություններ

Ի՞նչ այլ նյութեր կան, որոնք կարող են օգնել ինձ հասկանալ Մորմոնի Գիրքը և նրա նպատակները:

Հետևյալ տեսանյութերը, որոնք հասանելի են ChurchofJesusChrist.org կայքում, օգնում են բացատրել Մորմոնի Գրքի բնույթը և նպատակները:

• «Մորմոնի Գրքի տիտղոսաթերթը և թարգմանությունը» (6:04)

• «Ի՞նչ է Մորմոնի Գիրքը Ընդհանուր ակնարկ 60 վայրկյանում» (1:13)

• «Մորոնին հիշատակարանը պահպանում է Վերջին օրերի համար» (3:26)

Ի՞նչ են նշանակում տիտղոսաթերթում նշված որոշ եզրույթներ:

Ստորև ներկայացվող սահմանումները կարող են օգնել ձեզ հասկանալ Մորմոնի Գրքի տիտղոսաթերթի որոշ եզրույթներ:

• Իսրայելի տունը վերաբերում է Աբրահամի, Իսահակի և Հակոբի հետնորդներին: Բացի այդ, Իսրայելի տունը ներառում է նրանց, ովքեր Աբրահամի, Իսահակի և Հակոբի իրական հետնորդները չեն, սակայն ընդունել են վերականգնված ավետարանի ուղերձը և գալիս են վերականգնված Եկեղեցի՝ անհրաժեշտ ուխտերով ու արարողություններով:

• Հրեաներ սկզբում անվանում էին Հուդայի ցեղին (Իսրայելի տասներկու ցեղերից մեկը) պատկանող յուրաքանչյուր մարդու: Սակայն Մորմոնի Գրքի գրողները այս բառով հաճախ անվանում էին Հին Կտակարանի ժամանակներում Հարավային Հուդայի թագավորությունում ապրող բոլոր մարդկանց (2 Նեփի 30.4, 33.8), չնայած նրանք կարող էին լինել Իսրայելի այլ ցեղերի հետնորդներ (Ալմա 10.3): Այսպես անվանում են նաև այն «մարդկանց, որոնք Հուդայականության կրոնի հետևորդներ են, ապրում են այդ կենսակերպով և ավանդույթներով, սակայն կարող են հրեական ծագման լինել կամ չլինել» (Սուրբ Գրքերի ուղեցույց, «Հրեաներ», scriptures.ChurchofJesusChrist.org):

• Հեթանոսներ նշանակում է «ազգերը» (Աստվածաշնչի բառարան, «Հեթանոսներ»): «Երբեմն բառը մատնանշում է ծագումով ոչ իսրայելացի մարդկանց, երբեմն՝ ծագումով ոչ հրեա, իսկ երբեմն՝ ավետարան չունեցող ազգերին, նույնիսկ եթե այդ մարդկանց մեջ կա իսրայելացու արյուն: Այս վերջին նշանակությամբ օգտագործումը հատկապես բնորոշ է բառին, ինչպես այն օգտագործված է Մորմոնի Գրքում և Վարդապետությունում ու Ուխտերում (Սուրբ գրությունների ուղեցույց, «Հեթանոսներ», scriptures.ChurchofJesusChrist.org):

• Կրճատումը ինչ-որ բանի կարճացված տարբերակն է:

• Մնացորդը մնացած մասն է:

Ինչո՞ւ է Մորմոնի Գիրքն այդքան կարևոր:

Հասկանալու համար, թե ինչ զգալի ազդեցություն է ունեցել Մորմոնի Գիրքը շատերի կյանքում, փորձեք ուսումնասիրել Նախագահ Ռասսել Մ․ Նելսոնի «Մորմոնի Գիրքը. ինչպիսի՞ն կլիներ ձեր կյանքն առանց նրա» ուղերձը (Լիահոնա, նոյեմբեր 2017, 60–63): Առավել ուշադրությամբ ուսումնասիրեք «Նախագահ Նելսոնի՝ Մորմոնի Գրքի ցանկերը» բաժինն ուղերձի վերջում:

Ինչպիսի՞ն է եղել բնօրինակ Մորմոնի Գրքի տիտղոսաթերթը:

Տիտղոսաթերթի պատկերը ձեռագրի տպագիր օրինակում կարող եք տեսնել այստեղ:

Տիտղոսաթերթի պատկերը Մորմոնի Գրքի առաջին հրատարակությունում կարող եք տեսնել այստեղ:

Օժանդակ ուսումնական վարժություն

«Մորմոնի Գրքի մասին համառոտ բացատրություն»

Որպեսզի օգնեք ուսանողներին հասկանալ, թե ինչ է Մորմոնի Գիրքը, և ինչպես է այն կազմվել, կարող եք բերել գրքեր կամ տուփեր, որոնք ներկայացնում են տարբեր թիթեղները, ինչպես նկարագրված է «Մորմոնի Գրքի մասին համառոտ բացատրության մեջ»: Ուսանողներին առաջարկեք կարդալ բացատրության 1-4-րդ պարբերությունները և պատրաստվել բացատրելու, թե Մորմոնի Գիրքը ինչպես է կազմվել այդ տարբեր թիթեղներից: