1 Nephi 3

Ang Diyos ay Naghahanda ng Paraan

Nakaupo si Nephi sa tabi ng isang sapa

Matapos maglakbay nang ilang araw sa ilang, sinubok ang pagsunod at pananampalataya sa Diyos ni Nephi at ng kanyang mga kapatid nang iutos sa kanila na bumalik sa Jerusalem upang kunin ang mga laminang tanso mula kay Laban. Kung minsan, iuutos din sa iyo ng Panginoon na gawin ang mahihirap na bagay. Ang lesson na ito ay makatutulong sa iyo na manampalataya sa Diyos upang maisakatuparan mo ang iniuutos Niya.

Pagtulong sa mga estudyante na makilala ang impluwensya ng Panginoon sa kanilang buhay. Habang pinag-aaralan ng mga estudyante kung paano pinagpala ng Tagapagligtas ang buhay ng mga tao sa mga banal na kasulatan, maghanap ng mga paraan para matulungan sila na matukoy ang Kanyang mga pagpapala sa sarili nilang buhay. Sabihin sa kanila na isipin kung paano maaaring sinasagot ng Tagapagligtas ang kanilang mga panalangin, kung paano Niya sila pinalalakas, o pinagagaling.

Paghahanda ng estudyante: Sabihin sa mga estudyante na isaulo ang doctrinal mastery passage na 1 Nephi 3:7 at isipin kung paano ito naaangkop sa mga sitwasyong kinakaharap nila sa kanilang buhay.

Mga Posibleng Aktibidad sa Pag-aaral

Mahihirap na kautusan

Upang matulungan ang mga estudyante na maunawaan ang kahalagahan ng salaysay tungkol sa mga anak ni Lehi na inutusan na gawin ang mahihirap na bagay, maaari mong isulat sa pisara ang mga sagot ng mga estudyante sa mga sumusunod na tanong at banggitin ang mga ito sa buong lesson.

• Aling mga kautusan, pamantayan, o iba pang mga paanyaya ng propeta ang pinakamahirap sundin para sa mga tinedyer ngayon? Bakit mas mahirap ang mga ito kaysa sa iba?

• Ano ang sasabihin mo sa isang tao na nakadarama na napakahirap sundin ng isang kautusan o pamantayan?

Ang isang alternatibong paraan upang masimulan ang klase ay tulungan ang mga estudyante na maunawaan na kailangan natin ang tulong ng Panginoon upang maisakatuparan natin ang iniuutos Niya. Ang isang paraan upang magawa ito ay magpagawa sa isang estudyante ng isang bagay na mangangailangan ng tulong ng titser. Halimbawa, bilang bahagi ng isang gawain, maaaring kailanganin niyang buksan ang isang bagay na nangangailangan ng susi mula sa titser.

Kung may kautusan na mahirap para sa iyo na sundin, isaisip ito habang pinag-aaralan mo ang 1 Nephi 3. Hangaring matuto mula sa mga halimbawang pinag-aaralan mo, at pagnilayan kung paano makakaimpluwensya sa iyong kaugnayan sa Panginoon ang iyong mga pagpili.

Ang Panginoon ay nagbigay ng kautusan sa mga anak ni Lehi

Basahin ang 1 Nephi 3:1–6, at alamin ang iniutos sa mga anak ni Lehi.

• Sa iyong palagay, bakit tama ang mga kapatid ni Nephi sa pagtawag sa kautusang ito na isang “mahirap na bagay”? (talata 5).

Ang sumusunod na talata ay makatutulong kung hindi sigurado ang mga estudyante kung paano sasagutin ang naunang tanong.

Isipin kung ano ang maaaring nadama ng mga anak ni Lehi nang lisanin nila ang kanilang tahanan at maglakbay sila nang daan-daang milya sa tigang na bayan patungo sa ilang upang pabalikin lang sa Jerusalem makalipas ang maikling panahon upang kunin ang mga lamina mula kay Laban.

Basahin ang 1 Nephi 3:7–8 at tukuyin ang dahilang ibinigay ni Nephi kung bakit handa siyang sundin ang utos ng Panginoon.

Ang 1 Nephi 3:7 ay isang doctrinal mastery passage. Maaari mong markahan ang mga doctrinal mastery passage sa paraang madali mong mahanap ang mga ito. Magkakaroon ka ng pagkakataon sa susunod na lesson na magsanay na gamitin ang doktrinang itinuro sa scripture passage na ito sa isang tanong o sitwasyon.

• Ano ang naunawaan ni Nephi na maaaring hindi naunawaan ng kanyang mga kapatid?

Ang isang bagay na matututuhan natin mula sa talata 7 ay naghahanda ang Diyos ng paraan para maisakatuparan natin ang anumang iniuutos Niya.

Pag-isipan kung paano nauugnay ang katotohanang ito sa mga kautusang maaaring mahirap para sa iyo.

Bagama’t tutulungan ka ng Diyos na maisakatuparan ang iniuutos Niya, hindi Niya ipinangako na magiging madali ito o magtatagumpay ang unang pagtatangka mo.

Ipinaliwanag ni Pangulong Dieter F. Uchtdorf, na noon ay kabilang sa Unang Panguluhan:

Pangulong Dieter F. Uchtdorf

Ang pagsunod sa Tagapagligtas ay hindi mag-aalis ng lahat ng inyong pagsubok. Gayunman, aalisin nito ang mga hadlang sa pagitan ninyo at ng tulong na gustong ibigay sa inyo ng Ama sa Langit. Sasamahan kayo ng Diyos. (Dieter F. Uchtdorf, “Pananabik na Makauwi,” Liahona, Nob. 2017, 22)

• Ano ang nauunawaan mo tungkol sa Ama sa Langit at kay Jesucristo sa tulong ng pahayag na ito?

Isiping muli ang mga kautusan, pamantayan, o iba pang mga paanyaya ng propeta na natukoy mo kanina sa lessson bilang pinakamahirap sundin para sa mga tinedyer.

• Ano ang mga balakid na maaaring magpahirap na masunod ang mga kautusang ito?

• Paano maaaring “maghanda ng paraan” ang Panginoon para matulungan ang mga kabataan na sundin ang mga kautusang ito?

Sabihin sa mga estudyante na magbahagi ng maraming sagot sa ibinigay na tanong.

Tinangkang kunin ni Nephi at ng kanyang mga kapatid ang mga laminang tanso

Para sa sumusunod na aktibidad, maaaring hatiin ang mga estudyante sa maliliit na grupo, kung saan pag-aaralan ng kalahati ng mga grupo ang unang pagtatangka at pag-aaralan naman ng natitirang kalahati ang pangalawang pagtatangka. Ang bawat grupo ay maaaring maghanda na isadula ang nangyari sa kanilang salaysay at isadula ito para sa isa pang grupo na pinag-aralan ang isa pang salaysay, o maaaring ibuod ng bawat grupo ang kanilang salaysay para sa isa pang grupo.

Maaaring panoorin ng mga estudyante ang mga iminungkahing video sa halip na basahin o isadula ang mga salaysay.

Pag-aralan ang mga sumusunod na salaysay tungkol sa unang dalawang pagtatangka na kunin ang mga laminang tanso. Alamin kung ano ang naging reaksyon ng magkakapatid sa bawat pagtatangka. (Tandaan: Sa lesson na “1 Nephi 4–5,” malalaman mo kung paano nagbigay ng paraan kalaunan ang Panginoon upang magtagumpay sila.)

Unang pagtatangka: Basahin ang 1 Nephi 3:10–15 o panoorin ang “Si Nephi ay Pinatnubayan ng Espiritu para Makuha ang mga Laminang Tanso” mula sa time code na 4:43 hanggang 8:18. Ang video na ito ay matatagpuan sa SimbahanniJesucristo.org. (Maaaring makatulong na malaman na ang palabunutan ay isang paraan ng pagpili ng isang opsiyon sa maraming pagpipilian.)

Pangalawang pagtatangka: Basahin ang 1 Nephi 3:22–31; 4:1, o panoorin ang “Si Nephi ay Pinatnubayan ng Espiritu para Makuha ang mga Laminang Tanso” mula sa time code na 8:18 hanggang 15:10.

• Ano kaya ang natutuhan ng magkakapatid na ito tungkol sa kanilang mga sarili mula sa mga pagsubok na naranasan nila habang sinisikap na sundin ang kautusan ng Diyos?

• Sa iyong palagay, bakit hinahayaan tayo ng ating mapagmahal na Diyos na mahirapan nang kaunti bago Siya maglaan ng paraan para maisakatuparan ang Kanyang kalooban?

• Sa iyong palagay, paano nakaimpluwensya ang magkakaibang reaksyon ng magkakapatid sa kanilang pananampalataya at kaugnayan kay Jesucristo? Bakit?

Ipamuhay ang salaysay na ito

Matutulungan ka ng Tagapagligtas na madaig ang mga balakid na mas nagpapahirap na masunod ang Kanyang mga kautusan at ang payo ng Kanyang mga propeta. Upang matulungan kang maipamuhay ito, sagutin ang mga sumusunod na tanong sa iyong study journal.

Maaari mong ipakita ang mga sumusunod na opsiyon sa tanong bilang sanggunian ng mga estudyante.

Kapag tapos na ang mga estudyante, mag-anyaya ng mga boluntaryo upang ibahagi sa klase ang ilan sa mga isinulat nila. Magpatotoo na ang Panginoon ay palaging gagawa ng paraan upang matupad natin ang iniuutos Niya sa atin.

1. Isipin na kunwari ay pinapayuhan ka ni Nephi tungkol sa isang kautusan o sa payo ng propeta na nahihirapan kang sundin. Ano sa palagay mo ang sasabihin Niya sa iyo?

2. Ano ang mga partikular na gagawin mo para mas lubos mong masunod ang isa sa mga kautusan ng Panginoon o mga payo ng propeta?

3. Ano ang nakita o naranasan mo na nagbibigay sa iyo ng tiwala na maghahanda ng paraan ang Panginoon upang masunod mo ang Kanyang mga kautusan at ang Kanyang propeta?

Kung makikinabang ang mga estudyante sa pag-aaral ng natitirang bahagi ng salaysay tungkol sa pagkuha ni Nephi ng mga lamina bago ituro sa kanila ang doctrinal mastery lesson para sa 1 Nephi 3:7, maaari kang maghintay na ituro ang doctrinal mastery lesson hanggang sa matapos ang lesson na “1 Nephi 4–5.” Ang isa pang opsiyon ay ipabuod sa isang estudyante ang mga pangyayaring nakatala sa 1 Nephi 4 para matulungan ang klase na makita kung paano naglaan ng paraan ang Panginoon upang masunod ang Kanyang mga kautusan.

Komentaryo at Pinagmulang Impormasyon

Saan ako magsisimula kung nahihirapan akong sundin ang maraming kautusan?

Itinuro ni Pangulong Harold B. Lee (1899–1973):

Pangulong Harold B. Lee

Ang pinakamahalaga sa lahat ng mga kautusan ng Diyos ay yaong pinakamahirap ninyong masunod ngayon. … Gawin iyan nang wasto, at pagkatapos ay simulan ninyo ang susunod na pinakamahirap ninyong masunod. Iyan ang paraan ng pagpapakabanal sa inyong sarili sa pamamagitan ng pagsunod sa mga kautusan ng Diyos. (Mga Turo ng mga Pangulo ng Simbahan: Harold B. Lee [2000], 36)

Bakit tayo binibigyan ng Ama sa Langit ng mga kautusan?

Tumutulong ang Diyos na masagot ang tanong na ito sa Doktrina at mga Tipan 82:8–9.

Ipinaliwanag ni Sister Carole M. Stephens, dating miyembro ng Relief Society General Presidency:

Sister Carole M. Stephens

Kapag tinulutan natin na turuan tayo ng ating Ama, mauunawaan natin na ang Kanyang batas ay pagpapakita ng pagmamahal Niya sa atin at ang pagsunod sa Kanyang mga batas ay pagpapakita ng pagmamahal natin sa Kanya. (Carole M. Stephens, “Kung Ako’y Inyong Iniibig, ay Tutuparin Ninyo ang Aking mga Utos,” Liahona, Nob. 2015, 119)

Mga Karagdagang Aktibidad sa Pag-aaral

“Ang Katapangan ni Nephi”

Upang masimulan ang kuwento sa 1 Nephi 3, maaari mong anyayahan ang mga estudyante na kantahin o pakinggan ang “Ang Katapangan ni Nephi” (Aklat ng mga Awit Pambata, 64). Pagkatapos ay anyayahan ang isang boluntaryo na ibahagi ang mga detalye na binanggit sa unang talata ng awitin.

“Hahayo Ako at Gagawin”

Maaari mong ipatugtog ang awiting “Hahayo Ako at Gagawin” (3:56) at hikayatin ang mga estudyante na sumabay at basahin ang mga titik habang nakikinig sila. Hilingin sa mga estudyante na magbahagi ng mga ideya, damdamin, o salita na napansin nila habang pinakikinggan nila ang awitin.

Ang kahalagahan ng ating pag-uugali

Sabihin sa mga estudyante na sagutin ang mga sumusunod na tanong:

Alin sa mga anak ni Lehi ang lumisan sa kanilang tahanan upang manirahan sa ilang kasama ang kanilang mga magulang? bumalik sa Jerusalem upang kunin ang mga laminang tanso? nagsakripisyo ng kanilang kayamanan bilang kapalit ng mga laminang tanso? (Ang sagot sa bawat tanong ay lahat silang apat.)

Ipabasa sa mga estudyante ang 1 Nephi 3:6 upang maghanap ng isang dahilan kung bakit pinagpala ng Panginoon si Nephi nang higit kina Laman at Lemuel kahit sinunod ng lahat ng magkakapatid ang iniutos sa kanila.

Hilingin sa mga estudyante na magbahagi ng mga karanasan kung kailan nadama nila na pinagpala sila dahil handa silang sumunod nang hindi nagrereklamo.

Iba pang mga halimbawa ng pagsunod sa Diyos

Sabihin sa mga estudyante na magbahagi mula sa mga banal na kasulatan o kasaysayan ng Simbahan ng mga halimbawa ng mga taong nagpakita ng matinding pananampalataya sa Diyos sa pamamagitan ng pagsunod kahit sa mahihirap na kalagayan. Kung kailangan ng mga estudyante ng tulong, magpakita ng mga larawan ng mga taong tulad nina Noe, Moises, o Joseph Smith.

Anyayahan ang mga estudyante na ibahagi kung ano ang handang pagdaanan ng tao para sumunod, ang mga balakid na kinaharap niya, at kung paano naghanda ng paraan ang Panginoon para sa kanya upang maisakatuparan ang iniutos Niya.

Tiyaking hahantong ang talakayan sa halimbawa ng Tagapagligtas na perpektong pagsunod sa Kanyang Ama. Maaari mong gamitin ang sumusunod na pahayag:

“Sa lahat ng aral na natututuhan natin mula sa buhay ng Tagapagligtas, wala nang mas malinaw at makapangyarihan pa kaysa sa aral tungkol sa pagsunod” (Robert D. Hales, “Kung Ako’y Inyong Iniibig, ay Tutuparin Ninyo ang Aking mga Utos,” Liahona, Mayo 2014, 35).