1 Nephi 2

“Hinanap Mo Ako nang Buong Pagsisikap”

Kung minsan ay iniuutos sa atin ng Panginoon na gawin ang mga bagay na maaaring mahirap nating maunawaan o magawa. Matapos manawagan sa mga tao ng Jerusalem na magsisi, sinunod ni Lehi ang paghahayag na lumisan kasama ang kanyang pamilya patungo sa ilang. Sa halip na bumulung-bulong na tulad nina Laman at Lemuel, bumaling si Nephi sa Panginoon para sa karagdagang pang-unawa at napalambot ang kanyang puso. Layunin ng lesson na ito na tulungan kang makadama ng mas matinding hangaring bumaling sa Panginoon kapag iniuutos Niya sa iyo na gawin ang mahihirap na bagay.

Pag-alaala sa tagabigay ng batas. Kapag nagtuturo tungkol sa mga batas at kautusan ng Diyos, alalahaning ituro din ang tungkol sa tagabigay ng batas. Tulungan ang mga estudyante na pag-isipan kung ano ang itinuturo ng mga kautusan ng Diyos tungkol sa Kanya, ang Kanyang hangaring gabayan at pagpalain sila, at ang pagmamahal Niya sa kanila. Tulungan ang mga estudyante na maunawaan na ang mga batas ay ibinigay ng mapagmahal na Ama sa Langit upang tulungan sila na maging higit na katulad Niya at ng Kanyang Pinakamamahal na Anak.

Paghahanda ng estudyante: Itanong sa isang kaibigan o kamag-anak, “Kailan ka humingi at tumanggap ng tulong mula sa Panginoon upang maniwala at sumunod sa Kanyang mga salita, kahit mahirap ito?”

Mga Posibleng Aktibidad sa Pag-aaral

Pagtugon sa payo ng Panginoon

Maaari mong ipakita ang sumusunod na sitwasyon at mga tanong. Bigyan ang mga estudyante ng sapat na oras para pag-isipan at talakayin kung paano nila sasagutin ang mga tanong.

Isipin na nakikinig ka sa pangkalahatang kumperensya at ang Pangulo ng Simbahan ay nagbibigay ng payo na sa palagay mo ay magiging mahirap na sundin. Pagkatapos ng kumperensya, naririnig mo ang iba pang mga miyembro ng Simbahan na nagrereklamo tungkol sa kanyang payo at nagtatanong kung bakit hihilingin sa atin ng propeta na gawin ang bagay na ito. Habang nakikinig ka sa mga argumentong ito, nag-iisip ka kung ano ang dapat mong gawin.

• Ano ang ilang negatibong paraan ng pagtugon sa mga reklamo at puna ng mga miyembro?

• Ano ang ilang positibong pamamaraan sa sitwasyong ito? Ano ang ikalulugod ng Panginoon?

Sa 1 Nephi 2, makikita mo ang magkakaibang tugon ng mga anak ni Lehi sa isang mahirap na kautusang ibinigay sa kanila ng Diyos sa pamamagitan ng Kanyang propeta. Sa iyong pag-aaral, maghanap ng mga alituntunin na makatutulong sa iyo kung tila mahirap sundin ang propeta.

Iniutos ng Panginoon kay Lehi na lisanin ang Jerusalem

Maaaring natatandaan mo na iniutos ng Panginoon kay Lehi na balaan ang mga tao ng Jerusalem na sila ay malilipol kung hindi sila magsisisi. Basahin ang 1 Nephi 2:1–5, at alamin ang ipinayo ng Panginoon kay Lehi matapos siyang mangaral ng pagsisisi. Maaari mo ring panoorin ang “Kinausap ni Lehi ang Kanyang Pamilya na Lisanin ang Jerusalem” (2:27), na matatagpuan sa SimbahanniJesucristo.org.

Maaari mong ipakita ang mapang ito. Upang matulungan ang mga estudyante na maisalarawan sa kanilang isipan ang layo na maaaring nilakbay ng pamilya ni Lehi, maaari ka ring magbigay ng halimbawa ng isang lugar na tinatayang 200 milya (320 kilometro) ang layo mula sa lugar kung nasaan ka at ang iyong mga estudyante.

Ang layo na posibleng nilakbay ng pamilya ni Lehi mula Jerusalem patungo sa mga hangganan ng Dagat na Pula ay tinatayang 200 milya (320 kilometro). Ang kanilang paglalakbay ay posibleng inabot nang maraming araw at nagdala sa kanila sa isang mainit at tigang na bayan na kilalang may mga magnanakaw na naghihintay na mandambong sa mga manlalakbay na hindi nakahanda.

• Kung isa ka sa mga anak ni Lehi, ano kaya ang naging reaksyon mo sa sitwasyong ito? Bakit?

• Anong mga tanong ang maaaring naisip mo?

• Paano mo nakikitang ipinamalas ang awa ng Panginoon sa Kanyang utos na lisanin ang Jerusalem?

Ang isang paraan para matulungan ang mga estudyante na pag-aralan ang kabanatang ito ay tulungan silang pagkumparahin ang mga sagot nina Laman at Lemuel sa mga sagot nina Nephi at Sam. Ang pagkukumpara sa mga indibiduwal sa mga banal na kasulatan ay isang kasanayan sa pag-aaral ng mga banal na kasulatan na makatutulong sa mga estudyante na pagnilayan ang sarili nilang pagsisikap na sundin ang Diyos. Maaari mong sabihin sa mga estudyante na sanayin ito sa pamamagitan ng paggawa ng talahanayan na nasa ibaba sa whiteboard. Sabihin sa mga estudyante na isulat sa pisara ang matutuklasan nila. Makatutulong din na ituro ito bilang kasanayan sa pag-aaral ng mga banal na kasulatan na magagamit nila sa lahat ng banal na kasulatan sa kanilang personal na pag-aaral.

Tugon nina Laman at Lemuel	Tugon nina Nephi at Sam
Tugon nina Laman at Lemuel 1 Nephi 2:11–13	Tugon nina Nephi at Sam 1 Nephi 2:16–21

Maaari mo ring panoorin ang “Nanalangin si Nephi para kina Laman at Lemuel” (6:02), na matatagpuan sa SimbahanniJesucristo.org, at hanapin ang iba pang mga kaalaman na maidaragdag mo sa iyong chart.

• Ano ang napansin mo habang ikinukumpara mo ang mga ginawa nina Laman at Lemuel sa ginawa nina Nephi at Sam?

  Ang pagsasabi sa mga estudyante na ibuod ang natutuhan nila ay maaaring maging magandang paraan para matukoy nila ang mga alituntunin mula sa mga banal na kasulatan. Madalas na makakatuklas ang mga estudyante ng mga alituntunin na katulad ng nasa manwal ng titser. Kung magbabahagi ang mga estudyante ng mga katotohanang iba mula sa nakasaad sa manwal, ang mga natuklasan nila ay maaaring mas makabuluhan sa kanila. Humingi ng patnubay mula sa Espiritu Santo para malaman kung aling mga alituntunin ang magiging pinakamakabuluhang talakayin sa klase.

• Sa isang pangungusap, paano mo ibubuod ang natutuhan mo sa mga halimbawa nina Laman at Lemuel? Paano mo ibubuod ang natutuhan mo sa mga halimbawa nina Nephi at Sam?

Maglaan ng ilang sandali na rebyuhin ang isinulat mo. Pag-isipan kung aling mga kilos o motibo ang pinakakatulad ng sa iyo. Anong mga hangarin, ideya, o damdamin ang dumarating sa iyo habang ikinukumpara mo ito?

Maaaring natuklasan mo mula kina Laman at Lemuel na kung hindi natin alam ang mga pangako ng Panginoon at hindi tayo naniniwala sa Kanyang mga propeta, maaari tayong bumulung-bulong. Maaaring natutuhan mo mula kay Nephi na kapag masigasig nating hinahangad na maunawaan ang mga kautusan ng Panginoon, mapapalambot Niya ang ating puso upang tulungan tayong maniwala at sumunod.

Ang sinabi ni Nephi na “pinalambot [ng Panginoon] ang [kanyang] puso” (1 Nephi 2:16) ay nagpapahiwatig na, katulad nina Laman at Lemuel, hindi madali para sa kanya na sundin ang kautusang ito. Isipin kung paano kaya nakaapekto sa buong buhay ni Nephi ang desisyon niya na bumaling sa Panginoon sa sitwasyong ito. Isipin kung paano posibleng naiba ang buhay nina Laman at Lemuel kung tinularan nila ang halimbawa ni Nephi.

• Ano ang ilang sitwasyon na kinakaharap mo o makakaharap mo kung saan makikinabang ka sa pagtulad sa halimbawa ni Nephi?

• Paano makakaapekto sa iyong buhay ngayon at sa hinaharap ang mapagpakumbabang pagsamo sa Panginoon sa mga sitwasyong ito, sa halip na huwag maniwala at bumulung-bulong?

• Ano ang nauunawaan mo tungkol sa Diyos na makapipigil sa iyong bumulung-bulong kapag iniuutos Niya sa iyo na gawin ang isang bagay na mahirap?

Ibinahagi ni Elder Neil L. Andersen ng Korum ng Labindalawang Apostol kung ano ang magagawa natin kapag hindi natin nauunawaan sa simula o hindi tayo sumasang-ayon sa payo ng propeta ng Panginoon.

Huwag kayong mabibigla kung ang inyong mga personal na pananaw sa simula ay hindi palaging lubos na umaayon sa mga turo ng propeta ng Panginoon. Ito ang mga pagkakataon ng pagkatuto, ng pagpapakumbaba, kapag tayo ay lumuluhod para manalangin. Nagpapatuloy tayo sa paglakad nang may pananampalataya, nagtitiwala sa Diyos, nalalaman na darating ang panahon na makatatanggap tayo ng dagdag na espirituwal na kaliwanagan mula sa ating Ama sa Langit. Inilarawan ng isang propeta ang di-maikukumparang kaloob ng Tagapagligtas nang ganito: “ang kalooban ng Anak ay mapasasakop sa kalooban ng Ama” [Mosias 15:7]. Ang pagsuko ng ating kalooban sa kalooban ng Diyos, sa katunayan, ay hindi talaga pagsuko subalit pagsisimula ng isang maluwalhating tagumpay. (Neil L. Andersen, “Ang Propeta ng Diyos,” Liahona, Mayo 2018, 26)

• Anong mga pagpapala ang dumating sa iyo nang hangarin mong isuko ang iyong kalooban sa Ama sa Langit, tulad ng ginawa nina Jesus at Nephi?

Maglaan ng ilang sandali para isulat ang iyong mga ideya at espirituwal na impresyon. Ano ang natutuhan mo na gusto mong tandaan? Anong mga pagbabago ang nahihikayat kang gawin sa iyong buhay batay sa napag-aralan mo ngayon?

Komentaryo at Pinagmulang Impormasyon

Paano makaiimpluwensya ang pagpapatibay ng aking ugnayan sa Tagapagligtas sa paraan ng pagtugon ko sa mahihirap na sitwasyon?

Itinuro ni Elder Craig C. Christensen ng Pitumpu:

Matapos pakinggang magsalita ang kanyang ama tungkol sa maraming espirituwal na karanasan nito, ginustong malaman ni Nephi kung ano ang nalaman ng kanyang ama. Higit pa ito sa simpleng pag-uusisa—isang bagay iyon na lubos na kinasabikan niya at hinangad niyang malaman. Kahit “lubhang bata pa,” nagkaroon siya ng “matinding pagnanais na malaman ang mga hiwaga ng Diyos” [1 Nephi 2:16]. Nanabik siyang “makita, at marinig, at malaman ang mga bagay na ito, sa pamamagitan ng kapangyarihan ng Espiritu Santo” [1 Nephi 10:17].

… Dahil sa pananalig ng kanyang puso at pagiging masigasig, biniyayaan si Nephi ng isang kagila-gilalas na karanasan. Tumanggap siya ng patotoo tungkol sa parating na pagsilang, buhay, at Pagpapako sa Krus ng Tagapagligtas na si Jesucristo; nakita niya ang paglabas ng Aklat ni Mormon at ang Panunumbalik ng ebanghelyo sa mga huling araw—lahat ay dahil sa kanyang taos-pusong hangaring malaman ito sa kanyang sarili.

Ang personal na karanasang ito sa Panginoon ay naghanda kay Nephi sa mga paghihirap at hamon na kakaharapin niya kalaunan. Napalakas siya ng mga ito kahit ang iba sa kanyang pamilya ay nahihirapan na. Magagawa niya ito dahil natutuhan niya sa kanyang sarili at nalaman niya sa kanyang sarili. Natulungan siya ng kanyang sariling patotoo. (Craig C. Christensen, “Alam Ko ang mga Bagay na Ito sa Aking Sarili,” Liahona, Nob. 2014, 50–51)

Pagsasalarawan sa isip ng mga banal na kasulatan

Upang mas maisalarawan sa isipan ang mga banal na kasulatan, maaari mong panoorin ang “Lumisan ang Pamilya ni Lehi Patungo sa Ilang” (3:47) bukod pa sa pag-aralan ang teksto nito.

Mga Karagdagang Aktibidad sa Pag-aaral

Nagpapasalamat anuman ang kalagayan

Matapos pag-aralan ang tungkol sa paglisan ng pamilya ni Lehi sa Jerusalem, ipabasa sa mga estudyante ang 1 Nephi 2:7, at alamin ang ginawa ni Lehi. Talakayin ang halimbawa ni Lehi ng pasasalamat sa pamamagitan ng pagtatanong ng tulad ng “Sa palagay ninyo, bakit nagpasalamat si Lehi matapos mawalan nang labis-labis?” o “Ano sa palagay ninyo ang naging epekto ng pasasalamat ni Lehi sa kanyang pamilya?”

Ibahagi ang sumusunod na pahayag ni Pangulong Dieter F. Uchtdorf, na noon ay nasa Unang Panguluhan, at hikayatin ang mga estudyante na magsikap na magpasalamat anuman ang sitwasyon.

Maaari bang imungkahi ko na ugaliin nating magpasalamat, isang paraan ng pamumuhay na hindi naaapektuhan ng kasalukuyang kalagayan? Sa madaling salita, iminumungkahi ko na sa halip na magpasalamat para sa lahat ng bagay, magtuon tayo sa pagpapasalamat sa ating mga kalagayan—anuman ang mga ito. (Dieter F. Uchtdorf, “Nagpapasalamat Anuman ang Kalagayan,” Liahona, Mayo 2014, 75)

Pangmatagalang epekto ng mga desisyon

Sabihin sa mga estudyante na ibahagi kung ano sa palagay nila ang epekto ng mga desisyon nina Nephi, Sam, Laman, at Lemuel sa 1 Nephi 2 sa buong buhay nila. Anyayahan ang mga estudyante na pag-aralan ang ilan o lahat ng sumusunod na scripture passage. Habang nag-aaral sila, sabihin sa kanila na pag-isipan kung paano maaaring nakaimpluwensya ang mga pangyayaring nakatala sa 1 Nephi 2 sa mga reaksyon nina Laman, Lemuel, at Nephi sa mga talatang ito.

	Laman at Lemuel	Nephi
Iniutos sa mga anak ni Lehi na kunin ang mga laminang tanso	Laman at Lemuel 1 Nephi 3:5	Nephi 1 Nephi 3:6–7
Tiniyak ng isang anghel sa mga anak ni Lehi na ibibigay ng Panginoon si Laban sa kanilang mga kamay	Laman at Lemuel 1 Nephi 3:31	Nephi 1 Nephi 4:1–3
Ibinahagi ni Lehi ang kanyang pangitain tungkol sa punungkahoy ng buhay	Laman at Lemuel 1 Nephi 15:2–3, 8–9	Nephi 1 Nephi 10:17; 11:1
Nabali ni Nephi ang kanyang busog	Laman at Lemuel 1 Nephi 16:18–20	Nephi 1 Nephi 16:23, 30–32
Iniutos kay Nephi na gumawa ng sasakyang-dagat	Laman at Lemuel 1 Nephi 17:17–18	Nephi 1 Nephi 17:8–9, 50-51
Reaksyon ng mga anak ni Lehi sa bagong pamumuno kasunod ng pagkamatay ni Lehi	Laman at Lemuel 2 Nephi 5:1–3, 20	Nephi 2 Nephi 5:5–11