1 Nephi 4–5

“Ako ay Pinatnubayan ng Espiritu”

Si Nephi sa Jerusalem

Matapos ang dalawang bigong pagtatangkang kunin ang mga laminang tanso mula kay Laban, si Nephi ay maingat na pumasok sa Jerusalem sa gabi nang may pananampalataya sa Panginoon. Gayunman, wala siyang gaanong ideya kung paano isasakatuparan ang iniutos sa kanya. Tulad ni Nephi, nakadama ka na ba ng matinding kagustuhang gawin ang isang bagay ngunit hindi ka sigurado kung paano ito isasagawa? Layunin ng lesson na ito na palakasin ang iyong tiwala sa Ama sa Langit at sa Kanyang kahandaang gabayan ka.

Pagtulong sa mga estudyante na maghanda para matuto. Inilalahad sa mga banal na kasulatan ang tungkol sa kahandaan ng mga puso’t isipan ng mga taong naghahangad na espirituwal na matuto. Regular na talakayin sa mga estudyante ang kahalagahan ng paghahanda ng mag-aaral at hikayatin silang gawin ang paghahanda ng estudyante araw-araw.

Paghahanda ng estudyante: Bigyan ang mga estudyante ng kopya ng pahayag ni Pangulong Nelson na makikita sa simula ng lesson. Hikayatin sila na dumating sa klase na may nakahandang mga ideya tungkol sa mga sitwasyon kung saan personal silang makikinabang sa pagtanggap ng patnubay ng Panginoon.

Mga Posibleng Aktibidad sa Pag-aaral

Pagtanggap ng patnubay mula sa Ama sa Langit

Ipakita ang sumusunod na pahayag ni Pangulong Nelson at anyayahan ang mga estudyante na ibahagi ang kanilang mga ideya mula sa paghahanda ng estudyante.

Si Pangulong Russell M. Nelson ay nagbahagi ng mahalagang payo tungkol sa pagtanggap ng personal na paghahayag. Habang pinag-aaralan mo ang kanyang pahayag, isipin kung paano ito naaangkop sa iyo.

Pangulong Russell M. Nelson

Maaari tayong manalangin sa ating Ama sa Langit at tumanggap ng patnubay at direksyon, mabalaan sa panganib at ligalig, at mabigyan ng kakayahan na gumawa ng mga bagay na hindi natin kakayanin nang mag-isa. Kung talagang tatanggapin natin ang Espiritu Santo at matututuhang makilala at maunawaan ang Kanyang mga pahiwatig, magagabayan tayo sa malalaki at maliliit na bagay. (Russell M. Nelson, “Paghahayag para sa Simbahan, Paghahayag para sa Ating Buhay,” Liahona, Mayo 2018, 94)

• Ano ang ilang sitwasyon sa iyong buhay, malaki man o maliit, kung saan makatutulong ang pagtanggap ng patnubay ng Ama sa Langit? (Maaari mong isulat ang iyong mga sagot.)

Maaari mong ipakita ang mga sumusunod na tanong at mga opsiyon sa sagot sa pisara bago magsimula ang klase o i-print ang mga ito para sa bawat estudyante. Bigyan ng oras ang mga estudyante na tahimik na masuri ang kanilang damdamin at maisulat ang kanilang mga sagot.

Piliin ang sagot na pinakamainam na naglalarawan sa nadarama mo tungkol sa mga sumusunod na pahayag.

1. Masigasig akong humihingi ng patnubay at payo sa Ama sa Langit upang tulungan ako sa aking mga pagsubok, tanong, at desisyon.

   • Madalas

   • Kung Minsan

   • Bihira

2. Nagtitiwala ako sa kakayahan at hangarin ng Ama sa Langit na gabayan ang buhay ko sa pamamagitan ng Espiritu.

   • Madalas

   • Kung Minsan

   • Bihira

3. Humahayo ako nang may pananampalataya at kumikilos ako ayon sa mga pahiwatig ng Espiritu Santo, kahit hindi ko alam ang gagawin ko.

   • Madalas

   • Kung Minsan

   • Bihira

Habang pinag-aaralan mo ang isang sitwasyon kung saan hindi sigurado si Nephi kung ano ang gagawin, maghanap ng mga katotohanang nagpapalakas ng iyong tiwala sa Ama sa Langit at sa Kanyang kahandaang gabayan ka.

“Umahon na tayo”

Alalahanin na nagkaroon ng dalawang hindi matagumpay na pagtatangka ang mga anak ni Lehi na kunin ang mga laminang tanso mula kay Laban at natakot sila para sa kanilang buhay (tingnan sa 1 Nephi 3:11–27). Ano kaya ang madarama mo kung nalagay ka sa katulad na sitwasyon? Ano kaya ang mga magiging alalahanin mo? Kahit nakakita ng isang anghel, nag-alala sina Laman at Lemuel at may mga tanong sila kung paano isasakatuparan ang iniutos sa kanila (tingnan sa 1 Nephi 3:31).

Basahin ang 1 Nephi 4:1–3, at alamin ang naging sagot ni Nephi sa mga alalahanin ng kanyang mga kapatid.

• Ano ang tumimo sa iyo mula sa mga talatang ito?

• Anong halimbawa mula sa mga banal na kasulatan ang ginamit ni Nephi upang magpatotoo tungkol sa lakas ng Panginoon at mahikayat ang kanyang mga kapatid? Anong mga salaysay mula sa mga banal na kasulatan ang nagbigay sa iyo ng tapang at lakas sa iyong buhay?

• Paano naaangkop ang pariralang “Umahon na tayo” sa mga sitwasyon at hamon sa iyong buhay? (Maaari mong markahan ang pariralang ito sa iyong mga banal na kasulatan sa tuwing mababasa ito sa talata 1–3.)

Maaari mong ipanood ang sumusunod na video upang matulungan ang mga estudyante na mas maunawaan ang kuwento. Maaaring makatulong na i-pause ang video paminsan-minsan at patingnan sa mga estudyante ang mga banal na kasulatan. Halimbawa, maaaring i-pause ang video sa time code na 1:07 upang matukoy ng mga estudyante ang ginagawa ni Nephi. Pagkatapos ay maaaring ipabasa at pamarkahan sa mga estudyante ang 1 Nephi 4:6–7 sa kanilang mga banal na kasulatan.

Basahin ang 1 Nephi 4:4–8, at alamin ang ginawa ni Nephi sa pangatlong pagtatangkang kunin ang mga laminang tanso. Maaari mo ring panoorin ang “Iniutos ng Espiritu kay Nephi na Patayin si Laban” (3:26), na matatagpuan sa SimbahanniJesucristo.org, bilang bahagi ng iyong pag-aaral.

• Ano ang alam ni Nephi at ano ang hindi niya alam nang simulan niya ang pangatlong pagtatangkang ito?

• Ano ang napansin mo sa pariralang “Gayunman, ako ay yumaon” sa 1 Nephi 4:7?

• Anong katotohanan ang matututuhan mo mula sa mga salita ni Nephi?

Narito ang isang alituntunin ng ebanghelyo na maaaring naisip mo: sa mga panahon ng kawalang-katiyakan, makatatanggap tayo ng patnubay mula sa Ama sa Langit sa pamamagitan ng Espiritu kapag humayo tayo nang may pananampalataya.

Maaari mong isulat ang alituntuning ito o ang isang alituntuning naisip mo sa iyong mga banal na kasulatan.

Itinuro ni Pangulong Dallin H. Oaks ng Unang Panguluhan ang kahalagahan ng ating pagkilos kapag humihingi tayo ng paghahayag at patnubay:

Pangulong Dallin H. Oaks

Sa aking pag-aaral ng mga banal na kasulatan napansin ko na karamihan sa paghahayag sa mga anak ng Diyos ay dumarating kapag sila ay kumilos, hindi habang sila ay nagpapahinga sa kanilang tirahan at naghihintay na sabihin sa kanila ng Panginoon ang unang hakbang na gagawin. …

Kaya gagawin natin ang lahat ng makakaya natin. Pagkatapos ay hihintayin natin ang paghahayag mula sa Panginoon. (Dallin H. Oaks, “Sa Kanyang Sariling Panahon, sa Kanyang Sariling Paraan,” Liahona, Ago. 2013, 22–24)

Isipin kung paano nauugnay ang katotohanang ito at ang pahayag ni Pangulong Oaks sa mga sitwasyong natukoy mo kanina.

• Sa iyong palagay, bakit gusto ng Panginoon na magpatuloy ka nang may pananampalataya sa mga panahon ng kawalang-katiyakan?

Naghahanda ng paraan ang Panginoon

Iniutos ng Panginoon kay Nephi na patayin si Laban. Nabagabag siya sa ideya na pagkitil ng buhay, ngunit patuloy siyang hinikayat ng Espiritu na magpatuloy. Sinunod ni Nephi “ang tinig ng Espiritu” (1 Nephi 4:18), nagpanggap siya bilang si Laban habang suot ang mga damit nito, at nakumbinsi niya si Zoram, ang tagapagsilbi ni Laban, na kunin ang mga laminang tanso mula sa kabang-yaman.

Maaari mong basahin ang salaysay na ito sa 1 Nephi 4:9–24 at markahan ang mga salita o parirala na makabuluhan sa iyo. Maaari mo ring panoorin ang “Nakuha ni Nephi ang mga Sagradong Talaan” (4:20), na matatagpuan sa SimbahanniJesucristo.org.

Paano nauugnay ang karanasan ni Nephi sa pagkuha ng mga lamina sa patotoong ibinahagi niya sa 1 Nephi 3:7?

Bigyan ng oras ang mga estudyante na pag-isipan ang sarili nilang kalagayan kung saan maaaring kailanganin nilang magpatuloy nang may pananampalataya. Hikayatin silang pagnilayan ang natutuhan nila mula sa karanasan ni Nephi habang tahimik nilang isinusulat ang kanilang mga naisip at plano sa patuloy na pagsunod. Maaari kang mag-anyaya ng ilang boluntaryo na ibahagi ang ilan sa kanilang mga naisip at ideya pagkatapos nilang magsulat.

• Ano ang natutuhan ko ngayon na makatutulong sa akin sa sitwasyon ko?

• Ano ang nadama ko ngayon na magpapalakas sa aking tiwala sa kakayahan at hangarin ng Ama sa Langit na gabayan ako?

• Ano ang magagawa ko para matularan ang halimbawa ni Nephi at humayo nang may pananampalataya kahit tila hindi ko alam ang gagawin ko?

Komentaryo at Pinagmulang Impormasyon

Paano kung hindi ako sigurado sa pahiwatig na natanggap ko mula sa Espiritu Santo?

Itinuro ni Elder Ronald A. Rasband ng Korum ng Labindalawang Apostol:

Elder Ronald A. Rasband

Batay sa karanasan ko, pinakamadalas na nakikipag-usap sa atin ang Espiritu sa pamamagitan ng pagpapadama sa atin. Madarama ninyo ito sa mga salitang pamilyar sa inyo, na may kahulugan sa inyo, na naghihikayat sa inyo. …

… Dapat tayong magtiwala sa unang pahiwatig sa atin. Minsan ay nangangatwiran tayo, iniisip kung nakadarama ba tayo ng isang espirituwal na impresyon o kung sariling kaisipan lang natin iyon. Kapag nagsimula na tayong magdalawang-isip, maging magtatlong-isip ukol sa ating nadarama—at lahat tayo ay ginawa iyan—binabale-wala natin ang Espiritu; pinag-aalinlanganan natin ang banal na payo. …

Ang mga unang pahiwatig ay dalisay na inspirasyon mula sa langit. Kapag nagpapatibay o nagpapatotoo ang mga ito sa atin, kailangan nating alamin kung para sa ano ang mga ito at huwag balewalain ang mga ito. (Ronald A. Rasband, “Hayaang Patnubayan ng Espiritu Santo,” Liahona, Mayo 2017, 94–96)

1 Nephi 4:10–12. Bakit kailangang patayin ni Nephi si Laban?

Upang mas maunawaan ang utos ng Panginoon na patayin si Laban, makatutulong na alalahanin ang sumusunod:

1. Binigyan ng Panginoon si Laban ng dalawang pagkakataon na ibigay ang mga laminang tanso bago iniutos na siya ay patayin. Si Laban ay sinungaling at magnanakaw, at dalawang beses niyang tinangkang pumatay. Ayon sa batas ni Moises, ang pagnanakaw at tangkang pagpatay ay parehong may kaparusahang kamatayan (tingnan sa Exodo 21:14; 22:2; Deuteronomio 24:7).

2. Gusto ng Panginoon na mapasakamay ni Lehi at ng kanyang mga inapo ang banal na kasulatan, kahit “masawi ang isang tao” (1 Nephi 4:13) upang maisakatuparan ito. Hindi lang napagpala ng mga laminang tanso ang mga inapo ni Lehi, nagbigay rin ang mga ito ng ilan sa mga nilalaman para sa Aklat ni Mormon (tulad ng mga pahayag mula kay Isaias at mula sa talinghaga ng mga likas at ligaw na punong olibo ni Zenos). Napagpala ng Aklat ni Mormon, na isinalin mula sa mga laminang ginto, ang milyun-milyong tao at milyun-milyon pa ang pagpapalain nito. Sa huli, nakasalalay ang lahat ng ito sa paggapi ni Nephi kay Laban at pagsunod sa utos ng Espiritu.

Mga Karagdagang Aktibidad sa Pag-aaral

1 Nephi 5:1–9. Ang kapangyarihan ng patotoo at pasasalamat

Kung makikinabang ang mga estudyante sa pag-aaral tungkol sa kapangyarihan ng patotoo at kahalagahan ng pasasalamat, maaari ninyong basahin ang 1 Nephi 5:1–9 o panoorin ang video na “Nagalak si Saria sa Pagbabalik ng Kanyang mga Anak” (4:05).

Ang mga tanong na tulad ng mga sumusunod ay magagamit para sa talakayan:

• Paano tumugon si Lehi sa mga reklamo ni Saria? (Maaari mong ipaliwanag na tumugon si Lehi nang may patotoo at tiwala sa Panginoon sa halip na may takot o pag-aalinlangan. Hindi siya tumugon nang pagalit o naiinis.)

• Ano ang matututuhan natin sa itinugon ni Lehi kay Saria?

• Anong katotohanan ang matututuhan natin mula sa talata 9? (Tulungan ang mga estudyante na tumukoy ng katotohanan na tulad ng sumusunod: Kapag tumanggap tayo ng mga pagpapala mula sa Diyos, maaari nating piliing tumigil sandali at magpasalamat sa Kanya.)

1 Nephi 5:10–22. Ang kahalagahan ng mga banal na kasulatan

Upang mabigyang-diin ang kahalagahan ng mga banal na kasulatan, maaari mong basahin ang 1 Nephi 5:10–22 kasama ng mga estudyante o ipanood ang video na “Pinatotohanan ni Lehi ang Kahalagahan ng Banal na Kasulatan” (1:41). Maaaring saliksikin ng mga estudyante ang mga talata para sa mahalagang nilalaman na nasa mga laminang tanso. Maaari nilang ibahagi kung paano naging “napakahalaga” ng mga banal na kasulatan (1 Nephi 5:21) sa kanila at sa kanilang pamilya.