1 Nefi 6–7

Përcaktimi i “Gjëra[ve të] Perëndisë”

Nefi dhe vëllezërit e tij duke folur me Ishmaelin

Po të shkruaje një anal që do të mbahej që brezat e ardhshëm të mësonin prej tij, çfarë mund të përfshije në të? Nefi shprehu dëshirën që shkrimet e tij të ishin të kënaqshme për Perëndinë dhe t’i bindnin të tjerët ta ndiqnin Jezu Krishtin. Ky mësim do të të ndihmojë të kuptosh se si qëllimet e Librit të Mormonit mund të të ndihmojnë gjatë studimit tënd dhe në jetën tënde.

Përqendrimi te qëllimi i autorit. Sipas faqes së titullit të Librit të Mormonit, ai u shkrua “nëpërmjet shpirtit të profecisë dhe të zbulimit” për t’i bindur të gjithë njerëzit që Jezusi është Krishti. Ndërsa nxënësit studiojnë, inkurajojini ata të përsiatin se përse secili autor mund ta ketë regjistruar një mësim ose ndodhi të caktuar dhe si i ndihmon ai ose ajo lexuesit që të vijnë më pranë Jezu Krishtit.

Përgatitja e nxënësve: Inkurajojini nxënësit të bëjnë studimin e tyre vetjak të përditshëm të Librit të Mormonit. Ftojini ata të përsiatin për përvojën e tyre me studimin e Librit të Mormonit deri më tani dhe për atë që po mësojnë.

Veprimtari të Mundshme të të Mësuarit

Pse ta studiojmë Librin e Mormonit?

Pjesa në vijim ka për qëllim t’i ndihmojë nxënësit të përcaktojnë arsyen pse Nefi i përfshiu pikërisht ato [gjëra] në analin e tij. Nëse do të donit të përdornit diçka pamore, vendosni një kopje të Librit të Mormonit pranë librave të tjerë dhe ftojini nxënësit ta interpretojnë me role këtë situatë si klasë ose në dyshe.

Imagjinoni se si mund të përgjigjeni nëse dikush ju bën pyetjet e mëposhtme:

• “Ka shumë libra rreth fesë dhe të bërit një njeri më i mirë; pse duhet ta lexoj Librin e Mormonit? Çfarë do të bëjë ai për mua? Ku ndryshon ose është ai më i mirë se librat e tjerë?”

Ftojini disa studentë të tregojnë atë që mund të thonë. Falënderojini për përgjigjet e tyre dhe përgëzojini për mënyrat se si u përgjigjën mirë. Ftojini ata të kërkojnë më shumë pikëpamje ndërsa studiojnë.

Nefi e tregoi synimin, ose qëllimet e tij, për regjistrimin e atyre që shkroi në Librin e Mormonit. Dijenia për këto qëllime mund të na ndihmojë të kuptojmë arsyen përse duhet ta lexojmë librin dhe çfarë mund të bëjë ai për ne.

Lexo te 1 Nefi 6:3–6 dhe merr parasysh të shenjosh fjalët ose frazat që i përcaktojnë qëllimet e Nefit për mbajtjen e analit të tij. Mund të jetë e dobishme të dish se “Perëndia i Abrahamit, … Isakut, dhe … Jakobit” (vargu 4) është një titull për Jezu Krishtin.

• Si do ta shpjegoje arsyen përse Nefi i regjistroi pikërisht ato [gjëra]?

Sipas Nefit, shkrimet e tij kishin për qëllim të na bindnin që të vijmë te Jezu Krishti dhe të përmbanin vetëm gjëra që janë të kënaqshme për Perëndinë.

Ndalo një çast për të menduar rreth përvojës tënde me leximin e Librit të Mormonit deri tani.

Përcaktoni nëse do të ishte më mirë që nxënësit të përgjigjen për pyetjet në vijim me zë të lartë, të mendojnë rreth përgjigjeve të tyre individualisht ose t’i shkruajnë përgjigjet e tyre në ditarin e tyre të studimit.

• A po të ndihmon Libri i Mormonit që të dish gjëra që janë të kënaqshme për Perëndinë? Nëse po, si?

• A ndien se studimi i Librit të Mormonit po të ndihmon të afrohesh më shumë me Jezu Krishtin dhe të shpëtohesh? Përse po ose përse jo?

• Si mund të jetë një bekim në jetën tënde njohuria për gjërat e Perëndisë dhe afrimi më shumë me Jezu Krishtin?

Ardhja te Jezu Krishti dhe njohuria e gjërave që janë të kënaqshme për Perëndinë

Një aftësi e dobishme e studimit të shkrimeve të shenjta është të kërkosh qëllimet e Nefit ndërsa lexonë Librin e Mormonit. Do të kesh mundësi të praktikohesh për ta bërë këtë ndërsa lexon te 1 Nefi 7.

Merrni parasysh të paraqitni udhëzimet, referencat e shkrimeve të shenjta dhe përmbledhjet vijuese dhe të ftoni nxënësit të zgjedhin një pjesë për ta studiuar. Përcaktoni a do të ishte më mirë që nxënësit të studiojnë individualisht, në dyshe ose në grupe të vogla. Mund të jetë e dobishme të ecni përreth dhomës dhe të ndihmoni ndonjë nxënës që mund të ketë pyetje ose ka nevojë për ndihmë për ta kuptuar ose personalizuar atë që po lexon.

Ngjarjet që tregoi Nefi te 1 Nefi 7 mund të ndahen në tri pjesë kryesore. Lexo përmbledhjet vijuese për çdo pjesë. Përzgjidh një dhe studioje më tej, duke kërkuar për çdo gjë që e kënaq Perëndinë dhe na ndihmon ne të vijmë te Krishti.

Pjesa 1. 1 Nefi 7:1–5. Nefi dhe vëllezërit e tij u kthyen përsëri në Jerusalem për të bindur familjen e Ishmaelit që t’i bashkohej udhëtimit të tyre për në tokën e premtuar. Kjo e lejoi Nefin dhe vëllezërit e tij të martoheshin dhe të kishin familje.

Pjesa 2. 1 Nefi 7:6–18. Lamani dhe Lemueli e lidhën Nefin, duke synuar ta linin të vdiste në vendin e shkretë. Por Nefi ushtroi besim të madh dhe Zoti e çliroi atë mrekullisht.

Pjesa 3. 1 Nefi 7:17–22. Nefi i fali sinqerisht vëllezërit e vet për orvatjen e tyre për ta vrarë dhe grupi u kthye te Lehi dhe Saria.

Kur nxënësit të mbarojnë studimin, vërini të diskutojnë për atë që mësuan dhe ta shkruajnë përgjigjen për pyetjen vijuese në tabelë.

• Çfarë mësove nga studimi yt që mendon se do ta kënaqte Perëndinë dhe do të të ndihmonte të vije te Krishti?

Nxënësit mund të tregojnë parime si martesa dhe familja janë qendrore në planin e Perëndisë; nëse ushtrojmë besim te Zoti, Ai është në gjendje t’i bëjë të gjitha gjërat për ne sipas vullnetit të Tij dhe falja e të tjerëve sjell paqe.

• Si mund të të ndihmojë ajo që mësove në jetën tënde?

Nëse është e nevojshme, merrni parasysh të bëni pyetje për ndjekjen e ecurisë si të mëposhtmet: Si mund të jetë zbatimi i asaj që mësove në jetën tënde? Çfarë hapash të ardhshëm mund të ndërmarrësh?

Reflekto për përvojën tënde të studimit sot ndërsa kërkove në mënyrë specifike gjëra që do të të ndihmonin të vije te Jezu Krishti dhe që janë të kënaqshme për Perëndinë.

• Si mund të përmirësohet studimi yt i shkrimeve të shenjta nëse ke vazhdimisht këtë qasje ndaj studimit tënd?

Merrni parasysh ta mbyllni me dëshminë tuaj vetjake ose t’i lejoni nxënësit të tregojnë atë që kanë mësuar ose ndier nga studimi i tyre.

Komente dhe Informacion për Rrethanat

Çfarë bekimesh mund të vijnë nga studimi me sinqeritet i Librit të Mormonit dhe mbajtja shënim e të vërtetave që përmban ai?

Merr parasysh të shikosh materialin filmik vijues që paraqet rininë nga Europa lindore duke përshkruar përvojat e tyre me leximin e Librit të Mormonit dhe ta mbash shënim atë që mësuan ata.

Përse familja është kaq e rëndësishme për Zotin? Çfarë ndryshimi mund të bëj në familjen time tani?

Shkrimet e shenjta flasin për nevojën që bijtë e Lehit të martoheshin që të mund të bënin fëmijë në tokën e premtuar dhe nëpërmjet profetëve modernë ne mësojmë se familja është qendrore në planin e Zotit që të bëjë të ndodhë fati ynë i përjetshëm. Burimet e mëposhtme mund të të ndihmojnë ta kuptosh më thellë rëndësinë e familjes dhe ndikimin që mund të kenë familjet.

• “Familja: Një Proklamatë drejtuar Botës”, ChurchofJesusChrist.org

Si mund t’i fal të tjerët?

Plaku Xhefri R. Holland, i Kuorumit të Dymbëdhjetë Apostujve, dha mësim sa vijon:

Plaku Xhefri R. Holland

“‘Falni dhe do të jeni të falur’ [Lluka 6:37], dha mësim Krishti në kohën e Dhiatës së Re. Dhe në kohën tonë: ‘Unë, Zoti, do të fal kë do të fal, por nga ju kërkohet t’i falni të gjithë njerëzit’ [Doktrina e Besëlidhje 64:10]. Megjithatë është e rëndësishme për disa prej jush që jetojnë në ankth të vërtetë, që të vëreni atë që Ai nuk tha. Ai nuk tha: ‘Nuk ju lejohet të ndieni dhembje të vërtetë ose brengë të vërtetë nga përvojat shkatërruese që i keni pasur për shkak të një personi tjetër’. As nuk tha: ‘Me qëllim që të falni plotësisht, ju duhet të hyni sërish në një marrëdhënie helmuese ose të ktheheni në një rrethanë keqtrajtuese dhe shkatërruese’. Por pavarësisht nga fyerjet më të tmerrshme që mund të na vijnë, ne mund të ngrihemi mbi dhembjen tonë vetëm kur i vendosim këmbët tona në shtegun e shërimit të vërtetë. Ai shteg është shtegu i faljes nëpër të cilin eci Jezusi i Nazaretit, që i bën thirrje secilit prej nesh: ‘Eja e më ndiq’ [Lluka 18:22].” (Xhefri R. Holland, “Shërbesa e Pajtimit”, Liahona, nëntor 2018, f. 78–79)

Teksa shërbente si anëtar i Të Shtatëdhjetëve, Plaku Leri J. Eko Houk tha fjalët në vijim:

Plaku Leri J. Eko Houk

“Vëllezër e motra, a ka njerëz në jetën tonë që na kanë lënduar? A i ushqejmë ato që quhen ndjenja plotësisht të justifikuara mërie dhe zemërimi? A po e lejojmë krenarinë që të na pengojë të falim dhe t’i lëmë gjërat të shkojnë? E ftoj gjithsecilin prej nesh që të falë plotësisht dhe ta lërë shërimin të ndodhë së brendshmi. Por edhe nëse falja nuk vjen sot, dijeni se ashtu siç e dëshirojmë dhe punojmë për të, ajo do të vijë – ashtu siç bëri më në fund për mua pas vdekjes së vëllait tim.” (Leri J. Eko Houk, “Sikundër Krishti ju Fal, ashtu Bëni edhe Ju”, Liahona, maj 2018, f. 16)

Veprimtari Plotësuese të të Mësuarit

Një fillim alternativ

Nxënësit mund të diskutojnë për veprimtaritë për të cilat qëllimi kryesor shpesh mund të kalojë pa u vënë re. Për shembull, shkuarja në shkollë mund të bëhet për të plotësuar detyrat në vend që të bëhet për marrje të arsimimit. Kërkoni nga nxënësit të përsiatin për pasojat e kalimit pa u vënë re të qëllimit më të madh të diçkaje. Ndihmojini ata të kuptojnë se shumë njerëz e keqkuptojnë qëllimin e Librit të Mormonit dhe se ky mësim do të trajtojë atë qëllim.

Gjetja e parimeve të ungjillit

Nxënësit mund të kërkojnë parime të ungjillit ndërsa lexojnë tri pjesët e 1 Nefi 7. Pas leximit, ata mund t’i bëjnë vetes pyetje si: “Çfarë mësimi kryesor mora nga këto vargje?”

Nëse nxënësit kanë nevojë për ndihmë që t’i kuptojnë dhe përcaktojnë parimet, merrni parasysh si mund t’i ndihmojnë burimet vijuese:

• Dejvid A. Bednar, “Parimet e Ungjillit Tim”, Liahona, maj 2021, f. 123–126

• Richard G. Scott, “Acquiring Spiritual Knowledge”, Ensign, nëntor 1993, f. 86–88

Theksimi i doktrinës së familjes

Për t’i ndihmuar nxënësit të kuptojnë se çfarë ndjen Zoti rreth rëndësisë së martesës dhe familjes, merrni parasysh t’i ftoni ata të përsiatin për atë se si do të përgjigjeshin për pyetjen vijuese: “Pse Presidenca e Parë interesohet kaq shumë për ju dhe ju jep kaq shumë burime?” Ndërsa nxënësit studiojnë vargjet te 1 Nefi 7:1–5, merrni parasysh të lexoni gjithashtu nga dokumenti “Familja: Një Proklamatë drejtuar Botës” (ChurchofJesusChrist.org).