1 Nefi 10; 11:1–6

“Që të Mund të Shihja dhe të Dëgjoja dhe të Dija”

Kur ke qenë i motivuar për të zbuluar a ishte e vërtetë diçka që dëgjove? Çfarë përpjekjesh bëre dhe te kush u mbështete për ndihmë? Pasi e dëgjoi të atin, Lehin, të jepte mësim rreth pemës së jetës dhe të profetizonte për ardhjen e Jezu Krishtit, Nefi dëshironte ta mësonte vetë të vërtetën e fjalëve të të atit. Ky mësim mund të të ndihmojë në përpjekjet e tua për të kërkuar me zell njohuri nga Zoti.

Bërja e pyetjeve që fton zbulimin. Bërja e pyetjeve me lidhje dhe e pyetjeve të hapura, më pas lejimi që nxënësit të kërkojnë në shkrimet e shenjta për përgjigje, mund të sigurojë mundësi kuptimplota dhe të fuqishme që nxënësit të zbulojnë vetë doktrina dhe parime. Këto lloj pyetjesh u tregojnë nxënësve që përgjigjet mund të gjenden në shkrimet e shenjta dhe që ata janë të aftë t’i gjejnë ato përgjigje.

Përgatitja e nxënësve: Ftojini nxënësit ta pyesin një prind ose udhëheqës të rinisë se çfarë bën ai ose ajo për të kërkuar të vërtetën me zell nga Perëndia ose si ia zbulon Fryma e Shenjtë të vërtetën atij ose asaj. Nxitini nxënësit të vijnë të përgatitur për t’i dhënë një ide klasës.

Veprimtari të Mundshme të të Mësuarit

Kur flasin profetët

Në vend që të përdorni skenarin më poshtë, mund ta filloni mësimin duke treguar disa thënie të profetit dhe apostujve aktualë që shpallin doktrinë ose që i ftojnë individët të veprojnë me besim. Paraqitini ose lexojini thëniet me zë të lartë dhe ftojini nxënësit të përcaktojnë më vete se cili nga tri pohimet pasqyron ndjenjat e tyre: 1) E besoj atë dhe jam gati të veproj sipas saj, 2) E besoj atë, por nuk kam për qëllim të veproj sipas saj dhe 3) Nuk jam i sigurt a e besoj atë. Sigurohuni që nxënësit ta kuptojnë se nuk ka përgjigje të drejtë ose të gabuar dhe se nuk ka pse të tregojnë se si e vlerësojnë veten.

Imagjino sikur gjatë një takimi shpirtëror mbarëbotëror për rininë, profeti bëri disa ftesa që rinia të veprojë me besim.

• Cilat janë disa reagime të ndryshme që mund të ketë rinia?

• Si mendon, pse do të ndodhnin këto reagime të ndryshme?

• Si mund të ndikojnë këto reagime në jetën e tyre tani ose në të ardhmen?

Mendo rreth mënyrës se si ke reaguar ndaj mësimeve të profetëve dhe pse. Si kanë ndikuar këto reagime tek ti? Ndërsa e studion këtë mësim, kërko të mësosh nga reagimet e ndryshme ndaj mësimeve profetike në shkrimet e shenjta dhe përsiat se si mund të zbatohen ato për ty.

Një dëshirë për të ditur

Pasi profeti Lehi ia tregoi familjes vegimin e tij për pemën e jetës (shih te 1 Nefi 8), ai dëshmoi se Jezu Krishti do ta kryente Shlyerjen e Tij (shih te 1 Nefi 10:1–16). Bijtë e Lehit patën reagime të ndryshme ndaj mësimeve të tij të frymëzuara.

Për ta lehtësuar pjesëmarrjen dhe diskutimin e nxënësve, merreni parasysh ta ndani klasën në grupe më të vogla për t’i studiuar këto vargje bashkë. Me nxënësit në grupe, jini i vetëdijshëm për mënyrën se si po punojnë së bashku dhe përdoreni ndikimin tuaj për t’i ndihmuar ata të jenë të suksesshëm.

Lexo te 1 Nefi 10:17–19 dhe 15:1–3, 8–9, duke krahasuar mënyrën se si reaguan Nefi, Lamani dhe Lemueli ndaj fjalëve të atit të tyre. Mund të dëshirosh t’i shenjosh fjalët dhe frazat që të bëjnë përshtypje.

Merreni parasysh t’i paraqitni pyetjet vijuese që anëtarët e klasës t’i diskutojnë. Mund të dëshironi t’ua ndërroni vendet grupeve dhe të dëgjoni si përgjigjen nxënësit.

• Çfarë ndryshimesh pe te mënyra si reaguan Nefi dhe vëllezërit e tij ndaj të njëjtit mesazh?

• Çfarë besonte Nefi për Perëndinë? Çfarë besonin Lamani dhe Lemueli? (Shih te 1 Nefi 10:17–18; 15:9.)

• Si mendon se do të ndikojnë tek ata bindjet dhe reagimet e tyre të ndryshme?

Një nga të vërtetat që kuptonte Nefi, ishte se Përëndia na e zbulon të vërtetën nëpërmjet Frymës së Shenjtë kur e kërkojmë Atë me zell.

Merreni parasysh ta shkruani në tabelë pohimin e theksuar me germa të zeza:

• Cilat janë disa gjëra që Nefi i kishte përjetuar tashmë, që e ndihmuan atë të arrinte te kjo njohuri rreth Perëndisë?

Nëse nxënësit e kanë të vështirë të përgjigjen, mund t’i ftoni ata të rishikojnë referencat 1 Nefi 2:16 dhe 1 Nefi 4:6–13 ose t’i përmblidhni këto ngjarje.

Të menduarit rreth përvojave të Nefit, mund të të sjellë ndër mend përvoja të së shkuarës që ke pasur kur Ati Qiellor të ka zbuluar të vërteta. Mund të duash të shënosh se si të ka bekuar Ai në ditarin tënd të studimit.

Kjo mund të jetë një nga disa mundësi gjatë mësimit kur nxënësit mund të duan të tregojnë përvoja personale.

Kërkimi i së vërtetës nga Perëndia

Nefi mësoi se Ati Qiellor na bekon me Frymën e Shenjtë ndërsa kërkojmë të vërtetë nga Ai. Për ta parë më nga afër këtë të vërtetë, bëj dy kolona në një faqe në ditarin tënd të studimit. Emërtoje njërën kolonë “Mënyra për ta kërkuar me zell të vërtetën nga Perëndia” dhe tjetrën “Mënyra se si Perëndia e zbulon të vërtetën nëpërmjet Frymës së Shenjtë”. Shto disa ide që mund të mendosh në secilën kolonë. Mund të duash të përfshish këndvështrime që mësove nga vargjet 1 Nefi 10:17–19.

Një mundësi tjetër mund të jetë që grupet e vogla të përdorin një fletë letre, duke e kaluar letrën nga një person tek tjetri disa herë. Çdo nxënës duhet të shtojë një ide në cilëndo kolonë kur e merr letrën. Kjo veprimtari mund të bëhet edhe nga e gjithë klasa në tabelë. Nëse e lejon koha, merreni parasysh t’i inkurajoni nxënësit të përfshijnë referenca të shkrimeve të shenjta që i përkrahin sugjerimet e tyre.

Lexo te 1 Nephi 11:1–6, duke kërkuar atë që bëri Nefi për të kërkuar të vërtetën dhe si e ndihmoi Shpirti atë. Shenjo fjalë ose fraza specifike që të bëjnë përshtypje. Mund të duash të bësh shtesa te kolonat në ditarin tënd të studimit.

Merreni parasysh t’i ftoni nxënësit të tregojnë se çfarë iu duk kuptimplotë. Pasi nxënësit tregojnë, mund të bëni pyetje që ndjekin ecurinë, si “Pse mendoni që u gëzua Shpirti?” (shih te vargu 6) ose “Si mendoni që përsiatja mund të çojë në zbulesë?”

Shto çdo ide të re në kolonat në ditarin tënd të studimit.

Shqyrto atë që ke shënuar rreth mënyrës se si Perëndia e zbulon të vërtetën nëpërmjet Frymës së Shenjtë kur e kërkojmë Atë me zell. Mendo rreth mënyrës se si mund të kesh parë që disa nga këto janë të vërteta në jetën tënde. Në çfarë mënyrash është forcuar marrëdhënia jote me Atin Qiellor ndërsa e ke kërkuar me zell Atë?

Nëse përvojat nuk janë tepër vetjake, ftojini disa nxënës të tregojnë përvojat e tyre. Merreni parasysh të tregoni edhe përvoja vetjake. Synoni të theksoni se si parimi i këtij mësimi është i vërtetë dhe me vend në jetën tonë sot.

Zbulesa vetjake ka rëndësi

Për shkak se Nefi dëshironte të mësonte vetë dhe iu drejtua Zotit për përgjigje, ai pa atë që pa i ati, Lehi, dhe iu treguan shumë ngjarje të ardhshme që do të ndodhnin në tokë. (Për të mësuar më shumë rreth vegimit të Nefit, shih te 1 Nefi 11–14.) Vegimi i Nefit për shtegun e ngushtë e të ngushtuar qe një ngjarje që ia ndryshoi jetën. Ai më vonë e mbajti shënim inkurajimin e tij për të gjithë që të ndjekin po të njëjtin shteg (shih te 2 Nefi 31:18–21).

Ftojini nxënësit t’u përgjigjen pyetjeve në vijim në ditarët e tyre të studimit:

• Çfarë ke mësuar rreth arsyes pse kanë rëndësi reagimet e tua ndaj mësimeve të frymëzuara?

• Si mund ta zbatosh atë që ke mësuar rreth kërkimit me zell të së vërtetës?

• Çfarë ke mësuar rreth Atit Qiellor dhe Jezu Krishtit që të frymëzon të afrohesh më shumë me Ta?

Komente dhe Informacion për Rrethanat

Cilat janë disa arsye pse nganjëherë nuk ia bëjmë Atit Qiellor pyetjet tona?

Presidentja Kamill N. Xhonson, e Presidencës së Përgjithshme të Fillores, vërejti:

“Ndoshta kjo ndodh ngaqë ne nuk e kemi besimin për ta pranuar përgjigjen që mund të marrim. Ndoshta ndodh ngaqë burri ose gruaja e natyrshme brenda nesh i bën qëndresë lënies së gjërave tërësisht në dorën e Zotit dhe mirëbesimit ndaj Tij plotësisht.” (Kamill N. Xhonson, “Ftojeni Krishtin të Jetë Autori i Historisë Suaj”, Liahona, nëntor 2021, f. 80–81)

Si të përsiat?

Përpara thirrjes së tij tek Të Shtatëdhjetët, Plaku Gerald N. Land vërejti:

“Gjeni kohë për të përsiatur dhe menduar. Largohuni nga rrëmuja e jetës. Gjeni një vend të qetë dhe kaloni kohë thjesht duke u ulur e menduar, duke dëgjuar mendimet e ndjenjat tuaja, duke ia hapur veten nxitjeve të Shpirtit. …

Ndonjëherë ne qëllimisht duhet t’i lemë mënjanë shqetësimet e botës, duhet ta lëmë mënjanë të nxituarin e jetës sonë të përditshme dhe të gjejmë një periudhë kohe të qetë e një vend të qetë ku mund të ulemi e të përsiatim e të meditojmë dhe të dëgjojmë për atë zë të qetë, të ulët që pëshpërit.” (Gerald N. Land, “The Voice of the Lord” [takim shpirtëror në Universitetin “Brigam Jang”, 2 dhjetor 1997], f. 9–10, speeches.byu.edu)

Veprimtari Plotësuese të të Mësuarit

1 Nefi 9. Fletët e Nefit

Shënim: Mësimi për Fjalët e Mormonit do të përfshijë referencat për kapitullin 1 Nefi 9. Nëse do të ishte e dobishme ta jepnit mësim tani, shikojeni atë mësim. Nëse nxënësit kanë pyetje, merreni parasysh t’i drejtoni ata te burimet që janë në dispozicion në programin Eja, Më Ndiq këtë javë.

1 Nefi 10:2–16. Lehi dëshmoi për Jezu Krishtin dhe misionin e Tij

Mund të doni t’i lidhni mësimet e Lehit rreth pemës së jetës me misionin e Jezu Krishtit. Merreni parasysh t’i ftoni nxënësit të lexojnë te 1 Nefi 10:2–16 dhe të mendojnë rreth mënyrës se si këto mësime do t’i shtyjnë individët të besojnë te Jezu Krishti dhe ta marrin frutën e pemës. Nxënësit mund të përsiatin edhe rreth arsyes përse Zoti do të donte që familja e Lehit – dhe të gjithë ne – t’i dinim këto të vërteta. Ashtu si Lehi dëshironte që familja e tij ta njihte dhe donte Shpëtimtarin, kërkojuni nxënësve që të marrin parasysh se çfarë mund t’u thoshin njerëzve të tyre të dashur për t’i ftuar ata që t’i drejtohen Atij.

Një fillim ndryshe i mësimit

Në vijim janë reagime të ndryshme që mund të kenë individët ndaj një mesazhi nga profeti. Merreni parasysh t’u kërkoni katër nxënësve që secili të lexojë njërin nga pohimet e mëposhtme:

• Armandi besonte shumë nga ato që i ishin mësuar, por kishte pyetje rreth disave prej tyre. Ai do që të flasë rreth shqetësimeve të tij me prindërit.

• Ela ndjeu se nuk i kuptonte plotësisht pjesë të mesazhit të profetit. Ajo planifikon të lutet për të kuptuar se si gjejnë zbatim për të mësimet e profetit.

• Arbrit i pëlqyen pjesë të bisedës por kishte vështirësi me të tjerat. Ai i shpërndau mendimet dhe ndjenjat e tij në rrjetet sociale.

• Belës iu duk interesante biseda. Ajo nuk planifikon të ndërmarrë ndonjë veprim pasi e dëgjoi atë.

Kërkojuni nxënësve të tregojnë atë që mendojnë për këto reagime, dhe të diskutojnë epërsitë dhe mangësitë e secilit. Ata mund të tregojnë edhe se ku mund të çojnë këto reagime.