1 Nefi 8:1–18

Dashuria e Perëndisë Është më e Dëshirueshmja mbi të Gjitha Gjërat

Si do ta përshkruaje dashurinë e Perëndisë? Lehi pati një vegim në të cilin pa një pemë të bukur. Ai hëngri frutin e pemës dhe “ishte më i ëmbël se gjithçka” që kishte shijuar ndonjëherë më parë (1 Nefi 8:11). Kjo pemë dhe fruti i saj përfaqësojnë dashurinë e Perëndisë që shfaqen te lindja, jeta, shërbesa dhe flijimi shlyes i Jezu Krishtit. Kjo dashuri ia “mbushi shpirtin [Lehit] me një gëzim jashtëzakonisht të madh” (1 Nefi 8:12). Ky mësim ka për qëllim të të ndihmojë që ta shtosh dëshirën tënde për të përjetuar dashurinë e Perëndisë dhe Shlyerjen e Jezu Krishtit.

Inkurajimi i nxënësve për të treguar përvoja. Çdo individ në klasë ka një burim të pasur të dëshmisë, ideve dhe përvojave lidhur me të jetuarit e ungjillit. Siguroni mundësi për nxënësit që të tregojnë përvoja të përshtatshme vetjake. Shprehni mirënjohje për nxënësit kur ata janë të gatshëm të tregojnë përvoja të tilla.

Përgatitja e nxënësve: Ftojini nxënësit të përsiatin pyetjet e mëposhtme: Në çfarë mënyrash mund ta përjetojë dikush dashurinë e Perëndisë? Kur e ke ndier dashurinë e Tij për ty? Nxënësit mund edhe të flasin me një pjesëtar të familjes ose udhëheqës të Kishës rreth mënyrës se si e përjetojnë dashurinë e Perëndisë për ta.

Veprimtari të Mundshme të të Mësuarit

Errësira dhe drita

Merrni parasysh të shfaqni një material filmik të këtyre historive të treguara në konferencën e përgjithshme. Mund edhe të tregoni një përvojë vetjake për t’i ndihmuar nxënësit të fillojnë të ndiejnë se si është të jesh në errësirë e të dëshirosh dritën. Kjo mund t’i ndihmojnë nxënësit të përgatiten për të mësuar rreth nevojës së tyre për Jezu Krishtin për ta mposhtur errësirën në jetën e tyre.

Ecja me biçikletë përmes një tuneli në një shteg prej 24 kilometrash (shih Vern P. Stanfill, “Zgjidhni Dritën”, Ensign ose Liahona, nëntor 2015, f. 55–57).

Dritat e Tempullit të Solt‑Lejkut që nuk ndizeshin natën (shih Sharon Iubank, “Krishti: Drita që Shkëlqen në Errësirë”, Ensign ose Liahona, maj 2019, f. 73–76).

Zbritja me litar në një shpellë të thellë (shih Timothi J. Daiks, “Drita Kapet pas Dritës”, Liahona, maj 2021, f. 112–115).

Lehi lutet për mëshirën e Zotit

Ndërkohë që jetonte në vendin e shkretë, Lehi i tregoi familjes së tij hollësi të një vegimi që kishte parë. Në këtë vegim, ai ishte në “një vend të shkretë, të errët dhe të zymtë” (1 Nefi 8:4).

Për t’i ndihmuar nxënësit t’i imagjinojnë vargjet vijuese, mund të jetë e dobishme t’u kërkoni atyre të lexojnë me ngadalë ose t’i lexoni ju vargjet dhe t’i ftoni nxënësit të mbyllin sytë dhe të përfytyrojnë atë që përshkruajnë vargjet.

Lexo te 1 Nefi 8:5–8, duke kërkuar atë që i ndodhi Lehit dhe se si u ndie ai. Mund të jetë e dobishme ta përfytyrosh atë që lexon. Kërko hollësi përshkruese që mund të të ndihmojnë të krijosh një tablo në mendje ose t’i imagjinosh ngjarjet si një film.

• Çfarë lloj mendimesh ose ndjenjash mendon se e bënë Lehin të lutej për mëshirë?

Ndalu një çast për të përsiatur mënyrat e ndryshme në të cilat mund të ndiejmë errësirë në jetën tonë dhe arsyet se pse mund t’i bëjmë thirrje Zotit për mëshirë.

Lexo te 1 Nefi 8:9–12, duke kërkuar mënyrën se si e ndihmoi Zoti Lehin.

Në ditarin tënd të studimit, bëj një vizatim të thjeshtë që përfaqëson pemën që pa Lehi. Vizatoje frutën në pemë dhe emërtoje frutën në bazë të shpjegimeve të Lehit te 1 Nefi 8:10–12. (Për përshkrime shtesë për ta emërtuar frutën e pemës, lexo te 1 Nefi 15:36 dhe Alma 32:42.) Ndërsa vizaton, mendo rreth asaj që mund të përfaqësojnë kjo pemë dhe fruta e saj.

Më vonë, Nefi deshi ta dinte dhe kuptonte personalisht vegimin, përfshirë kuptimin e pemës që kishte parë Lehi. Ndërkohë që përsiaste mbi atë që i qe dhënë mësim, Nefit iu tregua, nga Shpirti, një vegim i Virgjëreshës Marie duke mbajtur Jezusi foshnjë në krahë (shih te 1 Nefi 11:13, 20).

Vështroje figurën vijuese dhe mendo rreth arsyes pse Nefit mund t’i jetë treguar kjo kur Ai donte të dinte kuptimin e pemës.

Lexo te 1 Nefi 11:21–23, duke kërkuar se çfarë tjetër iu tregua Nefit dhe si e ndihmoi kjo atë për të mësuar kuptimin e pemës. Mund ta emërtosh pemën në bazë të asaj që mëson.

• Si mendon që na ndihmon Shpëtimtari ta ndiejmë dashurinë e Perëndisë?

Plaku Dejvid A. Bednar, i Kuorumit të Dymbëdhjetë Apostujve, dha mësim:

“Shfaqja më e madhërishme e dashurisë së Perëndisë për fëmijët e Tij është shërbesa në vdekshmëri, flijimi shlyes dhe Ringjallja e Zotit Jezu Krisht. Fruta në pemë mund të shihet si një simbol për bekimet e Shlyerjes së Shpëtimtarit.” (Dejvid A. Bednar, “Ejani dhe Shikoni”, Ensign ose Liahona, nëntor 2014, f. 109)

• Nga vegimi i Lehit dhe thënia e Plakut Bednar, çfarë të vërtetash mund të përcaktoni rreth dashurisë së Perëndisë?

Nxënësit mund të përcaktojnë disa të vërteta të ndryshme. Nxitini nxënësit të shprehin pse e vërteta që përcaktuan, është e rëndësishme për ta.

Të ndiejmë dashurinë e Perëndisë dhe gëzim të madh nëpërmjet Jezu Krishtit

Një e vërtetë që mund të mësojmë, është se dashuria e Perëndisë, e shfaqur nëpërmjet Jezu Krishtit, është më e dëshirueshme se çdo gjë tjetër dhe sjell gëzimin më të shumtë.

Veprimtaritë vijuese mund të të ndihmojnë ta dallosh se si mund ta ndiesh dashurinë e Perëndisë për ty për shkak të Jezu Krishtit. Ndërsa i bën këto veprimtari, përpiqu të përcaktosh bekimet e shumta që vijnë nëpërmjet Jezu Krishtit dhe Shlyerjes së Tij dhe shkruaji ato mbi ose përreth frutës që vizatove.

Mund të jetë e efektshme ta bëni ndryshe secilën nga veprimtaritë vijuese. Nxënësit mund të punojnë në dyshe ose grupe të vogla për Veprimtarinë 1. Veprimtaria 2 mund të bëhet më mirë duke zgjedhur një material filmik dhe duke e parë atë si klasë. Veprimtaria 3 mund të bëhet nga nxënësit individualisht.

Veprimtaria 1

Lexo atë që dëshmoi Lehi pasi pa këtë vegim te 1 Nefi 10:5–6. Gjithashtu lexo disa nga shkrimet e shenjta vijuese ose kërko të tjera që ilustrojnë bekimet që mund të marrim nëpërmjet Shlyerjes së Jezu Krishtit: Isaia 53:4–5; Gjoni 1:17; Mosia 4:2–3; Alma 7:11–12; Helamani 5:12.

Veprimtaria 2

Shiko një nga materialet filmike në vijim, që janë në dispozicion te ChurchofJesusChrist.org, duke kërkuar bekimet që vijnë nëpërmjet Jezu Krishtit:

“Për Shkak të Tij” (2:36)

“Peace in Christ” [“Paqe në Krisht”] (4:09)

Veprimtaria 3

Përsiat mënyra se si i ke përjetuar bekimet që ofron Jezu Krishti, ose si e ke parë këtë në jetën e njerëzve të tjerë. Kjo mund të përfshijë mënyra se si të bekoi Zoti në kohë errësire.

Çfarë mësove?

Ndalu një çast për të rishikuar bekimet që mund të marrim nëpërmjet Shlyerjes së Jezu Krishtit, të cilat i shkrove në frutën që vizatove. Përsiat pse këto bekime mund “ta bë[jnë] dikë të lumtur” (1 Nefi 8:10), të jenë “më [të ëmbla] se gjithçka” (1 Nefi 8:11) dhe të të mbushin “me një gëzim jashtëzakonisht të madh” (1 Nefi 8:12).

Ftoni disa nxënës të tregojnë se çfarë mësuan dhe përse është domethënëse për ta. Pyetjet vijuese mund të jenë të dobishme:

• Çfarë mësove rreth dashurisë së Perëndisë për ty?

• Çfarë bekimesh që janë në dispozicion nëpërmjet Jezu Krishtit, dëshiron më së shumti në jetën tënde? Përse?

• Si je bekuar për shkak të dashurisë që Perëndia ka treguar me dërgimin e Birit të Tij, Jezu Krishtit, për të shlyer për ty?

Pasi t’i dëgjoni përvojat e nxënësve, merrni parasysh të jepni mendimet dhe dëshminë tuaj për dashurinë e Perëndisë dhe bekimet që mund të marrim nëpërmjet Shpëtimtarit dhe Shlyerjes së Tij.

Komente dhe Informacion për Rrethanat

Çfarë bekimesh mund të marrim nëpërmjet Shlyerjes së Jezu Krishtit?

Shkrimet e shenjta dëshmojnë për bekimet e shumta që Shpëtimtari na ofron nëpërmjet Shlyerjes së Tij. Ne mund të falemi për mëkatet tona dhe zemra jonë të mund të pastrohet (shih te Mosia 4:2–3). Ne mund të pajtohemi me Perëndinë (shih te Jakobi [LiM] 4:11). Ne marrim “hir dhe [të] vërtet[ë]” (Gjoni 1:17). Ne mund ta mposhtim botën dhe të ndiejmë paqe (shih te Gjoni 16:33). Ne mund të marrim ndihmë hyjnore dhe shërim për vuajtjet, dhembjet, hidhërimet dhe sëmundjet tona (shih tek Isaia 53:4–5; Alma 7:11). Ai i njeh dobësitë tona dhe do të na ndihmojë për to (shih tek Alma 7:12). Ai mund të na forcojë kundër tundimit (shih te Doktrina e Besëlidhje 62:1). Ai është një themel i sigurt dhe nëse i ndërtojmë jetët tona mbi Të, nuk do të biem kurrë (shih te Helamani 5:12). I gjithë njerëzimi do të ringjallet së vdekuri (shih te Mosia 16:7–8; Alma 7:12; 1 Korintasve 15:22). Ne mund të bëhemi si Shpëtimtari dhe të trashëgojmë jetën e përjetshme (shih te Moroni 7:48; 2 Nefi 2:27).

Të Mësuarit Plotësues

Shembuj nga shkrimet e shenjta rreth përjetimit të gëzimit nëpërmjet Jezu Krishtit

Kjo veprimtari mund të jetë e dobishme për t’i ndihmuar nxënësit të kuptojnë të vërtetën që dashuria e Perëndisë, e shfaqur nëpërmjet Jezu Krishtit, është më e dëshirueshme se çdo gjë tjetër dhe sjell gëzimin më të shumtë. Ka një model të përsëritur në Librin e Mormonit dhe në shkrime të shenjta të tjera të njerëzve në nevojë që iu drejtuan Perëndisë dhe përjetuan dashurinë dhe gëzimin e Tij (duke marrë simbolikisht frutën e pemës së jetës). Merrni parasysh t’u siguroni kohë nxënësve për të lexuar një shembull dhe për të kërkuar atë që mund të mësojnë nga shembulli.

Shembulli 1: Populli i Mbretit Beniamin

• Populli kishte rënë në tokë prej frikës nga Zoti (Mosia 4:1).

• Ata u lutën për mëshirë (Mosia 4:2).

• Ata u mbushën me gëzim nëpërmjet Jezu Krishtit (Mosia 4:3).

• Mbreti Beniamin vuri në dukje që ata kishin shijuar dashurinë e Perëndisë (Mosia 4:11).

Shembulli 2: Alma

• Alma ndjeu frikë dhe faj (Alma 36:11–16).

• Ai u lut për mëshirë (Alma 36:17–18).

• Ai ndjeu gëzim nëpërmjet Jezu Krishtit (Alma 36:19–21).

Shembulli 3: Jozef Smithi

• Jozef Smithin e rrethoi errësira dhe ndjeu frikë (Joseph Smith – Historia 1:15).

• Ai u lut për çlirim (Joseph Smith – Historia 1:16).

• Ati Qiellor dhe Jezu Krishti iu shfaqën atij në lavdi të madhe (Joseph Smith – Historia 1:17).

• Rreth përvojës së tij në Korijen e Shenjtë, Jozef Smithi shkroi: “Shpirti im u mbush me dashuri dhe për shumë ditë mund të ngazëllehesha me gëzim të madh” (History, rreth verës 1832, f. 3, josephsmithpapers.org).

• Shembuj të tjerë përfshijnë Enosin (shih tek Enosi 1:1–8), Mbretin Lamoni (shih tek Alma 18:20–21, 41; 19:6, 12–13), gruan e Mbretit Lamoni (shih tek Alma 19:4, 8–11, 29–30), një grup lamanitësh (shih te Helamani 5:23–28, 40–48) dhe nefitët gjatë shfaqjes së Jezu Krishtit (shih tek 3 Nefi 8:19–25; 11:1–17; 4 Nefi 1:16).

Një dëshirë për ta ndarë gëzimin me të tjerët

Kur Lehi hëngri frutën e pemës së jetës dhe përjetoi gëzim të madh, ai kishte dëshirë ta ndante këtë gëzim me familjen e tij (shih te 1 Nefi 8:12). Plaku Dejvid A. Bednar dha mësim: “Përgjigjja e menjëhershme e Lehit ndaj marrjes së frutës së pemës dhe përjetimit të gëzimit të madh ishte një dëshirë e shtuar për ta ndarë me familjen e tij dhe për t’i shërbyer asaj. Kështu, teksa u [drejtua] te Krishti, ai u [drejtua] edhe te njerëzit e tjerë nëpërmjet dashurisë dhe shërbimit” (“Ejani dhe Shikoni”, Ensign ose Liahona, nëntor 2014, f. 109).

Nxënësit mund të përfitojnë nga një diskutim rreth gëzimit që kanë gjetur në ndjekjen e Shpëtimtarit Jezu Krisht, dhe se si po e ndajnë këtë gëzim me familjen e tyre dhe të tjerët.