1 Nephi 8:1–18

Ang Pag-ibig ng Diyos ang Pinakakanais-nais sa Lahat ng Bagay

Punungkahoy ng Buhay

Paano mo ilalarawan ang pag-ibig ng Diyos? Si Lehi ay nagkaroon ng pangitain kung saan nakita niya ang isang magandang punungkahoy. Kinain niya ang bunga ng punungkahoy na iyon, at “napakatamis nito, higit pa sa lahat” ng natikman na niya (1 Nephi 8:11). Ang punungkahoy na ito at ang bunga nito ay kumakatawan sa pag-ibig ng Diyos, na ipinakita sa pagsilang, buhay, ministeryo, at nagbabayad-salang sakripisyo ni Jesucristo. Ang pag-ibig na ito ay “pinuspos ang kaluluwa [ni Lehi] ng labis na kagalakan” (1 Nephi 8:12). Layunin ng lesson na ito na tulungan kang madagdagan ang iyong hangaring maranasan ang pag-ibig ng Diyos at ang Pagbabayad-sala ni Jesucristo.

Paghikayat sa mga estudyante na magbahagi ng mga karanasan. Bawat indibiduwal sa klase mo ay saganang pagmumulan ng patotoo, kaalaman, at mga karanasan sa pamumuhay nang ayon sa ebanghelyo. Magbigay ng mga pagkakataon sa mga estudyante na magbahagi ng mga angkop na personal na karanasan. Magpasalamat sa mga estudyante kapag handa silang magbahagi ng gayong mga karanasan.

Paghahanda ng estudyante: Hikayatin ang mga estudyante na pag-isipan ang mga sumusunod na tanong: Sa paanong paraan mararanasan ng isang tao ang pag-ibig o pagmamahal ng Diyos? Kailan mo nadama ang pagmamahal Niya sa iyo? Maaari ding makipag-usap ang mga estudyante sa isang kapamilya o lider ng Simbahan kung paano niya nararanasan ang pagmamahal ng Diyos para sa kanya.

Mga Posibleng Aktibidad sa Pag-aaral

Kadiliman at liwanag

Maaari mong ipapanood ang video ng isa sa mga kuwentong ito na ibinahagi sa pangkalahatang kumperensya. Maaari ka ring magbahagi ng isang personal na karanasan para matulungan ang mga estudyante na simulang madama kung ano ang pakiramdam ng nasa dilim at maghangad ng liwanag. Makatutulong ito sa mga estudyante na maghandang malaman ang pangangailangan nila kay Jesucristo upang madaig ang kadiliman sa kanilang buhay.

Pagbibisikleta sa 15 milyang lagusan (tingnan sa Vern P. Stanfill, “Piliin ang Liwanag,” Liahona, Nob. 2015, 55–57).

Ang mga ilaw ng Salt Lake Temple na hindi sumindi sa gabi (tingnan sa Sharon Eubank, “Si Cristo: Ang Ilaw na Lumiliwanag sa Kadiliman,” Liahona, Mayo 2019, 73–76).

Pag-rappel sa malalim na kuweba (tingnan sa Timothy J. Dyches, “Ang Liwanag ay Kumukunyapit,” Liahona, Mayo 2021, 112–15).

Nanalangin si Lehi na kaawaan siya ng Panginoon

Habang naninirahan sa ilang, ibinahagi ni Lehi sa kanyang pamilya ang mga detalye ng kanyang pangitain. Sa pangitaing ito, siya ay nasa “isang madilim at mapanglaw na ilang” (1 Nephi 8:4).

Upang matulungan ang mga estudyante na mailarawan sa isipan ang mga sumusunod na talata, maaaring makatulong na ipabasa ang mga ito sa kanila nang dahan-dahan o basahin mo ang mga talata at sabihin sa mga estudyante na ipikit ang kanilang mga mata at isipin kung ano ang inilalarawan sa mga talatang ito.

Basahin ang 1 Nephi 8:5–8, at alamin kung ano ang nangyari kay Lehi at kung ano ang nadama niya. Makatutulong na ilarawan sa isipan ang binabasa mo. Maghanap ng mga naglalarawang detalye na makatutulong sa iyong gumawa ng larawan sa isipan o isipin ang mga pangyayari tulad ng isang pelikula.

• Sa iyong palagay, anong uri ng mga kaisipan o damdamin ang naging dahilan para manalangin si Lehi na kaawaan siya?

Pag-isipan sandali ang iba’t ibang paraan na maaari nating madama ang kadiliman sa ating buhay at ang mga dahilan kung bakit maaari tayong magsumamo sa Panginoon na kaawaan tayo.

Basahin ang 1 Nephi 8:9–12, at alamin kung paano tinulungan ng Panginoon si Lehi.

Upang matulungan ang mga estudyante na patuloy na mailarawan sa isipan ang banal na kasulatan, maaari mong ipanood ang video na “Nakita ni Lehi ang Punungkahoy ng Buhay” (4:32) mula sa time code na 1:52 hanggang 4:32.

Sa iyong study journal, gumawa ng simpleng drawing na kumakatawan sa punungkahoy na nakita ni Lehi. Magdrowing ng bunga sa punungkahoy, at lagyan ng label ang bunga batay sa mga paliwanag ni Lehi sa 1 Nephi 8:10–12. (Para sa mga karagdagang paglalarawan upang malagyan ng label ang bunga ng punungkahoy, basahin ang 1 Nephi 15:36 at Alma 32:42.) Habang nagdodrowing ka, isipin kung ano ang maaaring kinakatawan ng punungkahoy na ito at ng bunga nito.

Kalaunan, gustong malaman at maunawaan mismo ni Nephi ang pangitain, kabilang ang kahulugan ng punungkahoy na nakita ni Lehi. Habang pinagninilayan ang itinuro sa kanya, ipinakita kay Nephi, sa pamamagitan ng Espiritu, ang isang pangitain tungkol kay Birheng Maria na dala ang sanggol na si Jesus sa kanyang mga bisig (tingnan sa 1 Nephi 11:13, 20).

Tingnan ang sumusunod na larawan at isipin kung bakit kaya ito ipinakita kay Nephi nang naisin niya na malaman ang kahulugan ng punungkahoy.

Si Maria at ang sanggol na si Jesus

Basahin ang 1 Nephi 11:21–23, at alamin kung ano pa ang ipinakita kay Nephi at kung paano ito nakatulong sa kanya na malaman ang kahulugan ng punungkahoy. Maaari mong lagyan ng label ang punungkahoy batay sa natutuhan mo.

• Sa iyong palagay, paano tayo tinutulungan ng Tagapagligtas na madama ang pag-ibig ng Diyos?

Itinuro ni Elder David A. Bednar ng Korum ng Labindalawang Apostol:

Elder David A. Bednar

Ang pinakadakilang pagpapakita ng pagmamahal ng Diyos para sa Kanyang mga anak ay ang mortal na ministeryo, nagbabayad-salang sakripisyo, at Pagkabuhay na Mag-uli ng Panginoong Jesucristo. Ang bunga ng punungkahoy ay maituturing na simbolo ng mga pagpapala ng Pagbabayad-sala ng Tagapagligtas. (David A. Bednar, “Magsiparito Kayo, at Inyong Makikita,” Liahona, Nob. 2014, 109)

• Mula sa pangitain ni Lehi at sa pahayag ni Elder Bednar, anong mga katotohanan ang matutukoy mo tungkol sa pag-ibig o pagmamahal ng Diyos?

Maaaring makatukoy ang mga estudyante ng maraming iba’t ibang katotohanan. Hikayatin ang mga estudyante na ipahayag kung bakit mahalaga sa kanila ang katotohanang natukoy nila.

Madama ang pag-ibig ng Diyos at labis na kagalakan sa pamamagitan ni Jesucristo

Ang isang katotohanan na matututuhan natin ay ang pag-ibig o pagmamahal ng Diyos, na ipinapakita sa pamamagitan ni Jesucristo, ay mas kanais-nais kaysa anupamang bagay at nagdudulot ng lubos na kagalakan.

Ang mga sumusunod na aktibidad ay makatutulong sa iyo na matukoy kung paano mo maaaring madama ang pagmamahal ng Diyos sa iyo dahil kay Jesucristo. Sa paggawa mo ng mga aktibidad na ito, subukang tukuyin ang maraming pagpapalang dumarating sa pamamagitan ni Jesucristo at ng Kanyang Pagbabayad-sala at isulat ang mga ito sa bunga o sa paligid ng idinrowing mong bunga.

Maaaring epektibong gawin ang bawat isa sa mga sumusunod na aktibidad sa magkakaibang paraan. Maaaring gumawa ang mga estudyante nang magkakapartner o sa maliliit na grupo para sa Aktibidad 1. Ang Aktibidad 2 ay maaaring pinakamainam na gawin sa pamamagitan ng pagpili ng isang video at panoorin ito ng buong klase. Ang Aktibidad 3 ay maaaring gawin nang mag-isa ng estudyante.

Aktibidad 1

Basahin ang pinatotohanan ni Lehi matapos makita ang pangitaing ito sa 1 Nephi 10:5–6. Basahin din ang ilan sa mga sumusunod na banal na kasulatan o hanapin ang iba na naglalarawan ng mga pagpapalang matatanggap natin sa pamamagitan ng Pagbabayad-sala ni Jesucristo: Isaias 53:4–5; Juan 1:17; Mosias 4:2–3; Alma 7:11–12; Helaman 5:12.

Aktibidad 2

Panoorin ang sumusunod na video, na matatagpuan sa SimbahanniJesucristo.org, at alamin ang mga pagpapalang dumarating sa pamamagitan ni Jesucristo:

“Dahil sa Kanya” (2:36)

Aktibidad 3

Pag-isipan ang mga paraan kung paano mo naranasan ang mga pagpapalang ibinibigay ni Jesucristo o kung paano mo ito nakita sa buhay ng ibang tao. Maaaring kabilang dito ang mga paraan kung paano ka pinagpala ng Panginoon sa panahon ng kadiliman.

Ano ang natutuhan mo?

Balikan sandali ang mga pagpapalang matatanggap natin sa pamamagitan ng Pagbabayad-sala ni Jesucristo na isinulat mo sa idinrowing mong bunga. Isiping mabuti kung bakit ang mga pagpapalang ito ay maaaring “makapagpaligaya sa tao” (1 Nephi 8:10), maging “napakatamis, higit pa sa lahat” (1 Nephi 8:11), at pupuspusin ka “ng labis na kagalakan” (1 Nephi 8:12).

Anyayahan ang ilang estudyante na ibahagi ang natutuhan nila at kung bakit ito mahalaga sa kanila. Maaaring makatulong ang mga sumusunod na tanong:

• Ano ang natutuhan mo tungkol sa pag-ibig o pagmamahal ng Diyos sa iyo?

• Aling mga pagpapala na makakamtan sa pamamagitan ni Jesucristo ang pinakagusto mo sa iyong buhay? Bakit?

• Paano ka napagpala dahil sa pagmamahal na ipinakita ng Diyos sa pagsusugo ng Kanyang Anak na si Jesucristo upang magbayad-sala para sa iyo?

Matapos marinig ang mga karanasan ng mga estudyante, maaari kang magbahagi ng sarili mong kaisipan at patotoo tungkol sa pagmamahal ng Diyos at sa mga pagpapalang matatanggap natin sa pamamagitan ng Tagapagligtas at ng Kanyang Pagbabayad-sala.

Komentaryo at Pinagmulang Impormasyon

Anong mga pagpapala ang matatanggap natin sa pamamagitan ng Pagbabayad-sala ni Jesucristo?

Pinatototohanan ng mga banal na kasulatan ang maraming pagpapalang ibinibigay sa atin ng Tagapagligtas sa pamamagitan ng Kanyang Pagbabayad-sala. Mapapatawad tayo sa ating mga kasalanan, at ang ating puso ay mapapadalisay (tingnan sa Mosias 4:2–3). Maaari tayong makipagkasundo sa Diyos (tingnan sa Jacob 4:11). Tinatanggap natin “ang biyaya at ang katotohanan” (Juan 1:17). Madaraig natin ang sanlibutan at makadarama tayo ng kapayapaan (tingnan sa Juan 16:33). Makatatanggap tayo ng tulong at pagpapagaling mula sa Diyos sa ating mga paghihirap, pasakit, kalungkutan, at karamdaman (tingnan sa Isaias 53:4–5; Alma 7:11). Alam Niya ang ating mga kahinaan at tutulungan Niya tayo na madaig ang mga ito (tingnan sa Alma 7:12). Mapalalakas Niya tayo laban sa tukso (tingnan sa Doktrina at mga Tipan 62:1). Siya ang tunay na saligan, at kung itatayo natin ang ating buhay sa Kanya, hindi tayo kailanman babagsak (tingnan sa Helaman 5:12). Ang buong sangkatauhan ay mabubuhay na mag-uli mula sa mga patay (tingnan sa Mosias 16:7–8; Alma 7:12; 1 Corinto 15:22). Maaari tayong maging katulad ng Tagapagligtas at magmana ng buhay na walang hanggan (tingnan sa Moroni 7:48; 2 Nephi 2:27).

Karagdagang Pag-aaral

Mga halimbawa mula sa mga banal na kasulatan tungkol sa pagkakaroon ng kagalakan sa pamamagitan ni Jesucristo

Ang aktibidad na ito ay maaaring maging kapaki-pakinabang sa pagtulong sa mga estudyante na maunawaan ang katotohanan na ang pag-ibig o pagmamahal ng Diyos, na ipinapakita sa pamamagitan ni Jesucristo, ay mas kanais-nais kaysa anupamang bagay at nagdudulot ng lubos na kagalakan. May paulit-ulit na huwaran sa Aklat ni Mormon at sa iba pang mga banal na kasulatan tungkol sa mga taong nangangailangan na bumaling sa Diyos at nakadama ng Kanyang pagmamahal at kagalakan (sa pamamagitan ng simbolikong pagkain ng bunga ng punungkahoy ng buhay). Maaari mong bigyan ng oras ang mga estudyante na magbasa ng isang halimbawa at alamin kung ano ang matututuhan nila mula sa halimbawa.

Halimbawa 1: Mga tao ni Haring Benjamin

• Ang mga tao ay nangapalugmok sa lupa dahil sa takot sa Panginoon (Mosias 4:1).

• Nanalangin sila na kaawaan sila (Mosias 4:2).

• Sila ay napuspos ng kagalakan sa pamamagitan ni Jesucristo (Mosias 4:3).

• Ipinaliwanag ni Haring Benjamin na natikman nila ang pag-ibig ng Diyos (Mosias 4:11).

Halimbawa 2: Alma

• Si Alma ay nakadama ng takot at pagkabagabag dahil sa kasalanan (Alma 36:11–16).

• Nanalangin siya na kaawaan siya (Alma 36:17–18).

• Nakadama siya ng kagalakan sa pamamagitan ni Jesucristo (Alma 36:19–21).

Halimbawa 3: Joseph Smith

• Si Joseph Smith ay nadaig ng kadiliman at nakadama ng takot (Joseph Smith—Kasaysayan 1:15).

• Nanalangin siya na iligtas siya (Joseph Smith—Kasaysayan 1:16).

• Nagpakita sa kanya ang Ama sa Langit at si Jesucristo sa dakilang kaluwalhatian (Joseph Smith—Kasaysayan 1:17).

• Tungkol sa kanyang karanasan sa Sagradong Kakahuyan, isinulat ni Joseph Smith, “Ang aking kaluluwa ay napuspos ng pagmamahal at sa loob ng maraming araw, maaari akong magbunyi nang may matinding kagalakan” (History, circa Summer 1832, 3, josephsmithpapers.org).

• Kasama sa iba pang mga halimbawa si Enos (tingnan sa Enos 1:1–8), si Haring Lamoni (tingnan sa Alma 18: 20–21, 41; 19:6, 12–13), ang asawa ni Haring Lamoni (tingnan sa Alma 19:4, 8–11, 29–30), isang grupo ng mga Lamanita (tingnan sa Helaman 5:23–28, 40–48), at mga Nephita sa pagpapakita ni Jesucristo (tingnan sa 3 Nephi 8:19–25; 11:1–17; 4 Nephi 1:16).

Isang hangaring magbahagi ng kagalakan sa iba

Nang kumain si Lehi ng bunga ng punungkahoy at nakadama siya ng labis na kagalakan, ninais niyang ibahagi ang kagalakang ito sa kanyang pamilya (tingnan sa 1 Nephi 8:12). Itinuro ni Elder David A. Bednar, “Ang dagling pagtugon ni Lehi na kumain ng bunga ng puno at makadama ng malaking kagalakan ay nagpaibayo ng kanyang hangaring ibahagi ito at maglingkod sa kanyang pamilya. Kaya, nang bumaling siya kay Cristo, minahal at pinaglingkuran niya rin ang iba” (“Magsiparito Kayo, at Inyong Makikita,” Liahona, Nob. 2014, 109).

Maaaring makinabang ang mga estudyante sa isang talakayan tungkol sa kagalakang natagpuan nila sa pagsunod sa Tagapagligtas na si Jesucristo at kung paano nila ibinabahagi ang kagalakang ito sa kanilang pamilya at sa iba.