1 Nephi 8:19–38

Humawak nang Mahigpit sa Salita ng Diyos

Maraming tao sa mundo ang gustong makadama ng kagalakan at pagmamahal ngunit hindi alam kung saan ito matatagpuan. Sa kanyang pangitain tungkol sa punungkahoy ng buhay, nalaman ni Lehi ang tungkol sa landas na dapat nating tahakin at kung paano manatili rito upang matamasa ang mga pagpapala ng pagmamahal ng Diyos. Ang lesson na ito ay makatutulong sa iyong sundin ang salita ng Diyos na gagabay sa iyo patungo sa Kanyang mga pinakadakilang pagpapala.

Regular na pagdarasal para sa iyong mga estudyante. Kilala ng Ama sa Langit ang bawat isa sa iyong mga estudyante. Habang nagdarasal ka sa Kanya, matutulungan ka Niyang mahiwatigan ang mga pangangailangan ng iyong mga estudyante at mabibigyang-inspirasyon ka Niya sa mga paraan upang matugunan ang mga pangangailangang iyon. Pakinggan ang mga pahiwatig habang naghahanda kang magturo at sa oras ng lesson.

Paghahanda ng estudyante: Regular na ipagdasal ang iyong mga estudyante. Kilala ng Ama sa Langit ang bawat isa sa iyong mga estudyante. Habang nagdarasal ka sa Kanya, matutulungan ka Niyang mahiwatigan ang mga pangangailangan ng iyong mga estudyante at mabibigyang-inspirasyon ka Niya sa mga paraan upang matugunan ang mga pangangailangang iyon. Pakinggan ang mga pahiwatig habang naghahanda kang magturo at sa oras ng lesson.

Mga Posibleng Aktibidad sa Pag-aaral

Pangitain ni Lehi

Tingnan sandali ang ipinintang larawan ng pangitain ni Lehi. Kabilang dito ang punungkahoy, na kumakatawan sa pag-ibig ng Diyos, at ang bunga nito, na sumisimbolo sa mga pagpapalang ibinibigay sa pamamagitan ng Pagbabayad-sala ni Jesucristo (tingnan sa David A. Bednar, “Panaginip ni Lehi: Paghawak nang Mahigpit sa Gabay,” Liahona, Okt. 2011, 32–37). Kabilang din dito ang ilang karagdagang elemento.

• Ano ang mahalaga para sa iyo sa ipinintang larawang ito?

• Ano ang matututuhan mo sa naobserbahan mo?

Ipinaliwanag ni Pangulong Boyd K. Packer (1924–2015) ng Korum ng Labindalawang Apostol:

Maaaring isipin ninyo na ang panaginip o pangitain ni Lehi ay walang mahalagang kahulugan para sa inyo, ngunit may mahalagang kahulugan ito. Kasama kayo rito; lahat tayo ay kasama rito. (Boyd K. Packer, “Makita ang Ating mga Sarili sa Panaginip ni Lehi,” Liahona, Ago. 2010, 22)

Habang pinag-aaralan mo ang lesson na ito, humingi ng patnubay mula sa Ama sa Langit upang maunawaan kung paano maaaring nauugnay ang pangitain ni Lehi sa iyong buhay. Maghanap ng mga katotohanan na maaaring makatulong sa iyo na matanggap ang ipinangakong kagalakan sa pamamagitan ng Tagapagligtas, gayundin ang mga balakid na maaaring kailangan mong iwasan o daigin.

Maraming tao ang sumusulong

Sa kanyang panaginip, nakita ni Lehi ang “di mabilang na lipumpon ng mga tao” (1 Nephi 8:21) na nagsisikap na marating ang punungkahoy ng buhay. Nakakita sila ng ilang elemento na nakaapekto sa kakayahan nilang pumunta sa punungkahoy: abu-abo ng kadiliman, gabay na bakal, at mga tao sa isang malaki at maluwang na gusali. Makikita mo ang tatlong elementong ito sa ipinintang larawan sa itaas.

Maaari mong hikayatin ang mga estudyante na gumuhit ng sarili nilang representasyon ng pangitain habang nag-aaral sila. Maaaring magdagdag ang mga estudyante ng mga detalye sa buong lesson.

Mahaba ang sumusunod na aktibidad sa pagbabasa. Sabihin sa mga estudyante na maaaring nahihirapang magbasa nang mag-isa na magbasa nang may kapartner. Hikayatin ang mga estudyante na ibahagi sa isa’t isa ang nalaman nila at ang kanilang mga impresyon.

Habang binabasa mo ang 1 Nephi 8:22–34, hanapin ang mga elementong ito at kung ano sa palagay mo ang isinisimbolo ng mga ito. Maaari mo ring panoorin ang “Nakakita si Lehi ng Gabay na Bakal at ng mga Taong Nagsilayo” (3:30), na matatagpuan sa SimbahanniJesucristo.org.

• Ano sa palagay mo ang maaaring kinakatawan ng mga elementong ito sa pangitain ni Lehi?

Kalaunan, nakita ni Nephi sa pangitain ang nakita ng kanyang ama at ipinaliwanag niya ang mga simbolong ito. Basahin ang 1 Nephi 12:17–18 upang malaman kung ano ang itinuro ni Nephi. Isulat ang natutuhan mo.

Kung gumuhit ang mga estudyante ng sarili nilang representasyon ng pangitain, maaari nilang lagyan ng label ang kanilang mga drowing batay sa natutuhan nila mula sa paliwanag ni Nephi.

Upang matulungan ang mga estudyante na matalakay ang natutuhan nila at maipamuhay ito, maaari mong itanong ang tulad ng mga sumusunod:

• Ano ang hitsura ng malaki at maluwang na gusali at abu-abo ng kadiliman sa ating panahon?

• Paano nagiging sanhi ng pagkaligaw ng mga tao ang mga balakid na ito ngayon?

• Ano ang natutuhan ninyo na mahalagang maunawaan tungkol sa inyong paglalakbay sa buhay?

Makatutulong sa mga estudyante na talakayin pa ang abu-abo ng kadiliman at ang malaki at maluwang na gusali sa pamamagitan ng pagbibigay ng mga sumusunod na tanong:

• Bakit kaya inilarawan ng Panginoon ang mga balakid na ito sa ganitong paraan?

• Sa inyong palagay, bakit maraming tao ang naghangad na pumunta sa malaki at maluwang na gusali?

Isipin ang mga tuksong kinakaharap mo at ang mga paraan kung paano posibleng makaapekto sa iyo ang kapalaluan. Isipin kung paano ito maaaring makagambala sa iyo o makahadlang sa kakayahan mong lumapit kay Cristo at madama ang pag-ibig o pagmamahal ng Diyos.

Ang tulong na ibinibigay sa atin ng Diyos

Sa pangitain ni Lehi, naghanda rin ang Diyos ng mga paraan upang matulungan ang Kanyang mga anak na makarating sa punungkahoy. May “makipot at makitid na landas” (1 Nephi 8:20) na patungo sa punungkahoy. Sa pagtahak sa landas, naglaan Siya ng “gabay na bakal” na gumabay sa mga tao (1 Nephi 8:19, 24, 30).

• Ano sa palagay mo ang maaaring dahilan kung bakit mahalaga na gawa sa bakal ang gabay?

Basahin ang 1 Nephi 15:23–25 upang malaman ang itinuro ni Nephi tungkol sa kahulugan ng gabay at ng kanyang mga pangako tungkol dito.

• Ano ang mahalaga para sa iyo sa mga talatang ito?

Maaaring idagdag ng mga estudyanteng nagdrowing ng pangitain ang landas at ang gabay na bakal at kung ano ang isinisimbolo nito. Hilingin sa mga estudyante na ibuod ang natutuhan nila tungkol sa gabay na bakal at kung paano ito makatutulong sa kanila. Ang sumusunod ay isang katotohanan na maaaring makatulong.

Ang isang katotohanan na matututuhan natin ay kung tayo ay makikinig at hahawak nang mahigpit sa salita ng Panginoon, hindi tayo madadaig ng mga tukso ng kaaway.

• Paano makapagbibigay ng kaligtasan at lakas ang mga salita ng Panginoon sa mga banal na kasulatan at ang mga sinabi ng Kanyang mga propeta sa panahong tinutukso ka?

• Ano ang ilang halimbawa kung paano tayo maaakay ng salita ng Diyos upang matanggap ang mga pagpapala at kagalakang ibinibigay ng Tagapagligtas sa pamamagitan ng Kanyang Pagbabayad-sala?

• Ano ang itinuturo sa iyo ng katotohanang ito tungkol sa Panginoon?

Kung makatutulong sa mga estudyante na talakayin pa ang gabay na bakal, maaaring maging kapaki-pakinabang ang isa o mahigit pa sa mga sumusunod na tanong:

• Bakit kaya inilarawan ng Panginoon ang Kanyang salita bilang gabay na bakal?

• Ano ang maaaring ibig sabihin ng “makikinig sa salita ng Diyos, at mahigpit na kakapit dito”? (1 Nephi 15:24).

• Ano ang ilang iba’t ibang paraan kung paano natin maaaring mabasa, marinig, o matanggap ang salita ng Diyos?

Ang mga estudyanteng nagdrowing ng pangitain ay maaaring magdagdag ng ilang scripture reference sa gabay na bakal na personal na makatutulong sa kanila na manatili sa landas, mapaglabanan ang mga tukso, o matanggap ang mga pagpapala ng Pagbabayad-sala ng Tagapagligtas. Kung kailangan nila ng tulong sa paghahanap ng banal na kasulatan, maaari silang maghanap ng mga sangguniang gumagamit ng katagang “salita ng Diyos” (Gabay sa mga Banal na Kasulatan, scriptures.ChurchofJesusChrist.org). Maaari kang magbahagi ng personal na halimbawa sa klase o maaari mong hilingin sa isang estudyante na magboluntaryo.

Sa pagtatapos ng lesson na ito, pagnilayan kung nasaan ka sa pangitaing iyon. Paano ka lumapit sa Tagapagligtas, at paano ka patuloy na nagsisikap na lumapit sa Kanya? Anong mga panggagambala at tukso ang nararanasan mo? Paano ka tinutulungan ng Panginoon sa pamamagitan ng Kanyang salita?

Maaari mong suriin ang iyong mithiin sa pag-aaral ng mga banal na kasulatan at kung paano ito nakatutulong sa iyo, gayundin ang anumang pagpapabuti o pagbabagong gusto mong gawin. Kung wala kang mithiin sa pag-aaral, mag-ukol ng ilang sandali na magtakda ng mithiin.

Komentaryo at Pinagmulang Impormasyon

Paano ako hahawak nang mahigpit sa gabay na bakal?

Ipinaliwanag ni Elder David A. Bednar ng Korum ng Labindalawang Apostol:

Gusto kong imungkahi na ang paghawak nang mahigpit sa gabay na bakal ay nangangailangan, nang husto, ng mapanalangin, palagian, at masigasig na paggamit ng mga banal na kasulatan bilang tiyak na pinagmumulan ng inihayag na katotohanan at maaasahang gabay sa paglalakbay sa makipot at makitid na landas tungo sa punungkahoy ng buhay—maging sa Panginoong Jesucristo. (David A. Bednar, “Panaginip ni Lehi: Paghawak nang Mahigpit sa Gabay,” Liahona, Okt. 2011, 36)

Paano ko maiiwasang mabulag ng abu-abo ng kadiliman?

Itinuro ni Elder Jeffrey R. Holland ng Korum ng Labindalawang Apostol:

Mahalagang pansinin na ang abu-abo ng kadilimang ito ay lumalambong sa lahat ng manlalakbay—sa matatapat at masigasig (masasabi nating ang mga hinirang) gayundin sa mas mahihina at mabubuway ang pundasyon. Ang pangunahing punto ng kuwento ay na ang matatagumpay na manlalakbay ay nalalampasan ang lahat ng hadlang, pati ang pang-aakit ng ipinagbabawal na mga landas at pangungutya ng mga mapagmalaki at palalong nagsipaglakbay doon. (Jeffrey R. Holland, “Kaligtasan para sa Kaluluwa,” Nob. 2009, Liahona, 88)

Ipinayo ni Elder Kevin W. Pearson ng Pitumpu:

Maliban kung tayo ay “patuloy na humahawak nang mahigpit” [1 Nephi 8:30] sa salita ng Diyos at ipinamumuhay ito, tayo ay magiging bulag sa espirituwal sa halip na magkaroon ng espirituwal na kaisipan. Saliksikin ang Aklat ni Mormon at ang mga salita ng mga buhay na propeta araw-araw, araw-araw, araw-araw! Ito ang susi sa espirituwal na kaligtasan at pag-iwas sa panlilinlang. Kung wala ito, tayo ay espirituwal na naliligaw. (Kevin W. Pearson, “Manatili sa Punungkahoy,” Liahona, Mayo 2015, 115)

Ano ang iba pang mga resource na makatutulong sa akin na maisalarawan sa isipan at maunawaan ang pangitain ni Lehi tungkol sa punungkahoy ng buhay?

Ang mga sumusunod na video ay matatagpuan sa SimbahanniJesucristo.org at makatutulong sa iyong maisalarawan sa isipan at maunawaan ang mga bahagi ng pangitain ni Lehi: “Inanyayahan ni Lehi ang Kanyang Pamilya na Kumain ng Bunga ng Punungkahoy” (3:23) at “Ang Matatapat ay Kumain ng Bunga ng Punungkahoy” (3:28).

Karagdagang Pag-aaral

Alternatibong simula ng lesson

Magdrowing ng isang punungkahoy sa pisara. Sabihin sa mga estudyante na kunwari ay may isang taong kailangang maglakbay mula sa likod ng silid papunta sa puno na sumasagisag sa paglapit kay Cristo. Maaaring ilipat ng mga estudyante ang mga bagay at mga tao sa iba’t ibang bahagi ng silid upang sumagisag sa pagtulong sa atin ng Panginoon na makarating sa punungkahoy, gayundin ang mga balakid na maaaring makaharap natin na maaaring pumigil sa atin.

Mga tanong na tatalakayin tungkol sa mga tao sa pangitain ni Lehi

Upang matulungan ang mga estudyante na makapag-ukol ng oras sa pag-iisip kung ano ang matututuhan mula sa iba’t ibang grupo ng mga tao sa pangitain ni Lehi, maaari mong itanong ang ilang bagay na tulad ng mga sumusunod:

• Anong payo ang ibibigay ninyo sa isang taong nangawala sa landas matapos dumating ang abu-abo ng kadiliman? Bakit?

• Sa inyong palagay, bakit nagsitalikod ang ilang tao matapos kumain ng bunga ng punungkahoy ng buhay?

• Ano ang magagawa ninyo para mapigilan ang inyong sarili na tumalikod sa katotohanan matapos magkaroon ng mga espirituwal na karanasan?

• Ano ang naunawaan ng mga taong nanatili sa punungkahoy na hindi naunawaan ng mga taong umalis?