1 Nephi 10; 11:1–6

Upang “Aking Makita, at Marinig, at Malaman”

Kailan ka nahikayat na alamin kung totoo ang isang bagay na narinig mo? Anong mga pagsisikap ang ginawa mo at sino ang inasahan mo na tumulong? Matapos marinig ang kanyang ama, si Lehi, na magturo tungkol sa punungkahoy ng buhay at magpropesiya tungkol sa pagparito ni Jesucristo, ninais ni Nephi na malaman ang katotohanan ng mga salita ng kanyang ama para sa kanyang sarili. Ang lesson na ito ay makatutulong sa iyo sa iyong mga pagsisikap na masigasig na maghangad ng kaalaman mula sa Panginoon.

Pagtatanong na nag-aanyaya ng pagtuklas. Ang pagtatanong ng mga tanong na may kaugnayan at mapag-iisipan nang husto, at pagkatapos ay pagtutulot sa mga estudyante na saliksikin ang mga banal na kasulatan para sa mga sagot, ay makapagbibigay ng mga makabuluhan at matinding pagkakataon upang matuklasan ng mga estudyante ang doktrina at mga alituntunin para sa kanilang sarili. Ang mga ganitong uri ng mga tanong ay nagpapakita sa mga estudyante na ang mga sagot ay matatagpuan sa mga banal na kasulatan at na kaya nilang hanapin ang mga sagot na iyon.

Paghahanda ng estudyante: Sabihin sa mga estudyante na itanong sa isang magulang o lider ng kabataan kung ano ang ginagawa nila para masigasig na mahanap ang katotohanan mula sa Diyos o kung paano inihahayag ng Espiritu Santo ang katotohanan sa kanila. Hikayatin ang mga estudyante na pumasok na handang magbahagi ng ideya sa klase.

Mga Posibleng Aktibidad sa Pag-aaral

Kapag nagsasalita ang mga propeta

Sa halip na gamitin ang sitwasyon sa ibaba, maaari mong simulan ang lesson sa pagbabahagi ng ilang pahayag ng kasalukuyang propeta at mga apostol na nagpapahayag ng doktrina o nag-aanyaya sa mga tao na kumilos nang may pananampalataya. Ipakita o basahin nang malakas ang mga pahayag at sabihin sa mga estudyante na tukuyin sa sarili kung alin sa tatlong pahayag ang nagpapakita ng kanilang damdamin: (1) Naniniwala ako rito at handa akong kumilos ayon dito, (2) naniniwala ako rito pero hindi ko ito gagawin, at (3) hindi ako sigurado kung naniniwala ako rito. Tiyaking nauunawaan ng mga estudyante na walang tama o maling sagot at hindi nila kailangang ibahagi kung paano nila ni-rate ang kanilang sarili.

Isipin na sa isang pandaigdigang debosyonal para sa mga kabataan, nagbigay ang propeta ng ilang paanyaya sa mga kabataan na kumilos nang may pananampalataya.

• Ano kaya ang ilan sa iba’t ibang reaksyon ng mga kabataan?

• Sa palagay mo, bakit kaya magkakaroon ng ganitong iba’t ibang reaksyon?

• Paano maaaring makaimpluwensya ang mga reaksyong ito sa kanilang buhay ngayon o sa hinaharap?

Isipin kung paano ka tumugon sa mga turo ng mga propeta at kung bakit. Paano ka naimpluwensyahan ng iyong mga reaksyon? Habang pinag-aaralan mo ang lesson na ito, hangaring matuto mula sa iba’t ibang reaksyon sa mga turo ng propeta sa mga banal na kasulatan at isipin kung paano ito naaangkop sa iyo.

Hangaring malaman

Matapos ilahad ni propetang Lehi ang kanyang pangitain tungkol sa punungkahoy ng buhay sa kanyang pamilya (tingnan sa 1 Nephi 8), nagpatotoo siya na isasakatuparan ni Jesucristo ang Kanyang Pagbabayad-sala (tingnan sa 1 Nephi 10:1–16). Ang mga anak ni Lehi ay may iba’t ibang reaksyon sa kanyang mga inspiradong turo.

Upang mapadali ang dagdag na partisipasyon at talakayan ng mga estudyante, maaari mong hatiin ang klase sa mas maliliit na grupo para sama-samang pag-aralan ang mga talatang ito. Kapag ang mga estudyante ay nasa mga grupo, alamin kung paano sila nagtutulungan, at gamitin ang iyong impluwensya upang matulungan silang magtagumpay.

Basahin ang 1 Nephi 10:17–19 at 15:1–3, 8–9, at ikumpara kung paano tumugon sina Nephi, Laman, at Lemuel sa mga salita ng kanilang ama. Maaari mong markahan ang mga salita at mga parirala na mahalaga para sa iyo.

Maaari mong ipakita ang mga sumusunod na tanong na tatalakayin ng mga miyembro ng klase. Maaari mong puntahan ang bawat grupo at pakinggan kung paano tumugon ang mga estudyante.

• Anong mga pagkakaiba ang nakita mo sa pagtugon ni Nephi at ng kanyang mga kapatid sa iisang mensahe?

• Ano ang pinaniwalaan ni Nephi tungkol sa Diyos? Ano ang pinaniwalaan nina Laman at Lemuel? (Tingnan sa 1 Nephi 10:17–18; 15:9.)

• Sa iyong palagay, paano makakaimpluwensya sa kanila ang iba’t ibang paniniwala at reaksyon nila?

Isa sa mga katotohanang naunawaan ni Nephi ay inihahayag ng Diyos ang katotohanan sa atin sa pamamagitan ng Espiritu Santo kapag masigasig natin Siyang hinahanap.

Isiping isulat sa pisara ang pahayag na nakasulat sa bold letter.

• Ano ang ilang bagay na naranasan na ni Nephi na nakatulong sa kanya na malaman ang tungkol sa Diyos?

Kung nahihirapang sumagot ang mga estudyante, maaari mong iparebyu sa kanila ang 1 Nephi 2:16 at 1 Nephi 4:6–13 o ipabuod ang mga pangyayaring ito.

Ang pag-iisip tungkol sa mga karanasan ni Nephi ay maaaring magpaalala ng mga naranasan mo noong ihayag sa iyo ng Ama sa Langit ang katotohanan. Maaari mong isulat sa iyong study journal kung paano ka Niya pinagpala.

Maaaring isa ito sa ilang pagkakataon sa lesson kung saan maaaring magbahagi ang mga estudyante ng mga personal na karanasan.

Paghahanap ng katotohanan mula sa Diyos

Nalaman ni Nephi na pinagpapala tayo ng Ama sa Langit sa pamamagitan ng Espiritu Santo kapag naghahanap tayo ng katotohanan mula sa Kanya. Upang mas makitang mabuti ang katotohanang ito, gumawa ng dalawang column sa isang pahina ng iyong study journal. Lagyan ng label ang isang column na “Mga paraan para masigasig na maghanap ng katotohanan mula sa Diyos” at ang isa pa ay “Mga Paraan kung paano inihahayag ng Diyos ang katotohanan sa pamamagitan ng Espiritu Santo.” Magdagdag ng ilang ideyang maiisip mo sa bawat column. Maaari ka ring magsama ng mga natutuhan mo mula sa 1 Nephi 10:17–19.

Ang ibang opsiyon para sa maliliit na grupo ay gumamit ng isang piraso ng papel, at ipasa-pasa ang papel nang ilang beses. Bawat estudyante ay magdaragdag ng isang ideya sa alinmang column kapag natanggap nila ang papel. Ang aktibidad na ito ay maaari ding gawin ng buong klase sa pisara. Kung may oras pa, maaari mong hikayatin ang mga estudyante na magsama ng mga scripture reference na sumusuporta sa kanilang mga mungkahi.

Basahin ang 1 Nephi 11:1–6, at alamin ang ginawa ni Nephi para mahanap ang katotohanan at kung paano siya tinulungan ng Espiritu. Magmarka ng mga partikular na salita o parirala na mahalaga para sa iyo. Maaari kang magdagdag sa mga column sa iyong study journal.

Maaari mong anyayahan ang mga estudyante na ibahagi kung ano ang naging makabuluhan sa kanila. Matapos magbahagi ang mga estudyante, maaari kang magbigay ng mga follow-up na tanong na tulad ng “Sa inyong palagay, bakit nagalak ang Espiritu?” (tingnan sa talata 6) o “Sa inyong palagay, paano humahantong sa paghahayag ang pagbubulay-bulay?”

Upang malaman kung paano naghangad ang isang Apostol sa panahong ito ng mga sagot mula sa Panginoon noong binatilyo pa siya, panoorin ang video na “Paano Ko Ginagawang #Pakinggan Siya: Elder Ronald A. Rasband” (2:55), na matatagpuan sa SimbahanniJesucristo.org. Isipin kung paano sinunod ni Elder Rasband ang gayon ding huwaran ng paghahanap ng katotohanan at kung paano siya pinagpala ng Panginoon. Magdagdag ng anumang bagong ideya sa mga column sa iyong study journal.

Tingnan kung ano ang naitala mo tungkol sa kung paano inihahayag ng Diyos ang katotohanan sa pamamagitan ng Espiritu Santo kapag masigasig natin Siyang hinahanap. Isipin kung paano mo nakita na totoo ang ilan sa mga ito sa sarili mong buhay. Sa paanong mga paraan napalakas ang iyong kaugnayan sa Ama sa Langit nang masigasig mo Siyang hinanap?

Kung hindi masyadong personal ang mga karanasan, anyayahang magbahagi ang ilang estudyante. Maaari ka ring magbahagi ng mga personal na karanasan. Sikaping bigyang-diin kung paano naging totoo at nauugnay ang alituntunin ng lesson na ito sa ating buhay ngayon.

Mahalaga ang personal na paghahayag

Dahil ninais ni Nephi na matuto para sa kanyang sarili at bumaling sa Panginoon para sa mga sagot, nakita niya ang nakita ng kanyang amang si Lehi, at ipinakita sa kanya ang maraming kaganapan sa hinaharap na mangyayari sa mundo. (Upang malaman pa ang tungkol sa pangitain ni Nephi, tingnan ang 1 Nephi 11–14.) Ang pangitain ni Nephi tungkol sa makipot at makitid na landas ay nagpabago ng buhay niya. Kalaunan ay isinulat niya ang panghihikayat niya sa lahat na tahakin ang landas ding iyon (tingnan sa 2 Nephi 31:18–21).

Sabihin sa mga estudyante na sagutin ang mga sumusunod na tanong sa kanilang study journal:

• Ano ang natutuhan mo kung bakit mahalaga ang iyong mga tugon sa mga inspiradong turo?

• Paano mo maipamumuhay ang natutuhan mo tungkol sa masigasig na paghahanap ng katotohanan?

• Ano ang natutuhan mo tungkol sa Ama sa Langit at kay Jesucristo na naghihikayat sa iyo na mas lumapit sa Kanila?

Komentaryo at Pinagmulang Impormasyon

Ano ang ilang dahilan kung bakit hindi natin itinatanong kung minsan sa Ama sa Langit ang ating mga tanong?

Sinabi ni Pangulong Camille N. Johnson ng Primary General Presidency:

Marahil, dahil wala tayong pananampalatayang tanggapin ang sagot na matatanggap natin. Marahil, dahil tumatanggi ang pagiging likas na tao natin na lubos na isuko ang sarili sa Panginoon at lubos na magtiwala sa Kanya. (Camille N. Johnson, “Anyayahan si Cristo na Maging May-akda ng Inyong Kuwento,” Liahona, Nob. 2021, 80–81)

Paano ako magbubulay-bulay?

Bago siya tinawag sa Pitumpu, ipinahayag ni Elder Gerald N. Lund na:

Mag-ukol ng oras na magbulay-bulay at mag-isip. Lumayo muna sa mga gawaing pinagkakaabalahan. Maghanap ng isang tahimik na lugar at umupo at mag-ukol ng oras na mag-isip, makinig sa sinasabi ng inyong isipan at damdamin, at ihanda ang inyong sarili sa mga pahiwatig ng Espiritu. …

Kung minsan, kailangang iwan natin ang mga alalahanin sa mundo, isantabi ang ginagawa sa araw-araw, at maghanap ng tahimik na lugar at oras kung saan makakaupo tayo at makapagninilay-nilay at makakapag-isip at makapagmumuni-muni—at mapapakinggan ang marahan at banayad na tinig na iyon na bumubulong. (Gerald N. Lund, “The Voice of the Lord” [Brigham Young University devotional, Dis. 2, 1997], 9–10, speeches.byu.edu)

Mga Karagdagang Aktibidad sa Pag-aaral

1 Nephi 9. Ang mga lamina ni Nephi

Paalala: Ang lesson tungkol sa Mga Salita ni Mormon ay kapapalooban ng mga reperensya sa 1 Nephi 9. Kung makabubuting ituro ito ngayon, isaalang-alang ang lesson na iyon. Kung may mga tanong ang mga estudyante, maaari mong ituro sa kanila ang mga resources na makukuha sa Pumarito Ka, Sumunod Ka sa Akin ngayong linggo.

1 Nephi 10:2–16. Nagpatotoo si Lehi tungkol kay Jesucristo at sa Kanyang misyon

Maaari mong iugnay ang mga turo ni Lehi tungkol sa punungkahoy ng buhay sa misyon ni Jesucristo. Maaari mong sabihin sa mga estudyante na basahin ang 1 Nephi 10:2–16 at isipin kung paano aakayin ng mga turong ito ang mga tao na maniwala kay Jesucristo at kumain ng bunga ng punungkahoy. Maaari ding pag-isipan ng mga estudyante kung bakit nais ng Panginoon na malaman ng pamilya ni Lehi—at nating lahat—ang mga katotohanang ito. Tulad ng pagnanais ni Lehi na makilala at mahalin ng kanyang pamilya ang Tagapagligtas, sabihin sa mga estudyante na isipin kung ano ang maaari nilang sabihin sa kanilang mga mahal sa buhay upang anyayahan silang bumaling sa Kanya.

Alternatibong simula ng lesson

Ang sumusunod ay iba’t ibang reaksyon na maaaring itugon ng mga indibiduwal sa isang mensahe mula sa propeta. Maaari mong ipabasa sa apat na estudyante ang isa sa mga sumusunod na pahayag:

• Maraming pinaniniwalaan si Dirk sa mga itinuro ngunit may mga tanong siya tungkol sa ilan dito. Gusto niyang kausapin ang kanyang mga magulang tungkol sa kanyang mga alalahanin.

• Nadama ni Abbie na tila hindi niya lubos na naunawaan ang ilang bahagi ng mensahe ng propeta. Pinlano niyang manalangin para maunawaan kung paano naaangkop sa kanya ang mga turo ng propeta.

• Gustung-gusto ni Jayden ang ilang bahagi ng mensahe ngunit nahirapan siya sa iba. Ibinahagi niya sa social media ang kanyang mga naiisip at nadarama.

• Naging interesado si Simone sa mensahe. Wala siyang balak na gawin ito matapos itong marinig.

Sabihin sa mga estudyante na ibahagi kung ano ang palagay nila sa mga reaksyong ito at talakayin ang mga kapakinabangan at kawalan ng bawat isa. Maaari din nilang ibahagi kung saan maaaring humantong ang mga reaksyong ito.