1 Nefi 11

“Vër Re Denjimin e Perëndisë!”

Vegimi i Nefit për Virgjëreshën Marie

Shkrimet e shenjta na mësojnë se çfarë është “më e dëshirueshmja” dhe “më e gëzueshmja për shpirtin” nga të gjitha gjërat që shijojmë në këtë jetë (1 Nefi 11:22–23). Ndërsa Nefi bashkëbisedoi me lajmëtarë qiellorë, ai pati një vegim të Shpëtimtarit të botës dhe mori kuptueshmërinë e vet për atë që sjell gëzimin më të shumtë: dashurinë e Perëndisë. Ky mësim mund të të ndihmojë ta ndiesh dashurinë e Atit Qiellor dhe Jezu Krishtit për ty.

Dashuria për ata, të cilëve u jepni mësim. Çdo gjë që bëri Shpëtimtari gjatë gjithë shërbesës së Tij në tokë, ishte e motivuar nga dashuria. Ndërsa e ndiqni shembullin e Tij, dashuria do të jetë arsyeja dhe nxitja për mësimdhënien tuaj. Dashuria do të ndikojë tek ajo që bëni dhe te mënyra si ndërveproni me nxënësit tuaj.

Përgatitja e nxënësve: Ftojini nxënësit të sjellin diçka në klasë që ilustron një mënyrë se si Perëndia e shfaq dashurinë e Tij për ta.

Veprimtari të Mundshme të të Mësuarit

Rëndësia e dashurisë së Perëndisë

Motra Suzën H. Porter, e Presidencës së Përgjithshme të Fillores, tha:

Motra Suzën H. Porter

“Çasti kur e dini dhe e kuptoni se sa plotësisht ju duan si fëmijë i Perëndisë, ndryshon gjithçka.” (Suzën H. Porter, “Dashuria e Perëndisë: Më e Gëzueshmja për Shpirtin”, Liahona, nëntor 2021, f. 33)

• Çfarë mund të ndryshojë kur dikush e di dhe e kupton dashurinë e Perëndisë për të?

• Si mund të ndikojë në jetën tënde të ndierit se Perëndia të do?

Merreni parasysh t’u jepni nxënësve një çast për të përsiatur se sa shumë e ndiejnë dashurinë e Perëndisë dhe provat që shohin për dashurinë e Tij në jetën e tyre. Ftojini nxënësit, ndërsa studiojnë kapitullin 1 Nefi 11, të kërkojnë prova të dashurisë që Ati Qiellor dhe Jezu Krishti kanë për ta.

Vegimi i Nefit

Ëndrra e Lehit

Ftojini nxënësit të kujtojnë simbolet kryesore nga ëndrra e Lehit e shënuar te 1 Nefi 8. Nëse nxënësit kanë nevojë për ndihmë, ftojini ata ta rishikojnë shkurtimisht atë kapitull.

• Çfarë simbolesh kryesore mund të kujtosh nga ëndrra e Lehit e shënuar te 1 Nephi 8?

Nefi dëshironte thellësisht ta kuptonte domethënien e ëndrrës së të atit dhe besonte se Zoti do t’ia bënte të ditur atij. Ndërsa përsiaste në zemrën e tij, Shpirti i Zotit iu shfaq dhe ia tregoi atij pemën e jetës. Kur Nefi kërkoi të dinte interpretimin e pemës, një engjëll iu shfaq për ta ndihmuar të mësonte më shumë rreth asaj që po shihte në vegim (shih te 1 Nefi 11:1–14).

Si pjesë e ndihmës për Nefin që ta kuptonte domethënien e pemës, engjëlli i bëri Nefit një pyetje. Lexo te 1 Nefi 11:16 për të parë cila pyetje u bë.

Merreni parasysh t’i ndani nxënësit në dyshe dhe t’i vini ta pyesin njëri‑tjetrin dhe t’i përgjigjen pyetjes te vargu 16 përpara se të lexojnë vargun 17.

• Si do t’i përgjigjeshe pyetjes te vargu 16?

Lexo te vargu 17 për të parë se si u përgjigj Nefi.

• Çfarë të bën përshtypje rreth përgjigjes së Nefit te vargu 17?

“Denjim” do të thotë zbritje me dëshirë nga një pozitë me rang të lartë ose dinjitet. Për shembull, gjesti i Shpëtimtarit kur u lau këmbët dishepujve mund të konsiderohet një gjest denjimi (shih te Gjoni 13:3–17). Ndërkohë që denjimi i Perëndisë i përshkruar në këto vargje mund të japë mësim edhe rreth denjimit të Atit Qiellor, ky mësim përqendrohet kryesisht te denjimi i Jezu Krishtit.

Lexoje atë që pa Nefi te 1 Nefi 11:13–23, duke kërkuar prova të denjimit të Perëndisë.

• Çfarë prove gjete rreth denjimit të Perëndisë?

• Çfarë të vërtetash mëson rreth denjimit të Perëndisë?

Një e vërtetë që mund të mësojmë, është se denjimi i Perëndisë demonstron dashurinë e Tij për ne.

• Si mendon se e demonstron këtë të vërtetë lindja e Shpëtimtarit?

Lexo te 1 Nefi 11:26–33, duke kërkuar mënyra shtesë se si Jezusi denjoi për ta treguar dashurinë e Tij për njerëzimin.

Merreni parasysh t’i ndani nxënësit në grupe ose dyshe dhe t’u caktoni atyre pjesë më të vogla të fragmentit 1 Nefi 11:26–33. Pasi t’i lexojnë vargjet që iu caktuat, mund t’i diskutojnë pyetjet vijuese me grupet ose partnerët e tyre.

Një ide tjetër është të shfaqni figura të pjesëve të jetës së Shpëtimtarit që përmenden në këto vargje. Pastaj ftojini nxënësit të gjejnë tregime nga Dhiata e Re që e përshkruajnë ngjarjen e paraqitur në secilën figurë.

Nxënësit mund të shohin edhe një figurë, të gjejnë tregimin përkatës të Dhiatës së Re dhe të shpjegojnë se si e ilustron tregimi denjimin e Perëndisë.

• Çfarë prove gjete rreth denjimit të Shpëtimtarit?

• Si e demonstrojnë këto veprime dashurinë e Tij?

• Cilët janë shembuj të tjerë nga jeta e Jezu Krishtit që e ndien se e demonstrojnë dashurinë dhe denjimin e Tij?

Lexo atë që tha Plaku Kuentin L. Kuk, i Kuorumit të Dymbëdhjetë Apostujve, rreth mënyrës se si këto ngjarje na ndihmojnë ta kuptojmë dashurinë e Shpëtimtarit për ne. Ose mund të duash të shikosh materialin filmik “Të Përditshmen si Përjetësinë” nga kodi kohor 4:01 në 4:43, që është në dispozicion në ChurchofJesusChrist.org.

Plaku Kuentin L. Kuk

“Shembulli i përulësisë dhe i sakrificës së Shpëtimtarit për tërë njerëzimin është ngjarja më e rëndësishme e historisë. Shpëtimtari, edhe si një pjesëtar i Kreut‑Perëndi, ishte i gatshëm të vinte në tokë si një foshnjë e vobektë dhe të fillonte një ekzistencë që përfshiu mësimdhënien dhe shërimin e vëllezërve dhe të motrave të Tij dhe më së fundi vuajtjen e një dhembjeje të papërshkrueshme në Gjetseman e në kryq, me qëllim që ta përsoste Shlyerjen e Tij. Ky veprim dashurie dhe përulësie nga ana e Krishtit njihet si denjimi i Tij. Ai e bëri këtë për çdo burrë e çdo grua që Perëndia e ka krijuar ose do ta krijojë.” (Kuentin L. Kuk, “Të Përditshmen si Përjetësinë”, Ensign ose Liahona, nëntor 2017, f. 52)

• Si të ndihmon thënia e Plakut Kuk që ta kuptosh më mirë denjimin e Perëndisë?

Bekimet e vazhdueshme prej denjimit të Shpëtimtarit

Denjimi i Shpëtimtarit vazhdon të jetë provë e dashurisë së Tij për ne sot.

Merreni parasysh të tregoni se si jeni bekuar nga denjimi i Shpëtimtarit. Kjo mund t’i ndihmojë nxënësit ta ndiejnë dashurinë e Atit Qiellor dhe Jezu Krishtit për ta.

Nxënësit mund të përfitojnë nga dhënia e përgjigjeve për pyetjet vijuese në ditarët e tyre të studimit.

• Si e kanë demonstruar Ati Qiellor dhe Jezu Krishti dashurinë e Tyre për ty?

• Si ndikon ajo që Ata kanë bërë, te mënyra se si ndihesh për Ta?

• Çfarë ndihesh i motivuar të bësh për ta treguar dashurinë tënde për Atin Qiellor dhe Jezu Krishtin?

Pasi nxënësit të kenë pasur kohë për të shkruar, merreni parasysh t’i ftoni nxënësit e gatshëm t’i shprehin mendimet dhe ndjenjat e tyre. Nëse nxënësit e bënë përgatitjen për orën mësimore, ata mund ta tregojnë sendin që sollën, dhe të shpjegojnë se si ai send i ndihmon të ndiejnë dashurinë e Perëndisë për ta.

Komente dhe Informacion për Rrethanat

Kush është Shpirti që i flet Nefit në fillim të këtij vegimi?

Plaku Xhejms E. Talmixh (1862–1933), i Kuorumit të Dymbëdhjetë Apostujve, dha mësim:

Plaku Xhejms E. Talmixh

“Fakti që Shpirti i Zotit është në gjendje ta shfaqë Veten në formën dhe figurën e një njeriu, tregohet nga intervista e mrekullueshme mes Shpirtit dhe Nefit, në të cilën Ai ia zbuloi Veten profetit, e pyeti atë në lidhje me dëshirat dhe besimin e tij, e udhëzoi për gjërat e Perëndisë duke folur ballë për ballë me njeriun.” (James E. Talmage, The Articles of Faith [1968], f. 159–160; shih edhe Marion G. Romney, “The Holy Ghost”, Ensign, maj 1974, f. 90–92)

Çfarë kanë dhënë mësim udhëheqësit e Kishës rreth denjimit e Perëndisë?

Profeti Jozef Smith (1805–1844) tha:

Profeti Jozef Smith

“Kur meditojmë për shenjtërinë dhe përsosmërinë e Mësuesit tonë të madh, që na ka hapur një udhë nëpërmjet së cilës ne mund të shkojmë tek ai, madje duke sakrifikuar veten, zemrat tona treten përbrenda nga denjimi i tij.” (Mësimet e Presidentëve të Kishës: Jozef Smithi [2009], f. 56)

Plaku D. Tod Kristoferson, i Kuorumit të Dymbëdhjetë Apostujve, shpjegoi:

Plaku D. Tod Kristoferson

“Jezusi qe i Parëlinduri mes të gjithë shpirtrave dhe i Vetëmlinduri i Perëndisë në mish. Ndonëse nuk jemi lindur nga Perëndia në mish, ne jemi, ashtu si Jezusi, pasardhësit shpirtërorë të Perëndisë. Si rrjedhojë, lindja jonë në vdekshmëri është gjithashtu një lloj denjimi dhe, sikurse denjimi i Krishtit, ajo ka një qëllim fisnik. Njësoj si Jezusi, ne zbritëm nga qielli për të bërë vullnetin e Atij që na dërgoi, dhe për të arritur, me hirin e Krishtit, pavdekësinë dhe jetën e përjetshme. A mund të jetë e rëndësishme për ne që, ndërsa kërkojmë të ‘ngjit[emi] lart’, gjithashtu të zbresim nën të paktën disa gjëra që të mund t’i kuptojmë më plotësisht dhe të bëhemi më shumë si Krishti? Nëse Jezusit i nevojiteshin përvoja të caktuara, a nuk mund të na duhen edhe neve disa sfida dhe sprova, ‘që zemra[t tona] të mund të mbushe[n] me mëshirë, sipas mishit, që [ne] të mund të di[m]ë, sipas mishit, se si të ndihmoj[m]ë [njëri‑tjetrin] sipas dobësive [tona]’ [Alma 7:12]?” (D. Tod Kristoferson, “The Condescension of God and of Man” [takim shpirtëror për Krishtlindje i Presidencës së Parë, 7 Dhjetor 2014], ChurchofJesusChrist.org)

Veprimtari Plotësuese të të Mësuarit

1 Nefi 11:34–36. “Ndërtes[a e] gjerë dhe [e] madhe”

Merreni parasysh t’i ftoni nxënësit të kujtojnë hollësi rreth ndërtesës së gjerë dhe të madhe që përmendet në ëndrrën e Lehit. Ftojini ata të rishikojnë shkurtimisht vargjet 1 Nefi 8:26–28, 31–34, nëse është nevoja.

Ftojini nxënësit të lexojnë te 1 Nefi 11:34–36, duke kërkuar kuptimin e ndërtesës së gjerë dhe të madhe. Pyetini ata se ç’kuptim ka ajo për ta dhe çfarë mësojnë nga simbolizmi i rënies së ndërtesës. Pyetini se si mendojnë, pse ata që ishin në ndërtesë, “luft[ojnë] kundër dymbëdhjetë apostujve të Qengjit” (vargu 35) dhe ftojini ata të tregojnë se si mund të ndodhë kjo në kohën tonë.

Ftojini nxënësit të tregojnë mënyra se si mund të qëndrojnë me Apostujt ose përvoja që kanë pasur, të cilat i forcojnë dëshmitë e tyre që Apostujt janë vërtet “apostujt e Qengjit”. Ftojini nxënësit të vënë një synim për të qëndruar në krah të Shpëtimtarit dhe Apostujve të Tij të zgjedhur.

1 Nefi 11. “Shiko!”

Gjatë kohës së tyre me Nefin, Shpirti dhe një engjëll i Zotit i thanë Nefit shumë herë që të shikonte. Ftojini nxënësit të kërkojnë te 1 Nefi 11 për fjalën shiko dhe të mbajnë shënim se çfarë iu tregua Nefit.

Kujtojini nxënësit se një nga qëllimet kryesore të Frymës së Shenjtë është të dëshmojë për Atin Qiellor dhe Jezu Krishtin (shih te 3 Nefi 28:11).

Kërkojuni nxënësve të tregojnë se si Fryma e Shenjtë ua ka drejtuar vëmendjen te Jezu Krishti dhe si i ka ndihmuar të mësojnë rreth Tij.

Ftojini nxënësit t’i kërkojnë Atit Qiellor t’i drejtojë ata te Shpëtimtari ndërsa e studiojnë Librin e Mormonit. Kujtojini nxënësit t’u kushtojnë vëmendje nxitjeve të Shpirtit që do t’i udhëheqin ata që ta shikojnë e ta vënë re Qengjin e Perëndisë (shih te 1 Nefi 11:31).