1 Nefi 13:20–42

Të Vërtetat e Qarta dhe të Çmueshme

Libri i Mormonit

Rivendosja e ungjillit të Shpëtimtarit është një bekim në kaq shumë mënyra. Një bekim është që ai sjell në dritë shumë nga të vërtetat e qarta dhe të çmueshme që humbën nga Bibla. Nefi i pa ngjarjet e Rivendosjes shumë kohë përpara se të ndodhnin dhe e kuptoi rolin e rëndësishëm që do të luante anali i tij në Rivendosje. Ky mësim mund të të ndihmojë të kuptosh se si Libri i Mormonit dhe shkrimet e tjera të shenjta që janë zbuluar ndihmojnë të rivendosen të vërtetat e qarta dhe të çmueshme të ungjillit të Shpëtimtarit.

Përgatitja juaj për të dhënë mësim. Mësimdhënie e fuqishme e ungjillit nuk do të thotë thjesht të përgatitet një mësim, por të përgatitim veten. Për shkak se Shpirti dëshmon për të vërtetën dhe është burimi për kthimin në besim, mësuesit e efektshëm të ungjillit përqendrohen te mbushja e zemrave të tyre me Frymën e Shenjtë përpara se të mendojnë rreth mbushjes së kohës së orës mësimore. Merreni parasysh ta pyesni veten: “A jam gati të jap mësim me anë të Shpirtit?”

Përgatitja e nxënësve: Merreni parasysh t’i ftoni nxënësit të vijnë të përgatitur për të treguar diçka që kanë mësuar kohët e fundit nga studimi i tyre vetjak i shkrimeve të shenjta.

Veprimtari të Mundshme të të Mësuarit

Kontrolli i sigurisë

Tregojuni nxënësve figurën e një biçiklete ose, nëse është e mundur, merreni parasysh të sillni një biçikletë në klasë. Ftojini nxënësit të mendojnë për pjesët thelbësore të biçikletës dhe t’i renditin ato në tabelë.

Një biçikletë është një formë e thjeshtë dhe e efektshme e transportit. Çiklizmi mund të jetë gjithashtu një përvojë e gëzueshme dhe shpërblyese. Cilat janë disa pjesë thelbësore që i lejojnë një personi ta drejtojë biçikletën me siguri dhe efikasitet? Imagjino sikur të kishe një biçikletë dhe dikush ia hoqi asaj qëllimisht disa pjesë të caktuara thelbësore.

• Çfarë mund të tregojnë ato veprime rreth ndjenjave të tij ose të saj për ty?

• Çfarë mund të ndodhë po të përpiqesh ta drejtosh biçikletën pa pjesët që mungojnë?

• Kë mund të kontaktosh që ta riparojë e ta rikthejë biçikletën që të funksionojë siç duhet?

Në një mënyrë të ngjashme, Satani ka kërkuar t’i dëmtojë dhe pështjellojë fëmijët e Perëndisë duke hequr dhe ndryshuar pjesë të rëndësishme të ungjillit të Jezu Krishtit. Ndërsa studion te 1 Nefi 13, kërko atë që ka bërë Shpëtimtari për të na ndihmuar t’i kapërcejmë pengesat e Satanit.

Ka shumë njerëz që pengohen

Nefit iu treguan në vegim ngjarje të rëndësishme të ditëve të mëvonshme përfshirë një libër që po sillej në tokën e premtuar nga johebrenjtë. Lexo rreth librit te 1 Nefi 13:20–25 dhe kërko atë që përmbante ai.

Mund të jetë e dobishme t’i renditni në tabelë ato që zbulojnë nxënësit, të tilla si “besëlidhjet e Zotit”, “profecitë e profetëve të shenjtë” dhe “plotësinë e ungjillit” (1 Nefi 13:23–24). Merreni parasysh t’i pyesni nxënësit a e dinë se cili është libri te vargu 20 përpara se t’i ftoni ata të bëjnë një shënim në shkrimet e tyre të shenjta.

• Çfarë mësove nga leximi yt?

Merre parasysh të bësh një shënim te vargu 20 që libri të cilin e pa Nefi, i referohet Biblës së Shenjtë. Bërja e shënimeve në shkrimet e tua të shenjta mund të të ndihmojë t’i bësh ato vetjake dhe ta rritësh efektshmërinë e studimit tënd të shkrimeve të shenjta. Për shembull, bërja e shënimeve në shkrimet e tua të shenjta mund të të ndihmojë t’i mbash mend këndvështrimet shpirtërore në të ardhmen ose të jenë një bekim për ty ose të tjerët në një çast nevoje.

• Çfarë vure re te mënyra se si u përshkrua Bibla?

Merreni parasysh t’i lejoni nxënësit t’i studiojnë vargjet e radhës në dyshe ose në grupe të vogla dhe t’i ftoni ata të diskutojnë pyetje si ato në vijim. Kur nxënësit ta kenë përfunduar leximin, merreni parasysh t’i ftoni ata të mendojnë rreth mënyrës se si i kanë parë përpjekjet e Satanit për t’i hequr të vërtetat e qarta dhe të çmueshme të bëjnë që njerëzit në botë të pengohen.

Lexo te 1 Nefi 13:26–29, duke kërkuar atë që i ndodhi Biblës pasi ajo u përhap nga “apostujt e Qengjit”.

• Çfarë i ndodhi Biblës?

• Si mund të shkaktonte heqja e të vërtetave të qarta e të çmueshme nga Bibla që njerëzit të pengoheshin shpirtërisht?

• Si ngjasojnë këto vargje me analogjinë e biçikletës?

“Dhurata dhe fuqia e Qengjit”

Pasi dëshmoi që të vërtetat e qarta dhe të çmueshme u ndryshuan ose u hoqën nga Bibla, Nefi mësoi se Zoti në mëshirën e Tij nuk do të lejonte që bota të mbetej e pështjelluar ose e verbër (shih te 1 Nefi 13:30–34). Nefi pa që ungjilli do të rivendosej në plotësinë e tij nëpërmjet “dhuratës dhe fuqisë së Qengjit” (1 Nefi 13:35).

Për të mësuar se si e përmbushi këtë Shpëtimtari, lexo te 1 Nefi 13:35–39 dhe merre parasysh t’i shenjosh frazat vijuese dhe të shënosh kuptimin e tyre në shkrimet e tua të shenjta ose në ditarin tënd të studimit.

Në vend që thjesht t’ua thoni nxënësve informacionin vijues, mund të renditni shkrimet e shenjta dhe frazat në thonjëza në tabelë në një kolonë. Në një kolonë të dytë, mund t’i renditni interpretimet në një rend të ndryshëm nga ajo që renditet këtu. Ftojini nxënësit t’i studiojnë vargjet dhe ta përputhin frazën me interpretimin e saktë. Nxënësve mund t’u jepet edhe një mundësi për të bërë pyetje rreth këtyre vargjeve.

Referenca dhe fraza e shkrimit të shenjtë	Interpretimi
Referenca dhe fraza e shkrimit të shenjtë 1 Nefi 13:35 “këto gjëra”	Interpretimi Libri i Mormonit
Referenca dhe fraza e shkrimit të shenjtë 1 Nefi 13:39 “libra të tjerë”	Interpretimi Përfshin Librin e Mormonit, Doktrinën e Besëlidhjet, Perlën me Vlerë të Madhe dhe Përkthimin e Biblës prej Joseph Smith-it
Referenca dhe fraza e shkrimit të shenjtë 1 Nefi 13:39 “analet e profetëve dhe të dymbëdhjetë apostujve të Qengjit”	Interpretimi Bibla

Lexo te 1 Nefi 13:40–41, duke kërkuar një përshkrim të asaj që shkrimet e shenjta të Rivendosjes do t’u bëjnë të njohur njerëzve.

• Çfarë zbulove?

Merre parasysh ta shënosh të vërtetën vijuese në shkrimet e tua të shenjta ose në ditarin tënd të studimit: Libri i Mormonit dhe shkrimet e tjera të ditëve të mëvonshme rivendosin të vërteta të qarta dhe të çmueshme që dëshmojnë për Jezu Krishtin, dhe përforcojnë plotësinë e ungjillit të Tij të përhershëm.

Merreni parasysh t’i ftoni nxënësit t’i shkruajnë përgjigjet e tyre për pyetjen e dytë dhe të tretë më poshtë në një copë letre. Mblidhini përgjigjet e tyre dhe ekspozojini ato rreth e rrotull dhomës që t’i lexojnë të tjerët.

• Si mendon, pse të vërtetat nga ungjilli i Shpëtimtarit përshkruhen si të qarta dhe të çmueshme?

• Çfarë mëson rreth Zotit nga roli i Tij në rivendosjen e të vërtetave të qarta dhe të çmueshme?

• Cila është një e vërtetë ose një mësim nga shkrimet e shenjta të ditëve të mëvonshme që është e qartë dhe e çmueshme për ty?

• Si të ka ndihmuar ajo e vërtetë t’i afrohesh më shumë Jezu Krishtit?

Të vërtetat e qarta dhe të çmueshme të rivendosura

Paraqitni në tabelë temat vijuese dhe shkrimet e shenjta shoqëruese. Nxënësit mund të zgjedhin një ose mundësi të shumëfishta për t’i studiuar me më shumë hollësi. Vërini nxënësit ta studiojnë së pari fragmentin në Bibël dhe të imagjinojnë sikur ky të ishte informacioni i vetëm në lidhje me temën. Pastaj vërini ata të studiojnë fragmentet e tjera, duke kërkuar se si e sqarojnë ato atë që është në Bibël. Kjo mund të bëhet në dyshe dhe nxënësit mund t’i diskutojnë vëzhgimet e tyre me njëri-tjetrin. Përndryshe, nxënësit mund të studiojnë individualisht dhe t’i diskutojnë gjetjet e tyre si klasë.

Kreu‑Perëndi (Mateu 3:16–17)

• Joseph Smith – Historia 1:17

• Doktrina e Besëlidhje 130:22–23

Shlyerja e Jezu Krishtit (Lluka 22:41–44)

• Alma 7:11–13

• Doktrina e Besëlidhje 19:16–19

Jeta para lindjes (Jeremia 1:5)

• Abraham 3:22–25

• Doktrina e Besëlidhje 138:55–56

Sakramenti (Mateu 26:26–28)

• Moroni 4:1–3; 5:1–2

• Doktrina e Besëlidhje 59:8–12

Ungjilli i Jezu Krishtit (Marku 1:14–15)

• 3 Nefi 11:31–35; 27:13–21

• Nenet e Besimit 1:4

  Ftojini nxënësit e gatshëm ta tregojnë atë që mësuan. Mund të bëni pyetje si vijueset:

• Çfarë mësove për temën që zgjodhe?

• Si mund të të ndihmojë kjo e vërtetë që të gëzohesh në Jezu Krishtin dhe ta ndjekësh më mirë Atë?

• Pse je mirënjohës që Ati Qiellor dhe Jezu Krishti nxorën shkrime të tjera të shenjta dhe rivendosën të vërtetat e qarta dhe të çmueshme?

Komente dhe Informacion për Rrethanat

Si më ndihmon Libri i Mormonit të vij te Jezu Krishti?

1 Nefi 13:20–29. Pse janë kaq të rëndësishme Libri i Mormonit dhe shkrimet e tjera të shenjta të ditëve të mëvonshme?

Profeti Jozef Smith dha mësim se “shumë pika të rëndësishme që preknin shpëtimin e njeriut, ishin hequr nga Bibla, ose kishin humbur përpara se të hartohej ajo” (Mësimet e Presidentëve të Kishës: Jozef Smith [2009], f. 229). Ai gjithashtu tha se, e besonte Biblën “siç lexonte kur erdhi nga pena e shkruesve të parë” dhe se “përkthyes të paditur, kopjues të pakujdesshëm, apo priftërinj mashtrues dhe të korruptuar kanë kryer shumë gabime” (Mësimet: Jozef Smith, f. 217).

Plaku Xhefri R. Holland, i Kuorumit të Dymbëdhjetë Apostujve, dha mësim:

Plaku Xhefri R. Holland

“Elementet … që mungojnë nga Bibla ishin edhe ‘të qart[ë] [e]dhe më të çmueshm[it]’. Ata ishin të qartë në thjeshtësinë dhe kthjelltësinë e tyre, duke qenë të lehtë për ‘kuptimin e … njerëzve’; ata ishin të çmuar në pastërtinë dhe vlerën e tyre të thellë, në domethënien e tyre shpëtuese dhe rëndësinë e përjetshme për fëmijët e Perëndisë.” (Jeffrey R. Holland, Christ and the New Covenant: The Messianic Message of the Book of Mormon [1997], f. 5)

A duhet ta studioj ende Biblën së bashku me Librin e Mormonit dhe shkrimet e tjera të shenjta të ditëve të mëvonshme?

Presidenti M. Rasëll Ballard, i Kuorumit të Dymbëdhjetë Apostujve, deklaroi:

Presidenti M. Rasëll Ballard

“Anëtarët e Kishës së Jezu Krishtit të Shenjtorëve të Ditëve të Mëvonshme besojnë se ‘i gjithë Shkrimi është i frymëzuar nga Perëndia dhe i dobishëm’ (2 Timoteut 3:16). Ne i duam Biblën dhe shkrimet e tjera të shenjta. Kjo mund të jetë befasuese për dikë që mund të mos jetë në dijeni të besimit tonë te Bibla si fjala e zbuluar e Perëndisë. Ajo është një nga shtyllat e besimit tonë, një dëshmitare e fuqishme e Shpëtimtarit dhe e ndikimit të vazhdueshëm të Krishtit në jetën e atyre që e adhurojnë dhe e ndjekin Atë. Sa më shumë e lexojmë dhe e studiojmë Biblën dhe mësimet e saj, aq më qartë i shohim përforcimet doktrinore të ungjillit të rivendosur të Jezu Krishtit. …

Ju të rinj e të reja veçanërisht, mos ia ulni vlerat ose ta zhvlerësoni Biblën e Shenjtë. Ajo është anali i shenjtëruar, i shenjtë i jetës së Zotit.” (M. Russell Ballard, “The Miracle of the Holy Bible”, Ensign ose Liahona, maj 2007, f. 81–82)

Veprimtari Plotësuese të të Mësuarit

Fillim alternativ

Merreni parasysh ta filloni orën mësimore duke paraqitur një shenjë që paralajmëron “rrezik për t’u penguar” dhe duke u kërkuar nxënësve të mendojnë për një kohë së fundmi kur u penguan ose u ngeci këmba diku. Ftojini ata të shpjegojnë dobinë nga shenjat “rrezik për t’u penguar” ose shenja të tjera paralajmëruese përpara se ta analizojnë kapitullin 1 Nefi 13. Ftojini nxënësit të kërkojnë atë që ka bërë Satani për të bërë që shumë njerëz në botë të pengohen dhe si u ka siguruar ndihmë atyre Shpëtimtari.

Referenca‑kryq

Ndërsa nxënësit studiojnë vargjet te 1 Nefi 13:20–42 dhe përcaktojnë se si Libri i Mormonit i rivendos të vërtetat e qarta dhe të çmueshme që u hoqën nga Bibla, merreni parasysh t’i ftoni ata t’i bëjnë referencë‑kryq këto vargje me vargjet tek Ezekiel 37:15–19. Mund të përdoren edhe pyetje si ato në vijim:

• Si mendoni, çfarë do të thotë që këta dy drurë ose libra të shkrimit të shenjtë do të bëhen një gjë e vetme në dorën tuaj?

• Çfarë bekimesh janë në dispozicion kur ne i studiojmë Librin e Mormonit dhe Biblën së bashku si një libër?

• Si e ka thelluar studimi së bashku i Librit të Mormonit dhe i Biblës diturinë dhe dëshminë tuaj për Jezu Krishtin?