1 Nefia 11

“Tazano ny fiambanian’ Andriamanitra!”

Ny fahitan’i Nefia an’i Maria Virijiny

Mampianatra antsika momba ny zavatra “mahatsiriritra indrindra” sy “mampiravoravo indrindra ny fanahy” amin’ny zavatra rehetra ankafizintsika eto amin’ity fiainana ity ny soratra masina (1 Nefia 11:22–23). Rehefa niresaka tamina mpitondra hafatra avy any an-danitra i Nefia, dia nahita fahitana momba ny Mpamonjy an’izao tontolo izao ary nandray ny fahatakarany manokana momba ny zavatra mitondra fifaliana be indrindra: ny fitiavan’ Andriamanitra. Afaka manampy anao hahatsapa ny fitiavan’ny Ray any An-danitra sy i Jesoa Kristy anao ity lesona ity.

Mitia ireo izay ampianarinao. Ny zavatra rehetra nataon’ny Mpamonjy nandritra ny asa fanompoany teto an-tany dia natosiky ny fitiavana. Rehefa manaraka ny ohatra nasehony ianao, dia ny fitiavana no ho antony sy zavatra manosika anao hampianatra. Hiantraika amin’ny zavatra ataonao sy ny fomba ifaneraseranao amin’ny mpianatra ny fitiavana.

Fanomanana ny mpianatra: Asao hitondra zavatra iray ao amin’ny kilasy izay maneho fomba iray anehoan’ Andriamanitra ny fitiavany azy ireo ny mpianatra.

Ireo sahanasa fianarana azo atao

Ny maha-zava-dehibe ny fitiavan’ Andriamanitra

Ny Rahavavy Susan H. Porter ao amin’ny Fiadidian’ny Kilonga Maneran-tany dia nilaza toy izao:

Rahavavy Susan H. Porter

Rehefa fantatrao sy takatrao fa tena tiana tanteraka ianao amin’ny maha zanak’Andriamanitra anao dia manova ny zavatra rehetra izany. (Susan H. Porter, “Ny fitiavan’ Andriamanitra: Ilay mampiravoravo indrindra ny fanahy,” Liahona, nôv. 2021, 33)

• Inona no mety hiova rehefa mahafantatra sy mahatakatra ny fitiavan’ Andriamanitra azy ny olona iray?

• Inona no mety fiantraikan’ny fahatsapanao hoe tian’ Andriamanitra ianao eo amin’ny fiainanao?

Hevero ny hanome fotoana ny mpianatra hisaintsainany ny hoe manao ahoana ny fahatsapan’izy ireo ny fitiavan’ Andriamanitra sy ny porofom-pitiavany eo amin’ny fiainan’izy ireo. Asao ny mpianatra, rehefa mandalina ny 1 Nefia 11, mba hitady porofon’ny fitiavan’ny Ray any An-danitra sy i Jesoa Kristy azy ireo.

Ny fahitan’i Nefia

Ny nofin’i Lehia

Asao hitadidy ireo sariohatra lehibe tao amin’ny nofin’i Lehia voarakitra ao amin’ny 1 Nefia 8 ny mpianatra. Raha mila fanampiana ny mpianatra, dia asao hamerina hijery fohifohy izany toko izany izy ireo.

• Inona avy ireo sariohatra lehibe tadidinao tamin’ny nofin’i Lehia voarakitra ao amin’ny 1 Nefia 8?

Naniry lalina ny hahatakatra ny hevitry ny nofin-drainy i Nefia ary nino fa hampahafantarin’ny Tompo azy izany. Rehefa nisaintsaina tao am-pony izy, dia niseho ny Fanahin’ny Tompo ary nampiseho azy ilay hazon’aina. Rehefa nangataka ny hahafantatra ny fanazavana ny hevitr’ilay hazo i Nefia, dia nisy anjely niseho nanampy azy hahalala kokoa momba ny zavatra hitany tao amin’ny fahitana (jereo ny 1 Nefia 11:1–14).

Tao anatin’ny fanampiany an’i Nefia hahatakatra ny hevitr’ilay hazo, dia nametraka fanontaniana iray tamin’i Nefia ilay anjely. Vakio ny 1 Nefia 11:16 mba hahitana ilay fanontaniana napetraka.

Hevero ny hizara ny mpianatra ho tsiroaroa ary hanasa azy ireo hifanontany sy hamaly ilay fanontaniana ao amin’ny andininy 16 alohan’ny hamakian’izy ireo ny andininy 17.

• Ahoana no mety hamalianao ilay fanontaniana ao amin’ny andininy 16?

Vakio ny andininy 17 mba hahitana ny fomba namalian’i Nefia.

• Inona no manan-danja aminao amin’ny valintenin’i Nefia ao amin’ny andininy 17?

Ny “fiambaniana” dia midika hoe fidinana an-tsitrapo avy amin’ny ambaratongam-boninahitra na voninahitra iray. Ohatra, ny fanasan’ny Mpamonjy ny tongotry ny mpianany dia azo raisina ho fiambaniana (jereo ny Jaona 13:3–17). Na dia afaka mampianatra momba ny fiambanian’ny Ray any An-danitra aza ny fiambanian’ Andriamanitra voasoritsoritra ao amin’ireo andininy ireo, ity lesona ity dia mifantoka voalohany indrindra amin’ny fiambanian’i Jesoa Kristy.

Vakio ny zavatra hitan’i Nefia ao amin’ny 1 Nefia 11:13–23, hitadiavana porofon’ny fiambanian’ Andriamanitra.

• Inona no porofo hitanao momba ny fiambanian’ Andriamanitra?

• Inona avy ireo fahamarinana ianaranao momba ny fiambanian’ Andriamanitra?

Fahamarinana iray azontsika ianarana ny hoe ny fiambanian’ Andriamanitra dia maneho ny fitiavany antsika.

• Ahoana no iheveranao fa ny fahaterahan’ny Mpamonjy dia maneho io fahamarinana io?

Vakio ny 1 Nefia 11:26–33 hitadiavana fomba hafa niambanian’i Jesoa mba hampisehoany ny fitiavany ny olombelona.

Hevero ny hizara ny mpianatra ho vondrona na tsiroaroa ary hanendry azy ireo amin’ampahany kelikely kokoa amin’ny 1 Nefia 11:26–33. Rehefa avy mamaky ny andininy nanendrena azy izy ireo, dia azon’izy ireo atao ny mifanakalo hevitra momba ireto fanontaniana manaraka ireto amin’ny vondrona misy azy ireo na ny olona miaraka aminy.

Hevitra iray hafa azo atao ny mampiseho sarin’ny ampahan’ny fiainan’ny Mpamonjy voaresaka ao amin’ireo andininy ireo. Avy eo dia manasà mpianatra hitady fitantarana ao amin’ny Testamenta Vaovao izay manoritsoritra ny zava-nitranga asehon’ny sary tsirairay.

Azon’ny mpianatra atao ihany koa ny mijery sary iray, sy mitady ny fitantarana ao amin’ny Testamenta Vaovao mifandray amin’izany, ary manazava ny fomba anehoan’ilay fitantarana ny fiambanian’ Andriamanitra.

• Inona no porofon’ny fiambanian’ny Mpamonjy hitanao?

• Ahoana no anehoan’ireo zavatra nataony ireo ny fitiavany?

• Inona avy ireo ohatra hafa avy amin’ny fiainan’i Kristy tsapanao fa maneho ny fitiavany sy ny fiambaniany?

Vakio ny zavatra nambaran’ny Loholona Quentin L. Cook ao amin’ny Kôlejin’ny Apôstôly Roambinifolo momba ny fomba anampian’ireo zava-nitranga ireo antsika hahita ny fitiavan’ny Mpamonjy antsika. Na azonao atao ny mijery ny horonan-tsary hoe “Ireo zavatra iainana mahazatra any amin’ny mandrakizay” manomboka eo amin’ny mari-potoana 4:01 hatramin’ny 4:43, hita ao amin’ny ChurchofJesusChrist.org.

Loholona Quentin L. Cook

Ny ohatry ny Mpamonjy momba ny fanetrentena sy ny fahafoizan-tena ho an’ny zanakolombelona rehetra no fotoana miavaka indrindra eo amin’ny tantara. Ny Mpamonjy, na dia mpikambana ao amin’ Ny Andriamanitra aza, dia vonona ny ho ety an-tany toy ny zaza tsotra ary nanomboka niaina fiainana izay nahitana fampianarana sy fanasitranana ireo rahalahiny sy anabaviny, ary nifarana tamin’ny fiaretana fijaliana tsy hay lazaina tao Getsemane sy teo amin’ny hazofijaliana mba hanatanterahany ny Sorompanavotany. Io fanehoam-pitiavana sy fanetrentena avy amin’i Kristy io no antsoina hoe ny fiambaniany. Nataony izany ho an‘ny lehilahy sy ny vehivavy tsirairay nohariana sy hoharian’ Andriamanitra. (Quentin L. Cook, “Ireo zavatra iainana mahazatra any amin’ny mandrakizay,” Ensign na Liahona, nôv. 2017, 52)

• Ahoana no anampian’ny teny nataon’ny Loholona Cook anao hahatakatra tsara kokoa ny fiambanian’ Andriamanitra?

Ireo fitahiana mitohin’ny fiambanian’ny Mpamonjy

Ny fiambanian’ny Mpamonjy dia mitohy ho porofon’ny fitiavany antsika ankehitriny.

Hevero ny hizara ny fomba nitahiana anao tamin’ny alalan’ny fiambanian’ny Mpamonjy. Afaka manampy ny mpianatra hahatsapa ny fitiavan’ny Ray any An-danitra sy i Jesoa Kristy azy ireo izany.

Jereo ilay horonan-tsary hoe “Tsapako ny fitiavan’ny Mpamonjy ahy” (3:39), hita ao amin’ny ChurchofJesusChrist.org, hitadiavana ireo fomba nizaran’ireo ankizy ao amin’ilay horonan-tsary ny fahatsapan’izy ireo ny fitiavany.

Mety hahazo tombony amin’ny famaliana ireto fanontaniana manaraka ireto ao anatin’ny diary fandalinany ny mpianatra.

• Ahoana no fomba nanehoan’ny Ray any An-danitra sy i Jesoa Kristy ny fitiavan’ Izy ireo anao?

• Inona no fiantraikan’ny zavatra efa nataon’Izy ireo amin’ny fahatsapanao momba Azy ireo?

• Tsapanao fa voatosika hanao inona ianao mba hanehoana ny fitiavanao ny Ray any An-danitra sy i Jesoa Kristy?

Rehefa nahazo fotoana hanoratana ny mpianatra, dia hevero ny hanasa mpianatra mazoto hizara ny eritreritra sy fahatsapan’izy ireo. Raha nanao ny fiomanana ho amin’ny fotoam-pianarana ny mpianatra, dia azon’izy ireo atao ny mizara ny zavatra nentin’izy ireo ary manazava ny fomba anampian’izany zavatra izany azy ireo hahatsapa ny fitiavan’ andriamanitra azy ireo.

Fanamarihana sy fampahalalana ankapobeny

Iza ilay Fanahy niresaka tamin’i Nefia tamin’ny fiandohan’ilay fahitana?

Nampianatra ny Loholona James E. Talmage (1862–1933) tao amin’ny Kôlejin’ny Apôstôly Roambinifolo hoe:

Loholona James E. Talmage

Ny hoe ny Fanahin’ny Tompo dia afaka maneho ny tenany amin’ny endrika sy tarehin’olona, dia tondroin’ny resadresaka nahafinaritra teo amin’ny Fanahy sy i Nefia, izay nanehoany ny tenany tamin’ilay mpaminany, nametrahany fanontaniana taminy momba ireo faniriany sy finoany, nampianarany azy tamin’ny zavatr’ Andriamanitra, niresaka nifanatri-tava tamin’ilay olona.” (James E. Talmage, The Articles of Faith [1968], 159–60; jereo ihany koa ny Marion G. Romney, “The Holy Ghost,” Ensign, mey 1974, 90–92)

Inona no nampianarin’ny mpitarika ao amin’ny Fiangonana momba ny fiambanian’ Andriamanitra?

Ny Mpaminany Joseph Smith (1805–44) dia nilaza toy izao:

Mpaminany Joseph Smith

Rehefa saintsainintsika ny fahamasinana sy fahatanterahan’ny Tompontsika lehibe, izay nanokatra làlana iray ahafahantsika manatona Azy, hatramin’ny fanaovany sorona ny tenany mihitsy aza, dia mitsonika ao anatintsika amin’ny fiambaniany ny fontsika. (Teachings of Presidents of the Church: Joseph Smith [2011], 53–54)

Nanazava ny Loholona D. Todd Christofferson ao amin’ny Kôlejin’ny Apôstôly Roambinifolo hoe:

Loholona D. Todd Christofferson

I Jesoa no lahimatoa tamin’ny fanahy ary ilay Zanaka Lahitokana naterak’ Andriamanitra tamin’ny nofo. Na dia tsy naterak’ Andriamanitra tamin’ny nofo aza isika, dia taranaka ara-panahin’ Andriamanitra tahaka an’i Jesoa isika. Araka izany, ny fahaterahantsika ho amin’ny fiainana an-tany dia zavatra karazana fiambaniana ihany koa, ary tahaka ny an’i Kristy dia manana tanjona ambony izany. Mitovy amin’i Jesoa mihitsy, nidina avy any an-danitra isika mba hanao ny sitrapony izay naniraka antsika ary mba hanatratra ny tsy fahafatesana sy fiainana mandrakizay amin’ny alalan’ny famindram-pon’i Kristy. Mety ho zava-dehibe amintsika ihany koa ve, rehefa mikatsaka ny “hiakatra amin’ny avo isika”, ny hidina ho ambanin-javatra sasany farafahakeliny mba hahazoantsika feno kokoa sy hahatongavantsika tahaka an’i Kristy kokoa? Raha nila traikefa i Jesoa, mety mitaky fanamby sy fitsapana ihany koa ve isika, “mba ho feno famindram-po ny ao [anatintsika] araka ny nofo, mba [hahafantarantsika] araka ny nofo ny fomba hifanampiana arakaraka ny [rofintsika] avy” [Almà 7:12]? (D. Todd Christofferson, “The Condescension of God and of Man” [First Presidency Christmas devotional, des. 7, 2014], ChurchofJesusChrist.org)

Mba hahalalana misimisy kokoa momba ny fiambanian’ Andriamanitra, dia azonao atao ny mamaky ny lahatsoratry ny Eveka Richard C. Edgley ao amin’ny Episkôpa Mpiahy, “The Condescension of God,” Ensign, des. 2001, 16–21.

Sahanasa fianarana fanampiny

1 Nefia 11:34–36. “Ilay trano lehibe sy malalaka”

Hevero ny hanasa ny mpianatra hitadidy antsipiriany momba ilay trano lehibe sy malalaka voaresaka ao amin’ny nofin’i Lehia. Asao izy ireo hamerina hijery fohifohy ny 1 Nefia 8:26–28, 31–34, raha ilaina.

Asao ny mpianatra hamaky ny 1 Nefia 11:34–36, hitadiavana ny hevitr’ilay trano lehibe sy malalaka. Anontanio azy ireo ny dikan’izany amin’izy ireo sy ny zavatra ianaran’izy ireo avy amin’ny sariohatra asehon’ny firodanan’ilay trano. Anontanio azy ireo hoe nahoana araka ny eritreritr’izy ireo no “hiady amin’ny Apôstôly roa ambin’ny folon’ny Zanakondry” ireo olona tao anatin’ilay trano (andininy 35), ary asao izy ireo hizara ny fomba mety hisehoan’izany amin’izao androntsika izao.

Asao ireo mpianatra hizara fomba ahafahan’izy ireo mijoro miaraka amin’ny Apôstôly na zavatra niainan’izy ireo izay manamafy orina ny fijoroana ho vavolombelona ananan’izy ireo fa ireo Apôstôly ireo dia tena “apôstôlin’ny Zanakondry”. Asao hametraka tanjona iray hijoroana eo akaikin’ny Mpamonjy sy ireo Apôstôly nofidiny ny mpianatra.

1 Nefia 11. “Jereo!”

Nandritra ny fotoana niarahan’izy ireo tamin’i Nefia, ny Fanahy sy ny anjelin’ny Tompo iray dia niteny imbetsaka tamin’i Nefia mba hijery. Asao ny mpianatra mba hikaroka ny 1 Nefia 11 mba hahitana ny teny hoe jereo ary hanamarika ny zavatra naseho an’i Nefia.

Ampahatsiahivo ny mpianatra fa iray amin’ireo tanjona lehiben’ny Fanahy Masina ny hijoro ho vavolombelon’ny Ray any An-danitra sy i Jesoa Kristy (jereo ny 3 Nefia 28:11).

Angataho hizara ny fomba nitarihan’ny Fanahy Masina ny fifantohan’izy ireo ho any amin’i Jesoa Kristy sy nanampiany azy ireo hianatra momba Azy ny mpianatra.

Asao hangataka amin’ny Ray any An-danitra hitarika azy ireo ho any amin’ny Mpamonjy ny mpianatra rehefa mandalina ny Bokin’i Môrmôna. Ampahatsiahivo ny mpianatra ny hihaino tsara ny bitsiky ny Fanahy izay hitarika azy ireo hijery sy hitazana ny Zanakondrin’ Andriamanitra (jereo ny 1 Nefia 11:31).