1 Nephi 13–14

“Nasasandatahan … ng Kabutihan at Kapangyarihan ng Diyos”

Matapos maipakita sa isang pangitain ang apostasiya at pagkawasak ng kanyang mga tao sa huli, nakita ni Nephi na babaluktutin ng isang makapangyarihan at karumal-dumal na simbahan ang mga turo ng Biblia at kakalabanin nito ang mga Banal ng Diyos. Isipin ang kagalakan ni Nephi nang makita rin niya na ipanunumbalik ang ebanghelyo, at pagpapalain nito ang lahat ng tatanggap sa mga turo at tipan ng Tagapagligtas. Ang layunin ng lesson na ito ay tulungan kang maunawaan ang kahalagahan ng mga tipan at madagdagan ang iyong hangarin na gumawa ng mga tipan at tuparin ang mga ito.

Ipinapakita na pinahahalagahan ang mga kontribusyon ng mga mag-aaral. Kapag nagtaas ng kamay ang mga estudyante upang magkomento, tawagin sila sa pangalan at tulungan sila na madama na ang kanilang mga komento ay makatutulong sa iba na matuto.

Paghahanda ng estudyante: Maaari mong anyayahan ang mga estudyante na pumasok sa klase na handang ibahagi kung ano sa palagay nila ang ilan sa pinakamahahalagang pangyayari sa nakalipas na 500 taon.

Mga Posibleng Aktibidad sa Pag-aaral

Paalala: Ituturo ang 1 Nephi 13:20–42 nang mas detalyado sa susunod na lesson.

Ang impluwensya ng Diyos sa kasaysayan

Kunwari ay ipinakita sa iyo ang isang pangitain tungkol sa pinakamahahalagang pangyayari sa nakaraang 500 taon, kabilang na ang ating panahon.

Maaari mong isulat o ipasulat sa mga estudyante ang mga sagot sa sumusunod na tanong sa pisara. Ang mga sagot na nakikita sa pisara ay maaaring magbigay ng mga ideya sa iba pang mga estudyante.

• Sa iyong palagay, anong mga pangyayari ang maaari mong makita sa pangitaing ito? Bakit?

Ipinakita sa propetang si Nephi ang isang pangitain na kinapapalooban ng mahahalagang pangyayari mula sa panahong ito. Pansinin ang sinabi ni Pangulong Russell M. Nelson tungkol sa pangitain ni Nephi:

Nasa magandang posisyon tayo upang masaksihan nang aktwal ang pangyayari na nakita ni Nephi sa pangitain lang. …

Kayo, mga kapatid, ay kabilang sa kalalakihan, kababaihan, at mga bata na nakita ni Nephi. Isipin ninyo iyan! (Russell M. Nelson, “Pakinggan Siya,” Liahona, Mayo 2020, 88)

Sa pag-aaral mo ng 1 Nephi 13–14, maghanap ng katibayan ng kapangyarihan ng Diyos sa mga pangyayaring humahantong sa ating panahon gayundin ng mahahalagang pangako na tutuparin ng Panginoon sa iyong buhay.

Ang sumusunod na aktibidad ay magagamit sa maraming paraan. Halimbawa, maaari mong ipakita ang mga pangyayari at ang mga katugmang banal na kasulatan at pagkatapos ay ipabasa sa mga estudyante ang mga talata at pasulatin sila ng maikling buod ng lahat ng pangyayari. Maaari ka ring gumawa ng quiz kung saan maaaring itugma ng mga estudyante ang mga pangyayari sa mga talata.

Basahin ang mga scripture passage at itugma ang inilarawan sa mga talata sa mga pangyayaring nakalista sa ibaba. Paalala: Ang mga Gentil gaya ng pagkakagamit sa mga talatang ito ay tumutukoy sa mga taong hindi nagmula o hindi nakatira sa lupain ng Juda.

1 Nephi 13:12–13, 16–19	Ang talaan ng mga Nephita (Aklat ni Mormon) at iba pang banal na kasulatan ay nagpapatunay sa katotohanan ng talaan ng mga Judio (Biblia) at nagpapanumbalik ng malinaw at mahahalagang katotohanan.
1 Nephi 13:23–26	Pagtuklas at kolonisasyon ng lupang pangako ng mga Gentil.
1 Nephi 13:35–36, 39–40	Talaan ng mga Judio (ang Biblia) na binaluktot ng makapangyarihan at karumal-dumal na simbahan.
1 Nephi 14:7–10	Gagawa ng kagila-gilalas na gawain (Pagpapanumbalik ng ebanghelyo). Pipili ang mga Gentil kung tatanggapin o tatanggihan ang mga pagpapala nito.

Mga sagot: 1-b, 2-c, 3-a, 4-d. Maaari mong itanong sa mga estudyante kung ano ang alam nila o kung may mga tanong sila tungkol sa mga pangyayari.

• Ano sa palagay mo ang mahalaga tungkol sa mga propesiyang ito?

Maaaring makinabang ang mga estudyante sa pag-aaral ng 1 Nephi 13:12–13, 16–19 upang matuklasan kung paano napasakanila na mga naglakbay patungo sa lupang pangako ang Espiritu at kapangyarihan ng Diyos.

• Ano ang natutuhan mo tungkol sa Diyos mula sa mga talatang ito?

  Maaaring magandang pagkakataon ito upang ibahagi ang iyong patotoo tungkol sa kapangyarihan ng Diyos sa proseso ng Pagpapanumbalik. Maaari mo ring anyayahan ang mga estudyante na ibahagi ang kanilang mga nadama.

• Paano mapagpapala ng pagkaunawang ito tungkol sa Kanya ang iyong buhay ngayon?

Pagtatamo ng kapangyarihan ng Diyos sa ating buhay

Ipinakita kay Nephi ang mga huling araw at nakita ang Pagpapanumbalik ng Simbahan ni Jesucristo at ang oposisyon na kahaharapin nito. Nakita rin niya ang mga pagpapalang ipinangako sa mga tagasunod ni Jesucristo na tumutupad sa kanilang mga tipan.

Basahin ang 1 Nephi 14:12–14, at alamin ang nalaman ni Nephi tungkol sa mga miyembro ng Simbahan ni Jesucristo sa mga huling araw.

• Ano ang mahalaga para sa iyo sa paglalarawan ni Nephi sa Simbahan ni Jesucristo at sa mga miyembro nito sa ating panahon? Bakit?

  Maaari mong talakayin ang mga naisip at nadama ng mga estudyante tungkol sa pagiging kabilang nila sa kakaunting miyembro ng Simbahan sa buong mundo. Maaari mo silang anyayahan na magbahagi ng mga paraan kung paano nila nakita na nakipaglaban ang mga tao sa Tagapagligtas at kung paano sila tutugon nang tapat at nang may pagmamahal sa gayong mga hamon.

  Upang mapadali ang talakayan, maaari mong anyayahan ang mga estudyante na sagutin ang mga komento ng kanilang mga kaklase. Hangarin ang patnubay ng Espiritu upang malaman kung anong mga follow-up na tanong ang ibibigay.

• Anong mga alituntunin ang natutukoy ninyo sa talata 14?

Ang isang alituntunin na matututuhan natin mula sa mga talatang ito ay kung tutuparin natin ang ating mga tipan, masasandatahan tayo ng kabutihan at kapangyarihan ng Diyos.

• Anong mga tipan ang ginawa o gagawin mo sa Diyos?

• Ano ang ilang paraan na makatutulong sa iyo na manatiling nakatuon sa pagtupad sa mga tipang ginawa mo?

Itinuro ni Elder David A. Bednar ng Korum ng Labindalawang Apostol kung ano ang ibig sabihin ng masandatahan ng kabutihan at kapangyarihan ng Diyos sa dakilang kaluwalhatian:

Ang katagang “nasasandatahan ng kabutihan at kapangyarihan ng Diyos sa dakilang kaluwalhatian” [1 Nephi 14:14] ay hindi lamang isang magandang ideya o halimbawa ng mabulaklak na salita sa banal na mga kasulatan. Bagkus, ang mga biyayang ito ay madaling makikita sa buhay ng ‘di-mabilang na mga disipulo ng Panginoon sa mga huling araw. …

… Pinatototohanan ko na ang pinagtipanang mga tao ng Panginoon ngayon ay tunay na nasasandatahan ng kabutihan at kapangyarihan ng Diyos sa dakilang kaluwalhatian. Naging saksi ako sa pananampalataya, tapang, pananaw, pagtitiyaga, at kaligayahan na higit pa sa kapasidad ng isang mortal—na tanging Diyos lang ang makapagbibigay. (David A. Bednar, “Nasasandatahan ng Kabutihan at Kapangyarihan ng Diyos sa Dakilang Kaluwalhatian,” Liahona, Nob. 2021, 29–30)

• Ano ang ilang posibleng halimbawa ng mga taong kaedad mo na “nasasandatahan ng kabutihan”?

• Kailan mo naranasan ang ilan sa mga pagpapalang ito “na tanging Diyos lang ang makapagbibigay”?

• Ano ang sinasabi sa iyo ng iyong mga ginagawa araw-araw tungkol sa kung gaano kahalaga ang mga tipang ginawa mo?

• Bakit mo kailangan ang kapangyarihang nagmumula sa mga tipan sa Ama sa Langit?

• Paano mo mas lubos na maaanyayahan sa iyong buhay ang mga pagpapala ng paggawa at pagtupad ng mga tipan sa Ama sa Langit?

Komentaryo at Pinagmulang Impormasyon

1 Nephi 13. Ano ang ibig sabihin ng salitang mga Gentil sa Aklat ni Mormon?

Ang mga Gentil ay maaaring mangahulugang “mga bansa.” Tumutukoy ito sa (1) mga hindi kabilang sa sambahayan ni Israel, (2) mga hindi naniniwala sa Diyos ng Israel o yaong mga walang ebanghelyo, anuman ang kanilang lahi, at (3) mga taong hindi nagmula o hindi nakatira sa lupain ng Juda. Halimbawa, ang mga pilgrim at nandayuhan sa lupain ng Amerika ay tinatawag na mga Gentil sa 1 Nephi 13:3–13. Ang mga naglabas ng Aklat ni Mormon ay tinatawag na mga Gentil sa 1 Nephi 13:38. Ang Doktrina at mga Tipan at ang Mahalagang Perlas ay inilabas din sa pamamagitan ng mga Gentil (tingnan sa 1 Nephi 13:39; Doktrina at mga Tipan 109:60).

1 Nephi 13:12. Sino ang lalaki sa pangitain ni Nephi?

Tinukoy ni Pangulong Ezra Taft Benson (1899–1994) ang lalaking ito sa mga Gentil bilang si Christopher Columbus:

Binigyang-inspirasyon ng Diyos ang “isang lalaki sa mga Gentil” (1 Nephi 13:12) na, sa pamamagitan ng Espiritu ng Diyos ay naakay na muling matuklasan ang lupain ng Amerika at naging dahilan para mapagtuunan ng pansin ng mga tao sa Europa ang saganang bagong lupaing ito. Ang taong iyon, mangyari pa, ay si Christopher Columbus, na nagpatotoo na siya ay nabigyang-inspirasyon sa ginawa niya.

“Ang Panginoon natin,” sabi ni Columbus, “ay binuksan ang aking isipan, isinugo ako na maglayag sa dagat, at binigyang-inspirasyon ako na gawin ito. Yaong mga nakarinig tungkol sa aking gawain ay tinawag itong kahangalan, ako ay kinutya, at pinagtawanan. Ngunit sino ang maaaring mag-alinlangan ngunit binigyang-inspirasyon ako ng Espiritu Santo?” (Jacob Wasserman, Columbus, Don Quixote of the Seas, p. 19–20). (The Teachings of Ezra Taft Benson [1988], 577)

1 Nephi 14:10. Ano ang dalawang simbahan na nabanggit?

Ipinaliwanag ni Elder Dallin H. Oaks na ang “makapangyarihan at karumal-dumal na simbahan” na inilarawan ni Nephi ay ang “anumang pilosopiya o organisasyon na kumokontra sa paniniwala sa Diyos. At ang ‘pagkabihag’ na hangad ng ‘simbahang’ ito na kalagyan ng mga banal ay hindi magiging pisikal na pagkakulong kundi pagkabihag sa mga maling ideya” (“Tumayo Bilang mga Saksi ng Diyos,” Liahona, Mar. 2015, 32).

Paano pagpapalain ng Diyos ang mabubuti sa mga huling araw?

Itinuro ni Elder Neil L. Andersen ng Korum ng Labindalawang Apostol:

Nabubuhay tayo, mga kapatid, sa panahon bago ang Ikalawang Pagparito ng Panginoon, na matagal nang inasam ng mga nagsisisampalataya sa [lahat] ng mga panahon. Nabubuhay tayo sa panahon ng mga digmaan at bali-balita tungkol sa mga digmaan, sa panahon ng mga kalamidad, sa panahong ang mundo ay puno ng kawalang-katiyakan at kaguluhan.

Ngunit nabubuhay rin tayo sa maluwalhating panahon ng Panunumbalik, kung kailan ang ebanghelyo ay inihahatid sa buong mundo—isang panahon kung saan nangako ang Panginoon na Siya “ay magbabangon … ng mga dalisay na tao” [Doktrina at mga Tipan 100:16] at poprotektahan sila “ng kabutihan at kapangyarihan ng Diyos” [1 Nephi 14:14].

Nagagalak tayo sa mga araw na ito at dumadalangin na buong tapang nating maharap ang mga paghihirap at kawalang-katiyakan. (Neil L. Andersen, “Dumating Nawa ang Kaharian Mo,” Liahona, Mayo 2015, 119)

Paano tayo napagpapala ng pagtahak sa landas ng tipan?

Basahin, panoorin, o pakinggan ang mensahe ni Elder D. Todd Christofferson na may pamagat na “Bakit Mahalagang Tahakin ang Landas ng Tipan” (Liahona, Mayo 2021, 116–19).

Mga Karagdagang Aktibidad sa Pag-aaral

1 Nephi 14:1–7. Mga resulta ng pagtugon natin sa katotohanan

Ang isa pang paraan para matalakay ang 1 Nephi 14 ay ipakita ang sumusunod na larawan, na katulad ng isang daan na nagsanga, nang wala ang mga salita.

Basahin ang 1 Nephi 14:1–2, 5–7. Tulungan ang mga estudyante na mapansin ang iba’t ibang pagpiling gagawin ng mga tao bilang tugon sa Pagpapanumbalik ng ebanghelyo at ang mga bunga ng mga pagpiling iyon. Idagdag ang mga sagot sa larawan upang maging katulad ito ng nabanggit sa itaas.