1 Նեփի 16–18

Լիահոնա. Ուղեցույց անապատում

Երբևէ ունեցե՞լ եք մոլորվածության կամ շփոթության զգացում, երբ չգիտեիք, թե ինչ պետք է անեք, կամ ինչի վրա պետք է կենտրոնանաք կյանքում: Ինչպիսի՞ն կարող էր լինել ձեր կյանքը, եթե ավելի լավ կարողանայիք ճանաչել այն ուղղորդումը, որ Տերը փորձում էր տալ ձեզ: Երուսաղեմից Լեքիի ընտանիքի հեռանալուց կարճ ժամանակ անց Տերը նրանց ավելի ընդլայնված ուղղորդում տվեց Լիահոնայի միջոցով: Այս դասը կօգնի ձեզ ճանաչել և հետևել Տիրոջ առաջնորդությանը ձեր կյանքում:

Ուսանողների ուղղորդում՝ անձնական հայտնություն որոնելու հարցում: Ուսանողներին օգնեք հավատալ, որ Սուրբ Հոգին կարող է ուսուցանել և կատարելագործել նրանց: Խրախուսեք նրանց աղոթքով դիմել Երկնային Հորը և խնդրել, որ Հոգին ուսուցանի իրենց:

Ուսանողի նախապատրաստում. ուսանողներին առաջարկեք նկատել, թե օրվա ընթացքում ինչ ձևերով է Տերն առաջնորդում և ուղղորդում իրենց:

Հնարավոր ուսումնական վարժություններ

Ուղեցույց անապատում

Ստորև ներկայացվող վարժության նպատակն է օգնել ուսանողներին ծանոթանալ Լեքիի այն փորձառությանը, որը նրան տրվեց Լիահոնան: Որպես այլընտրանք ուսանողները կարող են իրենց համար պատկերել այն, ինչ արդեն գիտեն Լիահոնայի մասին, ապա՝ այդ տեղեկություններն ըստ անհրաժեշտության օգտագործել՝ իրենց ընկալումը մեծացնելու համար:

Ուսումնասիրեք հրաշագործ գործիքի մի քանի նկար, որը նրան տրվել էր Երուսաղեմից իր ընտանիքը հանելուց կարճ ժամանակ անց:

• Ի՞նչ գիտեք այս նկարներում պատկերված առարկայի մասին (տես 1 Նեփի 16.10):

• Ո՞րն էր դրա նպատակը:

Անհրաժեշտության դեպքում օգտագործեք ստորև ներկայացվող տեսանյութը, որը կօգնի ուսանողներին հասկանալ, թե ինչ է Լիահոնան: Նաև օգտակար կլինի դիտել «Տերը տալիս է Լիահոնան» տեսանյութը (3:02), որը հասանելի է ChurchofJesusChrist.org կայքում:

Երբ Տերն ուղղորդեց Լեքիին ճամփորդելու դեպի անապատ, նա արթնացավ, որպեսզի գտնի Տիրոջ տված հրաշք գործիքը: Լիահոնան «երկու սլաքով արույրե մի գունդ էր, որը Լեքիին և նրա հետևորդներին ուղղություն էր ցույց տալիս, ինչպես կողմնացույցը, ու նաև հոգևոր ցուցումներ էր տալիս, երբ նրանք արդար էին» (Սուրբ գրքերի ուղեցույցը, «Լիահոնա», scriptures.ChurchofJesusChrist.org):

Պատկերացրեք, որ մի առավոտ արթնացել եք ու ձեր դռան մոտ Լիահոնայի նման մի գործիք եք գտել, որը կարող եք օգտագործել օրվա ընթացքում ուղղորդում ստանալու համար:

Կարող եք տալ ստորև ներկայացված հարցերը, նշելով ուսանողների պատասխանները, որպեսզի հետո վերադառնաք դրանց, երբ ուսանողներն ուսումնասիրեն, թե ինչո՞վ է Լիահոնան նման Սուրբ Հոգուն:

• Ի՞նչը կարող էր այլ կերպ լիներ ձեր կյանքում, եթե Լիահոնայի նման մի բան ունենայիք, որն ուղղորդեր ձեզ:

• Այս պահին ինչպիսի՞ հանգամանքներ կան ձեր կյանքում, որոնց համար լրացուցիչ ուղղորդում կամ առաջնորդում կցանկանայիք:

Տասներկու Առաքյալների Քվորումից երեց Դեյվիդ Ա. Բեդնարը մի պատճառ է նկարագրել, որի համար պետք է ավելի լավ հասկանանք Լիահոնայի աշխատանքը: Նկատի առեք, որ «տեսակ և ստվեր» արտահայտությունը վերաբերում է ինչ-որ բան ներկայացնող առարկաներին, իրադարձություններին, պատմություններին կամ մարդկանց:

Մորմոնի Գրքում ներկայացված Լիահոնայի նկարագրությունը, որը Լեքիի և նրա ընտանիքի կողմից անապատի իրենց ճամփորդության ընթացքում օգտագործված ուղեցույցը կամ կողմնացույցն էր, հատուկ ներառվել է հիշատակարանում՝ որպես մեր օրվա տեսակ և ստվեր, և որպես կարևոր դաս այն մասին, թե ինչ պետք է անենք, որպեսզի վայելենք Սուրբ Հոգու օրհնությունները (Դեյվիդ Ա. Բեդնար, «Թող Նրա Հոգին միշտ մեզ հետ լինի», Ensign կամ Լիահոնա, մայիս 2006թ., 30):

Նմանություններ Լիահոնայի և Սուրբ Հոգու միջև

Ձեր օրագրում ստորև ներկայացվածի օրինակով մի աղյուսակ կազմեք: Կարող եք թվարկել Լիահոնայի և Սուրբ Հոգու միջև ձեր իմացած նմանություններից մի քանիսը: Ուսումնասիրելու ընթացքում մտածեք, թե սովորածից ինչն է օգնում ձեզ ավելի լավ հասկանալ Սուրբ Հոգուն, և ինչպես կարող եք ավելի լավ օգտագործել այս պարգևը ձեր կյանքում:

Լիահոնայի բնութագրիչները	Նմանությունները Սուրբ Հոգու հետ
Լիահոնայի բնութագրիչները	Նմանությունները Սուրբ Հոգու հետ

Կարող եք նմանատիպ աղյուսակ ցուցադրել և ուսանողներին առաջարկել գրի առնել սովորածը՝ պատրաստելով նրանց քննարկելու իրենց բացահայտումները:

Կարդացեք սուրբ գրությունների ստորև ներկայացվող հղումները և ձեր աղյուսակի ձախ սյունակում գրանցեք մանրամասներ Լիահոնայի մասին: Օրինակ՝ ինչպես է աշխատում Լիահոնան, ինչու էր այն տրամադրվել, և ինչ տեղի ունեցավ, որի պատճառով այն դադարեց աշխատել: Ապա աղոթքով մտածեք, թե Լիահոնայի վերաբերյալ այս մանրամասներն ինչ կապ ունեն կամ ինչով են խորհրդանշում Սուրբ Հոգու աշխատանքը: Ձեր աղյուսակի աջ սյունակում գրանցեք նմանությունները: Օրինակ՝ 1 Նեփի 16.10 հատվածում իմանում ենք, որ Լիահոնան ցույց էր տալիս այն ճանապարհը, որը Լեքին և նրա ընտանիքը պետք է անցնեին անապատով: Նույն կերպ Սուրբ Հոգին կարող է ցույց տալ այն ուղղությունը, որով մենք պետք է գնանք մեր կյանքում:

Որոշեք, թե ինչպես ավելի օգտակար կլինի ուսանողների համար կարդալ սուրբ գրությունները՝ ինքնուրույն, զույգերով, թե փոքր խմբերով: Կարող եք սենյակում Լիահոնայի յոթ նկար կախել, որոնցից յուրաքանչյուրի վրա փակցված կլինի ստորև ներկայացված սուրբ գրությունների հղումներից մեկը: Ուսանողները կարող են շրջել սենյակում, ուսումնասիրել տարբեր նկարներն ու իրենց աղյուսակներում գրի առնել Լիահոնայի մասին ուսմունքները: Ուսանողները կարող են վերադառնալ իրենց տեղերը և ինքնուրույն խորհել Լիահոնայի և Սուրբ Հոգու միջև նմանությունների մասին:

• 1 Նեփի 16.10

• 1 Նեփի 16.15–16

• 1 Նեփի 16.18–20, 25–27

• 1 Նեփի 16.28

• 1 Նեփի 16.29

• 1 Նեփի 18.8–13, 21–22

• Ալմա 37.38–42

Ուսանողներին առաջարկեք կիսվել ուսումնառության ընթացքում Սուրբ Հոգու մասին սովորած ճշմարտություններով: Նրանց բացահայտած ճշմարտությունների օրինակներ են. երբ լսենք Սուրբ Հոգու հուշումները, Տերը կարող է առաջնորդել մեզ մեր կյանքում. Սուրբ Հոգին մեր կյանքում գործում է մեր հավատքին, ջանասիրությանը և նրա նկատմամբ ունեցած ուշադրությանը համապատասխան, և Սուրբ Հոգին մեզ հասկացողություն է տալիս Տիրոջ ուղիների վերաբերյալ:

Եթե աղյուսակը ցուցադրվել է դասարանում, կարող եք ուսանողներին առաջարկել լրացնել Լիահոնայի մասին իմացածը: Հետո կարող եք միասին քննարկել, թե այդ ճշմարտություններն ինչպես են առնչվում Սուրբ Հոգու պարգևը հասկանալու և օգտագործելու հետ:

• Ե՞րբ եք դուք կամ ուրիշները զգացել Սուրբ Հոգու մասին այս ճշմարտություններից մեկը կամ մի քանիսը:

• Սուրբ Հոգու ուղղորդումը ճանաչելը և դրան հետևելը ինչպե՞ս կարող է ազդել Երկնային Հոր և Հիսուս Քրիստոսի հետ ձեր կապի վրա:

Մի պահ մտածեք, թե Սուրբ Հոգուց առաջնորդություն ստանալու ինչ կարողության ունեք, և ինչպես է այն ազդում ձեր կատարած ընտրությունների վրա: Կարող եք գրի առնել ձեր բոլոր մտքերը կամ տպավորությունները:

Եթե ուսանողներին Սուրբ Հոգու ուղղորդումը ճանաչելու և դրան հետևելու համար լրացուցիչ օգնություն է անհրաժեշտ, դասի վերջում ներկայացրեք «Բացատրական և պատմական տեղեկություններ» բաժնի հայտարարությունները: Բացի այդ, եթե ժամանակը թույլ տա, և եթե օգտակար լինի ուսանողների համար, կարող եք օգտագործել «Օժանդակ ուսումնական վարժություններ» բաժինը:

Վկայություն բերեք, թե ինչ կարևորություն ունի Սուրբ Հոգու ուղղորդումը մեր կյանքում: Ուսանողները կարող են կիսվել նաև իրենց վկայությամբ և փորձով:

Բացատրական և պատմական տեղեկություններ

Ինչո՞վ է Լիահոնան նման Սուրբ Հոգուն:

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Ճիշտ այնպես, ինչպես Լեքին էր օրհնվել հին ժամանակներում, մեզնից յուրաքանչյուրին մեր օրերում հոգևոր կողմնացույց է տրվում, որը կարող է ուղղորդել և հրահանգել մեզ մեր մահկանացու կյանքի ընթացքում: …

Երբ մեզնից յուրաքանչյուրն առաջ է շարժվում կյանքի արահետով, մենք առաջնորդվում ենք Սուրբ Հոգով ճիշտ այնպես, ինչպես Լեքին էր առաջնորդվում Լիահոնայի օգնությամբ: …

Սուրբ Հոգին գործում է մեր կյանքում նույնքան ճշգրիտ, որքան Լիահոնան Լեքիի և նրա ընտանիքի համար՝ համաձայն մեր հավատքի, ջանասիրության և ուշադրության (Դեյվիդ Ա. Բեդնար, «Թող Նրա Հոգին միշտ մեզ հետ լինի», Ensign կամ Լիահոնա, մայիս 2006թ., 30–31):

Ինչպե՞ս կարող եմ ավելի լավ ճանաչել Սուրբ Հոգուն իմ կյանքում

Տասներկու Առաքյալների Քվորումի նախագահ Բոյդ Ք. Փաքերն (1924–2015) ուսուցանել է.

Հոգին մեր ուշադրությունը չի գրավում՝ աղաղակելով կամ մեր ուսերից բռնած ուժգին թափահարելով։ Դրա փոխարեն նա շշնջում է։ Նա այնքան քնքշորեն է մոտենում մեզ, որ եթե մտազբաղ լինենք, կարող ենք ընդհանրապես չնկատել նրան: …

Երբեմն Նրա ներգործությունը բավական է լինում մեր ուշադրությունը գրավելու համար: Սակայն հիմնականում, եթե ուշադրություն չենք դարձնում մեղմ զգացողությանը, Հոգին հեռանում և սպասում է, մինչև մենք կգանք՝ փնտրելով և լսելով և մեր ձևով ասելով, ինչպես Սամուելը հին ժամանակներում․ «Խօսիր [Տեր], որովհետեւ քո ծառան լսում է» (Ա Թագավորաց 3.10) (Բոյդ Ք. Փաքեր, «Տիրոջ մոմը», Ensign, հունվար 1983թ., 53):

Օժանդակ ուսումնական վարժություններ

Այլ նմանություններ Լիահոնայի հետ

Ուսանողներին առաջարկեք Սուրբ Հոգուց բացի այլ գործիքներ բացահայտել, որոնք Տերն օգտագործում է մեզ առաջնորդելու համար: Օրինակ՝ հայրապետական օրհնությունները, սուրբ գրությունները և խորհուրդը ծնողներից կամ Եկեղեցու ղեկավարներից: Ուսանողները կարող են քննարկել, թե այս լրացուցիչ աղբյուրներն ինչով են նման Լիահոնային:

Լիահոնան և հայրապետական օրհնությունները

Եթե հայրապետական օրհնությունների մասին քննարկումն օգուտ կտա ուսանողներին, կարող եք օգտագործել «Հայրապետական օրհնություններ» բաժնում ներկայացված տեղեկությունները (Ավետարանական թեմաներ, topics.ChurchofJesusChrist.org):

Նախագահ Թոմաս Ս. Մոնսոնի (1927–2018) և «Երիտասարդ կանայք» կազմակերպության գլխավոր նախագահ Բոննի Հ․ Քորդոնի հայտարարությունները նույնպես կարող են օգտակար լինել:

Նույն Տերը, որը Լեքիին տվեց Լիահոնան, ձեզ և ինձ այսօր բացառիկ և արժեքավոր պարգև է տալիս, որ ուղղորդի մեզ կյանքում, որ նշի վտանգները՝ մեր ապահովության համար, և գծագրի ուղին, նույնիսկ ապահով անցումը ոչ թե դեպի ավետյաց երկիր, այլ դեպի մեր երկնային տուն: Պարգևը, որի մասին ես խոսում եմ, հայտնի է որպես ձեր հայրապետական օրհնություն: …

… Ձեր օրհնությունը չպետք է ծալել և պահել: Այն չպետք է շրջանակի մեջ դնել կամ հրապարակել: Այլ այն պետք է կարդալ: Այն պետք է սիրել: Դրան պետք է հետևել: Ձեր հայրապետական օրհնությունը կառաջնորդի ձեզ մութ գիշերով: Այն կուղեկցի ձեզ կյանքի դժվարությունների ժամանակ: … Ձեր հայրապետական օրհնությունը ձեր անձնական Լիահոնան է, որը կգծի ձեր ուղին և կլինի ձեր ուղեցույցը (Թոմաս Ս. Մոնսոն, «Ձեր հայրապետական օրհնությունը. Լույսի Լիահոնան», Ensign, նոյեմբեր 1986թ., 65–66):

Գտեք ձեր հայրապետական օրհնությունը, անհրաժեշտության դեպքում մաքրեք փոշին, բայց հաճախ ուսումնասիրեք այն: Եթե չունեք հայրապետական օրհնություն, ստացեք այն առանց հապաղելու: Մի հապաղեք պարզել, թե Տերն ինչ է ցանկանում ասել ձեզ հիմա այն մասին, թե ով եք դուք: (Բոննի Գ․ Քորդոն, «Եկեք Քրիստոսի մոտ և մենակ մի եկեք», Լիահոնա, նոյեմբեր 2021, 10):

Եթե ուսանողները չեն ստացել իրենց հայրապետական օրհնությունը, կարող եք առաջարկել նրանց աղոթքով ստանալ օրհնությունը և քննարկել այն ծնողների կամ Եկեղեցու առաջանորդների հետ: