1 Nephi 16–17

Pagkilos nang may Pananampalataya sa Mahihirap na Sitwasyon

Paggawa sa sasakyang-dagat

Isipin ang mga hamong kinaharap ni Lehi at ng kanyang pamilya matapos lisanin ang Jerusalem at habang naninirahan sa ilang. Ang paraan ng pagtugon ni Nephi sa kanyang mga hamon ay nagbibigay sa atin ng halimbawa kung paano tutugon sa sarili nating mga pagsubok sa buhay. Ang lesson na ito ay makatutulong sa iyo na matutuhan kung paano ihalintulad ang mga banal na kasulatan sa iyong sarili at harapin ang mga hamon nang may pananampalataya.

Pagtulong sa mga estudyante na magkaroon ng mga kasanayan sa pag-aaral. Upang matulungan ang mga estudyante na magtagumpay sa kanilang pag-aaral ng mga banal na kasulatan, gabayan sila sa iba’t ibang kasanayan at pamamaraan sa pag-aaral ng mga banal na kasulatan. Pumili ng mga kasanayan at pamamaraan na nakatuon sa pagtulong sa mga estudyante na maanyayahan ang Espiritu sa kanilang pag-aaral, mas maunawaan ang mga banal na kasulatan, at maipamuhay ang mga alituntunin ng ebanghelyo.

Paghahanda ng estudyante: Ipabasa sa mga estudyante ang 1 Nephi 19:23 at pag-isipan kung ano ang ibig sabihin ng ihalintulad ang mga banal na kasulatan sa ating sarili.

Mga Posibleng Aktibidad sa Pag-aaral

Paghahanap ng kahalagahan ng mga banal na kasulatan

Layunin ng sumusunod na tulungan ang mga estudyante na pag-isipan ang kahalagahan ng paghahalintulad ng mga banal na kasulatan sa kanilang buhay. Maaaring magandang pagkakataon ito upang kumustahin ang kanilang personal na pag-aaral ng mga banal na kasulatan. Bilang kapalit ng sitwasyon, maaari kang magsimula sa pagtatanong ng, “Ano ang ilang bagay na kadalasang inaalala ng mga tinedyer sa pagbabasa ng mga banal na kasulatan?”

Isipin na kunwari ay may nagsabi sa iyo na sa palagay niya ay sayang ang oras niya sa pagbabasa ng mga banal na kasulatan. Nadama niya na hindi kapaki-pakinabang ang mga banal na kasulatan para sa mga hamon at isyu sa ating panahon.

• Paano mo kaya sasagutin ang alalahanin niya?

Pag-isipan ang sarili mong pag-aaral ng mga banal na kasulatan at ang kahalagahan at silbi ng mga banal na kasulatan sa iyong buhay. Isipin ang mga bagay na nagpahirap na gawing makabuluhan ang mga banal na kasulatan at ang anumang bagay na nakatulong sa iyo na madaig ang mga balakid na ito.

Upang matulungan ang kanyang mga kapatid na matuto mula sa mga banal na kasulatan at gamitin ang mga ito sa kanilang panahon, nagturo ang propetang si Nephi ng isang mahalagang aral na makatutulong din sa ating pag-aaral ng mga banal na kasulatan.

Basahin ang 1 Nephi 19:23, at alamin kung ano ang itinuro ni Nephi.

• Paano mo ilalarawan sa sarili mong mga salita ang katotohanang itinuro ni Nephi?

Ihalintulad ang mga banal na kasulatan sa ating sarili

Ang isang katotohanan na maaaring natukoy mo sa talatang ito ay kapag inihalintulad natin ang mga banal na kasulatan sa ating sarili, matututo at makikinabang tayo mula sa mga ito.

• Ano ang alam mo tungkol sa paghahalintulad ng mga banal na kasulatan?

• Ano ang mga naging karanasan mo sa paghahalintulad ng mga banal na kasulatan?

• Ayon sa talata 23, ano ang layunin ni Nephi sa pagbabasa at paghahalintulad ng mga salita ni Isaias?

• Paano makatutulong sa iyo ang paghahalintulad ng mga banal na kasulatan upang mas lubos mong makilala at paniwalaan si Jesucristo?

Ang ibig sabihin ng ihalintulad ang mga banal na kasulatan ay iugnay ang nakatala sa mga ito sa ating sariling buhay.

Ang sumusunod na proseso ay makatutulong sa iyo sa mga pagsisikap mo na ihalintulad ang mga banal na kasulatan sa iyong buhay. Isulat ang mga hakbang na ito sa iyong study journal.

Ipakita ang mga sumusunod na hakbang upang matingnan ito ng mga estudyante sa buong lesson.

1. Maghanap ng mahahalagang detalye.

2. Ikumpara sa iyong buhay.

3. Tumuklas ng mahahalagang aral.

4. Tukuyin kung paano personal na ipamumuhay ang mga aral.

Sa lesson na ito, magkakaroon ka ng mga pagkakataong magsanay na ihalintulad ang mga banal na kasulatan sa iyong buhay habang pinag-aaralan mo ang ilang pangyayaring naganap sa pamilya ni Lehi sa ilang.

Nabali ni Nephi ang kanyang busog o pana

Layunin ng sumusunod na gabayan ang mga estudyante sa paghahalintulad ng mga banal na kasulatan at ihanda sila na gawin ito nang mag-isa kalaunan sa lesson.

Hakbang 1: Maghanap ng mahahalagang detalye

Magsanay na gawin ang hakbang na ito sa pamamagitan ng pag-aaral ng 1 Nephi 16:17–25, 30–32 at paghahanap ng mahahalagang detalye. Maaaring kabilang sa mga detalyeng ito ang mga tao, lugar, bagay, kilos, o pangyayari. Maaari mo ring panoorin ang “Pinatnubayan ng Panginoon ang Paglalakbay ni Lehi,” na matatagpuan sa SimbahanniJesucristo.org, mula sa time code na 5:33 hanggang 16:18 bilang bahagi ng iyong pag-aaral.

• Anong mahahalagang detalye ang nahanap mo?

Maaaring kasama sa mga napansin mong mga detalye ang pagkabali ng busog o pana ni Nephi; ang pagbulung-bulong nina Lehi, Laman, Lemuel, at ng mga anak na lalaki ni Ismael; ang paggawa ni Nephi ng bagong busog o pana; at pagpunta ni Nephi sa kanyang ama para magtanong kung saan siya patutungo para kumuha ng pagkain.

Nabali ni Nephi ang kanyang busog o pana

Hakbang 2: Ikumpara sa iyong buhay

Isipin ang mga aspeto ng iyong buhay na may kaugnayan sa mga detalyeng natukoy mo sa naunang hakbang. Maaaring makatulong sa iyo ang sumusunod na tanong para magawa ito:

• Anong mga sitwasyon sa buhay ko ang katulad ng mga sitwasyon sa mga talatang ito?

Maaaring naikumpara mo ang pagkabali ng busog o pana ni Nephi sa mga di-inaasahang paghihirap sa iyong buhay. Maaaring naikumpara mo na rin ang mga salita at ginawa ni Nephi at ng kanyang mga kapamilya sa mga reaksyon ng mga tao kapag naharap sa mahihirap na sitwasyon.

Hakbang 3: Tumuklas ng mahahalagang aral

Isipin ang natutuhan mo mula sa mga banal na kasulatan na maaaring angkop sa iyo. Maaari mo ring isipin ang natutuhan mo tungkol sa Tagapagligtas.

• Ano ang ilang aral na natutuhan mo mula sa salaysay tungkol sa pagkabali ng busog o pana ni Nephi at sa paggawa Niya nito na magagamit mo sa iyong buhay?

• Ano ang itinuturo sa iyo ng salaysay na ito tungkol kay Jesucristo?

Ang isang katotohanan na maaaring natukoy mo mula sa salaysay na ito ay kung magsisikap tayo at hihingi ng patnubay sa Panginoon, tutulungan Niya tayo sa ating mga paghihirap.

Hakbang 4: Tukuyin kung paano personal na ipamumuhay ang mga aral

• Tukuyin kung paano personal na ipamumuhay ang mga aral sa pamamagitan ng pagninilay-nilay sa sarili mong buhay.

• Ano ang ilang paraan na maipamumuhay mo ang katotohanang ito?

Bukod sa maraming paraan upang maipamuhay ang katotohanang ito, maaari mong isipin kung paano mo matutularan ang halimbawa ni Nephi kapag nakaranas ka ng mga di-inaasahang hamon o para bang wala nang pag-unlad ang buhay mo. Sa halip na bumulung-bulong o huwag gumawa ng kahit ano, maaari kang magkusa at sumulong nang may pananampalataya at pagtitiwala na tutulungan ka ni Jesucristo.

• Paano nakatulong sa iyo ang pagsunod sa huwarang ito sa pag-aaral upang mahanap mo ang kahalagahan ng salaysay ng banal na kasulatan na ito?

Iniutos kay Nephi na gumawa ng isang sasakyang-dagat

Layunin ng sumusunod na tulungan ang mga estudyante na gamitin ang kasanayan sa paghahalintulad ng mga banal na kasulatan nang mag-isa. Hikayatin ang mga estudyante na magsanay muna nang mag-isa. Pagkatapos ay maaaring magpartner-partner o magtipon sa maliliit na grupo ang mga estudyante upang ibahagi ang nalaman nila.

Patingnan sa mga estudyante ang apat na hakbang na ipinakita kanina sa lesson upang magamit nila ang mga ito habang gumagawa sila nang mag-isa.

Matapos maglakbay sa ilang nang walong taon, si Lehi at ang kanyang pamilya ay nakarating sa isang lupain sa tabi ng dalampasigan, na kanilang pinangalanang Masagana dahil sagana ito sa mga bungang-kahoy at pulut-pukyutan (tingnan sa 1 Nephi 17:4–6).

Basahin ang 1 Nephi 17:5–20, 48–55; 1 Nephi 18:1–4, gamitin ang apat na hakbang na tinalakay kanina upang tulungan kang ihalintulad ang salaysay na ito sa iyong buhay. Maaari mo ring panoorin ang video na “Iniutos ng Panginoon kay Nephi na Gumawa ng Isang Sasakyang-dagat” mula sa time code na 0:00 hanggang 12:07, na matatagpuan sa SimbahanniJesucristo.org. Hayaang gabayan ng Espiritu ang iyong mga iniisip at pag-aaral. Tumigil nang madalas upang pag-isipan kung paano maihahalintulad ang natutuhan mo sa mga partikular na sitwasyon sa iyong buhay. Itala ang mga impresyong matatanggap mo.

Sabihin sa mga estudyante na ibahagi ang nalaman nila mula sa bawat isa sa apat na hakbang. Maaari mo ring ibahagi kung paano nakaimpluwensya sa iyong pag-aaral ng mga banal na kasulatan ang paghahalintulad ng mga banal na kasulatan sa iyong buhay.

Komentaryo at Pinagmulang Impormasyon

Bakit mahirap para kay Nephi ang paggawa ng sasakyang-dagat?

Itinuro ni Elder David A. Bednar ng Korum ng Labindalawang Apostol:

Elder David A. Bednar

Si Nephi ay hindi isang marinero. Siya ay lumaki sa Jerusalem, isang lungsod na malayo sa karagatan, at hindi sa mga hangganan ng Dagat ng Mediterania. Tila wala siyang gaanong alam dito o hindi niya alam gamitin ang mga kagamitan at walang mga kasanayan sa paggawa ng sasakyang-dagat. Maaaring hindi pa siya nakakita ng isang sasakyang-dagat na naglalayag sa karagatan. At, pagkatapos, si Nephi ay inutusan at tinagubilinan na gumawa ng isang bagay na hindi pa niya nagawa noon. (David A. Bednar, “Learning to Love Learning,” Ensign, Peb. 2010, 28)

1 Nephi 17:45. Ano ang ibig sabihin ng maging “manhid”?

Itinuro ni Pangulong James E. Faust (1920–2007) ng Unang Panguluhan:

Pangulong James E. Faust

Gayunman … napupunta tayo sa lugar na walang signal ang cellphone. Nangyayari ito kapag ang gumagamit ng cellphone ay nasa tunnel o kuweba, o may iba pang sagabal.

Gayon din sa pakikipag-ugnayan sa Diyos. … Siguro’y may ilang bagay sa buhay na humahadlang sa atin para marinig ang mensahe dahil tayo’y “manhid” [1 Nephi 17:45]. Kadalasan tayo’y nasa lugar na patay sa espirituwal [spiritual dead spots]—mga lugar at sitwasyong hadlang sa mga banal na mensahe. Kabilang sa mga ito ang galit, pornograpiya, kasalanan, pagkamakasarili, at mga sitwasyong hindi angkop sa Espiritu. (James E. Faust, “Nakuha Ba Ninyo ang Tamang Mensahe?,” Liahona, Mayo 2004, 67)

Mga Karagdagang Aktibidad sa Pag-aaral

Mga karagdagang aral mula sa nabaling busog o pana

Pag-isipang tulungan ang mga estudyante na tumukoy ng mga karagdagang aral mula sa pagkabali ng pana. Ang isang paraan upang magawa ito ay bigyang-diin na bukod pa kina Laman at Lemuel na bumulung-bulong din, bumulung-bulong din si Amang Lehi. Sabihin sa mga estudyante na alamin kung ano ang hindi ginawa ni Nephi sa sitwasyong ito (hindi niya pinuntahan ang kanyang ama, hindi niya pinayuhan ito, hindi niya ipinahiya ito, o sinabihan ito na magsisi, sapagkat hindi iyon ang responsibilidad ni Nephi) at ano ang ginawa niya (hiniling niya kay Lehi na itanong sa Panginoon kung saan Niya nais na mangaso siya para makakuha ng pagkain). Ano ang matututuhan natin mula sa pananaw na ito? Paano ito naaangkop sa ating kaugnayan sa mga inordenang lingkod ng Panginoon sa ating panahon?

Paghahalintulad sa mga anak ni Israel

Habang itinatama ang kanyang mga kapatid, inihalintulad ni Nephi ang karanasan ni Moises at ng mga anak ni Israel sa sitwasyon ng kanyang pamilya. Maaari mong ipabasa sa mga estudyante ang mga salita ni Nephi sa 1 Nephi 17:21–47, at hanapin ang mga pagkakatulad ng dalawang karanasang iyon. Anong mga pagkakatulad ang matutukoy ng mga estudyante sa dalawang salaysay na ito at sa sarili nilang buhay? Bakit maaaring lalong makatulong sa ating panahon ang pag-alaala sa dalawang karanasang ito?

Pinalakas ng Panginoon

Maaaring makinabang ang mga estudyante sa pagtalakay sa 1 Nephi 17:3. Maaari mong anyayahan ang isang boluntaryo na basahin ang talatang ito at sabihin sa mga estudyante na tumukoy ng isang katotohanan na itinuro dito. Maaaring tumukoy ang mga estudyante ng isang bagay na katulad ng sumusunod: Kung susundin natin ang mga kautusan, tayo ay palalakasin ng Panginoon at magbibigay Siya ng paraan upang magawa natin ang iniuutos Niya.

Sabihin sa mga estudyante na mag-isip o maghanap ng katibayan ng alituntuning ito sa salaysay tungkol kay Lehi at sa kanyang pamilya. Sabihin sa kanila na mag-isip ng katibayan ng katotohanang ito sa kanilang sariling buhay.