1 Nefi 19–22

“Ata Mund të Harrojnë, por Unë Nuk do të të Harroj”

Bariu i mirë

Si ndihesh kur të kujton dikush që është i rëndësishëm për ty? Ndërkohë që jepte mësim rreth shpërndarjes dhe mbledhjes së Izraelit, Nefi i përdori profecitë e Isaias për të treguar se Zoti nuk do ta harronte shtëpinë e shpërndarë të Izraelit. Ky mësim ka për qëllim të të ndihmojë të ndiesh dashurinë e Zotit për ty dhe për të gjithë njerëzit dhe dëshirën e Tij për të të mbledhur pranë Vetes.

Ftesë për nxënësit që të flasin. Gjeni çaste në mësim kur mund t’i nxitni nxënësit të përsiatin ndjenjat e tyre për diçka dhe më pas kërkojuni atyre të shprehin atë që ndiejnë ose t’i shkruajnë ndjenjat e tyre dhe më pas t’i tregojnë ato. Po t’u jepni nxënësve një mundësi për t’i thënë me gojë mendimet dhe ndjenjat, kjo do t’i ndihmojë ata të ndihen më të sigurt te vetja për të shprehur dëshminë.

Përgatitja e nxënësve: Merrni parasysh t’u kërkoni nxënësve të vijnë gati për të thënë dy a tri fjalë që do të përdornin për të përshkruar se çfarë ndien Jezu Krishti kundrejt tyre.

Veprimtari të Mundshme të të Mësuarit

Dashuria e Shpëtimtarit për ne

Merrni parasysh ta filloni orën mësimore duke kënduar një këngë që lidhet me dashurinë që ka Jezu Krishti për ne, si për shembull “Dashuria e Shpëtimtarit Tonë” (music.ChurchofJesusChrist.org). Nxënësit mund të ftohen të tregojnë fjalë ose fraza nga kënga që u bëjnë përshtypje.

Ka raste kur secili prej nesh mund ta dallojë dhe ndiejë dashurinë e Perëndisë në jetën tonë, por në raste të tjera mund të mos e dallojmë fare atë. Imagjino sikur po flet me një shoqe që të tha se ajo nuk është e sigurt që Perëndia e do.

• Çfarë mund t’i tregosh nga shkrimet e shenjta që mund ta ndihmojë shoqen tënde?

• Çfarë përvojash mund t’i tregosh shoqes sate rreth mënyrës se si ke arritur ta njohësh dhe ndiesh dashurinë e Atit Qiellor dhe Jezu Krishtit?

Jepuni nxënësve pak kohë në klasë për të bërë sa vijon. Ftojini nxënësit të shënojnë disa nga mendimet ose pyetjet e tyre në një ditar studimi dhe kërkoni përgjigje gjatë mësimit.

Përsiati ndjenjat e tua rreth dashurisë së Perëndisë për ty, përfshirë çdo pyetje ose shqetësim që mund të kesh. Ndërsa studion, kërko për të vërteta që mund të të ndihmojnë ta kuptosh më mirë dhe ta ndiesh dashurinë që Ati Qiellor dhe Jezu Krishti kanë për ty.

Nefi jep mësim rreth dashurisë së Shpëtimtarit për ne

Te 1 Nefi 19, Nefi profetizoi për jetën dhe misionin e ardhshëm të Jezu Krishtit. Lexo te 1 Nefi 19:7–10, duke kërkuar atë që Nefi dha mësim rreth mënyrës se si Jezu Krishti do të trajtohej gjatë kohës së Tij në tokë dhe pse Ai do të ishte i gatshëm të trajtohej në këtë mënyrë.

• Çfarë fjalësh apo frazash të bëjnë më shumë përshtypje nga këto vargje? Përse?

• Si mund të ndikojë të kuptuarit e mësimeve në këto vargje te ndjenjat e tua për Atin Qiellor dhe Jezu Krishtin?

Përmblidheni paragrafin vijues ose ftojeni një nxënës t’ia tregojë atë klasës.

Pasi i shënoi profecitë e tij rreth Jezu Krishtit, Nefi tregoi profeci nga profeti i Dhiatës së Vjetër, Isaia rreth shpërndarjes dhe mbledhjes së Izraelit. Këto profeci qenë të rëndësishme për Nefin dhe familjen e tij, që ishin shpërndarë nga vendlindja e tyre, Jerusalemi, për shkak të ligësisë së njerëzve që jetonin në zonë. Profecitë e Isaias treguan se shumë nga izraelitët do të ndiheshin të harruar nga Zoti në gjendjen e tyre të shpërndarë.

Lexo te 1 Nefi 21:14–16 dhe kërko fjalët e Zotit për ata që do të ndiheshin të harruar.

Nëse nxënësve u duhet ndihmë për frazën “muret e tua janë vazhdimisht përpara meje” (1 Nefi 21:16), mund të shpjegoni se kjo frazë tregon se Zoti bën gjithmonë rojë për popullin e Tij dhe po e mbron atë.

• Si e sheh të manifestohet dashuria e Shpëtimtarit në këto vargje?

• Cila është një e vërtetë që mund të thuash rreth Jezu Krishtit në bazë të asaj që ke mësuar deri më sot?

  Një e vërtetë që nxënësit mund të përcaktojnë është se Zoti na do dhe nuk do të na harrojë. Merreni parasysh ta shkruani këtë të vërtetë në tabelë.

• 1 Nefi 22:9–12

• 1 Nefi 22:24–25

• 3 Nefi 22:7–8

• Cilat janë disa situata që mund t’ua bëjnë të vështirë disa njerëzve që ta besojnë këtë të vërtetë?

• Çfarë mund të na ndihmojë ta dallojmë më mirë dhe ta ndiejmë dashurinë që ka Jezu Krishti për ne?

Dashuria e Shpëtimtarit manifestohet nga gatishmëria e Tij për të mbledhur njerëzit pranë Vetes

Njerëzit e Izraelit të lashtë shpërndaheshin sa herë që ndalonin ta adhuronin Jehovën dhe i shkelnin besëlidhjet dhe urdhërimet e Perëndisë (shih te 2 Nefi 6:10–11; 10:3–6). Populli i Izraelit mblidhet kur ata vijnë te Krishti, e pranojnë ungjillin e Tij nëpërmjet pagëzimit dhe i zbatojnë urdhërimet e Tij. Shpëtimtari i premtoi Izraelit të shpërndarë se Ai nuk do t’i harronte ata dhe se Ai do t’i mblidhte te vetja në ditët fundit (shih te 1 Nefi 15:13–14; 2 Nefi 6:11; 9:1–2; 10:7–8).

Studioji krerët e kapitujve te 1 Nefi 21 dhe 22 për ta kuptuar më mirë atë që Isaia po profetizon dhe po jep mësim në këta kapituj.

Studioji fragmentet vijuese të shkrimeve të shenjta rreth mbledhjes së Izraelit në ditët e mëvonshme. Kushtoju vëmendje fjalëve ose frazave që tregojnë dashurinë e Zotit për popullin e Tij.

Merrni parasysh t’i angazhoni nxënësit në këtë veprimtari studimi. Një mënyrë është ta shkruani çdo referencë të shkrimeve të shenjta në një letër shënimesh ose në një copë të vogël letre që të ketë mjaftueshëm për çdo nxënës në klasë. Ftojini nxënësit ta studiojnë vargun në letrën e tyre, të përcaktojnë atë që do të bëjë Zoti për ta mbledhur Izraelin dhe më pas ta këmbejnë letrën e tyre me një shok klase. Nxënësit mund t’i këmbejnë letrat disa herë.

• 1 Nefi 22:9–12

• 1 Nefi 22:24–25

• 3 Nefi 22:7–8

• Çfarë premtimesh bëri Zoti në këto vargje? Si e demonstrojnë këto premtime dashurinë e Tij për të gjithë njerëzit?

• Për çfarë shembujsh mund të mendosh në jetën tënde ose në jetën e të tjerëve kur Zoti i ka mbledhur njerëzit pranë Vetes?

Ftojini nxënësit të shprehin ndjenjat, përvojat dhe dëshmitë e tyre. Dëshmoni para nxënësve rreth dashurisë që Jezu Krishti ka për ata individualisht dhe për çdokënd në botë.

Komente dhe Informacion për Rrethanat

Kur mëkatoj, a jam i padenjë për dashurinë e Perëndisë?

Vëllai Bredli R. Uilkoks, i Presidencës së përgjithshme të Të Rinjve dha mësim:

Vëllai Bredli R. Uilkoks

“Mbajeni mend që ndryshimi është i mundur, pendimi është një proces dhe denjësia nuk është të jesh i patëmetë. Më e rëndësishmja, mbajeni mend që Perëndia dhe Krishti janë të gatshëm të na ndihmojnë pikërisht këtu dhe tani. …

Shumë njerëz janë lënduar nga marrëdhëniet e shkatërruara dhe të tensionuara sa është e vështirë për ta që të besojnë te dhembshuria dhe shpirtgjerësia e Perëndisë. Ata e kanë të vështirë ta shohin Perëndinë ashtu siç është – një Atë i dashur që takohet me ne në nevojën tonë dhe di se si t’u japë … gjëra të mira atyre që ia kërkojnë atij [3 Nefi 14:11]. Hiri i Tij nuk është një çmim vetëm për të denjët. Është ‘ndihma hyjnore’ që jep Ai, e cila na ndihmon të bëhemi të denjë. Nuk është një shpërblim vetëm për të drejtët. Është ‘dhurimi i forcës’ që Ai jep që na ndihmon të bëhemi të drejtë [Diter F. Uhtdorf, “Dhurata e Hirit”, Ensign ose Liahona, maj 2015, f. 107]. Ne nuk po ecim thjesht drejt Perëndisë dhe Krishtit. Ne po ecim me Ta.” (Bredli R. Uilkoks, “Denjësia Nuk Është të Jesh i Patëmetë”, Liahona, nëntor 2021, f.62, 67)

Pse Jezu Krishti do ta krahasonte Veten me një nënë?

Plaku Dejll G. Renland, i Kuorumit të Dymbëdhjetë Apostujve, dha mësim:

Plaku Dejll G. Renland

“Si përgjigje, Jehova pyeti: ‘A mund të harrojë një grua foshnjën e gjirit, që ajo të mos ketë mëshirë për birin e barkut të saj?’ Po aq e pamundur sa është që një nënë e dashur të harrojë foshnjën e saj, Jehova shpalli se përkushtimi i Tij ishte edhe më i palëkundur. Ai pohoi: ‘Po, ata mund të harrojnë, por unë nuk do të të harroj. … Vër re, unë të kam gdhendur në pëllëmbët e duarve të mia; muret e tua janë vazhdimisht përpara meje’ (1 Nefi 21:15–16). Për shkak se Jezu Krishti duroi flijimin e pafundmë shlyes, Ai i kupton përsosurisht ndjenjat tona [shih tek Alma 7:11–13]. Ai është gjithmonë i vetëdijshëm për ne dhe rrethanat tona.” (Dejll G. Renland, “Padrejtësia Ndërkryese”, Liahona, maj 2021, f. 43)

Si mund ta dallojmë dashurinë e Perëndisë për ne?

Motra Suzën H. Porter, e Presidencës së Përgjithshme të Fillores, tha:

Motra Suzën H. Porter

“Dashuria e Perëndisë nuk gjendet te rrethanat e jetës sonë, por te prania e Tij në jetën tonë. Ne e njohim dashurinë e Tij kur marrim forcë përtej forcës sonë dhe kur Shpirti i Tij sjell paqe, ngushëllim dhe udhëzim. Nganjëherë mund të jetë e vështirë ta ndiesh dashurinë e Tij. Ne mund të lutemi që t’i kemi sytë hapur për të parë dorën e Tij në jetën tonë dhe për të parë dashurinë e Tij në bukurinë e krijimeve të Tij.” (Suzën H. Porter, “Dashuria e Perëndisë: Më e Gëzueshmja për Shpirtin”, Liahona, nëntor 2021, f. 35)

Veprimtari Plotësuese të të Mësuarit

1 Nefi 19:18–19. Një qëllim i rëndësishëm i Librit të Mormonit

Te 1 Nefi 19:18–19, Nefi shpjegoi qëllimin e tij kryesor për krijimin e analit të tij. Merrni parasysh t’i ftoni nxënësit t’i lexojnë këto vargje dhe të kërkojnë atë që dha mësim Nefi rreth arsyes pse e krijoi analin e tij.

Merrni parasysh t’i ndihmoni nxënësit të kuptojnë se leximi i shkrimeve të shenjta është një mënyrë e fuqishme që ta kujtojmë Shpëtimtarin Jezu Krisht çdo ditë. Merrni parasysh të bëni një ose më shumë nga pyetjet vijuese si pjesë e këtij diskutimi:

• Si na ndihmon Libri i Mormonit që ta kujtojmë Jezu Krishtin?

• Mendo për një kohë kur u ndjeve më pranë Shpëtimtarit për shkak të studimit të shkrimeve të shenjta. Çfarë ndryshimi solli kjo te dita jote ose dëshmia jote?

• Çfarë ndryshimesh ndien se duhet të bësh në studimin tënd vetjak që të mund ta kujtosh më shumë Shpëtimtarin Jezu Krisht?

Veprimtaria e zbatimit

Në përfundim të mësimit, merrni parasysh të shpërndani thënien vijuese nga Plaku Gerit W. Gong, i Kuorumit të Dymbëdhjetë Aspotujve: “Shpëtimtari ynë na fton që gjithmonë ta kujtojmë Atë siç Ai përherë na kujton ne.” (“Gjithmonë Kujtojeni Atë”, Ensign ose Liahona, maj 2016, f. 110).

Ftojini nxënësit të marrin parasysh zgjedhjet që mund të bëjnë qëllmisht për ta kujtuar Atin Qiellor dhe Jezu Krishtin më shumë gjatë ditës ose javës së tyre.

1 Nefi 22:15–28. “Të drejtët nuk duhet të kenë frikë”

Nxënësit mund të përfitojnë nga një diskutim i mësimeve të Nefit në gjysmën e dytë te kapitullit 1 Nefi 22. Merrni parasysh t’u kërkoni nxënësve të diskutojnë arsye pse disa njerëz ndihen të frikësuar nga ngjarjet e ditëve të fundit. Shpjegoni se Nefi e mbylli librin e parë të tij duke shkruar mësime që mund t’u japin shpresë të drejtëve që jetojnë në ditët e fundit.

Ftojini nxënësit të lexojnë te 1 Nefi 22:15–28, duke kërkuar mësimet që mund të na ndihmojnë të ndiejmë shpresë dhe ta kapërcejmë frikën rreth të jetuarit në ditët e fundit. Ftojini nxënësit të japin mendimet dhe idetë e tyre.