1 Nefia 19–22

“Mety manadino ihany izy, fa Izaho kosa tsy mba manadino anao”

Ilay mpiandry ondry tsara

Inona no tsapanao rehefa tsaroan’ny olona iray izay manan-danja aminao ianao? Teo am-pampianarana momba ny fampielezana sy ny fanangonana an’i Isiraely, i Nefia dia nampiasa ireo faminanian’i Isaia mba hanehoana fa tsy hanadino ny mpianakavin’i Isiraely niely ny Tompo. Ity lesona ity dia natao hanampiana anao hahatsapa ny fitiavan’ny Tompo anao sy ny olon-drehetra ary ny faniriany hanangona anareo ao Aminy.

Manasa ny mpianatra hizara. Mitadiava fotoana ao amin’ny lesona ahafahanao mitarika ny mpianatra hisaintsaina ny fahatsapan’izy ireo momba ny zavatra iray, ary avy eo dia mangataka azy ireo hizara ny zavatra tsapan’izy ireo na hanoratra ny fahatsapan’izy ireo ary avy eo dia hizara. Ny fanomezana fahafahana ny mpianatra mba hamoahany am-bava ny eritreriny sy ny fahatsapany dia afaka manampy azy ireo hahatsapa ho matoky tena kokoa amin’ny fanehoana fijoroana ho vavolombelona.

Fanomanana ny mpianatra: Hevero ny hangataka ny mpianatra ho tonga efa vonona hizara teny roa na telo hampiasain’izy ireo hamaritana ny fahatsapan’i Jesoa Kristy momba azy ireo.

Sahanasa fianarana azo atao

Ny fitiavan’ny Mpamonjy antsika

Hevero ny hanomboka ny fotoam-pianarana amin’ny alalan’ny fihirana hira iray mifandray amin’ny fitiavan’i Jesoa Kristy antsika, toy ny “Fantatro fa tia ahy ny Mpamonjy ahy” (music.ChurchofJesusChrist.org). Azo asaina hizara teny na andian-teny manan-danja amin’izy ireo avy ao amin’ilay hira ny mpianatra.

Misy ny fotoana ahafantarantsika sy ahatsapantsika tsirairay ny fitiavan’ Andriamanitra eo amin’ny fiainantsika, fa mety tsy ho fantatsika mihitsy izany amin’ny fotoana sasany. Alaovy sary an-tsaina hoe miresaka amina namana iray izay nilaza taminao ianao fa tsy azony antoka ny fitiavan’ Andriamanitra azy.

• Inona no mety hozarainao avy ao amin’ny soratra masina ka afaka manampy ny namanao?

• Inona no zavatra niainanao azonao zaraina amin’ny namanao momba ny fomba nahafantaranao sy nahatsapanao ny fitiavan’ny Ray any An-danitra sy i Jesoa Kristy?

Omeo fotoana ao am-pianarana ny mpianatra mba hanaovany izao manaraka izao. Asao hirakitra an-tsoratra ny sasany amin’ny eritreritra na fanontanian’izy ireo ao amin’ny diary fandalinany ny mpianatra ary hitady valiny mandritra ny lesona.

Saintsaino ny fahatsapanao manokana momba ny fitiavan’ Andriamanitra anao, ao anatin’izany ny fanontaniana na fanahiana mety hanananao. Rehefa mandalina ianao, dia mitadiava fahamarinana izay afaka manampy anao hahatakatra sy hahatsapa tsara kokoa ny fitiavan’ny Ray any An-danitra sy i Jesoa Kristy anao.

Nampianatra momba ny fitiavan’ny Mpamonjy antsika i Nefia

Ao amin’ny 1 Nefia 19, i Nefia dia naminany momba ny fiainan’i Jesoa Kristy amin’ny hoavy sy ny iraka hataony. Vakio ny 1 Nefia 19:7–10, hitadiavana ny zavatra nampianarin’i Nefia momba ny fomba handraisana an’i Jesoa Kristy mandritra ny androny etỳ an-tany sy ny antony mahatonga Azy ho vonona hatao toy izany.

• Inona no teny na andian-teny nanan-danja taminao tao amin’ireo andininy ireo? Nahoana?

• Ahoana no ahafahan’ny fahatakarana ny fampianarana ao amin’ireo andininy ireo miantraika amin’ny fahatsapanao momba ny Ray any An-danitra sy i Jesoa Kristy?

Fintino ity andiam-pehezan-teny manaraka ity na manasà mpianatra iray hizara izany amin’ny iray kilasy.

Rehefa avy nirakitra an-tsoratra ireo faminaniany manokana momba an’i Jesoa Kristy i Nefia, dia nizara faminaniana avy amina mpaminanin’ny Testamenta Taloha, i Isaia, momba ny fampielezana sy ny fanangonana an’i Isiraely. Ireo faminaniana ireo dia nanan-danja tamin’i Nefia sy ny fianakaviany izay niparitaka niala avy tany Jerosalema tanindrazany noho ny faharatsian’ny olona nipetraka tamin’izany faritra izany. Ireo faminanian’i Isaia dia nilaza fa maro amin’ireo Isiraelita no hahatsapa ho hadinon’ny Tompo any am-pielezan’izy ireo.

Vakio ny 1 Nefia 21:14–16 ary tadiavo ny tenin’ny Tompo tamin’ireo izay mety hahatsapa ho hadino.

Raha mila fanampiana amin’ilay andian-teny hoe “ny mandanao dia eo anatrehako mandrakariva” ny mpianatra (1 Nefia 21:16), dia azonao atao ny manazava fa io andian-teny io dia milaza fa mijery mandrakariva avy any ambony ny Tompo ary miaro ny olony.

• Ahoana no fahitanao ny fitiavan’ny Mpamonjy miseho amin’ireo andininy ireo?

• Inona no fahamarinana azonao lazaina momba an’i Jesoa Kristy miainga amin’ny zavatra nianaranao hatreto?

  Fahamarinana iray mety ho hitan’ny mpianatra ny hoe tia antsika ny Tompo ary tsy hanadino antsika mihitsy. Hevero ny hanoratra izany eny amin’ny solaitrabe.

• 1 Nefia 22:9–12

• 1 Nefia 22:24–25

• 3 Nefia 22:7–8

• Inona avy no toe-javatra mety hahasarotra amin’ny olona sasany ny hino io fahamarinana io?

• Inona no afaka manampy antsika hahafantatra sy hahatsapa kokoa ny fitiavan’i Jesoa Kristy antsika?

Ny fitiavan’ny Mpamonjy dia miseho amin’ny alalan’ny fahavononany hanangona olona ho ao Aminy

Naely patrana foana ny vahoakan’i Isiraely fahiny isaky ny nijanona tsy nanompo an’i Jehovah ka nanapaka ny fanekempihavanana sy ny didin’ Andriamanitra (jereo ny 2 Nefia 6:10–11; 10:3–6). Ny vahoakan’i Isiraely dia voangona rehefa manatona an’i Kristy, manaiky ny filazantsarany amin’ny alalan’ny batisa ary mitandrina ny didiny izy ireo. Nampanantena an’i Isiraely niely patrana ny Tompo fa tsy hanadino azy ireo ary hanangona azy ireo any Aminy amin’ny andro farany (jereo ny 1 Nefia 15:13–14; 2 Nefia 6:11; 9:1–2; 10:7–8).

Halalino ny lohatenin’ny toko ao amin’ny 1 Nefia 21 sy 22 mba hahatakarana tsara kokoa ny zavatra aminanian’i Isaia sy ny fampianarana ao amin’ireo toko ireo.

Halalino ireto andalan-tsoratra masina momba ny fanangonana an’i Isiraely amin’ny andro farany manaraka ireto. Jereo tsara ny teny na andian-teny izay milaza ny fitiavan’ny Tompo ny olony.

Hevero ny fomba hampandraisana anjara ny mpianatra amin’io sahanasa fianarana io. Fomba iray azo atao ny manoratra ny toko sy andininy tsirairay amina karatra kely fandraisana an-tsoratra misaraka na tapaka taratasy mba ho ampy ho an’ny mpianatra tsirairay ao amin’ny kilasy. Asao handalina ny andininy eo amin’ny taratasiny ny mpianatra, hamantatra ny zavatra hataon’ny Tompo hanangonana an’i Isiraely, ary avy eo dia hanakalo ny taratasiny amin’ny mpiara-mianatra aminy. Afaka manakalo taratasy imbetsaka ny mpianatra.

• 1 Nefia 22:9–12

• 1 Nefia 22:24–25

• 3 Nefia 22:7–8

• Inona no fampanantenana nataon’ny Tompo ao amin’ireo andininy ireo? Ahoana no anehoan’ireo fampanantenana ireo ny fitiavany ny olona rehetra?

• Inona avy no ohatra azonao eritreretina eo amin’ny fiainanao na ny fiainan’ny hafa izay nanangonan’ny Tompo olona ho ao Aminy?

Asao hizara ny fahatsapany, ny zavatra efa niainany ary ny fijoroana ho vavolombelona ananany ny mpianatra. Ijoroy ho vavolombelona amin’ny mpianatra ny fitiavan’i Jesoa Kristy azy ireo tsirairay avy sy ny olona rehetra eo amin’izao tontolo izao.

Fanamarihana sy fampahalalana voarakitra

Rehefa manota ve aho dia tsy mendrika ny fitiavan’ Andriamanitra?

Ny Rahalahy Bradley R. Wilcox ao amin’ny Fiadidian’ny Zatovolahy Maneran-tany dia nampianatra toy izao:

Ny Rahalahy Bradley R. Wilcox

Tsarovy fa azo atao tsara ny miova, ny fibebahana dia dingana arahina, ary ny fahamendrehana dia tsy midika hoe tsy fisiana kilema. Fa ny zava-dehibe indrindra dia izao, tsarovy fa Andriamanitra sy i Kristy dia vonona hanampy antsika izao dieny izao. …

Maro dia maro tokoa no efa voaratra noho ny fifandraisana izay mihenjana sy tapaka hany ka sarotra ho azy ireo ny hino ny fangorahan’ Andriamanitra sy ny fahari-pony. Sarotra amin’izy ireo ny mahita an’ Andriamanitra araka ny maha-Izy Azy—Ray be fitiavana izay manampy antsika amin’izay tena ilaintsika ary mahafantatra ny fomba “hanomezana zavatra tsara ho an’ireo izay mangataka Aminy” [3 Nefia 14:11]. Tsy loka fotsiny ho an’ireo izay mendrika ny fahasoavany. “Fanampiana masina” izay omeny ka manampy antsika ho lasa mendrika izany. Tsy valisoa fotsiny ho an’ny olo-marina izany. Ny “fanafiana tanjaka” omeny antsika no manampy antsika ho lasa olo-marina [Dieter F. Uchtdorf, “Ny fanomezam-pahasoavan’ny famindrampo,” Liahona, mey 2015, 107]. Tsy hoe mandeha mankany amin’ Andriamanitra sy i Kristy fotsiny isika. Miara-mandeha amin’ Izy Ireo isika. (Bradley R. Wilcox, “Ny fahamendrehana dia tsy midika hoe tsy fisiana kilema,” Liahona, nôv. 2021, 62, 67)

Nahoana no ampitahain’i Kristy amina reny ny tenany?

Nampianatra toy izao ny Loholona Dale G. Renlund ao amin’ny Kôlejin’ny Apôstôly Roambinifolo:

Ny Loholona Dale G. Renlund

Nanontany i Jehovah hoe: “Fa moa mety manadino ny zanany minono va ny vehivavy ka tsy hanana fangorahana ny zanakalahy naloaky ny kibony?” Araka ny tsy mampitombina ny hanadinoan’ny reny be fitiavana ny zanany madinika, dia nanambara i Jehovah fa vao mainka mafy orina kokoa noho izany ny fanoloran-tenany. Nilaza izy hoe: “Eny, mety manadino izy kanefa Izaho tsy hanadino anao. … Indro efa vitako tombokavatsa eo amin’ny felatanako ianao; ny mandanao dia eo anatrehako mandrakariva” [1 Nefia 21:15–16]. Noho i Jesoa niaritra ilay sorona tsy misy fetra ho fanavotana dia mahatakatra tsara ny zavatra tsapantsika Izy [jereo ny Almà 7:11–13]. Fantany foana ny amintsika sy ny toe-javatra misy antsika. (Dale G. Renlund, “Zavatra tsy rariny mahasendaotra,” Liahona, mey 2021, 43)

Ahoana no ahafahantsika mahafantatra ny fitiavan’ Andriamanitra antsika?

Ny Rahavavy Susan H. Porter ao amin’ny Fiadidian’ny Kilonga Maneran-tany dia nampianatra toy izao:

Ny Rahavavy Susan H. Porter

Ny fitiavan’ Andriamanitra dia tsy hita ao amin’ireo toe-javatra iainantsika, fa ao amin’ny fanatrehany eo amin’ny fiainantsika. Tsapantsika ny fitiavany rehefa mahazo hery mihoatra ny ananantsika isika ary rehefa mahatsapa fiadanana, fankaherezana ary fitarihana avy amin’ny Fanahiny. Misy fotoana, sarotra ny hahatsapana ny fitiavany. Afaka mivavaka isika mba hisokatra ny masontsika ka hahita ny tanany eo amin’ny fiainantsika sy hahita ny fitiavany amin’ny hatsaran’ireo zavatra nohariany. (Susan H. Porter, “Fitiavan’ Andriamanitra: Ny mampiravoravo indrindra ny fanahy,” Liahona, nôv. 2021, 35)

Sahanasa fianarana fanampiny

1 Nefia 19:18–19. Tanjona lehiben’ny Bokin’i Môrmôna

Ao amin’ny 1 Nefia 19:18–19, i Nefia dia nanazava ny tanjony voalohany tamin’ny famoronany ny rakitsorany. Hevero ny hanasa ny mpianatra hamaky ireo andininy ireo ary hitady ny zavatra nampianarin’i Nefia momba ny antony namoronany ny rakitsorany.

Hevero ny hampiasa ireo andininy ireo hanampiana ny mpianatra hahatakatra fa ny famakiana ny soratra masina dia fomba mahery vaika hitadidiana an’i Jesoa Kristy Mpamonjy isan’andro. Hevero ny hametraka ny iray na ny maromaro amin’ireto fanontaniana manaraka ireto ao anatin’ny fifanakalozan-kevitra:

• Ahoana no anampian’ny Bokin’i Môrmôna antsika hahatsiaro an’i Jesoa Kristy?

• Mieritrereta fotoana nahatsapanao ho akaiky kokoa ny Mpamonjy noho ny fandalinanao soratra masina. Inona no fahasamihafana nentin’izany tamin’ny andronao na ny fijoroana ho vavolombelona anananao?

• Inona no fiovana tsapanao fa tokony hataonao amin’ny fandalinanao manokana mba hahafahanao mahatsiaro tsara kokoa an’i Jesoa Kristy Mpamonjy?

Sahanasa fampiharana

Amin’ny famaranana ny lesona, dia hevero ny hizara ity teny nambaran’ny Loholona Gerrit W. Gong ao amin’ny Kôlejin’ny Apôstôly Roambinifolo manaraka ity: “Manasa antsika ny Mpamonjy hahatsiaro Azy mandrakariva, tahaka ny hahatsiarovany antsika mandrakariva” (“Tsarovy mandrakariva Izy,” Liahona, mey 2016, 110).

Asao hihevitra ireo safidy azon’izy ireo iniana atao mba hahatsiarovana kokoa ny Ray any An-danitra sy i Jesoa Kristy mandritra ny andro na ny herinandron’izy ireo ny mpianatra.

1 Nefia 22:15–28. “Tsy mila matahotra ny marina”

Mety hahazo tombony amin’ny fanaovana fifanakalozan-kevitra momba ireo fampianaran’i Nefia ao amin’ny tapany faharoa amin’ny 1 Nefia 22 ny mpianatra. Hevero ny hangataka ny mpianatra hifanakalo hevitra momba ireo antony mahatonga ny olona sasany hahatsapa ho matahotra ireo zava-mitranga amin’ny andro farany. Hazavao fa i Nefia dia namarana ny bokiny voalohany tamin’ny alalan’ny fizarana fampianarana izay afaka manome fanantenana ho an’ny marina izay miaina amin’ny andro farany.

Asao hamaky ny 1 Nefia 22:15–28 ny mpianatra, ka hitady ireo fampianarana izay afaka manampy antsika hahatsapa fanantenana sy handresy ny tahotra momba ny fiainana amin’ny andro farany. Asao hizara ny eritreriny sy ny hevi-baovao ananany ny mpianatra.