2 Nefi 2:17–26

“Shëlbuar nga Rënia”

A e ke pyetur ndonjëherë veten se si mund të ndikojnë ende tek ti zgjedhjet që bënë Adami dhe Eva mijëra vjet më parë? Lehi u dha mësim fëmijëve të tij për rrjedhojat e Rënies së Adamit dhe Evës dhe se me Shpëtimtarin ne mund t’i kapërcejmë të gjitha sfidat e vdekshmërisë. Ky mësim mund të të ndihmojë t’i vlerësosh më shumë Shpëtimtarin dhe Shlyerjen e Tij ndërsa e kupton Rënien e Adamit dhe Evës.

Ndihma ndaj nxënësve që të zhvillojnë aftësinë për t’i diskutuar me të tjerët bindjet për ungjillin. Nxënësit e rritin kuptueshmërinë e tyre kur e shpjegojnë ungjillin. Krijoni një mjedis ku nxënësit të ndihen të lirshëm që t’ua tregojnë të tjerëve atë që kuptojnë për të vërtetat e ungjillit.

Përgatitja e nxënësve: Merreni parasysh t’i ftoni nxënësit të lexojnë nenin e dytë të besimit dhe të mendojnë se si do t’ia shpjegonin atë dikujt tjetër. Ata mundet edhe t’u kërkojnë një apo dy njerëzve tek të cilët kanë mirëbesim, që t’iu tregojnë si e kanë kuptuar nenin e dytë të besimit.

Kjo përgatitje mund të përdoret në fillim të mësimit ose kur nxënësit tregojnë atë që dinë rreth Rënies së Adamit dhe Evës.

Veprimtari të Mundshme të të Mësuarit

Kuptueshmëria çon drejt vlerësimit

Përsiati pyetjet vijuese:

• Në një shkallë nga 1 te 10 (ku 1 është “aspak” dhe 10 është “tërësisht”), sa ndien se e kupton dhe e vlerëson Shpëtimtarin Jezu Krisht dhe flijimin e Tij për ty? Përse?

Jepuni nxënësve kohë të mjaftueshme që t’i përsiatin pyetjet e mëparshme përpara se të vazhdoni më tutje. Pastaj ftojini ata të japin përgjigje për pyetjen e radhës:

• Po të të pyeste dikush se çfarë duhet të bëjë ai ose ajo për ta kuptuar dhe vlerësuar Shlyerjen e Jezu Krishtit, çfarë do t’i thoshe?

Plaku Xhefri R. Holland, i Kuorumit të Dymbëdhjetë Apostujve, vuri në dukje një hap të nevojshëm për ta kuptuar më mirë Shlyerjen e Shpëtimtarit. Mund të duash të shikosh materialin filmik “Ku Drejtësia, Dashuria e Mëshira Takohen” nga kodi kohor 6:51 deri në 7:26 ose të lexosh thënien vijuese:

“E vërteta e thjeshtë është që ne nuk mund ta kuptojmë tërësisht Shlyerjen dhe Ringjalljen e Krishtit dhe ne nuk do ta vlerësojmë siç duhet qëllimin e pashoq të lindjes së Tij apo të vdekjes së Tij … pa e kuptuar se pati një Adam dhe një Evë të mirëfilltë, të cilët u larguan nga një Eden i mirëfilltë, me të gjitha pasojat që rënia i mbarti me vete.” (Xhefri R. Holland, “Ku Drejtësia, Dashuria e Mëshira Takohen”, Ensign ose Liahona, maj 2015, f. 105)

Për të të ndihmuar të vlerësosh se sa di tashmë rreth Rënies së Adamit dhe Evës, mendo për pyetjet vijuese:

• Çfarë është Rënia e Adamit dhe Evës?

• Çfarë rrjedhojash pati Rënia për botën? Po për ty?

• Çfarë vendi zë Rënia në planin e Atit Qiellor për shpëtimin?

• Si të ndihmon Rënia ta kuptosh dhe vlerësosh Jezu Krishtin dhe flijimin e Tij për ty?

Ndërsa studion, kërko përgjigje për këto pyetje dhe përsiat se si mund të të ndihmojë të kuptuarit e tyre.

Rrjedhojat e Rënies së Adamit dhe Evës

Paragrafi vijues ka për qëllim t’i ndihmojë nxënësit ta kuptojnë se si ishte Kopshti i Edenit në mënyrë që të mund t’i kuptojnë më thellësisht rrjedhojat e Rënies. Merreni parasysh t’i ftoni nxënësit të tregojnë atë që dinë rreth këtyre ngjarjeve dhe plotësoni çfarëdo hollësi të rëndësishme.

Ndërsa Lehi po përgatitej të vdiste, ai foli gjerë e gjatë me birin e tij, Jakobin, rreth Rënies së Adamit dhe Evës. Adami, Eva dhe të gjitha format e jetës në tokë ekzistonin në një gjendje pavdekësie, nuk i nënshtroheshin ende vdekjes dhe ishin në praninë e Perëndisë. Në atë gjendje, ata nuk mund të sëmureshin ose të vdisnin dhe kopshti u siguronte ushqim pa iu dashur të punonin për ta prodhuar atë. Ata gjithashtu nuk mund të kishin familje. Zoti i paralajmëroi se po ta hanin frutën e pemës së njohjes të së mirës dhe të së keqes, ata përfundimisht do të vdisnin (shih te Moisiu 3:16–17; Abraham 5:12–13). Vendimi i Adamit dhe Evës për ta ngrënë atë frutë dhe pasojat për ta dhe për pjesën tjetër të botës, njihen si Rënia.

Lexo te 2 Nefi 2:19–23 dhe Alma 42:6–9, duke kërkuar pasojat e Rënies. Merre parasysh ta shenjosh atë që gjen.

Mund të jetë e dobishme që t’i vini nxënësit të bashkëpunojnë në grupe të vogla ose të shkruajnë një listë në tabelë si klasë.

Merreni parasysh t’i ftoni nxënësit të përgjigjen për dy pyetjet vijuese në dyshe ose në grupe të vogla. Shpjegoni se këto pyetje janë pyetje për të shprehur një opinion, ndaj nxënësit mund t’i japin mendimet e tyre lirisht dhe të mos shqetësohen a e kanë “përgjigjen e saktë”.

• Si do të ndiheshe po të ishe në vend të Adamit dhe Evës duke i përjetuar këto pasoja?

• A mendon se këto rrjedhoja janë të mira, të këqija apo të dyja? Përse?

Lexo te 2 Nefi 2:24–25 dhe mendo rreth mënyrës se si do t’i përmblidhje këto vargje me vetë fjalët e tua.

2 Nefi 2:25 është një fragment i zotërimit doktrinor. Merre parasysh t’i shenjosh fragmentet e zotërimit doktrinor në mënyrë të dallueshme që të mund t’i gjesh me lehtësi. Do të kesh mundësi në mësimin e ardhshëm që ta ushtrosh zbatimin e doktrinës që jepet mësim në këtë fragment, për një pyetje ose situatë.

Ftojini nxënësit të tregojnë se si do t’i përmblidhnin këto vargje. Shkruajeni në tabelë çdo të vërtetë që ata përmendin. Sa vijon është një shembull i një të vërtete që ata mund të përcaktojnë.

Një e vërtetë që Lehi dha mësim, ishte se Rënia ishte një pjesë thelbësore e planit të Atit Qiellor për lumturinë.

Gjej ca kohë për të reflektuar për arsyen pse Rënia ishte një pjesë thelbësore e planit të Atit Qiellor ndërsa lexon këtë thënie nga Plaku Xhefri R. Holland, i Kuorumit të Dymbëdhjetë Apostujve.

“Rënia ishte pjesë [thelbësore] e planit hyjnor të Atit Qiellor. Pa të, asnjë fëmijë i vdekshëm nuk do t’u lindte Adamit dhe Evës dhe nuk do të kishte pasur familje njerëzore për të provuar kundërshti dhe rritje, liri morale të zgjedhjes dhe gëzimin e ringjalljes, të shëlbimit e të jetës së përjetshme [shih te 2 Nefi 2:22–27; Moisiu 5:11].” (Xhefri R. Holland, “Shlyerja e Jezu Krishtit”, Ensign, mars. 2008, f. 35)

• Pse Rënia ishte një pjesë thelbësore e planit të Atit Qiellor?

Si pjesë e kësaj pyetjeje, mund të doni tʼi vini nxënësit ta shenjojnë dhe diskutojnë frazën “njerëzit janë, që ata të mund të kenë gëzim” te 2 Nefi 2:25. Ju mund të bëni pyetje si ato që vijojnë:

Pse është e rëndësishme të kuptojmë se edhe kur përballemi me pasojat e Rënies, Ati Qiellor sërish dëshiron që ne të ndiejmë gëzim? Çfarë ju mëson kjo për Të?

Ne gjithsesi kemi nevojë për ndihmë

Ndonëse pasojat e Rënies janë pjesë e planit të Atit tonë Qiellor dhe kanë për qëllim të na ndihmojnë të përparojmë, ne nuk mund të ndiejmë gëzim të vërtetë pa ndihmë hyjnore.

Mund të doni tʼi renditni në tabelë shkrimet e shenjta më poshtë dhe tʼi vini nxënësit tʼi studiojnë në heshtje dhe tʼi përsiatin ato me kujdes.

Lexo me kujdes te 2 Nefi 2:26, duke kërkuar se si do të jetë e mundur tʼi kapërcejmë rrjedhojat e Rënies dhe të ndiejmë gëzim. Pastaj lexo te Moisiu 5:10–11, duke vënë re se cilat të vërteta bënë që Adami dhe Eva të gëzoheshin.

• Çfarë mësove?

• Si mendon, pse u gëzuan Adami dhe Eva pasi mësuan rreth Rënies dhe Shlyerjes së Jezu Krishtit?

Pasi të flasin nxënësit, ata mund tʼu rikthehen katër pyetjeve për vlerësimin e vetes nga fillimi i mësimit dhe të shohin se sa mirë mund tʼu përgjigjen atyre tani. Nëse është e nevojshme, përsëriteni cilindo material në mësim për tʼi ndihmuar në sqarimin e kuptueshmërisë së tyre. Një mënyrë tjetër për tʼi ndihmuar nxënësit të mendojnë rreth asaj që kanë mësuar në këtë mësim, është të tregoni skenarin vijues dhe tʼi ftoni nxënësit të tregojnë se si do të përgjigjeshin.

Imagjino sikur në një diskutim me një shoqe, ti vë re se ajo nuk e vlerëson Shpëtimtarin ose Shlyerjen e Tij.

• Çfarë njohurie rreth Rënies së Adamit dhe Evës mund ta ndihmonte atë ta vlerësonte Shpëtimtarin dhe Shlyerjen e Tij?

Merreni parasysh të jepni dëshminë tuaj për të vërtetat e dhëna në këtë mësim.

Komente dhe Informacion për Rrethanat

Si duhet të ndihemi rreth faktit që Eva e hëngri frutën?

Presidenti Dallin H. Ouks, i Presidencës së Parë, pohoi:

“Disa të krishterë e dënojnë Evën për veprimin e saj, duke arritur në përfundimin se ajo dhe bijat e saj kanë njëfarë të mete nga kjo. Jo shenjtorët e ditëve të mëvonshme! Ngaqë na u bë e ditur nga zbulesa, ne e kremtojmë veprimin e Evës dhe e nderojmë urtësinë e guximin e saj në episodin e shkëlqyer që quhet Rënie.” (Dallin H. Oaks, “The Great Plan of Happiness”, Ensign, nëntor 1993, f. 73)

Si mund të gjejmë gëzim në një botë të trazuar?

Presidenti M. Rasëll Ballard, i Kuorumit të Dymbëdhjetë Apostujve, pohoi:

“Profeti Lehi dha mësim: ‘[Burrat dhe gratë] janë, që ata të mund të kenë gëzim’ [2 Nefi 2:25]. Ka shumë arsye përse mund të mos kemi paqe, gëzim dhe lumturi në këtë jetë, ku përfshihen varfëria, lufta, fatkeqësitë natyrore dhe pengesat e papritura në punësim, shëndet dhe marrëdhëniet familjare.

Por edhe pse nuk mund t’i kontrollojmë ato forca të jashtme që ndikojnë në jetën tonë këtu në tokë, kur përpiqemi fort për t’u bërë dishepuj besnikë të Zotit Jezu Krisht, ne mund të gjejmë paqe, gëzim dhe lumturi pavarësisht nga shqetësimet e botës që na shtillen. …

… Vëllezër e motra, bëni më të mirën që mundeni të bëni ditë për ditë, dhe përpara se ta merrni vesh, do të arrini të kuptoni se Ati juaj Qiellor ju njeh dhe se Ai ju do. Dhe kur ta merrni vesh këtë – kur ta merrni vesh vërtet – jeta juaj do të ketë qëllim e kuptim të vërtetë dhe ju do të mbusheni me gëzim e paqe.” (M. Rasëll Ballard, “Ungjilli i Vërtetë, i Kulluar dhe i Thjeshtë i Jezu Krishtit”, Ensign ose Liahona, maj 2019, f. 28)

Presidenti Rasëll M. Nelson pohoi:

“Vëllezërit dhe motrat e mia të dashura, gëzimi që ndiejmë, ka të bëjë pak me rrethanat e jetës sonë dhe ka të bëjë plotësisht me përqendrimin e jetës sonë.

Kur përqendrimi i jetës sonë është te plani i Perëndisë për shpëtim … dhe te Jezu Krishti e ungjilli i Tij, ne mund të ndiejmë gëzim pavarësisht nga ajo që po ndodh – apo nuk po ndodh – në jetën tonë. Gëzimi vjen prej Tij dhe për shkak të Tij. Ai është burimi i të gjithë gëzimit. Ne e ndiejmë atë në kohën e Krishtlindjes, kur këndojmë: ‘Botës gëzim, ka ardh’ Zoti’ [‘Botës Gëzim’, Himne, nr. 120]. Dhe ne mund ta ndiejmë gjatë gjithë vitit. Për shenjtorët e ditëve të mëvonshme, Jezu Krishti është gëzim!” (Rasëll M. Nelson, “Gëzimi dhe Mbijetesa Shpirtërore”, Ensign ose Liahona, nëntor 2016, f. 82)

Veprimtari Plotësuese të të Mësuarit

Një fillim ndryshe i mësimit

Merrni parasysh të ftoni disa nxënës që të tregojnë se çfarë nevojitet të bëjë dikush për të kuptuar dhe vlerësuar gjëra të ndryshme si arti, trupi i vet fizik ose prindërit e vet. Pastaj ftojini nxënësit të tregojnë se çfarë nevojitet të bëjë dikush që ta kuptojë dhe vlerësojë Shlyerjen e Jezu Krishtit.

2 Nefi 2:25. Gjetja e gëzimit në këtë jetë

Lehi dha mësim se Zoti dëshiron që ne të ndiejmë gëzim në këtë jetë. Merreni parasysh t’i ndihmoni nxënësit ta përcaktojnë këtë të vërtetë te 2 Nefi 2:25. Për t’i ndihmuar ata të përcaktojnë mënyra për të gjetur gëzim, ftojini të kërkojnë në bisedën “Që Gëzimi Juaj të Jetë i Plotë” nga Presidentja Xhin B. Bingham, Presidente e Përgjithshme e Shoqatës së Ndihmës (Ensign ose Liahona, nëntor 2017, f. 85–87). Mund ta ndani klasën në tri grupe dhe t’i caktoni çdo grupi të lexojë një nga tri sugjerimet e saj për gjetjen e gëzimit. Më pas, diskutojeni atë që lexuan nxënësit, dhe ftojini ata të bëjnë një plan për të vepruarit me besim sipas asaj që mësuan. (Shënim: Nxënësit mund të kenë një mundësi tjetër për të studiuar rreth gjetjes së gëzimit në këtë jetë kur studiojnë te 2 Nefi 3–5.)

Një material filmik i mundshëm

Nëse do të ishte e dobishme, shfaqni materialin filmik “Ku Drejtësia, Dashuria e Mëshira Takohen” nga kodi kohor 0:16 deri në 6:30. Në këtë material filmik, Plaku Xhefri R. Holland, i Kuorumit të Dymbëdhjetë Apostujve, tregon historinë e një djali që i shpëton jetën të vëllait gjatë ngjitjes në mal. Plaku Holland e krahason atë me nevojën tonë për Shlyerjen e Jezu Krishtit.